མཚོ་སྔོན་སློབ་ཆེན་དུ“རྨ་འབྲི་རྫ་གསུམ་འགོ་ཁུངས་རྒྱལ་ཁབ་སྤྱི་གླིང་མི་སྡོད་ཁོར་ཡིག་བདེ་ཐང་ཞིབ་འཇུག་གླིང་”བཙུགས་པ།

  མཚོ་སྔོན་ཞིང་ཆེན་མི་དམངས་སྲིད་གཞུང་དང་ཧྥུ་ཏན་སློབ་ཆེན་གཉིས་ཀྱིས་མཉམ་ལས་སྒྲོམ་གཞིའི་གྲོས་ཆིངས་ཀྱི་སྐུལ་འདེད་འོག   མཚོ་སྔོན་སློབ་ཆེན་དང་ཧྥུ་ཏན་སློབ་ཆེན། རྨ་འབྲི་རྫ་གསུམ་འགོ་ཁུངས་རྒྱལ་ཁབ་སྤྱི་གླིང་དོ་དམ་ཅུས་སོགས་ཕྱོགས་དུ་མས་མཉམ་དུ་བསྐྲུན་པའི“རྨ་འབྲི་རྫ་གསུམ་རྒྱལ་ཁབ་སྤྱི་གླིང་མི་སྡོད་ཁོར་ཡིག་བདེ་ཐང་ཞིབ་འཇུག་གླིང་”ལ་མཚོ་སྔོན་སློབ་ཆེན་དངོས་སུ་སྒོ་བྱང་བཀལ།   མཚོ་སྔོན་ཞིང་ཆེན་དང་། ཧྲང་ཧའེ་གྲོང་ཁྱེར་གྱི་འབྲེལ་ཡོད་སྡེ་ཚན་གྱི་འགན་ཁུར་བློ་མཐུན་དང་རྨ་འབྲི་རྫ་གསུམ་འགོ་ཁུངས་རྒྱལ་ཁབ་སྤྱི་གླིང་གི་མི་སྡོད་ཁོར་ཡུག་བདེ་ཐང་ཞིབ་འཇུག་གླིང་འཛུགས་སྐྲུན་གྱི་ལས་སུ་ཞུགས་པའི་ལས་ཁུངས་ཀྱི་འཐུས་མི་རྣམས་སྒོ་བྱང་འགེལ་བའི་མཛད་སྒོར་ཞུགས།

 སྒོ་བྱང་འགེལ་བའི་མཛད་སྒོ་སྤེལ་རྗེས། རྨ་འབྲི་རྫ་གསུམ་འགོ་ཁུངས་རྒྱལ་ཁབ་སྤྱི་གླིང་གི་མི་སྡོད་ཁོར་ཡུག་བདེ་ཐང་ཞིབ་འཇུག་གླིང་གི་ཆེད་ལས་བློ་འདྲི་ཨུ་ལྷན་གྱི་ཚང་འཛོམས་གྲོས་ཚོགས་ཐེངས་དང་པོ་བསྡུས།  ཀྲུང་གོའི་ཚན་རིག་གླིང་གི་ཡོན་ཧྲི། ཧྥུ་ཏན་སློབ་ཆེན་གྱི་སློབ་གཙོ་ཅིན་ལེ་བློ་འདྲི་ཨུ་ལྷན་གྱི་ཀྲུའུ་རེན་ཨུ་ཡོན་ལ་བསྐོས།  ཐོག་མར་འདེམས་བསྐོས་ཀྱི་བློ་འདྲི་ཨུ་ཡོན་རྣམ་པས་མཉམ་དུ་མི་སྡོད་ཁོར་ཡུག་བདེ་ཐང་ཞིབ་འཇུག་གླིང་ཇི་ལྟར་གོང་དུ་སྤེལ་བའི་ཕྱོགས་ནས་བགྲོ་གླེང་མཛད།

 ཤེས་གསལ་ལྟར་ན།  ཞིབ་འཇུག་གླིང་བཙུགས་པ་ནི། མཚོ་སྔོན་སློབ་ཆེན་གྱིས་མ་སྐུལ་རང་རྟོགས་ཀྱིས་རྒྱལ་ཁབ་ཀྱི་འཐབ་ཇུས་གལ་ཆེན་ལ་ཞབས་འདེགས་དང་། མཐོ་སྒང་གསོ་རིག་དང་སྐྱེ་ཁམས་བདེ་ཐང་མཉམ་སྤེལ་ལ་སྐུལ་འདེད་གཏང་བའི་བྱེད་ཐབས་གལ་ཆེན་ཡིན་པས། མཚོ་སྔོན་སློབ་ཆེན་གྱིས་ས་ཁོངས་ཀྱི་དགེ་མཚན་དང་། རིག་ཚན་གྱི་དགེ་མཚན་གང་ལེགས་བཏོན་ཏེ།  ཚན་རིག་གི་ལམ་ནས་སྣོལ་སྡེབ་མཉམ་འདྲེས་ལ་སྐུལ་འདེད་བཏང་ནས་ནུས་ཤུགས་ཡོད་རྒུས་ཚན་རིག་ཞིབ་འཇུག་དང་།  འཇོན་མི་སྐྱེད་སྲིང་། སྤྱི་ཚོགས་ཞབས་ཕྱི།  མཐོ་སྒང་ཁམས་གསོ་བཅས་གཞི་གཅིག་ཏུ་དྲིལ་བའི་གསར་གཏོད་ཀྱི་ཆུ་ཚོད་ཧ་ཅང་མཐོ་བའི་སྡིངས་ཆ་ཞིག་རྒྱུ་རེད།   ཧྥུ་ཏན་སློབ་ཆེན་གྱིས་རིག་ཚན་དུ་མ་སྣོལ་སྡེབ་ཞིབ་འཇུག་གི་དགེ་མཚན་གང་ལེགས་བཏོན་ཏེ།  མཚོ་སྔོན་སློབ་ཆེན་སོགས་ལས་ཁུངས་ཀྱི་མཉམ་ཤུགས་བཏོན་པ་དང་།  མཐོ་སྒང་གསོ་རིག་དང་ཁོར་ཡུག་བདེ་ཐང་།  སྐྱེ་ཁམས་སྲུང་སྐྱོབ། དམངས་ཚིས་ལེགས་སྒྱུར་ལ་སོགས་ལྟེ་བའི་ཁྱབ་ཁོངས་ལ་དམིགས་ཏེ།  རིག་ཚན་ལ་མི་བལྟས་པར་མཉམ་ལས་གཏིང་ཟབ་ལ་སྐུལ་འདེད་གཏང་རྒྱུ།   ཞིབ་འཇུག་གླིང་གིས་རྨ་འབྲི་རྫ་གསུམ་འགོ་ཁུངས་རྒྱལ་ཁབ་སྤྱི་གླིང་གི་སྐྱེ་ཁམས་སྲུང་སྐྱོབ་དངོས་ལ་གཞི་བཙུགས་ཏེ།  ཚན་ཞིབ་གསར་གཏོད་ཀྱི་སྡིངས་ཆའི་ནུས་པ་གང་ལེགས་འདོན་པ་དང་།  སྐྱེ་ཁམས་བདེ་ཐང་ཁྱབ་ཁོངས་ཀྱི་ཞིབ་འཇུག་གཏིང་ཟབ།  ཚན་ཞིབ་གྲུབ་འབྲས་བཀོལ་སྤྱོད་ལ་སྐུལ་འདེད་བཅས་བཏང་ནས་སྐྱེ་ཁམས་དཔལ་ཡོན་གྱི་མཐོ་ས་དང་།  བདེ་ཐང་མཚོ་སྔོན་འཛུགས་སྐྲུན་ཐད་ལ་སྟོབས་དང་ལྡན་པའི་ཚན་རིག་གི་འདེགས་སྐྱོར་དང་རིག་ནུས་ཀྱི་རྒྱབ་སྐྱོར་བྱ་རྒྱུ་རེད།