【ཞིང་ཆེན་ནགས་ལས་རྩྭ་ཐང་ཅུས།】མཚོ་སྔོན་ཞིང་ཆེན་གྱིས2023ལོའི་རྒྱལ་ཁོངས་ས་ཞིང་སྔོ་སྒྱུར་གྱི་སྤྱི་བསྒྲགས་སྤེལ་བ།

མཚོ་སྔོན་གསར་འགྱུར་དྲ་བའི་འཕྲིན། ཟླ4པའི་ཚེས15ཉིན། མཚོ་སྔོན་ཞིང་ཆེན་ནགས་ལས་དང་རྩྭ་ཐང་ཅུའུ། མཚོ་སྔོན་ཞིང་ཆེན་སྔོ་འགྱུར་ཨུ་ཡོན་ལྷན་ཁང་གཞུང་ལས་ཁང་བཅས་ཀྱིས2023ལོའི་རྒྱལ་ཁོངས་ས་ཞིང་སྔོ་སྒྱུར་སྤྱི་བསྒྲགས་སྤེལ་བ་རེད།

སྤྱི་བསྒྲགས་ལས་མངོན་པར། 2023ལོར། མཚོ་སྔོན་ཞིང་ཆེན་གྱིས་གཞི་ཁྱོན་ཆེ་བའི་རྒྱལ་ཁོངས་ས་ཞིང་སྔོ་སྒྱུར་ལས་འགུལ་གཏིང་ཟབ་སྤེལ་ནས། རྒྱལ་ཁོངས་ས་ཞིང་སྔོ་འགྱུར་ལས་དོན་ལ་ཚན་རིག་དང་མཐུན་པའི་སྒོ་ནས་སྐུལ་འདེད་བཏང་ཞིང་། ལོ་ཧྲིལ་པོར་རྒྱལ་ཁབ་ས་ཆ་སྤྱི་ཆིང་ཁྲི30.31སྔོ་འགྱུར་ཟིན་པ་དང་། རྒྱལ་ཁབ་སྤྱི་གླིང་གཙོ་བྱས་ཏེ་རང་བྱུང་སྲུང་སྐྱོང་ཁུལ་མ་ལག་དཔེ་སྟོན་ཞིང་ཆེན་འཛུགས་སྐྲུན་ལ་བརྟན་པོའི་ངང་སྐུལ་འདེད་བཏང་ནས། གཙང་གསུམ་ཆུ་འགོའི་རྒྱལ་ཁབ་སྤྱི་གླིང་སྤུས་ལེགས་འཛུགས་སྐྲུན་གྱི་དུས་མཚམས་གསར་པར་སླེབས། ཟི་ལིང་རྒྱལ་ཁབ་རྩི་ཤིང་ར་བ《རྒྱལ་ཁབ་རྩི་ཤིང་ལྡུམ་རའི་མ་ལག་བཀོད་སྒྲིག་ཇུས་གཞིའི》ནང་བཅུག་པ་དང་། “བྱང་གསུམ”ལས་གྲྭའི་འགག་སྒྲོལ་དམག་འཐབ་ཁྱོན་ཡོངས་ནས་སྤེལ་འགོ་ཚུགས། རྒྱལ་ཁབ་ཀྱི་བྱེ་ཐང་སྤྱི་གླིང་12འགུལ་རྣམ་ལྟ་ཞིབ་ཚད་ལེན་ལས་དོན་ལེགས་གྲུབ་བྱུང་། ཆེད་དོན“ཉིས་བརྩེགས”ཅན་ལ་གཅིག་གྱུར་སྐུལ་འདེད་དང་། རྒྱལ་ཁོངས་ས་ཞིང་སྔོ་སྒྱུར་ཚོད་ལྟའི་དཔེ་སྟོན། བྱེ་འགྱུར་ས་ཆ་བཀག་སྡོམ་སྲུང་སྐྱོང་སོགས་གཙོ་གནད་ལས་གྲྭ་འཛུགས་སྐྲུན་རྣམ་གྲངས་གཅིག་གྱུར་གྱིས་སྐུལ་འདེད་བཏང་སྟེ། ལོ་ཧྲིལ་པོར་སྤྱི་ཆིང་ཁྲི9.75ཡི་བྱེ་འགོག་བྱེ་བཅོས་ལས་འགན་ལེགས་འགྲུབ་བྱུང་།

མཁར་ཁུལ་སྔོ་སྒྱུར་རིས་སྒྲོམ་ལྟ་བུ་དང་། གྲོང་གསེབ་སྔོ་སྒྱུར་དེ་སྦྲེལ་ཐག་དུ་བཟུང་སྟེ།  གྲོང་ཁྱེར་དང་གྲོང་རྡལ། གྲོང་ཚོའི་ས་ཁོངས་ཀྱི་རི་རྒོད་དང་ས་རྒོད་དང་། གྲོང་ཚོའི་འགྲམ་དང་། ཁྱིམ་ཚང་གི་འགྲམ། ལམ་འགྲམ། ཆུ་འགྲམ་སོགས་ཀྱི་སྒོ་ར་སྔོ་ལྗང་རྩི་ཤིང་གིས་བརྒྱན་དགོས། སྤྱི་ཚོགས་ཡོངས་ས་ཁོངས་སྔོ་སྒྱུར་དང་དམངས་ཡོངས་འོས་འགན་སྡོང་འཛུགས་ནང་ཞུགས་པར་སྐུལ་སློང་བྱ་དགོས། “དཔྱིད་རླུང2023”རྡུང་རྡེག་བཅོས་སྒྲིག་གི་ཆེད་དོན་ལས་འགུལ་སྤེལ་ནས། ནགས་ཚལ་དང་རྩྭ་ཐང་གི་ཐོན་ཁུངས་ཕྱོགས་བསྡུས་བཅོས་སྒྲིག་ལ་སྐུལ་འདེད་བཏང་བ་རེད།

ནགས་ཚལ་དང་རྩྭ་ཐང་ཁྱད་ལྡན་ཐོན་ལས་འཕེལ་རྒྱས་ཇེ་མགྱོགས་སུ་བཏང་ནས་ནགས་ཚལ་བདེ་ཐང་གསོ་སྐྱོང་དང་སྐྱེ་ཁམས་ཡུལ་སྐོར་སོགས་ལས་རིགས་གསར་པ་གསོ་སྐྱོང་ཧུར་ཐག་བྱ་དགོས། “ནགས་རྩྭ་ལག་རྩལ་གསར་པ་མཚོ་སྔོན་དུ་བསྐྱོད་པའི”ལས་དོན་སྐུལ་འདེད་ཚོགས་འདུ་དང་ཡོན་ཧྲིའི་ཆེད་མཁས་པའི་བཞུགས་མོལ་ཚོགས་འདུ་འཚོགས་ནས《ནགས་རྩྭ་ལག་རྩལ་མཐོ་གསར་མཚོ་སྔོན་དུ་བསྐྱོད་པའི་བྱ་འགུལ་ལག་བསྟར་ཇུས་གཞི(2023ལོ་ནས2025ལོ་བར)》མཉམ་འབྲེལ་ཐོག་པར་འགྲེམས་བྱས་ནས་ཚན་རྩལ་རོགས་སྐྱོར་བྱེད་ཐབས་ཁག16བཏོན་པ་རེད། 《མཚོ་སྔོན་ཞིང་ཆེན་གྱི་རི་སྐྱེས་སྲོག་ཆགས་སྲུང་སྐྱོང་སྲོལ་ཡིག》《མཚོ་སྔོན་ཞིང་ཆེན་གྱི་འདམ་ར་སྲུང་སྐྱོང་སྲོལ་ཡིག》དེ་ཞིང་ཆེན་དམངས་འཐུས་ཚོགས་ཆེན་གྱི་ཁྲིམས་འཛུགས་འཆར་འགོད་ནང་བཅུག་པ་རེད།

རྩོམ་སྒྲིག་པ། ལྷ་ཆེན་རྒྱལ།