རྒྱལ་སྟོན་སྐབས་སུ་མཚོ་སྔོན་བརྗོད་བྱའི་བརྙན་འཕྲིན་ཟློས་གར《བླ་ཤིང》སྐད་རིགས་མང་པོའི་སྒོ་ནས་བསྟན།

ཟླ9པའི་ཚེས30ཉིན། གསར་འགོད་པས་མཚོ་སྔོན་ཞིང་ཆེན་རྒྱང་སྒྲོག་བརྙན་འཕྲིན་ཅུའུ་ནས་རྒྱུས་ལོན་པ་ལྟར་ན། ཟླ10པའི་ཚེས1ཉིན་ནས་བཟུང་། 《བླ་ཤིང》སྐད་རིགས་མང་པོའི་པར་གཞི་དེ་དུས་ཆེན་གྱི་སྐབས་སུ་གཅིག་བསྡུས་སྒོས་འགྲེམ་སྟོན་བྱས་ཏེ། ཞིང་ཆེན་ཡོངས་ཀྱི་རིགས་སོ་སོའི་མང་ཚོགས་དང་མཉམ་དུ་རྒྱལ་སྟོན་ལ་མཉམ་རོལ་བྱས།

ཟླ9པའི་ཚེས29ཉིན། མཚོ་སྔོན་ཞིང་ཆེན་གྱིས་མཉམ་འབྲེལ་སྒོས་ཕབ་སྐྲུན་བྱས་པའི་དངོས་ཡོད་བརྗོད་བྱའི་བརྙན་འཕྲིན་ཟློས་གར་ཆེན་མོ《བླ་ཤིང》ཞེས་པ་དེ། ཀྲུང་གོའི་བརྙན་འཕྲིན་ཟློས་གར་གསེར་གླག་རྟགས་མ་སྐབས་སོ་གསུམ་པའི་བྱ་དགའ་སྟེར་བའི་མཛད་སྒོ་རུ། རྩེར་སོན་བརྙན་འཕྲིན་ཟློས་གར་དང་། རྩེར་སོན་བརྙན་འཕྲིན་ཟློས་གར་འཁྲབ་གཞུང་། རྩེར་སོན་སྐྱེས་མའི་འཁྲབ་རོགས་བཅས་བྱ་དགའ་ཆེན་པོ་གསུམ་བླངས་ཤིང་། མཚོ་སྔོན་བརྗོད་བྱའི་བརྙན་འཕྲིན་ཟློས་གར་གྱིས་གསེར་གླག་རྟགས་མའི་ཆེས་མཐོའི་གཟི་བརྗིད་བླངས་ཏེ་ལོ་རྒྱུས་རང་བཞིན་གྱི་ཐོད་བརྒལ་མངོན་འགྱུར་བྱས། བརྙན་འཕྲིན་ཟློས་གར་འདིའི་གཟི་བརྗིད་ཀྱི་ཚ་རླབས་ལ་བརྟེན་ཏེ། མཚོ་སྔོན་བརྙན་འཕྲིན་གྱིས་ཟླ10པའི་ཚེས1ཉིན་ནས་བཟུང་། ཉིན་རེའི་ཕྱི་དྲོའི་ཆུ་ཚོད་གཅིག་ནས་བསྟུད་མར་སྤྱི་སྐད་པར་གཞིའི་ལེའུ་དྲུག་རེ་དང་། ཨ་མདོ་བརྙན་འཕྲིན་གྱིས་ཟླ10པའི་ཚེས4ཉིན་ནས་བཟུང་། ཉིན་རེའི་དགོང་མོའི་ཆུ་ཚོད་བརྒྱད་དང་ཕྱེད་ཀའི་སྟེང་ཨམ་སྐད་པར་གཞིའི་ལེའུ་གཉིས་རེ་དང་། ཡུས་ཧྲུའུ་ཁུལ་གསར་འགྱུར་ཕྱོགས་བསྡུས་འཕྲིན་ལམ་གྱིས་ཟླ10པའི་ཚེས1ཉིན་གྱི་དགོང་མོའི་ཆུ་ཚོད་བརྒྱད་དང་སྐར་མ་བཅུའི་སྟེང་ཁམས་སྐད་པར་གཞིའི་ལེའུ་གཉིས་རེ་བཏང་སྟེ། ཞིང་ཆེན་དང་ཁུལ་ཡོངས་ཀྱི་འཕྲིན་ལམ་མང་པོ་ནས་འགྲེམ་སྟོན་བྱས་པ་རེད།

《བླ་ཤིང》ནི་མཚོ་སྔོན་ཞིང་ཆེན་གྱིས་སྟོབས་ཤུགས་ཡོད་རྒུས་ཕབ་སྐྲུན་བྱས་པའི་སྐྱེ་ཁམས་སྲུང་སྐྱོབ་བྱེད་པའི་བརྗོད་གཞིའི་སྤུས་ལེགས་ཐོན་རྫས་ཡིན་ཞིང་། བརྙན་འཕྲིན་ཟློས་གར་འདི་ལོ་སར་སྐབས་སུ་ཀྲུང་དབྱང་བརྙན་འཕྲིན་དང་རྒྱལ་ཡོངས་ཞིང་ཆེན་རིམ་པའི་བརྙན་འཕྲིན་ནས་གསེར་ནག་དུས་མཚམས་སུ་བཏང་བ་དང་། སྔོན་མར་ཧྲང་ཧའེ་བརྙན་འཕྲིན་ཟློས་གར་པའེ་ཡུས་ལན་བྱ་དགའ་སྐབས་སོ་གཅིག་པའི་སྟེང་། རྩེར་སོན་འཁྲབ་ཁྲིད་བྱ་དགའ་དང་། རྩེར་སོན་སྐྱེས་མའི་གཙོ་འཁྲབ་བྱ་དགའ་བླངས་ཤིང་། ད་ཐེངས་ཀྱི་གསེར་གླག་རྟགས་མའི་སྟེང་མིང་འདོན་སྣ་བདུན་དུ་ཚུད་པ་དང་། བྱ་དགའ་ཆེན་པོ་གསུམ་བླངས་པས། ལྟ་མཁན་དང་བསྔགས་བརྗོད་གཉིས་བཟང་མངོན་འགྱུར་བྱུང་། ཞིང་ཆེན་རྒྱང་སྒྲོག་བརྙན་འཕྲིན་ཅུས་ཀྱིས་སྤུས་ཚད་མཐོ་བའི་སྒོ་ནས་ཨམ་སྐད་དང་། ཁམས་སྐད་དུ་བསྒྱུར་སྐྲུན་བྱས་ཤིང་། སྤྱི་སྐད་དང་གྲངས་ཉུང་མི་རིགས་སྐད་ཀྱི་སྣ་མང་ཅན་གྱི་ཁྱབ་སྒྲོག་གྲལ་ཕྲེང་བསྒྲིགས་ཏེ། བརྙན་འཕྲིན་ཟློས་གར་དང་རིག་གནས་ཡུལ་སྐོར་གྱི་མཉམ་འདྲེས་ལམ་བུ་འཚོལ་ཞིབ་བྱས། ད་ཐེངས་འཕྲིན་སྟེགས་མང་པོ་དང་སྐད་རིགས་མང་པོའི་མཉམ་འབྲེལ་འགྲེམ་སྟོན་བརྒྱུད། སྐྱེ་ཁམས་དཔལ་ཡོན་གྱི་འདུ་ཤེས་ཁྱབ་སྒྲོག་བྱས་པ་མ་ཟད། གོམ་གང་མདུན་སྤོས་ཀྱིས་མི་རིགས་མཐུན་སྒྲིལ་ཡར་ཐོན་གྱི་དྲིལ་སྒྲོག་སློབ་གསོ་ཟབ་སྤེལ་བྱས་ནས། སྤྲོ་དགའ་འཆམ་མཐུན་གྱི་དུས་ཆེན་རྣམ་པ་བཟང་པོ་བསྐྲུན།