མཚོ་སྔོན་ཞིང་ཆེན་ཞོད་འགོག་བཀོད་འདོམས་པུའུ་ཡིས་ཉེ་ལམ་གྱི་ཞོད་འགོག་བྱ་བར་ཡང་བསྐྱར་བཀོད་སྒྲིག་བྱས།

ཟླ8པའི་ཚེས18ཉིན། གསར་འགོད་པས་མཚོ་སྔོན་ཞིང་ཆེན་འཕྲལ་བསྟུན་དོ་དམ་ཐིན་ནས་རྒྱུས་ལོན་བྱུང་བ་ལྟར་ན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཞོད་འགོག་གནོད་སྐྱོབ་བྱ་བའི་མཛུབ་སྟོན་གལ་ཆེན་གྱི་དགོངས་དོན་ལག་བསྟར་གཏིང་ཟབ་བྱེད་པ་དང་། རྒྱལ་ཁབ་ཞོད་འགོག་སྤྱི་ཁྱབ་གཞུང་སྒྲུབ་ཁང་དང་མཚོ་སྔོན་ཞིང་ཆེན་ཏང་ཨུ་དང་། ཞིང་ཆེན་སྲིད་གཞུང་གི་ཇུས་ཆོད་བཀོད་སྒྲིག་ཕྱོགས་ཡོངས་ནས་དངོས་འབེབས་བྱེད་ཆེད། ཛ་དྲག་དང་རྙོག་འཛིང་གི་ཞོད་འགོག་གནས་བབ་ལ་ཁ་གཏད་དེ། མཚོ་སྔོན་ཞིང་ཆེན་ཞོད་འགོད་བཀོད་འདོམས་པུའུ་ཡིས་ཆབ་སྲིད་ཀྱི་རང་རྟོགས་མཐོན་པོ་དང་འགན་འཁྲིའི་ཁག་ཁུར་ལ་བརྟེན་ནས། ཁུལ་ཁོངས་གཙོ་བོའི་བཀོད་གཏོང་བཀོད་འདོམས་རྐྱེན་སྲོལ་མུ་མཐུད་ལེགས་སྒྱུར་བྱེད་པ་དང་། འགོག་སྲུང་བྱེད་ཐབས་ཁག་དངོས་འབེབས་དོན་འཁྱོལ་ཡོང་བར་ནུས་ཤུགས་ཡོད་རྒུས་སྐུལ་འདེད་བཏང་ནས། མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་བདེ་འཇགས་ལ་དངོས་སུ་སྲུང་སྐྱོང་བྱས།

རྒྱུས་ལོན་པ་ལྟར་ན། ཟླ8པའི་ཚེས17ཉིན། ནང་སོག་ཀུའུ་པ་ཡན་ནོ་ཨར་གྲོང་ཁྱེར་དུ་ཆུ་ལོག་གི་གནོད་འཚེ་ཐེབས་ནས་མི་སྣར་ཤི་རྨས་ཚབས་ཆེན་བཟོས། ཞིང་ཆེན་ཞོད་འགོག་བཀོད་འདོམས་པུའུ་ཡིས་མྱུར་དུ་དོགས་ཟོན་བྱས་ཏེ། ཞོད་དུས་བདེ་འཇགས་འགོག་སྲུང་བྱ་བ་ལེགས་པོར་སྒྲུབ་པའི་བྲེལ་མྱུར་བརྡ་ཐོ་མྱུར་དུ་དཔར་ནས་བཀྲམས་པ་དང་། ཆབ་སྲིད་ཀྱི་ལངས་གནས་མཐོར་འདེགས་དང་འགན་འཁྲི་ནན་དཀྲི། འགོག་སྲུང་བྱེད་ཐབས་ཤུགས་དྲག་ཏུ་གཏོང་བ་སོགས་ཕྱོགས་སོ་སོའི་ཐད་ལ་བླང་བྱ་གསལ་བོ་བཏོན་པར་མ་ཟད། ཤུགས་དྲག་བདུན་གྱི་ཆེད་དམིགས་བྱེད་ཐབས་བཀོད་སྒྲིག་བྱས་ལ། མཚོ་སྔོན་གྱི་དོན་དངོས་དང་དམ་པོར་སྦྲེལ་ཏེ། གནམ་གཤིས་དང་ཆུ་དཔྱད་སོགས་སྡེ་ཁག་མང་པོ་མཉམ་འབྲེལ་གྱི་ཞིབ་སྡུར་རྐྱེན་སྲོལ་གཞིར་བཟུང་ནས། འགུལ་རྣམ་བཀོད་གཏོང་ཤུགས་དྲག་ཏུ་བཏང་། ལྟ་ཞིབ་སྔོན་བརྡ་དང་ཆ་འཕྲིན་བརྒྱུད་སྤྲོད། མང་ཚོགས་ལ་བརྡ་གཏོང་བ་བཅས་ཀྱི་རིམ་པ་གསུམ་གྱི་འགོག་སྡོམ་མ་ལག་བཙུགས་ཏེ། སྔོན་བརྡའི་ཕན་ནུས་དངོས་སུ་ཇེ་དྲག་ཏུ་བཏང་། རུ་བ་སྤོ་བ་དང་མཛེས་ལྗོངས་ཁུལ། བཟོ་སྐྲུན་ལས་ཡུལ་སོགས་དམིགས་བསལ་ས་ཁུལ་དམིགས་སུ་བཟུང་སྟེ། གནོད་པ་ཐེབས་སྲིད་པའི་མང་ཚོགས་ལ་ཆུ་མ་ཡོང་གོང་གི་རགས་རྒྱག་པའི་ཉེན་གཡོལ་བྱ་བར་ཤུགས་བསྣན། ཆུ་ལོག་ས་གཤིས་གནོད་འཚེ་རེ་རེ་བཞིན་ཞིབ་བཤེར་བྱེད་པའི་ཞིབ་ཚགས་ཀྱི་གསལ་ཐོ་བཙུགས་ཏེ། མངོན་མེད་རྐྱེན་ངན་གྱི་འགུལ་རྣམ་པ་མེད་པར་བཟོ་རྒྱུ་རེད། མཚོ་སྔོན་གྱི་སྐྱེ་ཁམས་ཁོར་ཡུག་དང་། མཐོ་སྒང་གི་སྒར་ས་ཉིན་རེ་བཞིན་ཇེ་མང་དུ་འགྲོ་བཞིན་པའི་དུས་དང་བསྟུན་ནས། བདག་ཁོངས་དོ་དམ་འགན་འཁྲི་དང་ལས་རིགས་སྒྲིག་སྲོལ་གསལ་བོར་འདོན་པ་དང་། ཕྱི་རོལ་དུ་མཚན་བསྐྱལ་བའི་བདེ་འཇགས་དོ་དམ་བྱ་བ་ཤུགས་དྲག་ཏུ་གཏོང་དགོས། ཞིང་ཆེན་དང་གྲོང་ཁྱེར། རྫོང་བཅས་རིམ་པ་གསུམ་གྱི་འཕྲལ་བསྟུན་སྟོབས་ཤུགས་གཅིག་འདོམས་བྱས་ཏེ། ཞོད་འགོག་ཉེན་སྐྱོབ་རོགས་སྐྱོབ་ཀྱི་གྲ་སྒྲིག་བྱ་བ་ཡག་པོར་བསྒྲུབ་དགོས། འཕྲལ་བསྟུན་ཆ་འཕྲིན་རྟེན་གཞིའི་ས་ཚིགས་དང་འཁོར་སྐར་ཆ་འཕྲིན་སྒྲིག་ཆས་ཀྱི་བཀོད་པ་དམ་དུ་སྦྲེལ་ནས། ཁུལ་ཁོངས་ཡོངས་ཀྱི་ཆ་འཕྲིན་གེགས་མེད་ལ་འགན་སྲུང་བྱ་བར་ཤུགས་སྣོན་རྒྱུ་རེད།

ཞིང་ཆེན་ཞོད་འགོད་བཀོད་འདོམས་པུའུ་ཡིས་ཞོད་དུས་ཀྱི་འགོག་སྲུང་ཁྱབ་ཁོངས་གཙོ་བོ་གནད་འཁེལ་སྒོས་གསལ་བོར་བགར་ཏེ། མཛེས་ལྗོངས་ཁུལ་དང་འཛུགས་སྐྲུན་ལས་ཡུལ། གཙང་འགྲམ་གྱི་སྡེ་བ། གཏེར་རི་ཁུལ། གྲོང་ཁྱེར་གྱི་ཆུ་ལོག་འབྱུང་སླ་བ་བའི་གནས། དགོན་པ་སོགས་འགོག་སྲུང་དོ་དམ་གྱི་ཁྱབ་ཁོངས་གཙོ་བོའི་ཁྲོད་འཇོག་རྒྱུ་རེད། དུས་མཉམ་དུ། ཕྱི་རོལ་དུ་སྒར་རྒྱག་མཁན་དང་། ཡུལ་སྐོར་པ། རུ་སྤོ་འབྲོག་དམངས། ལས་ཡུལ་ལས་བཟོ་བ། སྦྲང་རྩི་གསོག་མཁན་སོགས་འཁོར་རྒྱུགས་ཚོགས་ཁག་གནོད་སྐྱོན་སྔོན་བརྡའི་འབོད་སྐུལ་ཟུང་གི་མ་ལག་ཁྲོད་འཇོག་རྒྱུ་རེད། དུས་ཚོད་རེའི་ཆར་འབབ་ཚད་ཧོ་སྨི15ལས་བརྒལ་བའི་ས་ཁུལ་དུ་བཀོད་གཏོང་བྱ་བ་གནད་དུ་འཁེལ་བར་བྱས་ནས།  རིམ་པ་སོ་སོའི་འགོག་སྲུང་བཀོད་འདོམས་འགན་འཁྲི་ཇེ་དམ་དུ་བཏང་། རྣམ་པ་སྣ་ཚོགས་ཀྱི་སྔོན་བརྡའི་མ་ལག་བརྒྱུད་དེ། འབོད་སྐུལ་ཟུང་གི་རྐྱེན་སྲོལ་དངོས་འབེབས་ནན་མོ་བྱེད་པ་དང་། རིམ་པ་སོ་སོའི་ཞོད་འགོག་འགན་ཁུར་པས་ལས་འགན་ལེགས་འགྲུབ་དང་ཐག་གཅོད་ལེགས་པོ་བྱེད་པར་ཁག་ཐེག་བྱས་ནས། གོང་འོག་མཉམ་འགུལ་གྱི་ཕན་ནུས་མཐོ་བའི་འཕྲལ་བསྟུན་རྣམ་པ་གྲུབ་པར་བྱས།

ཞོད་འགོག་བྱེད་ཐབས་དེ་བཀོད་སྒྲིག་གི་རྣམ་པ་ནས་ཕན་འབྲས་དངོས་སུ་འགྱུར་བར་སྐུལ་འདེད་གཏོང་ཆེད། ཟླ8པའི་ཚེས17ཉིན། ཞིང་ཆེན་ཞོད་འགོག་གཞུང་སྒྲུབ་ཁང་དང་། ཞིང་ཆེན་འཕྲལ་བསྟུན་དོ་དམ་ཐིན་གྱིས་སྣེ་ཁྲིད་ནས་ཞིང་ཆེན་གནམ་གཤིས་ཅུའུ་དང་། ཞིང་ཆེན་ཆུ་བེད་ཐིན། ཞིང་ཆེན་རང་བྱུང་ཐོན་ཁུངས་ཐིན། ཞིང་ཆེན་རིག་གནས་དང་ཡུལ་སྐོར་ཐིན། ཞིང་ཆེན་འགྲིམ་འགྲུལ་སྐྱེལ་འདྲེན་ཐིན། ཞིང་ཆེན་ནགས་ལས་དང་རྩྭ་ཐང་ཅུའུ་སོགས་སྡེ་ཁག་དང་། གྲོང་ཁྱེར་དང་ཁུལ་སོ་སོའི་བཀོད་འདོམས་པུའུ་རྩ་འཛུགས་བྱས་ནས། ཞིང་ཆེན་ཡོངས་ཀྱི་ཞོད་དུས་བདེ་འཇགས་འགོག་སྲུང་བྱ་བའི་བརྙན་རིས་བཀོད་གཏོང་གྲོས་ཚོགས་བསྡུས། ཞིང་ཆེན་ཞོད་འགོག་གཞུང་སྒྲུབ་ཁང་གིས་ཆར་བ་དྲག་པོའི་གནས་ཚུལ་འགོག་སྲུང་ཁྱབ་ཁོངས་ཐད་ནས་ཡང་བསྐྱར་སྐུལ་སློང་དང་ཡང་བསྐྱར་བཀོད་སྒྲིག་བྱས་པར་མ་ཟད། འགན་འཁྲི་ཇེ་དམ་དུ་བཏང་ཞིང་། སྡེ་ཁག་མཐུན་སྦྱོར་དང་གོང་འོག་མཉམ་འགུལ་གྱི་མཉམ་ཤུགས་ཆེན་མོ་སྔར་ལས་གཅིག་སྡུད་བྱས་ཏེ། ཚད་གཞི་སྔར་ལས་མཐོན་པོ་དང་སྔར་ལས་ཏན་ཏིག་གི་བྱེད་ཐབས་ལ་བརྟེན་ནས་ཞོད་དུས་ཀྱི་བདེ་འཇགས་འགོག་མཚམས་ཇེ་བརྟན་དུ་བཏང་ལ། མི་དམངས་མང་ཚོགས་ཀྱི་ཚེ་སྲོག་རྒྱུ་ནོར་བདེ་འཇགས་ལ་ནུས་ཤུགས་ཡོད་རྒུས་སྲུང་སྐྱོང་བྱས་ནས་ཞོད་དུས་བདེ་འཇགས་ཡོང་བར་ཁག་ཐེག་བྱས།