མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ6པའི་ཚེས3ཉིན། གསར་འགོད་པས་ཡུས་ཧྲུའུ་བོད་རིགས་རང་སྐྱོང་ཁུལ་བཟོ་ལས་ཆ་འཕྲིན་ཚོང་དོན་ཅུས་ནས་ཤེས་གསལ་ལྟར་ན། ཉིན་འགའི་སྔོན། ཡུས་ཧྲུའུ་ཁུལ་ཞིང་ཕྱུགས་ཐོན་རྫས་སྐབས་བཅུ་དགུ་པའི་ཀྲུང་གོའི་ཤར་ནུབ་རྒྱུད་མཉམ་ལས་དང་དངུལ་གཏོང་ཚོང་དོན་ངོ་འཕྲད་གྲོས་མོལ་ཚོགས་འདུ། དར་གོས་ཚོང་ལམ་རྒྱལ་སྤྱིའི་འགྲེམས་སྟོན་ཚོགས་འདུ། སྐབས་བདུན་པའི་ཀྲུང་གོའི་ནུབ་རྒྱུད་རྒྱལ་སྤྱིའི་དངུལ་གཏོང་ཚོང་དོན་ངོ་འཕྲད་གྲོས་མོལ་ཚོགས་འདུ་བཅས་ཀྱིས་མཉམ་ལས་གྲོས་མཐུན11ལ་འདོད་མོས་བྱུང་བ་དང་། དེའི་ཁྲོད་ཐོན་རྫས་ཕྱིར་འཚོང་དང་ལག་རྩལ་མཉམ་ལས། དངུལ་གཏོང་གསར་སྤེལ་སོགས་ཁྱབ་ཁོངས་མང་པོ་དང་འབྲེལ་བ་ཡོད་པ་དང་། གཏའ་དངུལ་སྒོར་ཁྲི300ལྷག་ཙམ་ཟིན་ཞིང་། ཡུས་ཧྲུའུ་ཁུལ་གྱི་ཁེ་ལས་འཕེལ་རྒྱས་ལ་སྒུལ་ཤུགས་བསྣན།
དུས་སྔོན་མར། ཁུལ་བཟོ་ལས་ཆ་འཕྲིན་ཚོང་དོན་ཅུས་ཀྱིས་ཁེ་ལས་སོ་སོར་གཏིང་ཟབ་སྒོས་བརྟག་དཔྱད་ཞིབ་འཇུག་བྱས་ནས། ཁེ་ལས་ཀྱི་ཐོན་རྫས་ཁྱད་ཆོས་དང་འགྲེམས་ཞུགས་དགོས་མཁོར་རྒྱུས་ལོན་བྱས་ཏེ། མཚོན་བྱེད་རང་བཞིན་ལྡན་པའི་ཁྱད་ལྡན་ཐོན་རྫས་གདམ་གསེས་བྱས། འགྲེམས་ཞུགས་ཁེ་ལས་ཀྱི་འགྲེམས་གནས་ཇུས་འགོད་དང་། ཐོན་རྫས་འགྲེམས་སྟོན། དྲིལ་བསྒྲགས་ཁྱབ་གདལ་སོགས་ཀྱི་ཐད་གནས་པའི་དཀའ་ངལ་ལ་དམིགས་ནས། ཆེད་ལས་མི་སྣ་བཀོད་སྒྲིག་བྱས་ནས་རེ་རེ་བཞིན་མཛུབ་ཁྲིད་བྱས་ཏེ། ཁེ་ལས་ལ་འགྲེམས་ཞུགས་ཀྱི་གྲ་སྒྲིག་ལས་དོན་སོ་སོ་བསྒྲུབ་རོགས་བྱས། དེ་དང་ཆབས་ཅིག འགྲེམས་སྟོན་ཕྱོགས་གཙོ་བོ་དང་འབྲེལ་གཏུག་མཐུན་སྦྱོར་བྱས་ཏེ། སྤུས་ལེགས་འགྲེམས་སའི་ཐོན་ཁུངས་བརྩོན་ལེན་བྱས་ནས། ཁེ་ལས་ལ་འགྲེམས་སྟོན་ཁོར་ཡུག་བཟང་པོ་མཁོ་འདོན་བྱས།
འགྲེམས་སྟོན་སྟེང་། སྐོམ་ཆུ་དང་ནས་ནག་གི་སྦི་རག གཟུགས་འདས་ཤུལ་བཞག་རིག་གནས་བོད་སྤོས་སོགས་ཁྱད་ལྡན་ཐོན་རྫས་རིགས20ཙམ་འགྲེམས་སྟོན་བྱས་ཏེ་མགྲོན་པོ་མང་པོ་བཀུག ཁྱད་ལྡན་ཐོན་རྫས་དེ་དག་གིས་ཡུས་ཧྲུའུ་ཡི་ཕུན་སུམ་ཚོགས་པའི་རང་བྱུང་ཐོན་ཁུངས་དང་གཏིང་ཟབ་པའི་རིག་གནས་ཀྱི་རྨང་གཞི་མངོན་པར་མ་ཟད། མི་མང་པོ་ཞིག་ལ་ཡུས་ཧྲུའུ་ཡི་ཁྱད་ལྡན་ཐོན་ལས་འཕེལ་རྒྱས་ཀྱི་གྲུབ་འབྲས་རྒྱུས་ལོན་བྱེད་དུ་བཅུག འགྲེམས་སྟོན་སྐབས་སུ། འགྲེམས་ཞུགས་ཁེ་ལས་སྒྲིག་འཛུགས་བྱས་ནས་ས་གནས་སོ་སོའི་ཚོང་པ་དང་འབྲེལ་མཐུད་གྲོས་མོལ་བྱེད་སྒོ་ཐེངས6སྤེལ། ཐོན་རྫས་འོས་སྦྱོར་ཚོགས་འདུ་དང་ཁེ་ལས་ཀྱི་བཞུགས་མོལ་ཚོགས་འདུ་སོགས་བརྒྱུད་དེ། ཚོང་པ་དག་ལ་ཡུས་ཧྲུའུ་ཡི་ཁྱད་ལྡན་ཐོན་རྫས་ཞིབ་ཕྲའི་ངང་ངོ་སྤྲོད་བྱས་པ་དང་། ཡུས་ཧྲུའུ་ཡི་དངུལ་གཏོང་ཁོར་ཡུག་དང་ཐོན་ལས་སྲིད་ཇུས་དྲིལ་བསྒྲགས་བྱས་ནས། ཁེ་ལས་དག་ལ་མཉམ་ལས་ཀྱི་གོ་སྐབས་འཚོལ་བར་ཆ་རྐྱེན་བསྐྲུན། །
