མཚོ་ལྷོ་ཁུལ་གྱིས“མཚོ་སྔོན་པོ་རྟགས་མའི”གཟེབ་གྲུག་གདན་ཞུའི་འགྲན་བསྡུར་སྤེལ།

ཟླ8པའི་ཚེས18ཉིན།  མཚོ་ལྷོ་བོད་རིགས་རང་སྐྱོང་ཁུལ“མཚོ་སྔོན་པོ་རྟགས་མའི”གཟེབ་གྲུག་གདན་ཞུའི་འགྲན་བསྡུར་སྐབས་དང་པོ་གུང་ཧོ་རྫོང་མདའ་འཕེན་ལས་རྩལ་ཁང་དུ་སྤེལ་འགོ་བརྩམས།

ཐེངས་འདིའི་འགྲན་བསྡུར་དུས་ཚོད་ནི་ཟླ8པའི་ཚེས18ནས་ཚེས25བར་ཡིན་ལ།  དེའི་ཁྲོད་ཞིང་ཆེན་ནང་ཁུལ་གྱི་རུ་ཁག9དང་།  ཞིང་ཆེན་ཕྱིའི་རུ་ཁག7ཡོད།  ས་གནས་སོ་སོའི་རུ་ཁག་དག་གནས་འདིར་འཛོམས་ཏེ་མི་རིགས་མཐུན་སྒྲིལ་དང་ལུས་རྩལ་འགྲན་བསྡུར་ཟུང་འབྲེལ་བྱས་ཏེ།  ཞིང་ལས་དང་ལུས་རྩལ།  རིག་གནས་ཡུལ་སྐོར།  ཚོང་ལས་བཅས་ཐོན་ལས་ཀྱི་སྤུས་ཚད་མཐོ་བའི་འཕེལ་རྒྱས་སྲོག་ཤིང་དུ་བཟུང་ནས།  གཟེབ་གྲུག་འགྲན་བསྡུར་ལ་བརྟེན་ནས་ས་ཁུལ་སོ་སོའི་མཐུན་སྒྲིལ་ལ་ཤུགས་སྣོན་དང་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་སྲ་བརྟན་དུ་བཏང་།

གླེང་རིན་ཡོད་པ་ཞིག་ནི།  ཐེངས་འདིའི་འགྲན་བསྡུར་གྱི་སྤྱིའི་བྱ་དགའི་སྒོར་འབུམ་གཉིས་དང་ཁྲི་བདུན་སྟོང་བཞིར་སླེབས་ཡོད་ལ། དེའི་ཁྲོད་ཨང་པོའི་བྱ་དགའ་སྒོར་འབུམ་གཅིག་དང་ཁྲི་གསུམ།  ཨང་གཉིས་པར་སྒོར་ཁྲི་དྲུག  ཨང་གསུམ་པར་སྒོར་ཁྲི་བཞི།  ཨང་བཞི་བར་སྒོར་ཁྲི་གཉིས་བཅས་ཡོད།  ཨང་ལྔ་བ་ནས་ཨང་བརྒྱད་པའི་བར་སོ་སོར་སྒོར་ཁྲི་གཅིག་དང་སྒོར་སྟོང་བརྒྱད།  སྒོར་སྟོང་བཞི།  སྒོར་སྟོང་གཉིས་བཅས་ཀྱི་བྱ་དགའ་ཡོད།

ཉེ་བའི་ལོ་འདི་འགའི་རིང་།  མཚོ་ལྷོ་ཁུལ་རིག་གནས་ལུས་རྩལ་ཡུལ་སྐོར་རྒྱང་སྒྲོག་བརྙན་འཕྲིན་ཅུའུ་ཡིས་ཞིང་ལས་དང་ལས་རྩལ། རིག་གནས། ཡུལ་སྐོར།  ཚོང་ལས་བཅས་ལས་རིགས་ལྔ་མཉམ་འདྲེས་བྱེད་པ་རྒྱུན་འཁྱོངས་བྱས་ཏེ།  ལུས་རྩལ་འགྲན་བསྡུར་ལ་ལྟ་ཞོར་ཡུལ་སྐོར་ལ་འགྲོ་བ་དང་།  གློག་བརྙན་ལ་ལྟ་ཞོར་ཡུལ་སྐོར་ལ་འགྲོ་བ།  རིག་གནས་བྱེད་སྒོ་ལ་ལྟ་ཞོར་ཡུལ་སྐོར་ལ་འགྲོ་བ་སོགས་ཀྱི་བྱ་བ་མུ་མཐུད་དུ་ཞིབ་ཚགས་ཅན་དུ་བཏང་ནས།  མཚོ་སྔོན་པོ་རྟགས་མའི་རིམ་བསྟར་ལུས་རྩལ་འགྲན་བསྡུར་གྱི་ཟུང་རྟགས་བསྐྲུན་པ་དང་།  མཚོ་སྔོན་པོ་རྟགས་མའི་རྟ་རྒྱུག་འགྲན་བསྡུར།  མདའ་འཕེན་འགྲན་བསྡུར།  དབྱུག་རྩེད་སྤོ་ལོའི་གདན་ཞུའི་འགྲན་བསྡུར།  གཟེབ་གྲུག་གདན་ཞུའི་འགྲན་བསྡུར་སོགས་སྤེལ་ཏེ།  དམངས་ཡོངས་ཀྱི་ལུས་རྩལ་སྤྲོ་སེམས་འཕེལ་བར་བྱེད་པ་དང་། དེས་དམངས་ཡོངས་ཀྱི་ལུས་རྩལ་སྦྱོང་བརྡར་ལས་རིགས་ཀྱི་འཕེལ་རྒྱས་ལ་སྐུལ་འདེད་བཏང་ནས། དེ་དང་མཉམ་དུ་འགྲན་བསྡུར་གྱི་ཤུགས་རྐྱེན་ལ་བརྟེན་ནས་མཚོ་ལྷོ་ཁུལ་ལ་སྙན་གྲགས་རྒྱས་སུ་འཇུག་རྒྱུ་རེད།