གཅན་ཚ་རྫོང་གིས་སྤྱི་ཆིང་ཁྲི་གཅིག་དང་སྟོང་དགུ་སུམ་བརྒྱ་ལྷག་ལ་སྡོང་པོ་བཙུགས་ཏེ“བྱང་གསུམ”བཟོ་བསྐྲུན་གྱི་སྐྱེ་ཁམས་དང་ཕྱུག་འགྱུར་ཟུང་ལྡན་གྱི་གྲུབ་འབྲས་བླངས།

“བྱང་གསུམ”བཟོ་སྐྲུན་ལག་བསྟར་བྱེད་འགོ་བརྩམས་པ་ནས་བཟུང་།  རྨ་ལྷོ་བོད་རིགས་རང་སྐྱོང་ཁུལ་གཅན་ཙ་རྫོང་གིས་རྒྱུན་མཐུད་ངང་སྐྱེ་ཁམས་བཅོས་སྐྱོང་བྱ་བར་སྐུལ་འདེད་བཏང་།  ཟླ10པའི་ཚེས4ཉིན་བར།  གཅན་ཚ་རྫོང་གིས་སྤྱི་ཆིང་ཁྲི་གཅིག་དང་སྟོང་དགུ་སུམ་བརྒྱ་ལྷག་ལ་སྡོང་པོ་བཙུགས་པ་དང་།  སྤྱི་ཆིང་ཁྲི་བཞི་སྟོང་གཉིས་བདུན་བརྒྱ་ལྷག་ལ་རི་བཀག་ནགས་གསོ་བྱས།  སྔོན་ཆད་ཀྱི་མུག་རི་ཐང་སྟོང་ད་ལྟ་སྲ་བརྟན་གྱི་ལྗང་མདོག་གི་ལྕགས་རི་རུ་གྱུར་ཡོད་ལ།  རྨ་ཆུའི་འབབ་རྒྱུད་སྐྱེ་ཁམས་བདེ་འཇགས་འཛུགས་སྐྲུན་གྱི་སྲུང་ཡོལ་སྲ་བརྟན་དུ་བཏང་བ་མ་ཟད།  སྐྱེ་ཁམས་སྲུང་སྐྱོབ་དང་དམངས་ཚིས་ལེགས་བཅོས་གཉིས་གཅིག་ལ་གཅིག་བརྟེན་སྒོས་ཕྱུག་འགྱུར་གྱི་ལམ་བུ་གསར་བའི་སྟེང་བསྐྱོད་པར་བྱས།

མཚོ་སྔོན“བྱང་གསུམ”བཟོ་སྐྲུན་ཐེངས་དྲུག་པའི་གཙོ་གནད་ས་ཁུལ་ཡིན་པའི་ཆ་ནས།  གཅན་ཚ་རྫོང་གིས“ཆུ་མོའི་གཞུང་ལ་ལྗང་མདོག་ཁོར་ཡུག་བསྐྲུན།།  རི་བོ་སྟོང་གི་ས་ཆུ་ལེགས་བཅོས་བྱེད།།”ཅེས་པའི་རིག་ལམ་སྲོག་ཤིང་གཞིར་བཟུང་ནས།  སྐྱེ་ཁམས་སླར་བཅོས་དེ་འཕེལ་རྒྱས་ཀྱི་སྔོན་འགྲོ་བྱས་ཡོད།  སྤྱིའི་མ་དངུལ་ལ་སྒོར་དུང་ཕྱུར་གཉིས་དང་བྱེ་བ་གསུམ་ས་ཡ་ལྔ་ཙམ་ཡོད་པའི། གཅན་ཚ་ནས་རེབ་གོང་བར་གྱི་རྨ་ཆུའི་འབབ་རྒྱུད་སྐྱེ་ཁམས་སླར་གསོ་ལས་གཞི་ལ་བརྟེན་ནས།  རྒྱུན་མཐུད་ངང་རྨ་ཆུའི་འགྲམ་རྒྱུད་ཀྱི་སྐྱེ་ཁམས་འགོག་སྲུང་ཐིག་སྲ་བརྟན་བཏང་།

དོ་དམ་དང་སྲུང་སྐྱོབ་ལམ་ལུགས་སྟེང་ནས།  གཅན་ཚ་རྫོང་གིས་ཁྱོན་ཡོངས་ནས་རིམ་པ་གསུམ་གྱི་ནགས་རྩྭའི་སྲུང་སྐྱོབ་འགོ་ཁྲིད་པས་དོ་དམ་བྱེད་པའི་ལམ་ལུགས་དོན་འཁྱོལ་བྱས་པ་དང་།  རྫོང་དང་ཡུལ་ཚོ།  སྡེ་བ་བཅས་རིམ་པ་གསུམ་གྱི་ནགས་སྲུང་དང་རྩྭ་སྲུང་གི་འགན་འཁྲིའི་འབྲེལ་བ་བཙུགས་ནས།  “ནགས་རྩྭའི་སྲུང་སྐྱོབ་འགོ་བ་དང་སྐྱེ་ཁམས་སྲུང་སྐྱོབ་པ་གཉིས་མཉམ་འབྲེལ”བྱེད་པའི་མཐུན་སྦྱོར་རྐྱེན་སྲོལ་ལ་སྐུལ་འདེད་བཏང་།  ལྷོ་རིའི་ནགས་ར་ཡི་ནགས་སྲུང་མི་སྣ44ཡིས་ཉིན་རྒྱུན་སྐོར་ཞིབ་དང་མེ་འགོག་ལྟ་སྲུང་།  སྒྲིག་ཆས་ཞིག་གསོ་སོགས་ཀྱི་བྱ་བ་སྒྲུབ་པ་ལ་བརྟེན་ནས།  འཛུགས་བསྐྲུན་དང་དོ་དམ་གཉིས་རྒྱལ་གྱི་ཡུན་རིང་བདག་གཉེར་མངོན་འགྱུར་བྱས།

སྐྱེ་ཁམས་དང་ཕྱུག་འགྱུར་མཐུན་སྦྱོར་སྒོས་སྐུལ་འདེད་གཏོང་བ་ནི་གཅན་ཚ་རྫོང་གི་འབུར་དུ་ཐོན་པའི་ཁྱད་ཆོས་ཤིག་ཡིན།  གཅན་ཚ་རྫོང་གིས“བྱང་གསུམ” བཟོ་སྐྲུན་དང་ཕྱུག་འགྱུར་ཐོན་ལས་མཉམ་འདྲེས་སྒོས་སྐུལ་འདེད་བཏང་སྟེ།  ཁམ་བུ་དང་སྟར་ཀ་སོགས་ནགས་སིལ་དཔལ་འབྱོར་སྤྱི་ཆིང266.67གསོ་སྐྱོང་བྱས་པ་དང་།  མང་ཚོགས་ལ་སྣེ་ཁྲིད་དེ་བཟོ་སྐྲུན་འཛུགས་སྐྲུན་ཁྲོད་ཞུགས་ཏེ་མི་རེའི་ཆ་སྙོམས་ཡོང་འབབ་སྒོར་ཁྲི་གཅིག་དང་སྟོང་ལྔར་སླེབས།  ལྷོ་རིའི་ནགས་ར་ཡིས་ས་གནས་མང་ཚོགས་བསྡུ་ལེན་བྱས་ཏེ་ནགས་སྲུང་བའི་འགན་ཁུར་དུ་བཅུག་སྟེ།  ནགས་རར་སྲུང་སྐྱོབ་བྱས་ན་གླ་ཕོག་ཡོད་པ་དང་། ནགས་ར་འཛུགས་བསྐྲུན་བྱས་ན་ཁེ་ཕན་ཐོབ་པའི་རྣམ་པ་གྲུབ་པར་བྱས།  མིག་སྔར།  རྫོང་ཡོངས་ནས་རྒྱལ་ཁབ་རིམ་པའི་ནགས་ཚལ་གྲོང་གསེས་ལྔ་དང་།  ཞིང་ཆེན་རིམ་པའི་ནགས་ཚལ་གྲོང་རྡལ་གཉིས་གསར་བསྐྲུན་བྱས་ཏེ།  སྐྱེ་ཁམས་ཀྱི་མཛེས་པ་དང་མང་ཚོགས་ཀྱི་ཕྱུག་འགྱུར་ཕྱོགས་གཉིས་ནས་རྒྱལ་ཁ་ལེན་པ་མངོན་འགྱུར་བྱས།