མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
མཚོ་སྔོན་གསར་འགྱུར་དྲ་བའི་འཕྲིན། “ཞིང་ཕྱུགས་ལས་ཀྱི་སྤུས་ཚད་མཐོ་བའི་ཐོན་སྐྱེད་ནུས་ཤུགས་སྔར་བས་སྐྱེད་སྲིང་དང་འཕེལ་རྒྱས་གཏོང་བ་དང་། སྤུས་ཚད་མཐོ་བའི་གཟན་རྩྭ་ཞིབ་སྤེལ་རིམ་སྤོར་ལ་སྐུལ་འདེད་གཏོང་བ། ཁུལ་ཡོངས་ཀྱི་རྩྭ་ཕྱུགས་འཁོར་རྒྱུག་ཐོན་ལས་སྤུས་ཚད་མཐོ་བའི་ངང་འཕེལ་རྒྱས་འགྲོ་རྒྱུར་སྐུལ་འདེད་གཏོང་བ་བཅས་བྱ་ཆེད། ང་ཚོས་མཚོ་སྔོན་པིན་ཧྲེང་རྩྭ་ལས་ཚད་ཡོད་ཀུང་སིར་སྒོ་བྱང་བཀལ་ནས་མཚོ་ནུབ་ཁུལ་གྱི་སྤུས་ཚད་མཐོ་བའི་གཟན་རྩྭ་ཞིབ་སྤེལ་ལྟེ་གནས་ཐོག་མ་དེ་བཙུགས་པ་ཡིན”ཞེས་ཟླ9པའི་ཚེས18ཉིན་མཚོ་ནུབ་སོག་རིགས་བོད་རིགས་རང་སྐྱོང་ཁུལ་ཞིང་ཕྱུགས་ཅུའུ་ཡི་ཏང་ཙུའི་ཁོངས་མི་ཅུའུ་ཀྲང་གཞོན་པ་པད་མ་ཚེ་རིང་གིས་ངོ་སྤྲོད་བྱས།
ངོ་སྤྲོད་བྱས་པར་གཞིགས་ན། ལྟེ་གནས་དེ་ནི་མཚོ་སྔོན་གྱི་གྲོང་ཁྱེར་རིམ་པའི་གཟན་རྩྭའི་ཐོན་ལས་ལག་རྩལ་ཞིབ་འཇུག་གསར་སྤེལ་ལྟེ་གནས་ཐོག་མ་དེ་ཡིན་པ་དང་གཙོ་བོ་བ་ཚྭ་ཅན་གྱི་གཟན་རྩྭ་ལེགས་སྒྱུར་བེད་སྤྱོད་དང་། རྩྭའི་ཐོན་རྫས་ཚད་ལྡན་ཅན་གྱི་ཐོན་སྐྱེད། སྤུས་ལེགས་གཟན་རྩྭའི་ཐོན་རྫས་ཞིབ་འཇུག་གསར་སྤེལ་སོགས་ཁྱབ་ཁོངས་ལ་དམིགས་ནས་མཉམ་འབྲེལ་འགག་སྒྲོལ་བྱ་རྒྱུ་རེད། ལྟེ་གནས་དེ་ད་ཆ་གཏེར་ལེན་ཁ་གྲོང་ཁྱེར་གྱི་མཐའ་མཐའི་ས་རྒྱུ་ལེགས་བཅོས་དང་གཟན་རྩྭའི་ཐོན་ལས་ཚན་རྩལ་ཁང་ཆུང་ངུ་དང་གཏེར་ལེན་ཁ་གྲོང་ཁྱེར་ཨང་001གི་ཚན་རྩལ་ཆེད་མངགས་པའི་ལས་དོན་ས་ཚིགས་ལ་བརྟེན་ནས། ཞིང་ཆེན་ཡོངས་ཀྱི་གཟན་རྩྭའི་ཐོན་རྫས(རྩྭ་ཡུག་པོ་དང་། རྩྭ་བསངས་རྩྭ་སྐམ། མ་རྨོས་ལོ་ཏོག་རྩྭ་སྙན)ཀྱི་ལྗང་མདོག་བཟའ་བཅའི་ཐོན་སྐྱེད་རྒྱུ་ཆའི་བདེན་དཔང་ར་སྤྲོད་ཐོབ་པ་དང་། ཞིང་ཆེན་རིམ་པའི་ལས་སྟེགས་ཞབས་ཞུའི་ས་གནས་ལ་ཕན་འབྲས་མངོན་གསལ་དོད་པོ་ཐོན་ཡོད།
ཞིབ་སྤེལ་ལྟེ་གནས་ཀྱིས་ཐོན་ལས་འཕེལ་རྒྱས་ཁྲོད་ཚན་རྩལ་གྲུབ་འབྲས་སྤྱོད་རྒྱུར་སྣང་ཆེན་བྱས་ཏེ་ས་གནས་དེའི་ཐོན་ཁུངས་ཀྱི་ལེགས་ཆ་ཐོན་ལས་ཀྱི་ལེགས་ཆར་འགྱུར་བ་བྱེད་པ་དང་། སྔོན་ཐོན་དང་སྤྱོད་གོ་ཆོད་པའི་འདེབས་འཛུགས་དང་ཐོན་སྐྱེད་ལག་རྩལ་དང་ཟུང་འབྲེལ་གྱིས་གཟན་རྩྭའི་ཐོན་ཚད་དང་སྤུས་ཚད་མཐོ་རུ་བཏང་ནས་སྐྱེ་ཁམས་འབྲོག་ལས་འཕེལ་རྒྱས་ལ་དེ་བས་བརྟན་པའི་རྨང་གཞི་མཁོ་འདོན་བྱེད་པ་དང་འབྲེལ་ཞིང་ཆེན་ཡོངས་ཀྱི་འབྲོག་ལས་ཕྱོགས་སྒྱུར་རིམ་སྤོར་དང་། “ས་མཐོའི་རྩྭ་གྲོང”ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་ཕྱིར་གཏོང་ཁུལ་འཛུགས་སྐྲུན་བཅས་ལ་ཚན་རྩལ་གྱི་སྟོབས་ཤུགས་ལེགས་སྐྱེས་སུ་འབུལ་རྒྱུ་རེད།
