མཚོ་སྔོན་མེ་ཟོན་གྱིས་རོང་འབྲོག་ཁུལ་གྱི་འཕྲལ་བསྟུན་ཐག་གཅོད་ཀྱི“ཆེས་མཇུག་མཐའི་སྤྱི་ལེ་གཅིག ”ཡོངས་འགྲུབ་བྱས།

བསྟུད་མུར་ཉིན་འགའི་རིང་ལ། ཞིང་ཆེན་མེ་ཟོན་རོགས་སྐྱོབ་སྤྱི་ཁྱབ་རུ་ཁག་གིས་མཐོ་སྒང་གི་རོང་འབྲོག་ཁུལ་གྱི་གཞི་རིམ་མེ་ཟོན་བཅོས་སྐྱོང་གི་དོན་དངོས་ལ་རྐང་བཙུགས་ཏེ། ཞིང་ཆེན་ཡོངས་ཀྱི་རིམ་པ་སོ་སོའི་མེ་ཟོན་རོགས་སྐྱོབ་དཔུང་སྡེ་རྩ་འཛུགས་བྱས་ནས། སྡེ་བའི་སྒོ་ར་དང་རྩྭ་ཐང་གི་ཕྱུགས་ར། སྡེ་བ་རིམ་པའི་ཚོང་ཁང་སོགས་སུ་བསྐྱོད་དེ། མེ་ཟོན་བདེ་འཇགས་ཀྱི་དྲིལ་སྒྲོག་སློབ་གསོའི་ལས་འགུལ་ཁྱོན་ཡོངས་ནས་སྤེལ་ཏེ། ཕྱོགས་ཡོངས་ནས་རོང་འབྲོག་ཁུལ་གྱི་མེ་ཟོན་བདེ་འཇགས་ཀྱི་འགོག་སྲུང་འཛིང་རགས་བརྟན་པོ་བསྐྲུན།

བྱ་སྤྱོད་སྤེལ་བའི་རིང་ལ། རིམ་པ་སོ་སོའི་མེ་ཟོན་རོགས་སྐྱོབ་སྡེ་ཁག་གིས་རོང་འབྲོག་ཁུལ་གྱི་གློག་ཤུགས་སྐུད་ལམ་སྒེར་ངོས་ནས་གང་བྱུང་དུ་མཐུད་པ་དང་། ཨོང་ཐབ་ཀྱིས་དྲོད་ལེན་པ། གཟན་རྩྭ་གང་བྱུང་དུ་སྤུངས་ནས་གང་བྱུང་དུ་འཇོག་པ་སོགས་ཉེན་ཁ་ཆེ་བའི་འགལ་རྐྱེན་ལ་དམིགས་ཏེ། རིམ་པ་སོ་སོའི་མེ་ཟོན་རོགས་སྐྱོབ་སྡེ་ཁག་རྩ་འཛུགས་བྱས་ཏེ་སྒོ་རར་བསྐྱོད་ནས་གྲལ་བཤེར་བྱས་པའི་དུས་མཚུངས་སུ། འགལ་རྐྱེན་ངན་པ་དབྱེ་འབྱེད་དང་སྟབས་བདེའི་ཐག་གཅོད་བྱེད་ཐབས་ལག་བརྒྱུད་བྱས་ནས་ཁྲིད།  ཁེར་སྡོད་ལོ་ལོན་དང་གཞིས་སྲུང་ཁྱིམ་ཚང་སོགས་ཀྱི་ཚོགས་སྤྱིར་འགལ་རྐྱེན་གྲལ་བཤེར་རོགས་སྐྱོར་བྱ་རྒྱུ་རྒྱུན་འཁྱོངས་བྱས་ཏེ། ཉེ་འཁོར་གྱི་གྱོད་དཔེ་སྤྱད་དེ་ཉེན་བརྡ་བཏང་ནས། མེ་ཟོན་བདེ་འཇགས་ཀྱི་ཤེས་བྱ་མི་སེམས་ཀྱི་ཟབ་སར་ཟུག་ཏུ་བཅུག དུས་མཚུངས་སུ། ཕྱོགས་མང་པོའི་སྟོབས་ཤུགས་ལ་གཅིག་གྱུར་འཆར་འགོད་བྱས་ནས། རོང་འབྲོག་ཁུལ་གྱི་མེ་ཟོན་རྨང་གཞིའི་སྒྲིག་བཀོད་རིམ་སྤོར་དང་། ཆུ་གསོག་རྫིང་བུ་དང་ཆུ་ལེན་ས་ཚིགས་འཛུགས་སྐྲུན་ལ་གཅིག་གྱུར་འཆར་འགོད་བྱས་ནས་སྐུལ་འདེད་གཏོང་བ། མེ་གསོད་ཡོ་བྱད་སྒྲིག་སྦྱོར་བཅས་བྱས་ཏེ། ནགས་ཚལ་དང་རྩྭ་ཐང་གི་སྐོར་སྲུང་རུ་ཁག་དང་། སྡེ་བ་དང་སྡེ་ཁུལ་གྱི་དང་བླངས་མེ་ཟོན་སྟོབས་ཤུགས་ལ་བརྟེན་ནས། “མེ་དགྲ་ཆུང་ཆུང་སྡེ་ལས་མི་ཐོན་པ་དང་མེ་སྐྱོན་བྱུང་མ་ཐག་གཅོད་ཐུབ་པ”མངོན་འགྱུར་ཡོང་བར་སྐུལ་འདེད་བཏང་སྟེ། རོང་འབྲོག་ཁུལ་གྱི་འཕྲལ་བསྟུན་ཐག་གཅོད་ཀྱི“ཆེས་མཇུག་མཐའི་སྤྱི་ལེ་གཅིག ”ཡོངས་འགྲུབ་བྱས།

ཞིང་ཆེན་མེ་ཟོན་རོགས་སྐྱོབ་སྤྱི་ཁྱབ་རུ་ཁག་གི་འབྲེལ་ཡོད་འགོ་ཁྲིད་ཀྱིས་བསྟན་དོན། རིམ་པ་སོ་སོའི་འགན་འཁྲི་མུ་མཐུད་ཇེ་དམ་དུ་བཏང་ནས། མེ་ཟོན་དྲིལ་སྒྲོག་དང་འགལ་རྐྱེན་བཅོས་སྒྲིག་དང་འཕྲལ་བསྟུན་ཐག་གཅོད་མཉམ་འདྲེས་གཏིང་ཟབ་ཡོང་བར་སྐུལ་འདེད་གཏོང་བ་དང་། ཐག་རིང་ལུང་ཁུག་ཏུ་ཁ་ཐོར་དུ་སྡོད་པའི་རོང་འབྲོག་ཁྱིམ་ཚང་དང་ལོ་ལོན་ཚོགས་སྤྱི་སོགས་ཀྱི་ལས་རིམ་ཞན་སར་མུ་མཐུད་ཤུགས་བསྣན་ཏེ། རོང་འབྲོག་ཁུལ་གྱི་མེ་ཟོན་བདེ་འཇགས་ལ“རྒྱུས་མངའ་ཡོད་པའི་མི”ཁག་གཅིག་གསོ་སྐྱོང་བྱས་ཏེ། རྒྱུན་རྣམ་ཅན་གྱི་དྲིལ་སྒྲོག་ལ་བརྟེན་ནས་གཞི་རིམ་བཅོས་སྐྱོང་གི་ནུས་པ་ཆེ་རུ་བཏང་སྟེ། ཞིང་ཆེན་ཡོངས་ཀྱི་རོང་འབྲོག་མང་ཚོགས་ཀྱི་བདེ་སྡོད་ལས་བརྩོན་ལ་མེ་ཟོན་བདེ་འཇགས་ཀྱི་འགན་ལེན་བརྟན་པོ་མཁོ་འདོན་བྱེད་རྒྱུ་ཡིན་ཟེར།