མཚོ་སྔོན་གྱིས་སྟོན་དགུན་དུས་ཀྱི་ནགས་རྩྭའི་མེ་འགོག་དང་བདེ་འཇགས་ཐོན་སྐྱེད་བྱ་བར་ཡང་བསྐྱར་བཀོད་སྒྲིག་བྱས།

ཟླ10པའི་ཚེས2ཉིན།   མཚོ་སྔོན་ཞིང་ཆེན་ནགས་ལས་དང་རྩྭ་ཐང་ཅུས་ཀྱིས་ནགས་ཚལ་དང་རྩྭ་ཐང་གི་མེ་འགོག་དང་། བདེ་འཇགས་ཐོན་སྐྱེད་བྱ་བར་ཡང་བསྐྱར་བཀོད་སྒྲིག་བྱས་ཏེ།    སྨར་ཁོག་ཆུ་བོའི་ནགས་ལས་ཅུས་དང་རྨ་ལྷོ་བོད་རིགས་རང་སྐྱོང་ཁུལ་དམེ་ཤུལ་ནགས་ར།   མཚོ་ཤར་གྲོང་ཁྱེར་ཧྲུའུ་ཀྲུའུ་ཧོར་རིགས་རང་སྐྱོང་རྫོང་བྱང་རིའི་ནགས་ར། མཚོ་བྱང་བོད་རིགས་རང་སྐྱོང་ཁུལ་མུན་ཡོན་ཧོས་རིགས་རང་སྐྱོང་རྫོང་སེམས་ཉིད་ནགས་ར་སོགས་ཉེན་ཁ་ཆེ་བའི་ས་ཁོངས་བཞི་ལ་དམིགས་ནས་བྱ་བའི་འགན་འཁྲི་ནན་དཀྲི་དང་བཀོད་གཏོང་ཚོད་འཛིན་ཐད་ཀྱི་བྱ་བ་སྣ་ཚོགས་དམ་འཛིན་ཞིབ་ཚགས་བྱས་ཏེ། བདེ་འཇགས་གཏན་འཇགས་ཀྱི་ཚད་མཐའ་མཐའ་གཅིག་ཏུ་བརྟན་སྲུང་བྱས།

མཚོ་སྔོན་ཞིང་ཆེན་གྱིས་ད་ལོའི་སྟོན་དུས་ཀྱི་ནགས་ཚལ་དང་རྩྭ་ཐང་གི་མེ་སྐྱོན་གནས་བབ་ཀྱི་རྙོག་འཛིང་རང་བཞིན་དང་ཛ་དྲག་རང་བཞིན་ལ་ཞིབ་འཇུག་བརྡར་གཅོད་ལེགས་པོ་བྱས་པ་དང་།   ཚད་མཐའི་བསམ་ཕྱོགས་བརྟན་པོ་ཆགས་པར་བྱས་ལ།  ནམ་ཡང་ལྷོད་གཡེང་མི་བྱེད་པའི་འགན་འཁྲིའི་འདུ་ཤེས་ལ་བརྟེན་ནས་བྱ་བ་སྣ་ཚོགས་དམ་འཛིན་བྱས།   ནགས་དཔོན་ལམ་ལུགས་ཀྱི་གཅིག་འདོམས་སྣེ་ཁྲིད་བྱེད་ནུས་འདོན་སྤེལ་གང་ལེགས་བྱས་པ་དང་།    རིམ་པ་སོ་སོའི་ནགས་དཔོན་ལས་ཡུལ་དང་པོར་སྐྱོད་པ་དང་མདུན་གྲལ་བཀོད་འདོམས་བྱེད་པ། ཡུལ་དངོས་སྐུལ་སྒྲུབ་བྱེད་པ་བཅས་ལ་སྐུལ་འདེད་བཏང་ཞིང་།   འགོ་ཁྲིད་ཀྱིས་འགན་གཙང་ལེན་བྱེད་པ་དང་ཡུག་ཁུལ་གྱིས་འགན་གཙང་ལེན་བྱེད་པ།  ས་གནས་ཀྱིས་འགན་གཙང་ལེན་བྱེད་པ་བཅས་ཕྱོགས་ཡོངས་ལ་ཁེབས་པའི་འགན་འཁྲིའི་མ་ལག་འཐུས་ཚང་དུ་བཏང་ལ།   ཁོངས་གཏོགས་ས་ཁུལ་དང་ལས་རིགས་བྱེད་པོའི་སྔོན་འགོག་ཚོད་འཛིན་གྱི་འགན་འཁྲི་དོན་འཁྱོལ་ནན་མོ་བྱས་པ་དང་།  མེ་འགོག་དྲ་མིག་ཅན་གྱི་དོ་དམ་ཇེ་ཞིབ་ཏུ་བཏང་བར་མ་ཟད།   ནགས་ཁུལ་གཙོ་བོ་དང་གནས་ཡུལ་གཙོ་བོ། ཉེན་ཁ་ཆེ་བའི་དུས་མཚམས་བཅས་ལ་དམིགས་ནས་མི་གཏན་འཁེལ་བྱེད་པ་དང་ལས་རྐང་གཏན་འཁེལ་བྱེད་པ། འགན་འཁྲི་གཏན་འཁེལ་བྱེད་པ་བཅས་ཀྱི་ལམ་སྲོལ་དོན་འཁྱོལ་བྱས་ནས། རི་བོར་སྐོར་ཞིབ་བྱེད་མཁན་ཡོད་པ་དང་ནགས་ཁུལ་ལ་དོ་དམ་བྱེད་མཁན་ཡོད་པ།   མེ་སྐྱོན་ཐག་གཅོད་བྱེད་མཁན་ཡོད་པ། འགན་འཁྲི་ཁག་ཁུར་བྱེད་མཁན་ཡོད་པ་བཅས་མངོན་འགྱུར་བྱས།

ལྟ་ཞིབ་ཚད་ལེན་སྔོན་བརྡར་ཤུགས་བསྣན་ནས་རང་འགུལ་ངང་གནམ་གཤིས་དང་འཕྲལ་བསྟུན། མེ་ཟོན་སོགས་སྡེ་ཁག་བར་གྱི་མཉམ་སྒུལ་རོགས་ལས་ལ་ཤུགས་བསྣན་པ་དང་།  གནད་ལ་འཁེལ་བའི་སྒོ་ནས་མེ་སྐྱོན་ཉེན་ཁའི་སྔོན་བརྡའི་ཆ་འཕྲིན་ཁྱབ་བསྒྲགས་བྱས་ལ།   ནགས་རྩྭ་མ་ལག་གི་མེ་སྐྱོན་ཉེན་ཁའི་སྔོན་བརྡ་དང་ལེན་གཏན་འབེབས་དང་དཔེ་བསྡུར་བྱས་ཏེ། རིམ་པ་དགར་བའི་དང་ལེན་ཐག་གཅོད་བྱེད་ཐབས་ཇེ་ཞིབ་ཏུ་བཏང་། མེ་སྐྱོན་འབྱུང་ཁུངས་ལ་དོ་དམ་ཚོད་འཛིན་ནན་མོ་བྱས་ནས་མེ་སྐྱོན་འབྱུང་ཉེན་ཆེ་བའི་དུས་སྐབས་ཀྱི་དོ་དམ་ཚོད་འཛིན་ཚད་གཞི་ཕྱོགས་ཡོངས་ནས་ཇེ་མཐོར་བཏང་སྟེ། མེ་འགོག་ཞིབ་བཤེར་ས་ཚིགས་ཁ་སྣོན་དང་སྐོར་སྲུང་སྟོབས་ཤུགས་ཁ་སྣོན། སྐོར་ཞིབ་ཐེངས་གྲངས་ཇེ་མང་དུ་གཏོང་བ་བཅས་བྱས་པ་དང་།   རི་འགོར་འཛེག་པ་དང་ནགས་ཁུལ་དུ་བསྐྱོད་པར་ཞིབ་བཤེར་ཆོག་མཆན་འགོད་པའི་བྱ་བ་ཚད་ལྡན་དུ་བཏང་བར་མ་ཟད།   ཕྱི་རོལ་དུ་མེ་བཀོལ་བའི་བྱ་སྤྱོད་ལ་དོ་དམ་ཚོད་འཛིན་ནན་མོ་བྱས་ཤིང་།  རྒྱུན་ཆད་མེད་པར་ནགས་ཚལ་དང་རྩྭ་ཐང་གི་མེ་འགོག་ཐད་ཀྱི་མངོན་མེད་རྐྱེན་ངན་གཙང་སེལ་དང་། སྒྲིག་འགལ་ངང་མེ་བཀོལ་བའི་བྱ་སྤྱོད་ལ་ཆེད་དོན་དག་ཐེར་བཅོས་སྐྱོང་བྱེད་པར་སྐུལ་འདེད་བཏང་ལ།  ནགས་ལས་དང་གློག་ཤུགས་སྡེ་ཁག་གིས་མཉམ་དུ་བདེ་འཇགས་སྲུང་སྐྱོབ་བྱེད་པའི་ཆེད་དོན་མཁྲེགས་གཏོར་འགུལ་སྐྱོད་ཏན་ཏིག་གིས་སྤེལ་ཏེ། ནགས་ཚལ་གྱི་མེ་སྐྱོན་འབྱུང་སླ་བའི་དངོས་པོ་གཙང་སེལ་བྱེད་པ་གོ་རིམ་ལྡན་པའི་ངང་སྐུལ་འདེད་བཏང་།