ན་གོར་མོའི་སྤུས་ལེགས་ཞིང་ཕྱུགས་ཐོན་རྫས་ཟི་ལིང་དུ་ཐོན།

ཟླ10པའི་ཚེས1ཉིན། ཁུ་ནུ་འདབས་སུ་ནོར་ལུག་བཟང་། མཐོ་སྒང་ལེགས་རྫས་དབྱར་གྲོང་བརྒྱན་ཞེས་པའི་ན་གོར་མོ་གྲོང་ཁྱེར་ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་དྲིལ་སྒྲོག་འོས་སྦྱོར་བྱེད་སྒོ་དེ། ཟི་ལིང་ཧའེ་ཧུའུ་ཝན་ཏ་ཐང་ཆེན་དུ་འགོ་བརྩམས་ཤིང་། གཅིག་བསྡུས་སྒོས་ན་གོར་མོའི་སྤུས་ལེགས་ཞིང་ཕྱུགས་ཐོན་རྫས་དང་ཁྱད་ལྡན་གཟུགས་འདས་རིག་གནས་ཤུལ་བཞག་འོས་སྦྱོར་བྱས་ཏེ། རྒྱལ་སྟོན་དུས་ཆེན་ལ་འཚོ་བའི་རང་མདངས་སྣུམ་པོས་རབ་ཏུ་བརྒྱན།

ན་གོར་མོའི་ས་གནས་ཀྱི་ཁེ་ལས29ཡིས་སྤུས་ལེགས་ཞིང་ཕྱུགས་ཐོན་རྫས་སྣ་ཁ120དང་། གཟུགས་འདས་རིག་གནས་ཤུལ་བཞག་གི་རིག་གནས་གསར་གཏོད་ཐོན་རྫས90ལྷག་བསྣམས་ནས་ཡོང་། ཡུལ་དངོས་ཀྱི་འགྲེམ་གནས་གྲལ་དག་པོར་བསྒྲིགས་ཡོད་ཅིང་། ཁུ་ནུ་ཕྱུགས་རའི་སྐམས་ཤ་དང་། སོག་པོའི་ལུག་ཤ་སྤུས་ལེགས། འཕང་འབྲས་ཉིང་བཅུད། ལི་གྲོ། སྟར་ཁུ་སོགས་ལས་སྣོན་ལེགས་པོར་བྱས་པའི་ཐོན་རྫས་ཀྱིས་མིག་ཟུང་འཁྲུལ་དུ་བཅུག  སོག་པོའི་ལག་བཟོས་གྱོན་གོས་དང་། གཙགས་དྲུབ། སྒྲ་སྙན་རྟ་མགོ་སོགས་གཟུགས་འདས་རིག་གནས་ཤུལ་བཞག་གི་རིག་གནས་གསར་གཏོད་ཐོན་རྫས་ཡིད་འོང་ལྟ་ན་སྡུག་པས། གྲོང་མི་འགྲུལ་བ་མང་པོའི་མིག་དབང་ཡོངས་སུ་འཕྲོག  ཞིམ་ཟས་རོལ་མྱོང་ཁུལ་དུ་མི་ཚོགས་མང་པོ་འདུས་ཤིང་། ལུག་ཤ་བུམ་བསྲེགས་ཀྱི་ཞིམ་མངར་འཐུལ་བས། གྲོང་མི་རྣམས་ཀྱིས་གྲལ་སྒྲིག་སྟེ་རོལ་མྱོང་བྱས། ཡུལ་གཞན་གྱི་འགྲུལ་བ་མང་པོས་ས་ཚིགས་གཅིག་ཏུ་མཐོ་སྒང་ཁྱད་རྫས་ཉོ་སྡུད་བྱས་ནས། ན་གོར་མོའི་ཁྱད་ལྡན་ལེགས་རྫས་ཁྱིམ་དུ་ཁྱེར་ནས་གཉེན་ཉེར་ལེགས་སྐྱེས་འབུལ་བྱར་གྱུར།

ཉེ་བའི་ལོ་འགའི་རིང་། ན་གོར་མོས་མཐོ་སྒང་གི་དག་གཙང་སྐྱེ་ཁམས་ཀྱི་དགེ་མཚན་ལ་རྐང་བཙུགས་ཏེ། ལྗང་མདོག་སྐྱེ་ལྡན་ཞིང་ཕྱུགས་ཐོན་ལས་ཟབ་སྤེལ་བྱས་ཤིང་། སྟོབས་ཤུགས་ཡོད་རྒུས་ཞིང་ཆེན་ཡོངས་ཀྱི་ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་ཕྱིར་གཏོང་གནས་འཛུགས་སྐྲུན་བྱེད་པར་རམ་འདེགས་བྱས། མིག་སྔར། གྲོང་ཁྱེར་ཡོངས་ཀྱི་མུའུ་བྱེ་བ་དྲུག་དང་ས་ཡ་གཉིས་ལྷག་གི་རྩྭ་ཐང་དུ་སྐྱེ་ལྡན་དཔང་ཡིག་བླངས་ཡོད་ཅིང་། ཁེ་ལས17གྱི་ཐོན་རྫས93ལ་ལྗང་མདོག་ཟས་རིགས་དཔང་ཡིག་ཐོབ་ཡོད་པ་དང་། བྱེད་པོ་མང་ཤོས་ཀྱི་ཐོན་རྫས་ངོ་མཚར་ཚྭ་འདམ་གཞོང་གི་ལེགས་རྫས་མིང་ཐོ་རུ་ཚུད་ཡོད། ས་གནས་ཀྱི་མུའུ་འབུམ་གཅིག་ཁྲི་གཅིག་སྟོང་གཅིག་གི་འཕང་འབྲས་ཐོན་ལས་ཀྱི་དགེ་མཚན་འབུར་དུ་ཐོན་པས། སྐྱེ་ལྡན་འཕང་འབྲས་ཕྱིར་གཏོང་བྱས་པ་བསྟུད་མར་ལོ་བཅུ་བཞིའི་རིང་ཞིང་ཆེན་ཡོངས་ཀྱི་ཨང་དང་པོར་སླེབས། དུས་མཉམ་དུ། ཁྱད་ལྡན་སྐྱེ་དངོས་ཐོན་ལས་གླིང་གི་སྤུས་ལེགས་ལས་སྣོན་བྱས་པའི་མ་ལག་ལ་བརྟེན་ནས། ན་གོར་མོར་བསྟུད་མར་ཞིང་ཕྱུགས་ཐོན་རྫས་གསར་པ་ཞིབ་འཇུག་གསར་སྤེལ་བྱས་ཏེ། ཁྱིམ་གྲངས་ཁྲི་ཙམ་ལ་ཐོན་ལས་འཕེལ་རྒྱས་ཀྱི་ཁེ་སྤོགས་ལོངས་སྤྱོད་བྱེད་དུ་བཅུག