མཚོ་སྔོན་གྱི་ཚན་རྩལ་གསར་གཏོད་གླེང་སྟེགས་སྐབས་གསུམ་པ་ཟི་ལིང་དུ་བསྡུས།

ཟླ8པའི་ཚེས27ཉིན།   ལྗང་མདོག་རྩིས་གློག་མཐུན་སྦྱོར་བྱས་ཏེ།  མཚོ་སྔོན་གྱི་མ་འོངས་པ་མཉམ་དུ་སྤྱོད་ཅེས་པ་བརྗོད་གཞི་ཡིན་པའི་མཚོ་སྔོན་ཞིང་ཆེན་གྱི་ཚན་རྩལ་གསར་གཏོད་གླེང་སྟེགས་སྐབས་གསུམ་པ་ཟི་ལིང་དུ་བསྡུས།  ཐེངས་འདིའི་གླེང་སྟེགས་ནི་མཚོ་སྔོན་ཞིང་ཆེན་ཚན་རིག་ལག་རྩལ་མཐུན་ཚོགས་ཀྱིས་གཙོ་སྒྲུབ་བྱས་ཤིང་།   རིག་གཞུང་ལས་རིགས་དང་ཐོན་ལས་ལས་རིགས་ཀྱི་ཤེས་རིག་གཅིག་སྡུད་བྱས་ཏེ།   ལྗང་མདོག་རྩིས་ནུས་དང་གློག་ཤུགས་མཉམ་བསྲེས་འཕེལ་རྒྱས་ཀྱི་བྱེད་ཐབས་དང་མདུན་ལྗོངས་ལ་གྲོས་བསྡུར་ཟབ་མོ་བྱས་ནས།    མཚོ་སྔོན་གྱི་ལྗང་མདོག་རྩིས་གློག་མཐུན་སྦྱོར་འཕེལ་རྒྱས་དང་ནུས་ཁུངས་སྒྲིག་གཞི་ཚུལ་སྒྱུར་ལ་སྐུལ་འདེད་གཏོང་བར་ནུས་ཡོད་ཀྱི་འདེགས་སྐྱོར་འདོན་སྤྲོད་བྱེད་རྒྱུ་དམིགས་ཡུལ་དུ་བཟུང་ཡོད།

མཚོ་སྔོན་ནི་མདོ་དབུས་མཐོ་སྒང་གི་བྱང་ཤར་ཕྱོགས་སུ་ཡོད་པ་དང་།   འབྲི་ཆུ་དང་རྨ་ཆུ།  རྫ་ཆུ་བཅས་ཀྱི་འབྱུང་ཡུལ་ཡིན་པས།   ཀྲུང་ཧྭའི་ཆུ་གཏེར་ཞེས་པའི་མཚན་སྙན་ཡོད་པ་དང་།  ཆུའི་ཐོན་ཁུངས་ཕུན་སུམ་ཚོགས་པར་མ་ཟད།   ད་རུང་མཛེས་ལྗོངས་དང་དག་གཙང་ནུས་ཁུངས།   ཐུན་མོང་མ་ཡིན་པའི་རང་བྱུང་ཆ་རྐྱེན་འཛོམས་པོ་ཡོད་པས།   ལྗམ་མདོག་རྩིས་ནུས་ཐོན་ལས་འཕེལ་རྒྱས་ཀྱི་ས་ཁུལ་བཟང་བོ་ཞིག་ཏུ་བརྩི་བཞིན་ཡོད།     ཉེ་བའི་ལོ་འགའི་རིང་།    མཚོ་སྔོན་གྱིས་ཐོན་ཁུངས་དགེ་མཚན་འདོན་སྤེལ་གང་ལེགས་བྱས་པ་དང་།   ལྗང་གློག་དང་རྩིས་ནུས་ཟུང་འབྲེལ་བྱེད་པའི་རྣམ་པ་གསར་པའི་ཐོན་ལས་ལ་བཀོད་སྒྲིག་བཟང་བོ་བྱས་ཏེ།    ཐཱན་གཉིས་དམིགས་འབེན་དང་དཔལ་འབྱོར་སྤུས་ཚད་མཐོ་བའི་འཕེལ་རྒྱས་མངོན་འགྱུར་བྱེད་པར་རོགས་འདེགས་བྱས།

གླེང་སྟེགས་འགོ་རྩོམ་པའི་མཛད་སྒོའི་སྟེང་།    མཚོ་སྔོན་ཞིང་ཆེན་ཚན་རིག་ལག་རྩལ་མཐུན་ཚོགས་དང་ཀྲུང་གོ་ཆུ་ཤུགས་གློག་འདོན་བཟོ་སྐྲུན་སློབ་ཚོགས།    ཀྲུང་གོ་ཆ་འཕྲིན་སློབ་ཚོགས་སོགས་ཀྱིས་འཐབ་ཇུས་མཉམ་ལས་གྲོས་མཐུན་བཀོད་པ་དང་།      ཕྱོགས་སོ་སོས་ལྗང་གློག་སྦས་ཤུགས་དང་རྩིས་ནུས་རྨང་གཞིའི་སྒྲིག་ཆས།    ནུས་ཁུངས་གཞི་གྲངས་ཅན་སོགས་ཕྱོགས་ལ་དམིགས་ནས་མཉམ་ལས་ཟབ་མོ་བྱས་ཏེ།   ཚན་རྩལ་གསར་གཏོད་དང་ཐོན་ལས་མཐུན་སྦྱོར་ལ་མཉམ་དུ་སྐུལ་འདེད་གཏང་རྒྱུ་རེད།

བརྗོད་དོན་སྙན་ཞུ་འབུལ་སྐབས།   ཀྲུང་གོ་ཚན་རིག་གླིང་གི་ཡོན་ཧྲི་ཙོའུ་ཀྲི་ཀང་དང་ཀོན་ཞའོ་ཧུང་། དེ་མིན་ཁེ་ལས་ཀྱི་འཐུས་མིས་སོ་སོར་ལྗང་མདོག་རྩིས་གློག་མཐུན་སྦྱོར་གྱི་འཕེལ་ཕྱོགས་དང་ལག་རྩལ་གྱི་ཐབས་ལམ།    ལག་ལེན་དཔེ་གཞི་སོགས་ལ་དམིགས་ནས་ཆེད་དོན་སྙན་ཞུ་ཕུལ།   ཆེད་མཁས་པ་རྣམས་ཀྱིས་མཚོ་སྔོན་གྱིས་སྔར་ལས་ལྷག་པའི་སྒོ་ནས་དག་གཙང་ནུས་ཁུངས་དགེ་མཚན་ལ་བརྟེན་ནས།    ལྗང་མདོག་གཞི་གྲངས་ལྟེ་གནས་འཛུགས་སྐྲུན་དང་ནུས་ཁུངས་སེལ་ལེན་སྒྲིག་གཞི་ལེགས་སྒྲིག་ལ་སྐུལ་འདེད་གཏོང་བ་དང་།    ལྗང་གློག་འདེགས་སྐྱོར་གཙོ་བོ་ཡིན་པའི་རྩིས་ནུས་ཐོན་ལས་འཕེལ་རྒྱས་རྣམ་པ་གྲུབ་པར་བྱས་ནས།   སྤུས་གསར་ཐོན་སྐྱེད་ནུས་ཤུགས་ཐད་ལྗང་མདོག་གི་སྒུལ་ནུས་སྣོན་དགོས་ཞེས་བསྟན།

རྒྱུས་ལོན་བྱུང་བ་ལྟར་ན།   ཐེངས་འདིའི་གླེང་སྟེགས་ཀྱི་དུས་ཡུན་ཉིན་གཉིས་ཡིན་པ་དང་།    བརྗོད་དོན་གླེང་སྟེགས་ལས་གཞན།   ད་རུང་ཡན་ལག་གླེང་སྟེགས་དང་ཡོན་ཧྲིའི་ཚན་རིག་ཁྱབ་གདལ་ཐད་ཀྱི་སྙན་ཞུ་ཚོགས་འདུ།    ཡོན་ཧྲི་དང་ཆེད་མཁས་པ་ཁེ་ལས་སུ་བསྐྱོད་པ་སོགས་ཀྱི་བྱ་འགུལ་རབ་དང་རིམ་པ་ཡོད།    རྒྱལ་ཡོངས་ཀྱི་སློབ་ཚོགས་དང་ཞིང་ཆེན་དང་གྲོང་ཁྱེར་མང་པོའི་ཚན་རིག་ལག་རྩལ་མཐུན་ཚོགས།   མཚོ་སྔོན་ཞིང་ཆེན་གྱི་འབྲེལ་ཡོད་ཐིན་དང་ཅུའུ་སོགས་སྡེ་ཁག་གི་ཆེད་མཁས་པ་དང་ཁེ་ལས་འཐུས་མི་བརྒྱ་ལྷག་གླེང་སྟེགས་ལ་ཞུགས།