མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ8པའི་ཚེས12ཉིན། གསར་འགོད་པས་མཚོ་སྔོན་ཞིང་ཆེན་རིག་གནས་དང་ཡུལ་སྐོར་ཐིན་ནས་རྒྱུས་ལོན་བྱུང་བ་ལྟར་ན། ཡུལ་སྐོར་གྱི་ངར་སྒང་དང་ཆུ་ལོག་མོད་པའི་དུས་སྐབས་སྣོལ་འདྲེས་ཀྱི་སྐབས་འདིར། ཡུལ་སྐོར་བའི་ཡུལ་སྐོར་བདེ་འཇགས་དང་རོལ་རྩེད་སྒྲིག་ཆས་བརྟན་བརླིང་ངང་འཁོར་སྐྱོད་བྱེད་པར་འགན་ལེན་བྱེད་ཆེད། ཞིང་ཆེན་རིག་གནས་དང་ཡུལ་སྐོར་ཐིན་གྱིས་རོལ་རྩེད་སྒྲིག་ཆས་ཀྱི་བདེ་འཇགས་དོ་དམ་དང་ཆུ་ལོག་དུས་སྐབས་ཀྱི་ཉེན་ཁ་སྔོན་འགོག་ལ་དམ་པོར་དམིགས་ཏེ། ཞིང་ཆེན་ཡོངས་ཀྱི་ཁྱབ་ཁོངས་སུ་རོལ་རྩེད་སྒྲིག་བཀོད་སྒྲིག་ཆས་དང་ཆུ་ལོག་སྔོན་འགོག་ལས་དོན་ལ་ཕྱོགས་ཡོངས་ནས་ཆེད་དོན་ཞིབ་བཤེར་བྱས་ནས། མི་མངོན་པའི་འགལ་རྐྱེན་ཅི་རིགས་ལ་ཞིབ་བཤེར་དང་བདེ་འཇགས་འགན་འཁྲི་ཇེ་དམ་དུ་བཏང་སྟེ། རིག་གནས་ཡུལ་སྐོར་ལས་རིགས་བདེ་འཇགས་དང་གོ་རིམ་ལྡན་པའི་ངང་འཁོར་སྐྱོད་ཐུབ་པར་འགན་སྲུང་བྱས།
ཐེངས་འདིའི་ཞིབ་བཤེར་གྱིས་མཛེས་ལྗོངས་ཁུལ་གྱི་རོལ་རྩེད་སྒྲིག་ཆས་སྤྱོད་ཚད་མང་དུ་ཕྱིན་པའི་ཁྱད་ཆོས་ལ་དམ་པོར་དམིགས་ཏེ། རོལ་རྩེད་སྒྲིག་བཀོད་སྒྲིག་ཆས་ལ་ཆག་སྐྱོན་བྱུང་ཡོད་མེད་ཀྱི་ཐད་ཁྱོན་ཡོངས་ནས་བརྟག་དཔྱད་བྱས་ནས། ཡུལ་སྐོར་བ་རྣམས་ལ“ཉེན་སྲུང་ཉེན་འགོག”གི་སྐྱོབ་ཐག་བཀན་མོ་བཅིངས། ཞིབ་བཤེར་གྱིས་བདེ་འཇགས་ཉེན་སྟོན་གྱི་མཚོན་རྟགས་རང་བཞིན་གྱི་སྒྲིག་ཆས་དང་བདེ་འཇགས་མི་སྣར་འཛོམས་དགོས་པའི་ཉེར་མཁོ། འཕྲལ་བསྟུན་ཐག་གཅོད་ནུས་པ་སོགས་གནད་འགག་ལྷུ་ཚིགས་ལ་དམིགས་ཏེ། སྟེགས་བུ་རེ་རེ་དང་རྣམ་གྲངས་རེ་རེར་ཞིབ་བཤེར་ནན་མོ་བྱས། ཞིབ་བཤེར་བྱེད་པའི་སྐབས་སུ། ཞིབ་བཤེར་ཚན་ཆུང་གིས་ཤེས་རྟོགས་བྱུང་བའི་བདེ་འཇགས་ཀྱི་འགལ་རྐྱེན་ལ་དམིགས་ཏེ། ཡུལ་དངོས་སུ་བཅོས་སྒྲིག་གི་བསམ་འཆར་བཏོན་པ་དང་བཅོས་སྒྲིག་གི་དུས་ཡུན་ཁ་གསལ་བཟོས་ནས། འབྲེལ་ཡོད་སྡེ་ཁག་ལ་དུས་ཐོག་ཏུ་བཅོས་སྒྲིག་དོན་འཁྱོལ་བྱེད་དགོས་པའི་བླང་བྱ་བཏོན།
ཞིབ་བཤེར་ཚན་ཆུང་གིས་ཐལ་དྲགས་པའི་གནམ་གཤིས་ལས་བྱུང་བའི་ཉེན་ཁར་ཁ་གཏད་ནུས་ལྡན་འཇལ་ཆེད། འབྲེལ་ཡོད་ལས་ཁུངས་སོ་སོར་ངེས་པར་དུ་དོགས་ཟོན་ཆེན་པོ་བྱེད་དགོས་པའི་བླང་བྱ་བཏོན། ཆུ་ལོག་སྔོན་འགོག་བྱེད་པའི་སྐབས་སུ། Aརིམ་པའི་མཛེས་ལྗོངས་ཁུལ་དང་སྐར་རིམ་གྲོང་གསེབ་ཀྱི་ཡུལ་སྐོར་སྣེ་ལེན་ས་ཚིགས། རིམ་པ་སོ་སོའི་རང་འཁོར་སྒར་ས་སོགས་གནམ་གཤིས་ཉེན་གཏོང་ས་ཁུལ་དུ་གནས་པ་ཡིན་ན། ངེས་པར་དུ་སྒོ་རྒྱག་པ་དང་མཚམས་འཇོག་པ། ཕྱིར་འཐེན་པ། སྤོ་སྒྱུར་བྱེད་པ། སྐོར་ཞིབ་བཅས་ཀྱི་ཆུ་ལོག་སྔོན་འགོག་བྱེད་ཐབས་ཞིབ་ཕྲ་དོན་འཁྱོལ་ནན་མོ་བྱས་ཏེ། སྒོ་རྒྱག་དགོས་པའི་ཡུལ་སྐོར་གཉེར་སྐྱོང་ས་ཚིགས་མཐའ་གཅིག་ཏུ་སྒོ་རྒྱག་པ་དང་། ཡུལ་སྐོར་བ་དུས་ཐོག་ཏུ་ཁ་འགྲེམས་བྱས་ཏེ། མཛེས་ལྗོངས་ཁུལ་གཅིག་ཀྱང་མི་ལུས་པ་དང་ཡུལ་སྐོར་བ་གཅིག་ཀྱང་མི་ལུས་པར་འགན་ལེན་བྱེད་དགོས།
