མཚོ་ནུབ་ཁུལ་གྱིས་ཐོན་ལས་ཚུལ་སྒྱུར་དང་རིམ་སྤོར་མགྱོགས་སུ་བཏང་ནས་ས་གནས་ཀྱི་ཁྱད་ཆོས་ལྡན་པའི་དེང་རབས་ཅན་གྱི་ཐོན་ལས་མ་ལག་གསོ་སྐྱོང་བྱས།

ཟླ8པའི་ཚེས29ཉིན། གསར་འགོད་པས་མཚོ་སྔོན་ཞིང་ཆེན་སྲིད་གཞུང་གསར་འགྱུར་གཞུང་སྒྲུབ་ཁང་གིས་བསྡུས་པའི“བཅོས་སྒྱུར་ཕྱོགས་ཡོངས་ནས་ཟབ་སྤེལ་བཏང་སྟེ། སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་དགོས”ཞེས་པའི་མཚོ་ནུབ་ཁུལ་གྱི་ཆེད་དོན་གསར་འགྱུར་སྒྲོག་སྤེལ་ཚོགས་འདུའི་སྟེང་ནས་རྒྱུས་ལོན་བྱུང་བ་ལྟར་ན། ཉེ་བའི་ལོ་འདི་དག་གི་རིང་ལ། མཚོ་སྔོན་ཞིང་ཆེན་མཚོ་ནུབ་སོག་རིགས་བོད་རིགས་རང་སྐྱོང་ཁུལ་གྱིས་མཚོ་ནུབ་ཀྱི་ཁྱད་སྟོབས་ལྡན་པའི་དེང་རབས་ཅན་གྱི་ཐོན་ལས་མ་ལག་གསོ་སྐྱོང་བྱེད་པར་དམིགས་ཏེ། ཐོན་ལས་ཀྱི“གནས་བཞི”འཛུགས་སྐྲུན་གཙོ་བོར་བཟུང་ནས། “སྣུམ་གར་པོ་དང་ཚྭ་ཁ་མོ་ཅན་གྱི་ཐོན་ལས”དང“རླུང་གཡུག་ཉི་རྒྱག་ཅན་གྱི་ཐོན་ལས”འཕེལ་རྒྱས་གཏོང་བར་མཐོང་ཆེན་བྱེད་པའི་རྣམ་པ་གསར་པ་འབད་པས་བསྐྲུན་ནས། ཐོན་ལས་ཚུལ་སྒྱུར་རིམ་སྤོར་ཐད་གོམ་སྟབས་བརྟན་པོ་སྤོས།

ཚྭ་མཚོའི་ཐོན་ལས་རིམ་སྤོར་ཚད་སྔར་ལས་ཇེ་མགྱོགས་སུ་བཏང་སྟེ། ཐོན་ཁུངས་ཕྱོགས་བསྡུས་བེད་སྤྱོད་དང་། གཞི་གྲངས་དང་ཤེས་རིག་ལ་བརྟེན་ནས་ནུས་ཤུགས་སྩོལ་བ། ཚན་རྩལ་གསར་གཏོད་ཀྱིས་མཐུན་སྦྱོར་ངང་ནུས་ཤུགས་འདོན་རྒྱུ་རྒྱུན་འཁྱོངས་བྱས་ཏེ། ཚྭ་མཚོའི་ནང་གི་ལིས་རྫས་ཕྱིར་འདོན་སོགས་འཛམ་གླིང་རིམ་པའི་ལག་རྩལ་གྱི་དཀའ་གནད་མང་པོ་སེལ་ཡོད་ལ། ཚྭ་མཚོའི་ཐོན་ལས་ཚད་གཞི195བཟོ་བར་གཙོ་ཁྲིད་དང་དེའི་ལས་རིམ་ཧྲིལ་བོའི་ཁྲོད་འབད་པས་ཞུགས་པ། ན་གོར་མོ་ཡི་ཚྭ་མཚོའི་ལྷད་མེད་ཐོན་ལས་གླིང་འཛུགས་སྐྲུན་བྱེད་མགོ་བརྩམས་ཏེ། ཅཱ་དང་ནཱ། མེ། ལིས། ལུའུ་བཅས་ཀྱི་ཐོན་ལས་ཁྱུ་ཚོགས་ཆེན་པོ་ལྔ་རིམ་པར་གྲུབ་ཡོད་ལ། ཅཱ་ལུད་ཀྱི་ལོ་རེའི་ཐོན་ཚད་ཀྱིས་རྒྱལ་ཡོངས་ཀྱི80%ཡན་ཟིན་པ་དང་། ཐཱན་སྐྱུར་ལིས་ཀྱིས20%ཡན་ཟིན་ཡོད་ལ། ལན་ཚྭ་ཡིས15%ཡན་ཟིན་ཡོད་ཅིང་། མཱེ་རིགས་ཐོན་རྫས་ཀྱིས་རྒྱལ་ཡོངས་ཀྱི་རྩེར་སོན་ཁྲོམ་ར་བདག་བཟུང་བྱས་ཡོད།