མཚོ་སྔོན་གྱིས་ཕྱོགས་ཡོངས་ནས་སྟོན་དགུན་དུས་ཀྱི་ནགས་ཚལ་རྩྭ་ཐང་གི་མེ་འགོག་མེ་གསོད་བྱ་བར་བཀོད་སྒྲིག་བྱས།

ཟླ9པའི་ཚེས28ཉིན།  2026ལོའི་མཚོ་སྔོན་ཞིང་ཆེན་གྱི་ནགས་རྩྭའི་མ་ལག་གི་སྟོན་དགུན་དུས་ཀྱི་ནགས་ཚལ་དང་རྩྭ་ཐང་གི་མེ་འགོག་བྱ་བའི་བཀོད་སྒྲིག་ཚོགས་འདུ་བསྡུས།   ད་ལོའི་དགུན་ཁ་དང་སང་ལོའི་དཔྱིད་ཀའི་ཞིང་ཆེན་ཡོངས་ཀྱི་མེ་སྐྱོན་ཉེན་ཁ་ཅུང་ཆེ་བའི་གནས་བབ་ལ་དམིགས་ནས་ཞིང་ཆེན་ཡོངས་ཀྱི་ནགས་རྩྭའི་མ་ལག་གིས་མུ་ཕྲེང་ཡོངས་ཀྱི་མེ་འགོག་མེ་གསོད་ཀྱི་འགན་འཁྲི་ཇེ་དམ་དུ་བཏང་བ་དང་།   ས་མཚམས་རེ་རེར་མི་སྣ་དང་འགན་འཁྲི་གཏན་འཁེལ་བྱས་ཏེ་རི་ལ་ལྟ་མཁན་ཡོད་པ་དང་ནགས་ཚལ་སྲུང་སྐྱོབ་བྱེད་མཁན་ཡོད་པ། མེ་སྐྱོན་སྔོན་འགོག་བྱེད་མཁན་ཡོད་པ། འགན་ལེན་བྱེད་མཁན་ཡོད་པ་བཅས་མངོན་འགྱུར་བྱས་ནས་བློ་བརྟན་འགྱུར་མེད་སྒོས་མཐོ་སྒང་གི་སྐྱེ་ཁམས་བདེ་འཇགས་ཚད་མཐའ་བརྟན་སྲུང་བྱེད་རྒྱུ་རེད། 

ནགས་ཚལ་དང་རྩྭ་ཐང་གི་མེ་འགོག་བྱ་བ་ཡག་པོར་བསྒྲུབ་རྒྱུ་ནི་སྐྱེ་ཁམས་བདེ་འཇགས་ཀྱི་སྤྱི་ཡོངས་དང་འབྲེལ་བ་ཡོད་པས་འགན་འཁྲི་ཧ་ཅང་ལྕི།   ཞིང་ཆེན་ཡོངས་སྟོན་དགུན་དུས་ཀྱི་ནགས་ཚལ་རྩྭ་ཐང་གི་མེ་འགོག་གནན་འགག་དུས་སྐབས་སུ་སླེབས་ལ་ཉེ་ཞིང་།   གནམ་གཤིས་སྡེ་ཁག་གིས་སྔོན་དཔག་དང་ཞིབ་འཇུག་བརྡར་གཅོད་བྱས་པ་ལྟར་ན།   ད་ལོའི་དགུན་ཁ་དང་སང་ལོའི་དཔྱིད་ཀའི་ཞིང་ཆེན་ཡོངས་ཀྱི་ནགས་ཚལ་རྩྭ་ཐང་གི་མེ་སྐྱོན་གནས་བབ་རྙོག་འཛིང་ཆེ་ཞིང་།   ས་ཁུལ་མང་ཆེ་བའི་དྲོད་ཚད་ལོ་སྔོན་མ་དག་གི་དུས་མཉམ་དང་བསྡུར་ན་ཅུང་མཐོ་བ་དང་རླུང་གཡུག་པའི་གནམ་གཤིས་ཅུང་མང་ལ།  མེ་སྐྱོན་འབྱུང་ཉེན་ཆེ་བའི་དུས་ཡུན་ཅུང་ཇེ་རིང་དུ་སོང་ཡོད་པས།    རང་ཞིང་གིས་རིམ་པ་སོ་སོའི་མེ་འགོག་འགན་འཁྲི་ནན་དཀྲི་བྱས་ཏེ་ནགས་དཔོན་རྩྭ་དཔོན་ལམ་ལུགས་ཀྱི་སྣེ་ཁྲིད་ནུས་པ་འདོན་སྤེལ་གང་ལེགས་བྱེད་པ་དང་།  རིམ་པ་སོ་སོའི་ནགས་དཔོན་ལས་ཡུལ་དང་པོ་སོང་ནས་ཡུལ་དངོས་བཀོད་འདོམས་བྱེད་པར་སྐུལ་འདེད་གཏོང་བ།   ཏང་སྲིད་འགན་གཅིག་དང་ལས་གཅིག་འགན་གཉིས།  མཉམ་འཛིན་སྤྱི་འདོམས།  འགན་ཤོར་འགན་འདེད་བཅས་དང་། བདེ་འཇགས་ཐོན་སྐྱེད་ཐད་ཀྱི་དོ་དམ་གསུམ་དང་ངེས་པར་གསུམ་གྱི་བླང་བྱ་དོན་འཁྱོལ་ནན་མོ་བྱེད་པ།   ཁོངས་གཏོགས་ས་ཁུལ་གྱི་འགོ་ཁྲིད་དང་ལས་རིགས་ལྟ་སྐུལ་དོ་དམ། བདག་གཉེར་སྡེ་ཁག་གི་གཙོ་གཞིའི་འགན་འཁྲི། དེ་མིན་གཞི་རིམ་དོ་སྲུང་པ་བཅས་ཕྱོགས་བཞིའི་འགན་འཁྲི་ནན་དཀྲི་བཅས་བྱེད་དགོས།

བཀོད་སྒྲིག་ཚོགས་འདུའི་སྟེང་།  ཕྱོགས་ཡོངས་ནས་ཕྱི་རོལ་གྱི་མེ་སྐྱོན་འབྱུང་ཁུངས་དོ་དམ་ཚོད་འཛིན་ནན་མོ་བྱེད་པ་དང་།   འགག་སྒོ་སྔོན་དུ་སྣུར་བ་དང་འགོ་ཁུངས་ནས་བཅོས་སྐྱོང་བྱེད་རྒྱུ་རྒྱུན་འཁྱོངས་བྱས་ཏེ་ཕྱིར་རོལ་དུ་མེ་བཀོལ་སྤྱོད་བྱེད་པར་ཆོག་མཆན་འགོད་པ་དང་། རི་ཁུལ་དང་ནགས་ཚལ་དུ་སྐྱོད་སྐབས་ཀྱི་དངོས་མིང་ཐོ་འགོད་ལམ་ལུགས་ལག་བསྟར་ནན་མོ་བྱེད་དགོས་ཤིང་།  གནད་འགག་དུས་སྐབས་ལ་དམིགས་ནས་འབྲེལ་ཡོད་སྡེ་ཁག་གིས་མཉམ་འབྲེལ་བྱས་ཏེ་མེ་སྐྱོན་ཐད་ཀྱི་མངོན་མེད་རྐྱེན་ངན་ཞིབ་བཤེར་ནན་མོ་བྱས་ནས་མངོན་མེད་རྐྱེན་ངན་དུས་ཐོག་ཏུ་རྙེད་པ་དང་དུས་བཅད་ལྟར་དག་ཐེར་ལེགས་བཅོས་བྱེད་པ། འགུལ་རྣམ་གཙང་སེལ་བཅས་བྱེད་དགོས་ལ།  དེའི་རྨང་གཞིའི་སྟེང་། ལྟ་ཞིབ་ཚད་ལེན་སྔོན་བརྡ་དང་འཕྲལ་བསྟུན་ཐག་གཅོད་ནུས་པ་ཆེ་རུ་གཏོང་བ་དང་།   མིས་སྔོན་འགོག་དང་ལག་རྩལ་ལ་བརྟེན་ནས་སྔོན་འགོག་བྱེད་པ་ཟུང་འབྲེལ་གྱི་བྱེད་ཐབས་སྤྱོད་པ། ནམ་མཁའ་དང་བར་སྣང་། ས་གཞི་བཅས་གཞི་གཅིག་ཅན་གྱི་ལྟ་ཞིབ་ཚད་ལེན་སྔོན་བརྡའི་མ་ལག་མགྱོགས་མྱུར་ངང་བསྐྲུན་པ། སྐྱེ་ཁམས་དོ་སྲུང་པ་འབུམ་གཅིག་ལྷག་གི་དྲ་མིག་ཅན་གྱི་ས་ངོས་སྐོར་ཞིབ་བྱེད་ནུས་སོགས་འདོན་སྤེལ་བཅས་བྱས་ཏེ་མེ་སྐྱོན་གནས་ཚུལ་སྔ་མོ་ནས་ཤེས་རྟོགས་དང་སྔ་མོ་ནས་སྙན་ཞུ། སྔ་མོ་ནས་ཐག་གཅོད་བཅས་བྱེད་དགོས་པར་མ་ཟད། མེ་སྐྱོན་སྔོན་འགོག་གི་གནད་འགག་དུས་སྐབས་སུ།  ཞིང་ཆེན་ཡོངས་ཀྱི་ཆེད་ལས་རུ་ཁག་ལྔ་དང་ཆེད་ལས་མ་ཡིན་པའི་རུ་ཁག་བརྒྱ་དང་དགུ་བཅུ་ཡིས་ཡུལ་དངོས་ནས་སྔོན་འགོག་དང་སྐོར་སྲུང་བྱས་ཏེ་དངོས་འཐབ་སྦྱོར་བརྡར་ལ་ཤུགས་སྣོན་དགོས་པ་གཏན་འཁེལ་གསལ་བོ་བྱས།