མཚོ་སྔོན་སློབ་ཆེན་དུ་“གཙང་གསུམ་འབྱུང་ཡུལ་རྒྱལ་ཁབ་སྤྱི་གླིང་གི་མི་སྡོད་བདེ་ཐང་ཞིབ་འཇུག་ཁང་”བཙུགས་པ།

མཚོ་སྔོན་གསར་འགྱུར་དྲ་བའི་འཕྲིན། ཉེ་ཆར་མཚོ་སྔོན་ཞིང་ཆེན་མི་དམངས་སྲིད་གཞུང་དང་ཧྥུ་ཏན་སློབ་ཆེན་བར་གྱི་མཉམ་ལས་སྒྲོམ་གཞིའི་གྲོས་མཐུན་གྱི་སྐུལ་འདེད་འོགམཚོ་སྔོན་སློབ་ཆེན་དང་།ཧྥུ་ཏན་སློབ་ཆེན། གསུམ་གཙང་འབྱུང་ཡུལ་རྒྱལ་ཁབ་སྤྱི་གླིང་དོ་དམ་ཅུའུ་སོགས་ཕྱོགས་མང་པོས་ལག་གདང་སྦྲེལ་ནས་ཐུན་མོང་དུ་བསྐྲུན་པའི“གསུམ་གཙང་འབྱུང་ཡུལ་རྒྱལ་ཁབ་སྤྱི་གླིང་གི་མི་སྡོད་བདེ་ཐང་ཞིབ་འཇུག་ཁང་”དེ་མཚོ་སྔོན་སློབ་ཆེན་དུ་དངོས་སུ་སྒོ་འབྱེད་པ་དང་། མཚོ་སྔོན་ཞིང་ཆེན་དང་ཧྲང་ཧའེ་གྲོང་ཁྱེར་གྱི་འབྲེལ་ཡོད་སྡེ་ཚན་ཁག་གི་འགན་འཁུར་བློ་མཐུན་གཙོ་བོ་དང་གཙང་གསུམ་འབྱུང་ཡུལ་རྒྱལ་ཁབ་སྤྱི་གླིང་བདེ་ཐང་མི་སྡོད་ཞིབ་འཇུག་ཁང་འཛུགས་སྐྲུན་ནང་ཞུགས་པའི་སྡེ་ཚན་གྱི་འཐུས་མི་སྒོ་འབྱེད་མཛད་སྒོར་ཞུགས།

སྒོ་བྱང་སྒོ་འབྱེད་མཛད་སྒོ་བྱས་རྗེས་སན་ཅང་ཡོན་རྒྱལ་ཁབ་སྤྱི་གླིང་གི་མི་སྡོད་བདེ་ཐང་ཞིབ་འཇུག་ཁང་གི་རིགས་གཅིག་མཁས་ཅན་བློ་འདྲི་ཨུ་ལྷན་གྱི་ཚང་འཛོམས་ཚོགས་འདུ་ཐེངས་དང་པོ་འཚོགས། ཀྲུང་གོ་ཚན་རིག་ཁང་གི་ཡོན་ཧྲི་ཧྥུ་ཏན་སློབ་ཆེན་གྱི་སློབ་གཙོ་ཅིན་ལི་བློ་འདྲི་ཨུ་ཡོན་ལྷན་ཁང་གི་ཀྲུའུ་རེན་ཨུ་ཡོན་ལ་བདམས། ཐེངས་དང་པོར་བདམས་ཐོན་བྱུང་བའི་བློ་འདྲི་ཨུ་ཡོན་གྱིས་ཇི་ལྟར་བྱས་ནས་མི་སྡོད་བདེ་ཐང་ཞིབ་འཇུག་ཁང་གི་འཕེལ་རྒྱས་ལ་ཐུན་མོང་ཐོག་སྐུལ་འདེད་གཏོང་རྒྱུའི་ཐད་གྲོས་བསྡུར་བྱས།

ཤེས་རྟོགས་བྱུང་བར་གཞིགས་ན།ཞིབ་འཇུག་ཁང་བཙུགས་པ་ནི་མཚོ་སྔོན་སློབ་ཆེན་གྱིས་རང་འགུལ་ངང་རྒྱལ་ཁབ་ཀྱི་འཐབ་ཇུས་གལ་ཆེན་ལ་ཞབས་འདེགས་ཞུ་བ་དང་ས་མཐོའི་གསོ་རིག་དང་སྣོད་བཅུད་བདེ་ཐང་མཉམ་འདྲེས་འཕེལ་རྒྱས་ལ་སྐུལ་འདེད་གཏོང་བའི་བྱེད་ཐབས་གལ་ཆེན་ཞིག་རེད།མཚོ་སྔོན་སློབ་ཆེན་གྱིས་ས་ཁོངས་ཀྱི་ལེགས་ཆ་དང་རིག་ཚན་གྱི་ལེགས་ཆ་འདོན་སྤེལ་གང་ལེགས་བྱས་ནས་རིག་ཚན་སྣོལ་སྡེབ་མཉམ་འདྲེས་ལ་སྐུལ་འདེད་བཏང་སྟེ།ནུས་ཤུགས་ཡོད་རྒུས་ཚན་རིག་ཞིབ་འཇུག་དང་།ཤེས་ལྡན་མི་སྣ་གསོ་སྐྱོང་།སྤྱི་ཚོགས་ཞབས་ཞུ།ས་མཐོའི་བདེ་ཐང་གསོ་སྐྱོང་བཅས་གཞི་གཅིག་ཏུ་འདུས་པའི་ཆུ་ཚད་མཐོ་བའི་གསར་གཏོད་ལས་སྟེགས་བསྐྲུན་རྒྱུ་རེད། ཧྥུ་ཏན་སློབ་ཆེན་གྱིས་རིག་ཚན་མང་པོའི་སྣོལ་སྡེབ་ཞིབ་འཇུག་གི་ལེགས་ཆ་འདོན་སྤེལ་གང་ལེགས་བྱས་ཏེ་མཚོ་སྔོན་སློབ་ཆེན་སོགས་ཚན་པ་དང་ནུས་ཤུགས་གཅིག་སྒྲིལ་མཉམ་ལས་བྱས་ཏེ་ས་མཐོའི་གསོ་རིག་དང་།ཁོར་ཡུག་བདེ་ཐང་།སྣོད་བཅུད་སྲུང་སྐྱོབ།དམངས་འཚོ་ལེགས་སུ་གཏོང་བ་སོགས་ལྟེ་བའི་ཁྱབ་ཁོངས་ལ་དམིགས་ཏེ་རིག་ཚན་ལས་བརྒལ་བའི་མཉམ་འདྲེས་གཏིང་ཟབ་བྱ་རྒྱུར་སྐུལ་འདེད་གཏོང་རྒྱུ་ཡིན་པ་རེད། ཞིབ་འཇུག་ཁང་གིས་གཙང་པོ་གསུམ་གྱི་འབྱུང་ཁུངས་སྣོད་བཅུད་སྲུང་སྐྱོང་གི་དོན་དངོས་ལ་གཞི་ཚུགས་ནས་ཚན་རིག་ཞིབ་འཇུག་གསར་གཏོད་ལས་སྟེགས་ཀྱི་ནུས་པ་འདོན་སྤེལ་གང་ལེགས་བྱས་ཏེ་སྣོད་བཅུད་བདེ་ཐང་ཁྱབ་ཁོངས་ཀྱི་ཞིབ་འཇུག་གཏིང་ཟབ་ཏུ་གཏོང་བ་དང་།ཚན་རིག་ཞིབ་འཇུག་གི་གྲུབ་འབྲས་བསྒྱུར་སྤྱོད་ལ་སྐུལ་འདེད་བཏང་སྟེ་སྣོད་བཅུད་དཔལ་ཡོན་གྱི་མཐོ་ས་དང་བདེ་ཐང་གི་མཚོ་སྔོན་འཛུགས་སྐྲུན་བྱེད་པར་ཚན་རྩལ་གྱི་འདེགས་སྐྱོར་དང་རིག་སྟོབས་ཀྱི་རྒྱབ་སྐྱོར་ནུས་ལྡན་འདོན་སྤྲོད་བྱ་རྒྱུ་རེད།