མཚོ་ལྷོ་ཁུལ་གྱིས་སྐྱེ་ཁམས་ལ་བརྟེན་ནས་རྨ་ཆུའི་སྟོད་རྒྱུད་ཀྱི་ལྗང་མདོག་སྲུང་སྐྱོང་བྱས་པ།

ཡོང་ཁུངས། མཚོ་ལྷོ་ཁུལ་མཉམ་འདྲེས་སྨྱན་སྦྱོར་ལྟེ་གནས།

      ཚལ་རྔ་འགག་ཆུ་མཛོད་ནི་མཚོ་བོད་མཐོ་སྒང་གི་ཤར་བྱང་དུ་གནས་པ་དང་། རྨ་ཆུའི་བཞུར་རྒྱུན་ཡང་མཚོ་སྔོན་པོའི་མཚམས་ཚིགས་གལ་ཆེན་ཞིག་ཀྱང་ཡིན། ཆུ་མཛོད་ཀྱི་མཐའ་འཁོར་སྐྱེ་ཁམས་ཉམས་ཞན་ཡིན་པ་དང་། བྱེ་ཐང་ཅན་དང་ས་ཆུ་ཤོར་བའི་གནས་བབ་ལ་བཅོས་སྐྱོང་གང་ལེགས་བྱ་ཆེད། 2021ལོར་མཚོ་སྔོན་ཞིང་ཆེན་གྱིཆེས་ཐོག་མའི་ཀྲུང་དབྱང་ནོར་སྲིད་ཀྱིས་རྒྱབ་སྐྱོར་བྱས་པའི་རྒྱལ་ཁོངས་ལྗང་སྒྱུར་དཔེ་སྟོན་ཚོད་ལྟའི་ལས་གཞི་མགོ་བརྩམས་ཤིང་། མ་དངུལ་སྒོར་དུང་ཕྱུར3བཏང་ནས་གུང་ཧོ་དང་ཀོས་ནན་རྫོང་དུ་ས་མུའུ་ཁྲི29.75ཡི་སྐྱེ་ཁམས་ཉམས་གསོ་བྱས་པ་རེད། 

     གུང་ཧོ་རྫོང་རང་བྱུང་ཐོན་ཁུངས་དང་ནགས་ལས་རྩྭ་ཐང་ཅུའུ་ཡི་རོགས་སྒྲུབ་བཟོ་སྐྲུན་པ་ཀན་ཁྲིན་ཡན་གྱིས་བཤད་རྒྱུར། ཚལ་རྔ་འགག་ཆུ་མཛོད་ནི་རྨ་ཆུའི་སྟོད་རྒྱུད་ཀྱི་ཆུ་གསོག་ས་ཚིགས་གལ་ཆེན་ཞིག་ཡིན་ལ།  མཐའ་འཁོར་གྱི་སྔོ་ཁེབས་ཚད་ཉམས་ཞན་དུ་གྱུར་བ་དེས་ས་ཆུ་ཤོར་ཞིང་ཆུ་མཛོད་ལ་ཤུགས་རྐྱེན་ཐེབས་པས།  ལས་གཞི་ལག་བསྟར་མ་བྱས་གོང་དུ་ས་ཁོངས་ཁ་ཤས་བྱེ་མར་གྱུར་ཞིང་ཆར་ཆུའི་འདམ་ཟགས་ཀྱི་གནད་དོན་ལ་གཞིགས་ནས་བཟོ་སྐྲུན་ལ་སྐུལ་འདེད་བྱས་ཏེ་གཙང་བོའི་མགོ་ཁུངས་ལ་སྦག་བཙོག་མེད་ཅིང་རྨ་ཆུའི་ཆུ་རྒྱུན་གྱི་སྲུང་སྐྱོང་བྱ་བ་ལེགས་པོར་བསྒྲུབ་པ་ཡིན་ཟེར།

     སྔོ་ཁེབས་ཚད་ཇེ་མང་དང་ས་ཆུ་ཤོར་བའི་གནད་དོན་ལ་དམིགས་ནས་གུང་ཧོ་རྫོང་གིས་ཡུལ་བབ་དང་བསྟུན་ནས་ཚན་རྩལ་ཁྱབ་སྤེལ་དང་། མཐོ་སྒང་གི་ཆུ་མཛོད་སྐྱེ་ཁམས་ཉམས་གསོའི་ཐབས་ལམ་འཚོལ་ཞིབ་བྱས་ནས་སྔོ་ཁེབས་ལ་ཆུ་བཏང་ནས་སྔར་གྱི་བྱེ་ཐང་ལྗང་མདོག་ཅན་དུ་བསྒྱུར་ནས་མཐོ་སྒང་གི་སྐྱེ་ཁམས་ལ་གསོན་ཤུགས་གསར་བ་བསྩལ་ཡོད།

     གུང་ཧོ་རྫོང་རང་བྱུང་ཐོན་ཁུངས་དང་ནགས་ལས་རྩྭ་ཐང་ཅུས་ཀྱི་བཟོ་སྐྲུན་རོགས་སྒྲུབ་པ་ཀན་ཁྲེང་ཡན་གྱིས་བཤད་རྒྱུར། ང་ཚོས་འདས་ཟིན་པའི་ཉམས་མྱོང་སྟེང་ནས་བཤད་ན། བསྡོམས་པས་བྱེ་འགོག་ཐབས་ཤེས་རིགས་བཞི་ཚོད་ལྟ་བྱས་ཤིང་། ཆེས་འོས་ཤིང་འཚམ་པ་ནི་རྩྭ་འདེབས་བྱེ་འགོག་ཡིན་ལ། དེ་ནི་རྒྱལ་ཡོངས་ཀྱི་ས་གནས་སོ་སོའི་ཅང་སུའུ་དང་། ཧྲན་ཏུང་། ཉིང་ཞ། སི་ཁྲོན་སོགས་ནས་ནང་འདྲེན་བྱས་པ་ཡིན། གུང་ཧོ་ས་ཁུལ་དུ་ཆེས་འོས་ཤིང་འཚམ་པ་ཡང་ཝུའུ་ལྕང་དང་ཉུན་རྩྭ་ཡིན་ལ། འདི་ནི་ད་ལོའི་ཟླ་དྲུག་པར་བཏབ་པའི་ཉུན་རྩྭ་ཡིན་ཟེར།  

ལོ་གཉིས་རིང་གི་འཛུགས་སྐྲུན་བྱས་པ་བརྒྱུད། ལས་གཞི་འདི2022 ལོའི་ཟླ 9པར་ལེགས་འགྲུབ་བྱུང་བ་དང་། དེའི་རྗེས་སུ་རྒྱལ་ཁབ་དང་ཞིང་ཆེན། ཁུལ་རིམ་པའི་ཞིབ་བཤེར་རྩིས་ལེན་བྱས་པ་དང། ད་ལྟ་ཆུ་མཛོད་ཁུལ་གྱི་འགྲམ་གཉིས་སུ་སྐྱེ་ཁམས་འགྱུར་ལྡོག་གི་རྣམ་པ་གསལ་བོར་མངོན་ཡོད། མིས་བཟོས་ནགས་སྐྲུན་དེ70%དང་ནགས་རྩྭའི་ཁེབས་ཚད་ལས་གཞི5%ཡན་ལ་སླེབས་ཤིང་། སྔོན་ཆད་ཀྱི་བྱེ་མ་ཡང་ད་ལྟ་རིམ་བཞིན་སྔོ་ལྗང་གིས་ཁེབས་ཡོད། 

    གུང་ཧོ་རྫོང་ཐེ་ཀེ་ཤང་ཐེ་ཀེ་སྡེ་བའི་སྡེ་མི་བསོད་ནམས་རྡོ་རྗེ་ཡིས་བཤད་རྒྱུར། སྔོན་ཆད་ས་ཆ་འདིར་རླུང་གཡུག་ནས་བྱེ་མས་ཁེངས་ཡོད་མོད། ད་ལྟ་སྡོང་བོ་སྐྱེས་ཡོད་པས། ང་ཚོས་སྐོར་ཞིབ་བྱེད་སྐབས་རྒྱུན་དུ་དེ་ཕོ་དང་། རི་བོང་སོགས་མཐོང་ཐུབ་པས། སྐྱེ་ཁམས་ལ་དངོས་གནས་འགྱུར་ལྡོག་ཆེན་པོ་བྱུང་ཡོད་ཟེར།

     གུང་ཧོ་རྫོང་རང་བྱུང་ཐོན་ཁུངས་དང་ནགས་ལས་རྩྭ་ཐང་ཅུས་ཀྱི་བཟོ་སྐྲུན་རོགས་སྒྲུབ་པ་ཀན་ཁྲེང་ཡན་གྱིས་བཤད་རྒྱུར། ཉེ་བའི་ལོ་འགའི་རིང་། ང་ཚོས་འཕྲུལ་ཆས་དང་སྐྱེ་ཁམས་བཅོས་སྐྱོང་ཟུང་འབྲེལ་གྱི་རྣམ་པར་བརྟེན་ནས་སྔོན་ཆད་ཀྱི་བྱེ་ཐང་ལྗང་མདོག་ཅན་དུ་བསྒྱུར་ཞིང་། གུང་རྫོང་བཏུལ་ཐང་ས་ཁུལ་གྱི་སྤང་ལྗོངས་རྒྱ་ཁྱོན་སྔར་ལས་ཇེ་ཆེར་སོང་ཡོད། ལྟ་ཞིབ་ཚད་ལེན་ཁྲོད་ང་ཚོའི་ལས་གཞི་འདིས་སྔོ་ཁེབས་ཡང་བསྐྱར་སླར་གསོ་བྱུང་བ་མ་ཟད། འདབ་ཆགས་ཀྱང་ཇེ་མང་དུ་སོང་ཡོད་པ། འདི་ལས་བཏུལ་ཐང་གི་སྐྱེ་ཁམས་སྲུང་སྐྱོང་རིམ་བཞིན་ཉམས་གསོ་བྱས་ཡོད་པ་ཤེས་ཐུབ་ཟེར། 

     ཚལ་རྔ་འགག་ཆུ་མཛོད་ཀྱི་ལྗང་མདོག་གི་རྣམ་པ་ནི་རྨ་ཆུའི་སྟོད་རྒྱུད་ཀྱི་སྐྱེ་ཁམས་སྲུང་སྐྱོང་གི་གྲུབ་འབྲས་ཡིན་པ་མ་ཟད། རང་ཁུལ་གྱིས་སྐྱེ་ཁམས་འཛུགས་སྐྲུན་གྱི་འཐབ་ཇུས་ལག་བསྟར་བྱས་པའི་ཕན་འབྲས་ཀྱང་ཡིན། སྔོན་ཆད་ཀྱི་སྐྱེ་ཁམས་ཉམས་ཡིན་པ་ནས་ད་ལྟའི་ལྗང་མདོག་གི་སྐྱེ་ཁམས་རྣམ་པ་ནི་ནགས་རྩྭ་དང་སྡོང་ཕྲུག་རེ་རེ་ནས་མགོ་བརྩམས་ཏེ། ཁུལ་ཡོངས་ཀྱི་གོང་འོག་ཚང་མས་རྨ་ཆུའི་སྲུང་སྐྱོབ་ལ་འབད་བརྩོན་བྱས་པའི་ཆོད་སེམས་བརྟན་པོ་ལས་བྱུང་བ་ཡིན་ལ། ཚལ་རྔ་འགག་ཆུ་མཛོད་ཀྱི་སྐྱེ་ཁམས་བཅོས་སྐྱོང་གི་ཉམས་མྱོང་འདིས་རྨ་ཆུའི་འབབ་རྒྱུད་ཀྱི་སྐྱེ་ཁམས་སྲུང་སྐྱོབ་ལ་མཚོ་ལྷོའི་ཇུས་གཞི་འདོན་སྤྲོད་བྱས་པ་མ་ཟད། ད་ལྟའི་ལྗང་མདོག་གི་རྣམ་པ་ནི་མཚོ་ལྷོ་ཁུལ་གྱི་སྤུས་ཚད་མཐོ་བའི་འཕེལ་རྒྱས་ཀྱི་མཚོན་རྟགས་གསར་བའང་ཡིན།།

རྩོམ་སྒྲིག་པ། : ལྷ་ཆེན་རྒྱལ།