མཚོ་བྱང་བོད་རིགས་རང་སྐྱོང་ཁུལ་གྱི་གྲོང་གསེབ་འགྲུལ་སྐྱེལ་ཚད་བརྒྱ་ཆའི་བརྒྱར་སླེབས།

ཟླ8པའི་ཚེས19ཉིན། གསར་འགོད་པས་མཚོ་བྱང་བོད་རིགས་རང་སྐྱོང་ཁུལ་འགྲིམ་འགྲུལ་སྐྱེལ་འདྲེན་ཅུའུ་ནས་རྒྱུས་ལོན་པ་ལྟར་ན། མིག་སྔའི་བར་དུ། མཚོ་བྱང་བོད་རིགས་རང་སྐྱོང་ཁུལ་གྱི་ཡུལ་ཚོ་དང་གྲོང་རྡལ30དང་། སྲིད་འཛིན་སྡེ་བ214འགྲུལ་སྐྱེལ་ཚད་བརྒྱ་ཆའི་བརྒྱར་སླེབས་ཡོད་ཟེར།

མཚོ་བྱང་བོད་རིགས་རང་སྐྱོང་ཁུལ་གྱི་འགྲིམ་འགྲུལ་སྐྱེལ་འདྲེན་སྡེ་ཁག་གིས་འགྲུལ་ལམ་ཡོངས་ཁྱབ་དང་འགྲུལ་སྐྱེལ་སྟབས་བདེ། བེད་སྤྱོད་ནུས་ལྡན་བཅས་ལ་དམིགས་ཏེ། གྲོང་གསེབ་ཀྱི་གཞུང་ལམ་བདེ་སྤྱོད་རིན་ཐང་དང་དམངས་ཚིས་ཞབས་ཞུའི་བྱེད་ནུས་རྒྱུན་ཆད་མེད་པར་ཇེ་མཐོར་བཏང་། མིག་སྔར། མཚོ་བྱང་བོད་རིགས་རང་སྐྱོང་ཁུལ་དུ་འགྲུལ་སྐྱེལ་ལམ་ཐིག99ཡོད་ལ། དེའི་ཁྲོད་སྤྱི་སྤྱོད་རླངས་འཁོར་ཆེ་གྲས་ཀྱི་ལམ་ཐིག44དང་སྤྱི་སྤྱོད་རླངས་འཁོར་ཆུང་གྲས་ཀྱི་ལམ་ཐིག42ཡོད་ཅིང་། གཏན་འཁེལ་འགྲུལ་སྐྱེལ་ལམ་ཐིག13བཅས་ཡོད། མཚོ་བྱང་བོད་རིགས་རང་སྐྱོང་ཁུལ་གྱི་ཡུལ་ཚོ་དང་གྲོང་རྡལ30དང་སྲིད་འཛིན་སྡེ་བ214འགྲུལ་སྐྱེལ་བྱེད་ཚད་བརྒྱ་ཆའི་བརྒྱར་སླེབས་པ་དང་། སྡེ་བར་འབྲེལ་ཚད་བརྒྱ་ཆའི་བརྒྱར་སླེབས་པ་མངོན་འགྱུར་བྱུང་ནས། མང་ཚོགས་ཀྱིས་སྒོར་བུད་མ་ཐག་ལམ་མཐོང་ཐུབ་པ་དང་། རླངས་འཁོར་ལ་འདུག་བདེ་བ། མྱུར་སྐྱེལ་དངོས་ཟོག་དུས་ལྟར་ལེན་ཐུབ་པའི་སྟབས་བདེ་གང་མང་ལོངས་སྤྱོད་བྱེད་ཐུབ། དུས་མཉམ་དུ། འགྲིམ་འགྲུལ་སྐྱེལ་འདྲེན་ཁྱབ་ཁོངས་ཀྱི་གཞི་རྒྱ་ཆེ་བའི་སྒྲིག་ཆས་གསར་སྒྱུར་དང་འཛད་སྤྱོད་དངོས་རྫས་རྙིང་ཚབ་གསར་བརྗེའི་བྱ་བ་ནུས་ཤུགས་ཡོད་རྒུས་སྤེལ་ཏེ། ཞིང་ཆེན་རིམ་པའིལས་གཞིའི་མ་དངུལ་སྒོར་བྱེ་བ་གཉིས་ས་ཡ་བདུན་འབུམ་བདུན་གྱི་མ་དངུལ་རྫོང་བཞི་ལ་གཏོང་སྤྲོད་བྱས། ཁུལ་ཁོངས་ཀྱི་གཞི་རྒྱ་ཆེ་བའི་སྒྲིག་ཆས་ཀྱི་གཞི་གྲངས་གསར་སྒྱུར་བྱ་བ་ནན་ཏན་གྱིས་བསྒྲུབས་པ་དང་། ཁ་གསབ་རླངས་འཁོར266དང་ཁ་གསབ་མ་དངུལ་སྒོར་བྱེ་བ་གཅིག་ས་ཡ་གཅིག་འབུམ་དགུ་ཁྲི་བཞི་དང་སྟོང་ལྔ་གཏོང་སྤྲོད་བྱས།

མདོ་ལ་རྫོང་གི་ཆིན་དབྱང་ཀིའུ་གཞུང་ལམ་དང་། མིན་ཡོན་ཧོས་རིགས་རང་སྐྱོང་རྫོང་གི་ཐིའུ་ཐང་སྡེ་བའི་གཞུང་ལམ་སོགས་གྲོང་གསེབ་ཡུལ་སྐོར་གཞུང་ལམ་ཁག་ཅིག་འཛུགས་གྲུབ་བྱས་རྗེས། སྡེ་བའི་འགྲིམ་འགྲུལ་ཇེ་མང་དུ་བཏང་བར་མ་ཟད། ཡུལ་སྐོར་ཐོན་ཁུངས་དང་ཁྱད་ལྡན་ཐོན་ལས་འདྲེས་པར་བྱས་ཏེ། གྲོང་གསེབ་དར་སྤེལ་ཐད་རྒྱུན་མི་ཆད་པའི་སྟོབས་ཤུགས་ནུས་ལྡན་འདོན་སྤྲོད་བྱས། ཤྭ་མོ་སེར་པོ་དང་། གྲོ་མ། ཞོ་སོགས་ཁྱད་ལྡན་ཐོན་རྫས་མིང་གྲགས་ཚད་རྒྱུན་ཆད་མེད་པར་ཇེ་མཐོར་བཏང་ཞིང་། གཞུང་ལམ་འགྲམ་རྒྱུད་ཀྱི་ཞིང་པའི་སྤྲོ་སྐྱིད་ཟ་ཁང་དང་འབྲོག་ཁྱིམ་སྤྲོ་སྐྱིད་ཟ་ཁང་སོགས་ཇེ་མང་དུ་སོང་ནས། རོང་འབྲོག་མང་ཚོགས་ཀྱི་ཡོང་སྒོ་འཕར་ནས་ཕྱུག་པོར་འགྱུར་བར་སྐུལ་འདེད་ནུས་ལྡན་བཏང་།