མཚོ་སྔོན་གྱིས་བྱེད་ཐབས་སྣ་མང་སྤྱད་ནས་བུ་བཅོལ་ཞབས་ཞུའི་སྤུས་ཚད་མཐོ་པོའི་ངང་འཕེལ་རྒྱས་འགྲོ་བར་སྐུལ་འདེད་བཏང་།

མཚོ་སྔོན་གསར་འགྱུར་དྲ་བའི་འཕྲིན།   ཉེ་ཆར་མཚོ་སྔོན་ཞིང་ཆེན་འཕྲོད་བསྟེན་བདེ་ཐང་ཨུ་ལྷན་གྱིས་ཞིང་ཆེན་འཕེལ་རྒྱས་བཅོས་སྒྱུར་ཨུ་ལྷན་སོགས་ལས་ཁུངས14དང་མཉམ་དུ《མཚོ་སྔོན་ཞིང་ཆེན་གྱིས་བུ་བཅོལ་ཞབས་ཞུའི་སྤུས་ཚད་མཐོ་པོའི་ངང་འཕེལ་རྒྱས་འགྲོ་བར་སྐུལ་འདེད་གཏོང་བའི་བྱེད་ཐབས་འགའ་ཞིག》(གཤམ་དུ《བྱེད་ཐབས》ཞེས་བསྡུ་རྒྱུ)པར་འགྲེམས་བྱས་ནས། མཚོ་སྔོན་ཞིང་ཆེན་གྱི་བུ་བཅོལ་ཞབས་ཞུའི་མ་ལག་སྔར་བས་འཐུས་སྒོ་ཚང་དུ་གཏོང་བ་དང་བུ་བཅོལ་ཞབས་ཞུའི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་ནས“བྱིས་པར་སྐྱོང་མཁན་ཡོད་པ”མངོན་འགྱུར་བྱུང་བར་ཧུར་བརྩོན་བྱ་དགོས་པའི་ཁ་གསལ་བཏོན།       

《བྱེད་ཐབས》ནང་སྲིད་ཇུས་ལག་བསྟར་བྱ་བར་འགན་ལེན་ཐད་གསར་དུ་བསྐྲུན་པའི་བཅའ་སྡོད་ཁུལ་གྱིས་ཚད་གཞི་གཞིར་བཟུང་བུ་བཅོལ་ཞབས་ཞུའི་སྒྲིག་བཀོད་ལེ་ལག་ཚང་སྒྲིག་གི་སྒོ་ནས་བསྐྲུན་དགོས།     སྡོད་གནས་ཁུལ་བསྐྲུན་རྗེས་ཉོ་སྒྲུབ་དང་།    བརྗེ་བ།    བོགས་གཏོང་སོགས་ཀྱི་བྱེད་ཐབས་སྤྱད་དེ་ཚད་གཞི་གཞིར་བཟུང་བུ་བཅོལ་ཞབས་ཞུའི་སྒྲིག་ཆས་ཁ་གསབ་བྱ་རྒྱུ་རེད།     སྡེ་ཁུལ་གྱི་བེད་མེད་དུ་བསྐྱུར་བའི་ཁང་པ་བེད་སྤྱོད་བྱས་ཏེ།    བཙུད་འཇུག་ཅན་དང་།    མུ་འབྲེལ་ཅན།    ཆུང་གྲས་ཅན་བཅས་ཀྱི་སྡེ་ཁུལ་གསོ་སྐྱོང་ཞབས་ཞུའི་སྒྲིག་བཀོད་རྒྱས་སྐྲུན་བྱ་དགོས།     སྲིད་འཛིན་དོན་ལས་ལས་ཁུངས་སོགས་མི་སྤྱོད་ལས་ཁུངས་ཀྱིས་བེད་མེད་དུ་ལུས་པའི་ཁང་པ་བེད་སྤྱོད་བྱ་བར་སྐུལ་ལྕག་དང་རྒྱབ་སྐྱོར་བྱས་ཏེ། ཐོབ་ཐང་ལྡན་པའི་བཅོལ་གསོའི་སྒྲིག་གཞི་ནང་འདྲེན་གྱིས་ལས་བཟོར་བཅོལ་གསོའི་ཞབས་ཞུ་མཁོ་འདོན་དང་ཆ་རྐྱེན་ཡོད་ཚེ་ཉེ་འགྲམ་གྱི་གྲོང་མིར་སྒོ་དབྱེ་བྱ་དགོས་པ་བཅས་ཀྱི་བླང་བྱ་བཏོན།  

 འགན་ལེན་བྱེད་ཐབས་ལ་ཤུགས་སྣོན་པའི་ཐད་ཆ་རྐྱེན་ཡོད་པའི་མི་སྤྱོད་ལས་ཁུངས་ཀྱིས་བུ་བཅོལ་སྒྲིག་གཞི་འཛུགས་བར་རོགས་སྐྱོར་དང་།    འཛུགས་སྐྲུན་གྱི་གཞི་ཁྱོན་དང་ཚད་གཞི་གཞིར་བཟུང་ཁ་གསབ་རོགས་དངུལ་སྒོར་ཁྲི5ནས10བར་སྤྲད་རྒྱུ།     གཞུང་གཉེར་དང་དམངས་གཉེར་གྱི་ཀུན་ཕན་རང་བཞིན་གྱི་བུ་བཅོལ་ལས་ཁུངས་ཀྱིས་སྲིད་གཞུང་གིས་རིན་གོང་གཏན་འབེབས་ལག་བསྟར་བྱ་དགོས།     ཡོང་འབབ་དམའ་བའི་མང་ཚོགས་ལ་ཆག་ཡང་དང་རྩ་ཆག་གཏོང་བའི་སྲིད་ཇུས་ལག་བསྟར་བྱ་དགོས།     དམངས་གཉེར་གྱི་ཀུན་ཕན་རང་བཞིན་མིན་པའི་བུ་བཅོལ་ཁང་གི་སློབ་ཡོན་བསྡུ་ཚད་ཚོང་རའི་སྙོམས་སྒྲིག་རིན་གོང་ལག་བསྟར་བྱ་དགོས།     དམིགས་ཚད་ལས་འགན་ཁག་ལེགས་སྒྲུབ་ཅུང་ལེགས་པ།    ཕྱོགས་བསྡུས་གདེང་འཇོག་ཨང་རིམ་མདུན་གྲལ་དུ་སླེབས་པ་བཅས་ཀྱི་གྲོང་ཁྱེར(ཁུལ)ལ་བྱ་དགའི་རང་བཞིན་གྱི་ཁ་གསབ་སྤྲད་རྒྱུ།     མ་མཐའི་འཚོ་བ་འགན་སྲུང་ཁྱིམ་ཚང་སོགས་དཀའ་ངལ་ཡོད་པའི་ཁྱིམ་ཚང་ཁྲོད་ཆ་རྐྱེན་དང་མཐུན་པའི་ཕྲུ་གུ་དམར་འབྱར་དང་བྱིས་པའི་ཁྱིམ་ཚང་གིས་སྲིད་གཞུང་གིས་ཞབས་ཞུ་ཉོ་སྒྲུབ་བྱེད་སྟངས་བརྒྱུད་དཀའ་ངལ་ཡོད་པའི་ཁྱིམ་ཚང་ལ་བཅོལ་གསོ་རིན་གཅོག་གི་ཁ་གསབ་ལམ་སྲོལ་འཛུགས་དགོས།   

ལས་དོན་ལག་བསྟར་ལ་སྐུལ་འདེད་གཏོང་བའི་ཐད་རིམ་ཁག་མ་བུ་འཕྲོད་སྦྱོར་སྒྲིག་གཞིས་སྲིད་འཛིན་ས་ཁོངས་དེའི་ནང་གི་བུ་བཅོལ་སྒྲིག་གཞི་དང“སྨན་བཅོས་དང་སློབ་གསོ་ཟུང་འབྲེལ”གྱི་མཉམ་ལས་གྲོས་མཐུན་བཞག་ནས་དུས་བཀག་བཞིན་སྒོ་རྩར་མཛུབ་ཁྲིད་དང་ཞབས་འདེགས་ཞུ་བར་བསྐྱོད་དགོས།     ཀྲུང་ལུགས་དང་བོད་ལུགས་གསོ་རིག་གི་ཁྱད་ལྡན་ལེགས་ཆ་འདོན་སྤེལ་ཧུར་ཐག་བྱས་ནས་བཅོལ་གསོ་སྒྲིག་གཞི་དང་མཉམ་ལས་བྱས་ཏེ། བྱིས་པའི་མཉེད་འཕུར་དང་གསང་མིག་སྦྱར་བ་སོགས་ཀྲུང་ལུགས་གསོ་རིག་དང་བོད་ལུགས་གསོ་རིག་དང་བོད་སྨན་གྱི་འཚམ་མཐུན་ལག་རྩལ་ཁྱབ་གདལ་བཏང་ནས་ཀྲུང་ལུགས་གསོ་རིག་དང་བོད་ལུགས་གསོ་རིག  ། བོད་ལུགས་གསོ་རིག་གི་བཅོལ་གསོ་ཞབས་ཞུ་བཅས་མཉམ་འདྲེས་ཐུབ་པར་སྐུལ་འདེད་གཏོང་རྒྱུ་རེད།   ལས་ཁུངས་ཀྱི་འགན་འཁྲི་ལག་བསྟར་ནན་པོ་བྱས་ནས་ཁོངས་གཏོགས་ཁུལ་གྱི་རྩ་དོན་གཞིར་བཟུང་ལོ་ལྟར་བུ་བཅོལ་ཚན་པའི་ཚད་ལྡན་གྱི་ཞབས་ཞུའི་དོ་དམ་ཆེད་དོན་བཅོས་སྒྲིག་བྱ་སྤྱོད་སྤེལ་དགོས།     འཇོན་མི་གསོ་སྐྱོང་བྱེད་ཤུགས་ཆེ་རུ་གཏོང་བའི་ཐད་ལས་རིགས་སློབ་གླིང་དང་སློབ་གྲྭའི་གསོ་སྐྱོང་ཆེད་ལས་ཀྱི་སློབ་ཐོན་སློབ་མར་ལས་རིགས་རྩལ་ནུས་རིམ་པའི་ལག་ཁྱེར་རམ་ཡང་ན“1+Xའཛིན་ཡིག”གི་ཡིག་རྒྱུགས་གཏོང་བར་རྒྱབ་སྐྱོར་བྱེད་དགོས།     བྱིས་གཉོར་བ་དང་ཕྲུ་གུ་དམར་འབྱར་སྐྱོང་མཁན།    གསོ་བ་སོགས་ཀྱི་ཆེད་ལས(ལས་རིགས)རྩལ་ནུས་གསོ་སྦྱོང་དང་སློབ་སྦྱོང་ལ་ཤུགས་སྣོན་བརྒྱབ་སྟེ་ཕྲུ་གུ་དམར་འབྱར་དང་བྱིས་པར་དུས་རྒྱུན་ལྟ་སྐྱོང་བྱེད་པ་སོགས་ཀྱི་ཐད་ཀྱི་བདག་སྐྱོང་ནུས་པ་དང་ལས་སྒོའི་ཆུ་ཚད་ཇེ་མཐོར་གཏོང་དགོས་པའི་བླང་བྱ་བཏོན།