མགོ་ལོག་ཁུལ་གྱིས་དབང་བོ་སྐྱོན་ཅན་ལ་རོགས་སྐྱོར་བྱས་ཏེ་ཁོ་ཚོའི་འཚོ་བའི་སྤུས་ཚད་ཇེ་མཐོར་བཏང་།

ཟླ8པའི་ཚེས11ཉིན།   མགོ་ལོག་བོད་རིགས་རང་སྐྱོང་ཁུལ་དབང་བོ་སྐྱོན་ཅན་མཉམ་འབྲེལ་ལྷན་ཚོགས་ཀྱིས་སྒྲུབ་པའི་མགོ་ལོག་ཁུལ་གྱི་དབང་བོ་སྐྱོན་ཅན་གྱི་གཏམ་བཤད་འགྲན་སྡུར་དང་ལག་བཟོས་བརྩམས་ཆོས་འགྲེམ་ཚོང་གིས་དབང་བོ་སྐྱོན་ཅན་ལ་རོགས་སྐྱོར་བྱེད་པའི་བྱ་འགུལ་སོ་སོར་མགོ་ལོག་ཁུལ་གེ་སར་ཐང་ཆེན་དང་མགོ་ལོག་ཁུལ་དཔེ་མཛོད་ཁང་དུ་བསྡུས།

ཉིན་དེར།  མགོ་ལོག་ཁུལ་གྱི་རྫོང་དྲུག་ནས་ཡོང་བའི་དབང་བོ་སྐྱོན་ཅན་རྣམས་གྱིས་ཁྱེར་ཡོང་བའི་རི་མོ་དང་ཚྭ་བཟོས་བརྐོས་རིས།   གཙག་དྲུབས་སོགས་རིགས་སོ་སོའི་ལག་བཟོས་བརྩམས་ཆོས་ཀྱིས་མང་ཚོགས་མང་པོའི་ཡིད་དབང་བཀུག     བྱ་འགུལ་ཁྲོད་དུ།   བསྡོམས་པས་དབང་བོ་སྐྱོན་ཅན་གྱི་བརྩམས་ཆོས་དྲུག་བརྒྱ་ལྷག་འགྲེམ་ཚོང་བྱས་པ་དང་།   བརྩམས་ཆོས་བརྒྱ་དང་བཅོ་ལྔ་ཕྱིར་འཚོང་བྱས་ལ།   ཕྱིར་འཚོང་མ་དངུལ་སྒོར་ཁྲི་གཅིག་ལྷག་ལ་སླེབས།   གཏམ་བཤད་འགྲན་སྡུར་ཁྲོད་དུ།   དབང་བོ་སྐྱོན་ཅན་ལྔ་བཅུ་ཡིས་རང་གི་ཉམས་མྱོང་དང་ཟུང་འབྲེལ་བྱས་ཏེ།    དཀའ་ངལ་ལ་ཁ་གཏད་འཇལ་ཚུལ་དང་ཕུགས་བསམ་དོན་གཉེར་བྱས་ཚུལ།   རང་གི་རིན་ཐང་མངོན་འགྱུར་བྱས་པའི་གཏམ་རྒྱུད་དང་འབྲེལ་ནས་གཏམ་བཤད།

རྒྱུས་ལོན་བྱུང་བ་ལྟར་ན།  ད་ལོ་ནས་བཟུང་།  མགོ་ལོག་ཁུལ་དབང་བོ་སྐྱོན་ཅན་མཉམ་འབྲེལ་ལྷན་ཚོགས་ཀྱིས་འགན་འཁྲི་གཙོ་བོ་དང་ལས་དོན་གཙོ་བོར་དམིགས་ནས། ལས་བྱེད་པའི་འགན་སྒྲུབ་ནུས་པ་མཐོ་རུ་གཏོང་བ་དང་། དབང་བོ་སྐྱོན་ཅན་གྱི་སློབ་གསོ་ལས་ཞུགས་བྱ་བ་དང་དབང་བོ་སྐྱོན་ཅན་གྱི་ཁམས་གསོ་ཞབས་ཞུའི་བྱ་བ་བཟང་བོར་སྒྲུབ་པ།   གསོ་སྐྱོང་ལྟ་སྐྱོང་ཚད་ལྡན་ཅན་གྱི་ཞབས་ཞུའི་ཆུ་ཚད་མཐོ་རུ་གཏོང་བ་སོགས་ཀྱི་ཕྱོགས་ལ་རྒྱུན་ཆད་མེད་པར་ཤུགས་བཏོན་ཏེ།    མགོ་ལོག་ཁུལ་གྱི་དབང་བོ་སྐྱོན་ཅན་ལས་དོན་གྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་།   རོགས་འདེགས་རང་བཞིན་གྱི་ལས་ཞུགས་སོགས་བྱེད་ཐབས་སྣ་མང་བརྒྱུད་དེ་མི་རེ་བརྒྱད་གསར་དུ་ལས་ཞུགས་བྱས་པ་དང་།   དབང་བོ་སྐྱོན་ཅན་བརྒྱ་དང་ཉི་ཤུས་རྩལ་ནུས་གསོ་སྦྱོང་དང་ལེན་བྱས།   དགའ་བདེ་རྫོང་དང་རྨ་སྟོད་རྫོང་གི་དབང་བོ་སྐྱོན་ཅན་མཉམ་འབྲེལ་ལྷན་ཚོགས་ཀྱིས་ལྟ་སྐྱོང་བྱ་ཡུལ་ཉེར་གཉིས་གཏན་འཁེལ་བྱས་ཏེ།  དབང་བོ་སྐྱོན་ཅན་གྱི་ཁྱིམ་དུ་དུས་ཡུན་རིང་བོར་ཚྭ་བཟོས་བརྐོས་རིས་དང་བོད་སྤོས་བཟོ་བ་སོགས་ཀྱི་རྩལ་ནུས་གསོ་སྦྱོང་བྱས། 

ཁམས་གསོ་མ་དངུལ་སྒོར་ས་ཡ་གཅིག་དང་འབུམ་གསུམ་ཁྲི་གསུམ་བཏང་ནས་དབང་བོ་སྐྱོན་ཅན་བདུན་བརྒྱ་སོ་གཅིག་ལ་རམ་འདེམས་ཡོ་བྱད་ཉོས་པ་དང་།   དབང་བོ་སྐྱོན་ཅན་གྱི་དར་མ་དགུ་བརྒྱ་གྱ་གསུམ་ལ་ཁམས་གསོ་ཞབས་ཞུ་འདོན་སྤྲོད་བྱས་པར་མ་ཟད།  དབང་བོ་སྐྱོན་ཅན་གྱི་བྱིས་པ་ཉེར་བདུན་ལ་ཁམས་གསོ་ཆེད་ལས་ཞབས་ཞུ་འདོན་སྤྲོད་བྱས།  དེ་དང་མཉམ་དུ།    མི་གཅིག་ལ་ལྟ་སྐྱོང་དང་ཁྱིམ་ཚང་གཅིག་གི་དཀའ་ངལ་སེལ་བ།   ཕྱོགས་གཅིག་ལ་བདེ་སྐྱིད་བསྐྲུན་པའི་རྩ་དོན་ལྟར།   ཆ་རྐྱེན་དང་མཐུན་པའི་དབང་བོ་སྐྱོན་ཅན་རྣམས་དབང་བོ་སྐྱོན་ཅན་ལྟ་སྐྱོང་ལྟེ་གནས་སུ་བཀོད་སྒྲིག་བྱས།  མིག་སྔར།   རྫོང་དྲུག་གི་དབང་བོ་སྐྱོན་ཅན་ལྟ་སྐྱོང་ལྟེ་གནས་བདེ་བླག་ངང་འཁོར་སྐྱོད་བྱེད་བཞིན་ཡོད།