མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ་དགུ་པར་རང་ཞིང་ཞོད་དུས་སུ་ཞུགས་པའི་ཚུན་དང་། ལྷག་པར་ཞིང་ཆེན་རིམ་པའི་ཞོད་འགོག་རིམ་པ་བཞི་པའི་ཉེན་བརྡ་དང་ས་གཤིས་གནོད་འཚེའི་རིམ་པ་གསུམ་པའི་ཉེན་བརྡ་གཏོང་མགོ་བརྩམས་རྗེས། མཚོ་སྔོན་ཞིང་ཆེན་གྱི་ཁྲོམ་ར་ལྟ་སྐུལ་དོ་དམ་ཅུའུ་ཡིས་ཚད་མཐོན་པོས་མཐོང་ཆེན་དང་མྱུར་དུ་དང་ལེན་བྱས་ཤིང་། ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་བཀོད་སྒྲིག་ལྟར། ཁྲོམ་ར་ལྟ་སྐུལ་དོ་དམ་ཁྱབ་ཁོངས་ཀྱི་ཞོད་འགོག་གནོད་འཕྲི་གནོད་སྐྱོབ་བྱ་བ་ནུས་ཤུགས་ཡོད་རྒུས་ལེགས་པོར་བསྒྲུབས།
ཞིང་ཆེན་ཁྲོམ་ར་ལྟ་སྐུལ་དོ་དམ་ཅུའུ་ཡིས་འབྲུ་རིགས་དང་སྣུམ། ཤ་དང་སྒོང་ང་། སྔོ་ཚལ་དང་འོ་མ་སོགས་ཀྱི་ཁྲོམ་རའི་མཁོ་འདོན་དང་རིན་གོང་འགྱུར་ལྡོག་ལ་དོ་སྣང་ཟབ་མོ་བྱས་ཏེ། ཉེན་ཁ་བརྡར་གཅོད་ལ་ཤུགས་སྣོན་དང་ལྟ་སྐུལ་དོ་དམ་སྣེ་མོ་སྔ་སྣུར་བྱས། སྡེ་ཁག་གི་གཅིག་འདོམས་མཐུན་སྦྱོར་ཤུགས་དྲག་ཏུ་བཏང་སྟེ། ཁྲོམ་རའི་ཞིབ་བཤེར་ནུས་ཚད་ཇེ་ཆེར་བཏང་བ་དང་། རིན་གོང་གསལ་བོ་མིན་པ་དང་། རིན་གོང་ཇེ་མཐོར་གཏོང་བ། ཁོག་སྦྲེལ་གོང་འཕར་སོགས་ཀྱི་རིན་གོང་ཁྲིམས་འགལ་བྱ་སྤྱོད་ལ་རྡུང་རྡེག་ནན་མོ་བཏང་ལ། འབྲེལ་ཡོད་སྡེ་ཁག་ལ་གཞོགས་འདེགས་བྱས་ཏེ་ཐོན་སྐྱེད་དང་འཁོར་སྐྱོད། འདོན་སྤྲོད་སོགས་ཕྱོགས་ཀྱི་དམངས་ཚིས་ཚོང་རྫས་གལ་ཆེན་གྱི་ཁྲོམ་རའི་རིན་གོང་བརྟན་འཇགས་ལ་འགན་སྲུང་བྱས། མིག་སྔའི་བར་དུ། ཞིང་ཆེན་ཡོངས་ཀྱི་ཁྱབ་ཁོངས་སུ་དམངས་ཚིས་ཚོང་རྫས་གལ་ཆེན་བདག་གཉེར་གཙོ་གཞིའི་ཁྱིམ་ཚང་ཁྲི་གསུམ་སྟོང་དྲུག་དང་བརྒྱ་ལ་ཞིབ་བཤེར་བྱས་ཏེ། ཁྱིམ་ཚང་ཉིས་བརྒྱ་དང་བཅུ་གཉིས་དག་ཐེར་ཚད་ལྡན་བཏང་བ་དང་། སྲིད་འཛིན་གྲོས་མོལ་ཐེངས་བཅུ་བཞིར་སྤེལ་ལ། འགན་དཀྲིའི་བཀའ་བརྡའི་དག་ཐེར་བརྡ་སྦྱོར་ཡི་གེ་གཉིས་མར་སྤྲད་ཅིང་། གྱོད་གཞི་དྲུག་རྩད་ཞིབ་བྱས་པ་དང་སྒོར་ཁྲི་ལྔ་དང་དྲུག་བརྒྱའི་དངུལ་ཆད་བཅད།
