མཚོ་སྔོན་ཞིང་ཆེན་གྱིས་གཞོན་ནུ་ལོ་ཆུང་སློབ་མ་དམག་སྒར་དུ་བསྐྱོད་པའི་བྱེད་སྒོ་སྤེལ།

ཟླ9པའི་ཚེས24ཉིན། མཚོ་སྔོན་ཞིང་ཆེན་སློབ་གསོ་ཐིང་དང་ཀྲུང་གུང་མཚོ་སྔོན་ཞིང་ཆེན་ཏང་ཨུའི་དྲིལ་སྒྲོག་པུའུ། མཚོ་སྔོན་ཞིང་ཆེན་དམག་ཁུལ་ཆབ་སྲིད་ལས་དོན་ཅུས་བཅས་ཀྱིས་གཙོ་སྒྲུབ་བྱས་པའི། “གསེར་ལྡན་སྟོན་དུས་ཀྱི་གཙང་པོའི་འབྱུང་ཡུལ་གྱིས་གཞོན་ནུ་ལོ་ཆུང་ལ་སྐུལ་མ་གཏོང་བ་དང་། ལྗང་མདོག་དམག་སྒར་གྱིས་དམག་དཔུང་སྟོབས་ལྡན་དུ་གཏོང་བའི་ཕུགས་འདུན་གཉེར”ཞེས་པའི། མཚོ་སྔོན་ཞིང་ཆེན་གྱི་གཞོན་ནུ་ལོ་ཆུང་སློབ་མ་དམག་སྒར་དུ་བསྐྱོད་པའི་བྱེད་སྒོ་ཟི་ལིང་གྲོང་ཁྱེར་མཁར་ཤར་ཆུས་ནས་སྤེལ།  ཟི་ལིང་གྲོང་ཁྱེར་རྒྱལ་སྲུང་སློབ་གསོའི་དཔེ་སྟོན་སློབ་གྲྭ་ནས་ཡོང་བའི་སློབ་མ200ལྷག་ལྗང་མདོག་དམག་སྒར་དུ་བསྐྱོད་དེ། དམག་མིའི་འཚོ་བ་ཉམས་ལེན་དང་སིམ་པའི་རྣམ་པའི་རྒྱལ་སྲུང་སློབ་གསོ་དང་ལེན་བྱས།

འགོ་རྩོམ་མཛད་སྒོ་དེ་རྒྱལ་དར་སྒྲེང་བ་དང་རྒྱལ་གླུ་དཀྲོལ་གཏོང་བྱེད་པའི་ཁྲོད་དངོས་སུ་སྤེལ། ཞིང་ཆེན་དམག་ཁུལ་ཁང་གི་གཟབ་སྦྲེང་རུ་ཁག་གི་དཔོན་དམག་ཚོས་གོམ་སྟབས་བརྟན་པོ་སྤོས་ནས་ལུས་རྩལ་ཐང་དུ་ཡོང་ནས། དར་ཆ་སྒྲེང་བའི་མཛད་སྒོ་བརྗིད་ཉམས་ལྡན་པའི་ངང་ཡོངས་འགྲུབ་བྱས་པ་དང་། ཚོགས་ར་ཡོངས་ཀྱི་དགེ་སློབ་དང་དཔོན་དམག་ཚོས་གཟབ་ནན་ངང་ཡར་ལངས་ནས་དོ་སྣང་ཆེན་པོ་བྱས། དེ་རྗེས་སློབ་མ་ཚོས་ཚན་ཆུང་ཁག་བགོས་ཀྱི་རྣམ་པས་སྒར་ཁུལ་དུ་ལྟ་སྐོར་བྱས་ནས། རྒྱལ་སྲུང་སློབ་གསོའི་སློབ་སྦྱོང་དང་གོ་མཚོན་སྒྲིག་ཆས་ལྟ་སྦྱོང་། ནང་སྲིད་ཉམས་ལེན་དང་དེ་བཞིན་མེ་མདའ་རྒྱག་སྟངས་ལ་ལད་མོ་བྱེད་པ་སོགས་ཀྱི་ལས་རིམ་བརྒྱུད་དེ། དམག་མིའི་འཚོ་བར་ཐག་ཉེ་ས་ནས་ཉམས་ལེན་བྱས།

རྒྱུས་ལོན་བྱུང་བ་ལྟར་ན། ད་ཐེངས་ཀྱི་འགོ་རྩོམ་མཛད་སྒོ་སྤེལ་བ་དེ་ལས་ཞིང་ཆེན་ཡོངས་ཀྱི་གཞོན་ནུ་ལོ་ཆུང་སློབ་མ་དམག་སྒར་དུ་བསྐྱོད་པའི་བྱེད་སྒོ་རབ་དང་རིམ་པ་དངོས་སུ་སྤེལ་འགོ་བརྩམས་པ་མཚོན་ཡོད། ཟླ9པ་ནསཟླ10པའི་བར་དུ། གྲོང་ཁྱེར་དང་ཁུལ་སོ་སོས་ཐག་ཉེ་ས་དང་སྟབས་བདེ་ཡོང་བའི་རྩ་དོན་གཞིར་བཟུང་སྟེ། ཁོངས་གཏོགས་ཁུལ་གྱི་རྒྱལ་སྲུང་སློབ་གསོའི་དཔེ་སྟོན་སློབ་གྲྭ་དང་རྒྱལ་སྲུང་སློབ་གསོའི་ཁྱད་ལྡན་སློབ་གྲྭ་སོགས་སློབ་གྲྭ་ཆུང་འབྲིང་གི་སློབ་མ་གཅིག་རྗེས་གཉིས་མཐུད་ངང་རྩ་འཛུགས་བྱས་ནས་དམག་སྒར་དུ་བསྐྱོད་དེ། ལྟ་སྐོར་སློབ་སྦྱོང་དང་མཉམ་འགུལ་སྤེལ་རེས། དམག་དོན་ཉམས་ལེན་སོགས་སྣ་མང་གི་བྱེད་ཐབས་བརྒྱུད་མཐར། ཞིང་ཆེན་ཡོངས་ཀྱི་གཞོན་ནུ་ལོ་ཆུང་གི་རྒྱལ་སྲུང་སློབ་གསོ་གཏིང་ཟབ་ས་དང་དོན་ལྡན་གྱི་ཕྱོགས་སུ་འཕེལ་བར་སྐུལ་འདེད་བཏང་།