ཝུའུ་ཞའོ་ཅུན་གྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་ལག་བསྟར་དོན་འཁྱོལ་བྱེད་པར་བླང་བྱ་བཏོན།

ཀན་སུའུ་ལན་ཀྲོའུ་གྲོང་ཁྱེར་ཡུས་ཀྲུང་རྫོང་དུ་ཆུ་ལོག་གི་གནོད་འཚེ་ཐེབས་རྗེས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཚད་མཐོའི་མཐོང་ཆེན་མཛད་དེ་མཛུབ་སྟོན་གལ་ཆེན་གནང་། ཟླ8པའི་ཚེས8ཉིན། ཞིང་ཆེན་ཏང་ཨུའི་ཧྲུའུ་ཅི། ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རིན་ཝུའུ་ཞའོ་ཅུན་གྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་ལག་བསྟར་དོན་འཁྱོལ་བྱེད་པ་དང་། ཞིང་ཆེན་ཡོངས་ཀྱི་ཞོད་འགོག་བྱ་བ་བཟང་པོར་སྒྲུབ་པའི་ཐད་བླང་བྱ་བཏོན་ནས་བཀོད་སྒྲིག་བྱས། བྱེད་ཐབས་སྣ་ཚོགས་དོན་འཁྱོལ་ཞིབ་ཕྲ་བྱས་ནས་མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་བདེ་འཇགས་ལ་ཁག་ཐེག་བྱེད་དགོས། ཉིན་དེར། ཞིང་ཆེན་ཡོངས་ཀྱི་ཞོད་འགོག་བྱ་བའི་བཀོད་གཏོང་ཚོགས་འདུ་བསྡུས་པ་དང་། སྔར་ལས་ལྷག་པའི་སྒོ་ནས་ཆབ་སྲིད་ཀྱི་ལངས་གནས་ཇེ་མཐོར་བཏང་སྟེ། ཆབ་སྲིད་ཀྱི་འགན་འཁྲི་དངོས་གནས་ཕྲག་ཏུ་བླངས་ཏེ་ཞོད་འགོག་གནོད་འཚེ་ཉུང་གཏོང་གི་བྱ་བ་ལྷོད་གཡེང་སྤུ་ཙམ་མི་བྱེད་པར། ནུས་ཤུགས་གང་ཡོད་བཏོན་ནས་ཞོད་འགོག་བདེ་འཇགས་ཀྱི་འགོག་སྲུང་འཛིང་རགས་བརྟན་པོར་བསྐྲུན་དགོས་པ་ནན་གྱིས་བསྟན། ཝུའུ་ཞའོ་ཅུན་གྱིས་གཏམ་བཤད་པ་དང་། ཞིང་ཆེན་ཏང་ཨུའི་ཧྲུའུ་ཅི་གཞོན་པ། ཧྲིན་ཀྲང་ལུའོ་ཏུང་ཁྲོན་གྱིས་འགོ་འཛིན་བྱས།

གྲོས་ཚོགས་ལས་བསྟན་དོན། ཐེངས་འདིའི་འབབ་ཞོད་ཀྱི་བརྒྱུད་རིམ་ཁྱབ་ཚད་ཆེ་བ་དང་དུས་ཡུན་རིང་བ་མ་ཟད།   དེར་སྔོན་བབས་པའི་ཆར་ཆུའི་མངའ་ཁོངས་སྣོལ་སྡེབ་བྱས་ཡོད་ལ། རི་ཉིལ་བ་དང་འདམ་ཟེགས། ཆུ་བོ་འབྲིང་ཆུང་གི་ཆུ་ལོག རི་ཆུའི་ཆུ་ལོག་སོགས་ཞོར་ཐོན་གནོད་འཚེའི་ཉེན་ཁ་ཆེ་རུ་འགྲོ་བཞིན་ཡོད་པས། ངེས་པར་དུ་ཐོག་མཐའ་བར་གསུམ་དུ་རྒྱུན་སྲུང་རྒྱུན་འཁྱོངས་དང་དོགས་ཟོན་ཆེན་པོ་བྱས་ཏེ། བྱ་བའི་སྤྱོད་ཚུལ་ནན་མོ་དང་ནུས་ལྡན་གྱི་ཁ་གཏད་འཇལ་ཐབས་ལ་བརྟེན་ནས། ཞོད་འགོག་གནོད་སྐྱོབ་ཀྱི་རང་འགུལ་འཐབ་འཛིང་མཐའ་གཅིག་ཏུ་ཡག་པོ་རྒྱག་དགོས།

གྲོས་ཚོགས་ལས་ནན་གྱིས་བསྟན་དོན། གཙོ་གནད་གནས་ཡུལ་འབུར་དུ་ཐོན་པར་བྱས་ཏེ་ཉེན་ཁའི་མངོན་མེད་རྐྱེན་ངན་ཕྱོགས་ཡོངས་ནས་ཞིབ་བཤེར་བྱེད་པ་དང་། མཛེས་ལྗོངས་ཁུལ་དང་འཛུགས་སྐྲུན་ཡུལ་དངོས།    རི་ཁུལ་གྱི་དགོན་པ།    དབྱར་དུས་ཀྱི་ཕྱུགས་ར། ཆུ་བོའི་ངོགས་གཉིས།    ཕྱི་རོལ་གྱི་སྒར་ས།    གྲོང་ཁྱེར་གྱི་ཆུ་ལོག་འབྱུང་སླ་བའི་ཁུལ་སོགས་ཉེན་ཁའི་ས་ཁོངས་ཀྱི་མངོན་མེད་རྐྱེན་ངན་ཞིབ་བཤེར་བྱེད་ཤུགས་ཆེ་རུ་བཏང་ནས། ཞོད་འགོག་བྱ་བ་ཞིབ་ཅིང་ཕྲ་བའི་སྒོ་ནས་ལེགས་པོར་སྒྲུབ་པར་ཁག་ཐེག་བྱེད་དགོས། ཕྱོགས་ཡོངས་ནས་མགྱོགས་མྱུར་འགུལ་སྐྱོད་སྤེལ་ཏེ། ཞོད་འགོག་གི་བྱེད་ཐབས་སྣ་ཚོགས་དོན་འཁྱོལ་ཞིབ་ཕྲ་བྱས་ནས། ཉེན་ཁའི་ཞིབ་འཇུག་བརྡར་གཅོད་དང་སྔོན་བརྡའི་སྔོན་ཚུད་ཉེན་བརྡ། ཆ་འཕྲིན་ཁྱབ་བསྒྲགས་བྱེད་པར་ཤུགས་སྣོན་དགོས། ལག་བསྟར་སྤོ་སྒྱུར་དང་ཉེན་གཡོལ་བྱེད་པའི“དབྱེར་མེད་བཞིའི”བླང་བྱ་གཟབ་ནན་སྒོས་ལག་བསྟར་བྱས་ཏེ། “ཁ་གཏད་འཇལ་བ་གཉིས”ཀྱི་རྐྱེན་སྲོལ་མཐའ་གཅིག་ཏུ་དོན་འཁྱོལ་བྱས་ནས།    བློ་བརྟན་འགྱུར་མེད་ཀྱིས“སྒོ་རྒྱག་པ་དང་མཚམས་འཇོག་པ།    ཕྱིར་འཐེན་པ།    སྐོར་སྐྱོད་བྱེད་པའི”བྱེད་ཐབས་སྤྱད་དེ།    གཙོ་གནད་གནས་ཡུལ་གྱི་མང་ཚོགས་ལ་གནས་སྤོ་བྱེད་དགོས་པ་སྔ་མོ་ནས་གནས་སྤོ་བྱེད་པ་དང་། ཉེན་གཡོལ་གནས་སུ་སྤར་ཟིན་པའི་མང་ཚོགས་ཕྱིར་ལོག་པ་འགོག་སྲུང་ནན་མོ་བྱ་དགོས།  ཆུ་བོ་དང་ཆུ་མཛོད། རགས་ཆེན་པོ།    ཆུ་རགས་སོགས་ལ་ལྟ་ཞིབ་ཚད་ལེན་དང་བཀོད་གཏོང་དམ་ཟབ་བྱས་ཏེ།  མཚོ་སྔོན་ལ་གནས་སྐོར་དུ་ཡོང་བའི་ཡུལ་སྐོར་བ་དང་རླངས་འཁོར་གྱི་རིགས་ལ་ཉེན་ཁའི་སྔོན་བརྡ་གཏོང་བ་དང་བདེ་འཇགས་ཀྱི་ཁྲིད་སྟོན་ལེགས་པོ་བྱེད་པ། དུས་ཐོག་ཏུ་གནོད་འཚེ་ཐེབས་པའི་བགྲོད་ལམ་ལ་འགྲིམ་འགྲུལ་དམ་སྡོམ་དང་མྱུར་དུ་ཞིག་གསོ་བྱས་ནས་བགྲོད་ལམ་ཤར་གཏོང་ཐུབ་པ་བྱེད་དགོས། དུས་ནམ་ཡང་བློ་བདེ་ལ་འབབ་མི་ཐུབ་པའི་འགན་འཁྲི་ཁུར་སེམས་ལ་བརྟེན་ནས། ཞོད་འགོག་དང་གནོད་འཚེ་ཉུང་གཏོང་གི་ས་ཁོངས་ཀྱི་གྲུབ་ཆ་གཙོ་བོའི་འགན་འཁྲི་དང་། ལས་རིགས་སྡེ་ཁག་གི་ལྟ་སྐུལ་དོ་དམ་དང་འགན་འཁྲི་ཏན་ཏིག་ཁུར་ནས། ལྷོད་གཡེང་གི་བསམ་པ་དང་སྟེས་དབང་གི་བསམ་པ་མཐའ་གཅིག་ཏུ་ཁྱད་གསོད་བྱས་ཏེ། ཚད་མཐའི་བསམ་གཞིགས་དང་མཐར་ཐུག་གི་བསམ་གཞིགས་བརྟན་པོར་བཙུགས་ནས། ས་སྲུང་གི་འགན་འཁྲི་ཡོད་པ་དང་ས་སྲུང་གི་འགན་འཁྲི་བསྒྲུབ་ནས། མང་ཚོགས་ཤི་རྨས་ཀྱི་ལས་འཛོལ་མི་འབྱུང་བའི་ཚད་མཐའ་བརྟན་སྲུང་བྱེད་དགོས།

གྲོས་ཚོགས་སྟེང་། ཞིང་ཆེན་གནམ་གཤིས་ཅུའུ་དང་ཞིང་ཆེན་འཕྲལ་བསྟུན་དོ་དམ་ཐིན། ཞིང་ཆེན་རང་བྱུང་ཐོན་ཁུངས་ཐིན། ཟི་ལིང་གྲོང་ཁྱེར། མཚོ་ཤར་གྲོང་ཁྱེར་གྱི་འགན་ཁུར་བློ་མཐུན་གྱིས་ཞོད་འགོག་གནོད་འཚེ་ཉུང་གཏོང་གི་བྱ་བའི་གནས་ཚུལ་སྙན་ཞུ་བྱས།

གྲོས་ཚོགས་དེ་བརྙན་རིས་ཀྱི་ལམ་ནས་བསྡུས། ཝང་ཝེ་ཏུང་དང་ཀྲང་ཅིན་ཀང་། ཚེ་རིང་ཐར། བུའུ་ལཱ་ཙི་པེ་ཁི་རི་སུའུ་ལིས་ཧན། ཀྲུའུ་ཞང་ཧྥུན། ལོའུ་ཀང་། ལིག་ཐའོ་བཅས་ཞིང་ཆེན་འཕྲལ་བསྟུན་བཀོད་འདོམས་པུའུ་དང་གྲོང་ཁྱེར་དང་ཁུལ་སོ་སོའི་འཕྲལ་བསྟུན་བཀོད་འདོམས་པུའུ་ནས་གྲོས་ཚོགས་སུ་ཞུགས།