མགོ་ལོག་ཁུལ་གྱི་ལོ་སྟོད་དྲ་ལམ་མགོ་སྐོར་གྱོད་དོན་ཐོ་འགོད་དང་གྱོང་གུད་བྱུང་ཚད་དུས་མཉམ་ལས་བརྒྱ་ཆའི་དྲུག་ཅུ་མར་ཆགས།

ད་ལོར།  མགོ་ལོག་བོད་རིགས་རང་སྐྱོང་ཁུལ་སྤྱི་བདེ་ཅུའུ་ཡིས“དྲ་ལམ་མགོ་སྐོར་གྱི་འགོག་སྲུང་བྱེད་ཐབས་ལ་སློབ་སྦྱོང་བྱས་ཏེ་འགན་འཁྲི་ནན་སྲུང་བྱེད”ཅེས་པའི་བརྗོད་དོན་ལ་རྐང་བཙུགས་ཏེ།  དྲ་ལམ་དང་དྲ་ལམ་མ་ཡིན་པའི་སྨྱན་བྱད་བརྒྱུད་ལམ་ལ་བརྟེན་ནས།  མགོ་སྐོར་གཡོ་ལེན་ལ་རྒོལ་བའི་དྲིལ་བསྒྲགས་སློབ་གསོ་སྤེལ།  ད་ལོའི་ལོ་སྟོད་དུ།  མགོ་ལོག་ཁུལ་གློག་འཕྲིན་དྲ་རྒྱའི་མགོ་སྐོར་གྱོད་དོན་གྱི་ཐོ་འགོད་བྱས་ཚད་དུས་མཉམ་ལས་བརྒྱ་ཆའི61.49མར་ཆགས་ཡོད།  གྱོད་དོན་ལས་གྱོང་གུད་བྱུང་བའི་སྒོར་གྲངས་འབུམ་བདུན་ཁྲི་ལྔ་སྟོང་གཅིག་དྲུག་བརྒྱ་ཡིན་ལ།  དུས་མཉམ་ལས་བརྒྱ་ཆའི60.98མར་ཆགས་ཡོད།

དྲ་ལམ་མགོ་སྐོར་གྱི་ཁྲིམས་འགལ་བྱ་སྤྱོད་ལ་འགོག་སྲུང་ནུས་ལྡན་བྱེད་པ་དང་།  མི་དམངས་མང་ཚོགས་ཀྱི་མགོ་སྐོར་ལ་ངེས་ཟིན་དང་སྔོན་འགོག་བྱེད་པའི་ནུས་པ་མཐོར་འདེགས་གཏོང་ཆེད།  ད་ལོའི་ལོ་སྟོད་དུ།  མགོ་ལོག་ཁུལ་སྤྱི་བདེ་ཅུའུ་ཡིས《གློག་འཕྲིན་དྲ་རྒྱའི་མགོ་སྐོར་གྱི་གནད་ཁེལ་དྲིལ་བསྒྲགས་ཇུས་གཞི》ཞེས་པ་བཏོན་ཏེ།  ཁུལ་ཡོངས་ཀྱི་སྤྱི་བདེ་ལས་ཁུངས་ཀྱིས་ནང་དོན་གསར་བ་དང་མང་ཚོགས་ཉན་སྤྲོ་བའི་གྱོད་དཔེ་དབྱེ་ཞིབ་དང་དྲིས་ལན་འདེབས་པ་སོགས་ཀྱི་རྣམ་པས་དྲ་ལམ་བྱེད་སྒོ་སྤེལ།  དུས་མཚུངས་སུ།  བྱུང་ཐེངས་མང་བའི་དྲ་རྒྱའི་མགོ་སྐོར་གྱི་རིགས་ལ་ཆེད་དུ་འགོག་སྲུང་ཐབས་ལམ་བཟོ་བ་དང་།  རྒྱ་བོད་སྐད་གཉིས་ཀྱི་ལམ་ནས་མགོ་སྐོར་གཡོ་ལེན་ལ་ངོ་རྒོལ་བྱེད་པའི་ཆེད་དོན་ལེ་ཚན་བཀོད་སྒྲིག་བྱེད་པ།  མགོ་སྐོར་གཡོ་ལེན་གྱི་བརྡ་འཕྲིན་སྐུར་བ།  མང་ཚོགས་ལ་ཁྲིད་སྟོན་བྱས་ཏེ“རྒྱལ་ཁབ་མགོ་སྐོར་གཡོ་ལེན་ལྟེ་གནས”APPཕབ་ལེན་བྱས།

དེ་མིན།  མུ་མཐུད་དུ་མགོ་སྐོར་གཡོ་ལེན་གྱི་དྲིལ་བསྒྲགས་ཁྱབ་ཁོངས་ཆེ་རུ་བཏང་བ་དང་།  མགོ་ལོག་ཁུལ་སྤྱི་བདེ་ལས་ཁུངས་ཀྱིས་འབྲེལ་ཡོད་ལས་ཁུངས་དང་མཉམ་འབྲེལ་སྒོས།  ཏང་སྲིད་ལས་ཁུངས་དང་།  ཁེ་ལས།  གློག་འཕྲིན་གཉེར་སྐྱོང་ཚོང་པ་སོགས་གཙོ་གནད་ས་ཁུལ་དུ་བརྙན་ཤེལ་ཆེ་བའི་སྟེང་ནས་དྲིལ་བསྒྲགས་བརྙན་ཐུང་གཏོང་བ་དང་བརྡ་ཁྱབ་སྦྱོར་བ་སོགས་ཀྱི་བྱེད་ཐབས་ལ་བརྟེན་ནས།  བརྒྱུད་ལམ་མི་འདྲ་བ་དང་རྣམ་པ་མི་འདྲ་བའི་སྒོ་ནས་དྲིལ་བསྒྲགས་བྱས།  མིག་སྔའི་བར་དུ།  ཁྱོན་བསྡོམས་དྲ་ལམ་དྲིལ་བསྒྲགས་ཐེངས200ལྷག་དང་དྲ་ལམ་མ་ཡིན་པའི་དྲིལ་བསྒྲགས་ཐེངས300ལྷག་སྤེལ་ཡོད།

མགོ་ལོག་ཁུལ་སྤྱི་བདེ་ཅུའུ་ཉེས་དོན་ཉེན་རྟོག་རུ་ཁག་གི་རུ་གཙོ་གཞོན་པ་ཀྲིག་ཕེའེ་རུང་གིས་བསྟན་དོན།  ཁོ་ཚོས་མུ་མཐུད་དུ་དྲིལ་བསྒྲགས་བྱེད་ཐབས་ལེགས་སྒྱུར་དང་།  མི་དམངས་ཀྱི་ལྡོག་ལན་ཟུང་འབྲེལ་སྒོས་དྲིལ་བསྒྲགས་ནང་དོན་ཕུན་སུམ་ཚོགས་པར་བཏང་སྟེ། མགོ་སྐོར་གཡོ་ལེན་དྲིལ་བསྒྲགས་ཀྱི་འགུག་ཤུགས་དང་དངོས་ཕན་རང་བཞིན་མཐོར་འདེགས་བཏང་ཡོད་པར་མ་ཟད།  སྤྱི་ཚོགས་བརྟན་ལྷིང་ལ་སྲུང་སྐྱོབ་དང་མི་དམངས་ཀྱི་རྒྱུ་ནོར་བདེ་འཇགས་ལ་འགན་སྲུང་བྱས་ཏེ།  མང་ཚོགས་ཀྱི་སྒོར་ཁུག་ལེགས་པར་སྲུང་ཡོད་ཟེར།