མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
2024ལོའི་འབྲིང་རྒྱུགས་མཇུག་བསྒྲིལ་ཏེ། 2025ལོའི་འབྲིང་རྒྱུགས་གི་དུང་བརྡ་བསྒྲགས་ཟིན། རྫོང་ཁོངས་ཀྱི་སློབ་མའི་སློབ་སྦྱོང་དམིགས་འབེན་གསལ་པོ་བཟོ་བ་དང་། སློབ་སྦྱོང་བྱེད་ཐབས་ལེགས་པོར་བསྒྱུར་བ། སློབ་སྦྱོང་གི་ལས་ཆོད་མཐོ་རུ་གཏོང་བ་བཅས་ལ་སྐུལ་ལྕག་དང་། ཚན་རིག་དང་མཐུན་པའི་སྒོ་ནས་རྒྱུགས་བསུ་བ་དང་རྒྱུགས་ལ་གྲ་སྒྲིག་བྱ་ཆེད། ཟླ8པའི་ཚེས21ཉིན། མགོ་ལོག་བོད་རིགས་རང་སྐྱོང་ཁུལ་གཅིག་སྒྲིལ་རྫོང་གུང་གཞོན་ཚོགས་པའི་ཨུ་ཡོན་ལྷན་ཁང་གིས་མགོ་ལོག་ཁུལ་གྱི་འབྲིང་རྒྱུགས་རྩེ་གྲའི་སློབ་སྦྱོང་ཉམས་མྱོང་མཉམ་སྤྱོད་བརྗེ་རེས་ཚོགས་འདུ་འཚོགས།
ཐེངས་འདིའི་བྱ་འགུལ་ལ་གཅིག་སྒྲིལ་རྫོང་གི་སློབ་མ་མགོན་པོ་སྐྱིད་མགོ་ལོག་ཁུལ་གྱི་འབྲིང་རྒྱུགས་རྩེ་གྲ་ཡུལ་དངོས་སུ་ཡོང་སྟེ་སློབ་སྦྱོང་ཉམས་མྱོང་མཉམ་སྤྱོད་བརྗེ་རེས་བྱས། སློབ་གྲོགས་མགོན་པོ་སྐྱིད་ཀྱིས་ཡུལ་དངོས་ཀྱི་སློབ་མའི་དྲི་བར་དམིགས་ནས། སློབ་ཁྲིད་ཟིན་བྲིས་ཀྱི་གནད་འགག་ཕན་ནུས་དང་། སློབ་ཁྲིད་མ་བྱས་གོང་གི་སྔོན་སྦྱོང་གི་དོན་སྙིང་། སློབ་ཁྲིད་སྐབས་སུ་བློ་རིག་སྒྲིམ་དགོས་པའི་གལ་གནད། དེ་ནས་སློབ་ཁྲིད་གྲོལ་རྗེས་ཀྱི་བསྐྱར་སྦྱོང་གི་ནུས་ལྡན་བྱེད་ཐབས་བཅས། ཕྱོགས་ཡོངས་དང་ཟུར་མང་པོ་ནས་རང་ཉིད་ཀྱི་དམའ་འབྲིང་ལོ་གསུམ་གྱི་རིང་ལ་གསོག་འཇོག་བྱས་པའི་སློབ་སྦྱོང་གི་ཉམས་མྱོང་རྩ་ཆེན་ཚང་མར་མཉམ་སྤྱོད་བྱས། མོས་ཚད་མཐོའི་རང་གཅུན་གྱི་སློབ་སྦྱོང་གོམས་སྲོལ་དང་། ཤེས་རབ་ཀྱིས་ཕྱུག་པའི་སློབ་སྦྱོང་བྱེད་ཐབས་དང་བརྟན་བརླིང་ཞི་ལྷོད་ཀྱི་རྒྱུགས་བསུའི་སེམས་ཁམས་ཀྱིས་དེར་འདུས་སློབ་མ་ཀུན་ལ་ངོ་མཚར་བསྐྱེད་ཅིང་བསྔགས་བརྗོད་ཚད་མེད་བྱས། དེ་བས་ཀྱང་ཚང་མར་ཕན་ནུས་མཐོ་བའི་སློབ་སྦྱོང་བྱེད་ཐབས་དང་། ཚན་རིག་དང་མཐུན་པའི་ངང་རྒྱུགས་བསུ་བའི་སྤོབས་པ་དང་སྟོབས་ཤུགས་བསྩལ།
སློབ་གྲོགས་མགོན་པོ་སྐྱིད་ཀྱིས་ད་དུང་མ་ལག་ཚང་བའི་སྒོ་ནས་དམའ་འབྲིང་སློབ་སྦྱོང་གི་ཁྱད་ཆོས་དང་འགྲན་སློང་ལྷུག་པོར་བརྗོད་ཅིང་། གཞན་ཡང་བསླབ་ཚན་རེ་རེར་དམིགས་ནས་སློབ་སྦྱོང་གི་གདམས་ངག་དང་བྱེད་ཐབས་མཁོ་སྤྲོད་བྱས་ཏེ། སློབ་མ་རྣམས་ལ་ཅུང་འཐུས་སྒོ་ཚང་བའི་སློབ་སྦྱོང་མཛུབ་སྟོན་བྱས་ཤིང་། ཁོ་ཚོས་སྔར་བས་ནུས་ལྡན་གྱིས་རྒྱུགས་ལ་ཁ་གཏད་འཇལ་བར་རོགས་འདེགས་བྱས། བྱ་འགུལ་ཡུལ་དངོས་ནས་ཁྱིམ་བདག་དང་སློབ་མ50ལྷག་གིས་བློ་སེམས་རྩེ་གཅིག་གིས་ཕུལ་བྱུང་སློབ་མའི་སློབ་སྦྱོང་ཉམས་མྱོང་མཉམ་སྤྱོད་ལ་མཉན་པ་དང་། ཐེངས་འདིའི་བྱ་འགུལ་ལ་ཁྱིམ་བདག་དང་སློབ་མ་རྣམས་ཀྱི་སྤྲོ་སེམས་འཁོལ་བའི་དགའ་བསུ་ཐོབ་ལ་སྤྱི་ཚོགས་ཀྱིས་ཀྱང་བསྔགས་བརྗོད་ཆེན་པོ་ཐོབ།
ཐེངས་འདིའི་མཉམ་སྤྱོད་ལ་ཞུགས་པའི་སློབ་མ་ཚོས་སློབ་གྲོགས་མགོན་པོ་སྐྱིད་ལ་ལྷག་བསམ་རྣམ་དག་གིས་རྟེན་འབྲེལ་ཞུས་པ་དང་དུས་མཚུངས་སུ། ཐེངས་འདིའི་བྱ་འགུལ་དེ་མགོ་རྩོམ་ས་དང་གོ་སྐབས་བཟང་པོར་བརྩིས་ཏེ། ཕུལ་དུ་བྱུང་བའི་སློབ་སྦྱོང་ཉམས་མྱོང་ལ་ཧུར་ཐག་གིས་དཔེ་བལྟ་དང་། རང་ཉིད་ལ་ཕྱིར་རྟོག་ཟབ་མོ་བྱས་ནས། སློབ་སྦྱོང་བྱེད་ཐབས་མུ་མཐུད་ལེགས་སྒྱུར་དང་། རྒྱུགས་གྲབས་སེམས་ཁམས་སྙོམས་སྒྲིག་བྱས་ཏེ། བཟང་སྤེལ་ཞན་གསབ་དང་། དངོས་གཉེར་འབད་བརྩོན་བྱེད་པ། མདུན་སྐྱོད་ཀྱི་དམིགས་འབེན་དང་ཁ་ཕྱོགས་བརྟན་པོར་བཏང་ནས། ལང་ཚོའི་ཕུགས་བསམ་མངོན་འགྱུར་བྱེད་པའི་ཆེད་དུ་དཔའ་ངར་ཞུམ་མེད་ཀྱིས་མདུན་དུ་བསྐྱོད་དེ། དམིགས་པ་རྩེ་གཅིག་གིས་རྒྱང་ལ་སླེབས་ཐུབ་པར་བྱ་རྒྱུ་ཡིན།
རྗེས་ཕྱོགས། གོང་གཞོན་ཚོགས་པ་རྫོང་ཨུས་མུ་མཐུད་དུ་ཉམས་མྱོང་བརྗེ་རེས་མཉམ་སྤྱོད་བྱ་འགུལ་སྤེལ་ཏེ། སྔར་ལས་མང་བའི་ཕུལ་བྱུང་ན་གཞོན་སློབ་བུ་ཁྲིད་སྟེགས་སུ་བུད་དེ་ཉམས་མྱོང་བརྒྱུད་སྤྲོད་དང་། དེང་རབས་གཞོན་ནུའི་ལང་ཚོའི་མཚར་སྡུག་གང་ལེགས་སྒོས་མངོན་པར་རེ་སྒུག་བྱ་རྒྱུ་རེད། །
རྩོམ་སྒྲིག་པ། ལྷ་ཆེན་རྒྱལ།
