མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
མཚོ་སྔོན་གསར་འགྱུར་དྲ་བའི་འཕྲིན། ཟླ11པའི་ཚེས29ཉིན། གསར་འགོད་པས་མཚོ་ཤར་གྲོང་ཁྱེར་ཧོར་གྲོང་ཧོར་རིགས་རང་སྐྱོང་རྫོང་ཞིང་ལས་གྲོང་གསེབ་དང་ཚན་རྩལ་ཅུའུ་ནས་ཤེས་གསལ་ལྟར་ན། “ཧོར་གྲོང་ཞོག་ཁོག”སྤུས་རྟགས་ཀྱི་ཤུགས་རྐྱེན་ཐེབས་ཤུགས་སྔར་ལས་ཇེ་ཆེར་དང་། ཁོར་ཡུག་གིས་སྤུས་ཚད་བཟང་པོ་ར་སྤྲོད། “ཧོར་གྲོང་ཞོག་ཁོག”གི་སྤུས་རྟགས་ལ་གཙང་སེལ་བཅས་བྱ་ཆེད། ད་ལོར་ཧོར་གྲོང་རྫོང་གིས་མཚོ་སྔོན་ཞིང་ཆེན་གནམ་གཤིས་ལྟེ་གནས་དང་ཧོར་གྲོང་རྫོང་གནམ་གཤིས་ཅུའུ་ལ་གཞི་བཅོལ་ཏེ་གནམ་གཤིས་སྤུས་ཚད་ཀྱི་བདེན་དཔང་ར་སྤྲོད་ལས་དོན་སྤེལ་ཞིང་། མིག་སྔར་བདེན་དཔང་ར་སྤྲོད་ལས་དོན་ལེགས་གྲུབ་ཟིན་པ་དང་། ཧོར་གྲོང་ཞོག་ཁོག་ལ་མཚོ་སྔོན་ཞིང་ཆེན་གྱི་ཞིང་ལས་ཐོན་རྫས་ཀྱི་གནམ་གཤིས་སྤུས་ཚད“ཆེས་ལེགས་པའི”བདེན་དཔང་ར་སྤྲོད་ཐོབ་པ་རེད།
ཤེས་གསལ་ལྟར་ན། ཐེངས་འདིའི་བདེན་དཔང་ར་སྤྲོད་ལས་དོན་ནང1991ལོ་ནས2023ལོའི་བར་ཧོར་གྲོང་རྫོང་གི་ས་ངོས་གནམ་གཤིས་ལྟ་ཞིབ་ཚད་འཇལ་ས་ཚིགས་ཀྱིས་ཞོག་ཁོག་སྐྱེ་འཚར་དུས་ཀྱི་གནམ་གཤིས་གཞི་གྲངས་དང་། ཞིང་ལས་གནམ་གཤིས་ལྟ་ཞིབ་ཚད་ལེན་གྱི་གཞི་གྲངས་བདམས་ནས། ལོ་རྒྱུས་ཀྱི་གནམ་གཤིས་གནོད་འཚེའི་གཞི་གྲངས་དང་ཟུང་འབྲེལ་ཐོག 2023ལོ་དང་ཉེ་བའི་ལོ5རིང་གི་ཧོར་གྲོང་ཞོག་ཁོག་སྐྱེ་འཚར་གྱི་གནམ་གཤིས་ཆ་རྐྱེན་ལ་ཁྱོན་ཡོངས་ནས་ཚོད་སྐོར་བྱས་པ་དང་། ཧོར་གྲོང་རྫོང་གི་ཞོག་ཁོག་སྐྱེ་འཚར་དུས་ཚིགས་ཀྱི་ཆ་སྙོམས་དྲོད་ཚད་ཀྱི་ཚད་གཞི་དང་། ཆར་ཆུ་མང་བའི་ཟླ་ཡི་ཆར་ཆུ་འབབ་ཚད་དང་། དྲོད་ཚད་མཐོ་བའི་ཟླ་ཡི་ཆེས་མཐོ་བའི་དྲོད་ཚད། ཆེས་གྲང་བའི་དུས་ཚིགས་ཀྱི་ཆ་སྙོམས་དྲོད་ཚད་བཅས་རྩིས་པ་རེད། དེ་དང་ཆབས་ཅིག་ཏུ། གནམ་གཤིས་འགྱུར་ལྡོག་གི་རྒྱབ་ལྗོངས་འོག གནམ་གཤིས་ཆ་རྐྱེན་གྱིས་ཧོར་གྲོང་ཞོག་ཁོག་ཐོན་ཚད་ལ་ཐེབས་པའི་ཤུགས་རྐྱེན་ལ་ཞིབ་བསྡུར་དབྱེ་ཞིབ་བྱས་པ་མ་ཟད། མ་འོངས་པའི་གནམ་གཤིས་འགྱུར་ལྡོག་ལས་ཐོན་པའི་ཤུགས་རྐྱེན་ལ་ཚོད་དཔག་ཀྱང་བྱས་པ་དང་། གནམ་གཤིས་ཆ་རྐྱེན་གྱི་ཚོད་སྐོར་དང་དབྱེ་ཞིབ་བརྒྱུད་དེ། ཧོར་གྲོང་ཞོག་ཁོག་གི་གནམ་གཤིས་སྤུས་ཚད“ཆེས་ལེགས་པ”རུ་ངོས་འཛིན་བྱས་པ་རེད།
“ཧོར་གྲོང་ཞོག་ཁོག”ནི་ཐོན་ཚད་མཐོ་ཞིང་། ཞོག་ཁོག་འདེབས་ཁྱོན་ཆེ་བ། བསིང་ཕྱེ་འདུས་ཚད་མཐོ་བ་བཅས་ཀྱི་ཁྱད་ཆོས་ལྡན། ཧོར་གྲོང་རྫོང་གིས་ལོ་རེར་ཆ་སྙོམས་ཞོག་ཁོག་སྤྱི་ཆིང་ཁྲི1.424བཏབ་པ་དང་། རྫོང་ཡོངས་སུ་ཞོག་ཁོག་འདེབས་འཛུགས་བྱེད་མཁན་ཆེད་ལས་མཉམ་ལས་ཁང327ཡོད་ཅིང་། ཞོག་ཁོག་གི་ཕིན་ཕྱེ་ལས་སྣོན་བྱེད་མཁན་ཁེ་ལས་དང་མཉམ་ལས་ཁང30ཡོད་པ་དང་། ལོ་རེར་ཕིན་ཕྱེ་ཏུན1770ཐོན་སྐྱེད་བྱེད་ཀྱི་ཡོད། ཧོར་གྲོང་རྫོང་ནི་ཞིང་ལས་དང་གྲོང་གསེབ་པའུ་ཡིས་གཏན་འཁེལ་བྱས་པའི་རྒྱལ་ཁབ་ཀྱི་ས་ཁོངས་རང་བཞིན་གྱི་ཞོག་ཁོག་སོན་བཟང་གསོ་སྤེལ་རྟེན་གཞི་ཞིག་རེད། ཐེངས་འདིའི་ཧོར་གྲོང་ཞོག་ཁོག་གི་གནམ་གཤིས་སྤུས་ཚད“ཆེས་ལེགས་པར”ར་སྤྲོད་བྱུང་བ་དེ་ཧོར་གྲོང་རྫོང་རྒྱལ་ཁབ་ཀྱི་ཞིང་ལས་ཐོན་རྫས་ཀྱི་སྤུས་ཚད་བདེ་འཇགས་རྫོང་དང་། རྒྱལ་ཡོངས་ཀྱི་ཞོག་ཁོག་དང་པད་ཁའི་ས་ཁོངས་རང་བཞིན་གྱི་སོན་བཟང་གསོ་སྤེལ་རྟེན་གཞི། ལྷད་མེད་སྐྱེ་ལྡན་ཞིང་ཕྱུགས་ཐོན་རྫས་ཕྱིར་གཏོང་བྱ་ཡུལ་གྱི་སྔོན་སྐྱོད་དཔེ་སྟོན་རྫོང་བཅས་མུ་མཐུད་གཏོད་པ་ལ་མཚོན་ན་དོན་སྙིང་གལ་ཆེན་ལྡན།
རྩོམ་སྒྲིག་པ། ཡེ་ཤེས་སྒྲོལ་མ།
