མཚོ་སྔོན་གྱི་ཞོད་འགོག་བྱ་བའི་ཉམས་མྱོང་དང་བྱེད་ཐབས་རྒྱལ་ཡོངས་སུ་ཁྱབ་གདལ་བཏང་།

ད་ལོའི་ཞོད་དུས་སུ།  རྙོག་འཛིང་ཛ་དྲག་ཆེ་བའི་ཞོད་འགོག་ཐན་འགོག་གནས་བབ་ལ་དམིགས་ཏེ།  ཞིང་ཆེན་ཡོངས་ཀྱི་གོང་འོག་ཚང་མས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཞོད་འགོག་རྒུད་སྐྱོབ་ཐད་གནང་བའི་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་ལག་བསྟར་བྱས་པ་དང་།  རྒྱལ་ཁབ་ཞོད་འགོག་ཐན་འགོག་སྤྱི་ཁྱབ་བཀོད་འདོམས་པུའུ་དང་འཕྲལ་བསྟུན་དོ་དམ་པུའུ། ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་བྱ་བའི་བཀོད་སྒྲིག་དོན་འཁྱོལ་ནན་མོ་བྱས་ཤིང་།  མི་དམངས་བླ་ན་མེད་པ་དང་ཚེ་སྲོག་བླ་ན་མཐོ་བ་རྒྱུན་འཁྱོངས་བྱས་པ་མ་ཟད།  ཚད་མཐའི་བསམ་ཕྱོགས་ལ་ཤུགས་བསྣན་པ་དང་།   ཞོད་འགོག་འགན་འཁྲི་སྣ་ཚོགས་དོན་འཁྱོལ་བྱེད་རྒྱུ་དམ་འཛིན་དང་། ཞོད་འགོག་བཀོད་འདོམས་ལམ་ལུགས་དང་ལམ་སྲོལ་གསར་གཏོད་འཐུས་ཚང་དུ་བཏང་ལ།   ཞོད་འགོག་ཐན་འགོག་གི་བྱ་བ་སྣ་ཚོགས་གཅིག་འདོམས་སྒོས་ལེགས་པོར་བསྒྲུབས་ནས། ཟླ9པའི་ཚེས30ཉིན་ཞོད་འགོག་བྱ་བ་བདེ་བླག་ངང་མཇུག་བསྒྲིལ་བ་དང་།  འབྲེལ་ཡོད་ཉམས་མྱོང་དང་བྱེད་ཐབས་དག་འཕྲལ་བསྟུན་དོ་དམ་པུའུ་ཡིས་དཔེ་མཚོན་ཉམས་མྱོང་དུ་བརྩིས་ནས་རྒྱལ་ཡོངས་སུ་ཁྱབ་གདལ་བཏང་།

ད་ལོའི་ཞོད་དུས་སུ། མཚོ་སྔོན་ཞིང་ཆེན་དུ་ཆར་བ་འབབ་ཚད་ཅུང་ཉུང་བ་དང་།  ཐན་ཞོད་འགྱུར་ལྡོག་གི་ཁྱད་ཆོས་མངོན་གསལ་ཡིན་ལ།   དུས་རིམ་རང་བཞིན་གྱི་ཐན་པ་དང་དུས་ཡུན་ཐུང་ངུའི་ནང་དྲག་ཆར་འབབ་པའི་གནས་ཚུལ་བསྣོལ་མར་བྱུང་།  ཞིང་ཆེན་ཞོད་འགོག་ཐན་འགོག་བཀོད་འདོམས་པུའུ་གཞུང་སྒྲུབ་ཁང་གིས་འགག་སྒོ་སྔ་སྣུར་དང་འབྱུང་ཁུངས་ནས་སྔོན་འགོག་བྱེད་རྒྱུ་རྒྱུན་འཁྱོངས་བྱས་པ་དང་།  ལྟ་ཞིབ་ཚད་ལེན་སྔོན་བརྡའི་ཐེངས་གྲངས་ཇེ་མང་དུ་བཏང་བ་མ་ཟད། ཆར་ཆུའི་གནས་ཚུལ་ལ་ཞིབ་འཇུག་བརྡར་གཅོད་ཐེངས་མང་བྱས་ཤིང་།   དང་ལེན་གཉིས་ཀྱི་ལམ་སྲོལ་འཐུས་ཚང་དུ་བཏང་སྟེ་གནད་ལ་འཁེལ་བའི་སྒོ་ནས་འགན་ཁུར་མི་སྣ་དང་གནོད་འཚེའི་ཉེན་ཁ་ཡོད་པའི་མང་ཚོགས་ལ་སྔོན་བརྡ་བཏང་། ཞིང་ཆེན་རིམ་པའི་ལྟ་སྐུལ་ཞིབ་བཤེར་ཚན་ཆུང་བཙུགས་ཏེ་སྐོར་ཐེངས་མང་པོའི་ཕྱོགས་ཡོངས་ལ་ཁེབས་པའི་ལྟ་སྐུལ་ཞིབ་བཤེར་བྱ་བ་སྤེལ་ནས་རྙེད་པའི་གནད་དོན་ལ་རེ་རེ་བཞིན་གནས་ཚུལ་ཕྱིར་ལྡོག་དང་དག་ཐེར་བཅོས་སྐྱོང་སོགས་ཀྱི་བྱེད་ཐབས་ལག་བསྟར་བྱས་པ་དང་།   ཆུ་ལོག་འབྱུང་སླ་བའི་གནས་དང་ཆུ་མཛོད་རགས་ཆེན།   ཆུ་དང་འབྲེལ་བ་ཡོད་པའི་ལྗོངས་ཁུལ་སོགས་གནས་གཙོ་བོར་དམ་པོར་དམིགས་ཤིང་།   ཉེན་ཁའི་མངོན་མེད་རྐྱེན་ངན་གཙང་སེལ་ལ་སྐུལ་འདེད་བཏང་སྟེ། ཚད་ཆེ་བའི་སྒོ་ནས་གནོད་འཚེ་མ་བྱུང་བའི་སྔོན་དུ་ཉེན་ཁ་ཐག་གཅོད་བྱས།  སྐོར་ཐེངས12ཀྱི་ས་ཁོངས་རང་བཞིན་གྱི་དྲག་ཆར་འབབ་པའི་བརྒྱུད་རིམ་ལ་གོ་རིམ་ལྡན་པའི་ངང་ཁ་གཏད་འཇལ་བ་དང་།  དུས་རིམ་རང་བཞིན་གྱི་ཐན་སྐྱོན་གནས་ཚུལ་ནུས་ལྡན་ངང་ཐག་གཅོད་བྱས་ལ།  གནོད་འཚེའི་གྱོང་གུན་དེ་ལོ་སྔོན་མ་དང་བསྡུར་ན་ཚད་ཆེན་པོས་ཇེ་ཉུང་དུ་སོང་ནས་ཞོད་འགོག་ཐན་འགོག་བྱ་བར་གྲུབ་འབྲས་ལེགས་པོ་བླངས།

མཚོ་སྔོན་ཞིང་ཆེན་ཞོད་འགོག་ཐན་འགོག་བཀོད་འདོམས་པུའུ་ཡིས་སྔ་གཞུག་ཏུ་ཞོད་འགོག་ཉེན་གཡོལ་གྱི་ལྔ་ཅན་ལྔའི་བྱ་བའི་བྱེད་ཐབས་དང་།  ཞོད་འགོག“1235”བཀོད་འདོམས་བྱ་བའི་ལམ་སྲོལ། དེ་བཞིན་གྲོས་མོལ་བརྡར་གཅོད། བཀོད་གཏོང་བྱ་བའི་མཛུབ་ཁྲིད་བཅས་ཕྱིར་བཏོན་པ་དང་།  ལྟེ་བ་གཅིག་གི་གཅིག་འདོམས་དང་ལམ་ཐིག་གཉིས་ཀྱི་ཞིབ་བཤེར།  གསལ་ཐོ་གསུམ། བྱེད་ཐབས་ལྔ་བཅས་ཀྱི་བཀོད་འདོམས་སྒྲོམ་གཞི་བསྐྲུན་ནས། ཞིང་ཆེན་དང་གྲོང་ཁྱེར། རྫོང་བཅས་རིམ་པ་གསུམ་གྱི་གྲོས་མོལ་བཀོད་གཏོང་ཚད་ལྡན་ཅན་གྱི་འཁོར་སྐྱོད་མངོན་འགྱུར་བྱས། དྲག་ཆར་དང་ཐོལ་བྱུང་གི་ཆུ་ལོག་དང་འདམ་རུད་གནས་ཚུལ་ལ་ཁ་གཏད་དེ། དུས་ཐོག་ཏུ་འཕྲལ་བསྟུན་དང་ལེན་བྱེད་ཐབས་ལག་བསྟར་བྱས་པ་དང་།   “སྒོ་རྒྱག་པ་དང་མཚམས་འཇོག་པ། ཕྱིར་འཐེན་བྱེད་པ། གནས་སྤོ་བ།  སྐོར་ཞིབ་བྱེད་པ”བཅས་ཀྱི་བྱེད་ཐབས་དོན་འཁྱོལ་ནན་མོ་བྱས་ཤིང་། གྲངས་རིག་ཞོད་འགོག་མ་ལག་གི་དུས་ཐོག་སྔོན་བརྡ་དང་སྔོན་ལ་གནས་སྤོ་བྱེད་པར་བརྟེན་ནས། ཉེན་ཁ་མགྱོགས་མྱུར་སྒོས་སྔོན་འགོག་ཚོད་འཛིན་བྱེད་པ་དང་མང་ཚོགས་བདེ་འཇགས་ངང་ཉེན་གཡོལ་བྱེད་པ་མངོན་འགྱུར་བྱས།