མཚོ་སྔོན་གྱིས་སྨན་བཅོས་འགན་བཅོལ་གཏོང་སྤྲོད་ཁྱབ་ཁོངས་མུ་མཐུད་དུ་རྒྱ་བསྐྱེད་དེ་འགན་བཅོལ་ནང་ཞུགས་མཁན་མང་ཚོགས་ཀྱི་ཁུར་པོ་ཇེ་ཡང་དུ་བཏང་བ།

  གསར་འགོད་པས་མཚོ་སྔོན་ཞིང་ཆེན་སྨན་བཅོས་འགན་ལེན་ཅུའུ་ནས་ཤེས་གསལ་ལྟར་ན། སྨན་བཅོས་འགན་ལེན་ཆུ་ཚད་སྔར་ལས་མཐོ་རུ་བཏང་ནས་སྨན་བཅོས་འགན་ལེན་སྒྱུར་བཅོས་ཀྱི་གྲུབ་འབྲས་ཀྱིས་འགན་བཅོལ་ནང་ཞུགས་མཁན་མང་ཚོགས་ལ་ཕན་པ་ཐོབ་ཆེད། མཚོ་སྔོན་ཞིང་ཆེན་སྨན་བཅོས་འགན་བཅོལ་ཅུའུ་ཡིས་རྣམ་གྲངས་ཀྱི་ནུས་པ་ངེས་གཏན་དང་། ནད་ཐོག་སྨན་བཅོས་ཀྱི་དགོས་མཁོ། བདེ་འཇགས་ནུས་པ། ཐེབས་རྩའི་ཐེག་ནུས་སོགས་ཀྱི་རྒྱུ་རྐྱེན་ལ་ཕྱོགས་བསྡུས་བསམ་གཞིག་བྱས་ནས་ཚད་བརྒལ་སྒྲ་རླབས་ཚ་སེལ་འབྲས་སྐྲན་སྨན་བཅོས་དང་། ཁམས་འདྲེན་སྦུ་གུ་བསྐྱར་གཏོང་ལག་རྩལ། སྒྲ་འབྱིན་འགོག་རྐྱེན་སྦྱོང་བརྡར་སོགས་སྨན་བཅོས་ཞབས་ཞུའི་རྣམ་གྲངས138དང་འདར་སེལ་ཡོ་བྱད། འགོ་སྐྱིའི་སྨན་སྤྱོད་ཟད་གྲོན་རྒྱུ་ཆ8སོགས་མཚོ་སྔོན་ཞིང་ཆེན་སྨན་བཅོས་འགན་བཅོལ་གཏོང་སྤྲོད་ཁྱབ་ཁོངས་ནང་བཅུག་ནས། 2024ལོའི་ཟླ10པའི་ཚེས1ཉིན་ནས་བཟུང་ལག་བསྟར་བྱ་རྒྱུ་རེད།

ཉེ་བའི་ལོ་ཤས་རིང་། མཚོ་སྔོན་ཞིང་ཆེན་སྨན་བཅོས་འགན་བཅོལ་ཅུའུ་ཡིས་སྨན་བཅོས་འགན་བཅོལ་དཀར་ཆག་གི་འགུལ་རྣམ་ལེགས་སྒྲིག་ལས་དོན་མུ་མཐུད་དུ་ཡག་པོ་བསྒྲུབས་ལ། ཐེངས་འདིར་ལེགས་སྒྲིག་བྱས་རྗེས་མཚོ་སྔོན་ཞིང་ཆེན་གྱི་སྨན་བཅོས་ཞབས་ཞུའི་རྣམ་གྲངས་དང་སྨན་སྤྱོད་ཟད་གྲོན་རྒྱུ་ཆ་སྨན་བཅོས་འགན་བཅོལ་དཀར་ཆག་ནང་བཅུག་པའི་བསྡུར་ཚད་སོ་སོ་ནས87%དང68%ཟིན་ཐུབ་པ་རེད།

རྩོམ་སྒྲིག་པ། ཁོན་ཐར་འཚོ།