མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
རང་རེའི་དྲ་བའི་འཕྲིན། བསྟུད་མར་ཉིན་འགའི་རིང་ལ། ཡུལ་ཤུལ་བོད་རིགས་རང་སྐྱོང་ཁུལ་ཡུས་ཧྲུའུ་གྲོང་ཁྱེར་གྱིས་བརྗོད་དོན་སློབ་གསོའི་བཀོད་སྒྲིག་གལ་ཆེན་སྣ་ཚོགས་ལས་སྒྲུབ་ལས་གཏོད་དང་བྱ་བར་སྐུལ་འདེད་གཏོང་བའི་སྒུལ་ཤུགས་གལ་ཆེན་ཏུ་བསྒྱུར་ཏེ་མང་ཚོགས་ཀྱི་ཡོང་སྒོ་འཕར་བར་དམ་དུ་དམིགས་པ་དང་བྱེད་ཐབས་སྣ་མང་སྤྱད་དེ་གྲོང་གསེབ་དར་སྤེལ་ལ་གྲུབ་འབྲས་བླངས།
ཡུལ་ཤུལ་གྲོང་ཁྱེར་གྱིས་གོང་གིས་འོག་ལ་སྣེ་ཁྲིད་དང་འོག་གིས་གོང་ལ་ཡར་སྐུལ་བྱེད་རྒྱུ་ཟུང་འབྲེལ་བྱེད་པའི་ཐབས་ལམ་སྤྱད་དེ་གནད་དོན་གྱི་གསལ་ཁྲ་ལྟར་གཞི་རིམ་དུ་ཟབ་ཞུགས་བྱེད་པ་དང་། དུས་བཅད་ལྟར་གཅིག་བསྡུས་གསོ་སྦྱོང་དང་ཁྱིམ་ཚང་དུ་སོང་ནས་མཛུབ་སྟོན་བྱེད་པ། ཡུལ་དངོས་ནས་གནད་དོན་ཐག་གཅོད་པ་སོགས་ཀྱི་བྱེད་ཐབས་བརྒྱུད་དེ་གྲོང་ཁྱེར་དང་ཡུལ་ཚོ། སྡེ་བ་བཅས་རིམ་པ་གསུམ་མཉམ་སྒུལ་དང་ཕན་ཚུན་སྦྲེལ་མཐུད་ཀྱི་བྱ་བའི་རྣམ་པ་གྲུབ་པར་བྱས། མ་དངུལ་སྒོར་དུང་ཕྱུར་བཞི་དང་ས་ཡ་བརྒྱད་བཏང་སྟེ་ཡུས་ཧྲུའུ་གྲོང་ཁྱེར་གྱི་ཕྱོགས་བསྡུས་ཐོན་ལས་གསར་གཏོད་དངོས་རྒྱུག་གླིང་དང་གསོ་སྤེལ་དཔེ་སྟོན་རྟེན་གཞི་སོགས་སྣེ་ཁྲིད་ལས་གཞི་ལག་བསྟར་བྱས་ཏེ་སྲིད་གཞུང་དང་ཁེ་ལས། མཉམ་ལས་ཁང་། འབྲོག་ཁྱིམ་བཅས་ཀྱི་ཁེ་ཕན་མཉམ་འབྲེལ་གྱི་ནང་རྐྱེན་བཙུགས་པ་དང་ཐོན་ལས་ཀྱི་སྦྲེལ་ཐག་ཡོངས་གོ་རིམ་ལྡན་པར་འཕེལ་རྒྱས་འགྲོ་བར་སྐུལ་ཁྲིད་བྱས། དེ་དང་མཉམ་དུ། ལས་གཏན་ལས་ཞུགས་ཀྱི་གཅིག་ཅན་དྲུག་གི་བྱེད་ཐབས་དོན་འཁྱོལ་བྱས་ཏེ་གྲོང་ཁྱེར་ཡོངས་ཀྱི་དབུལ་ཐར་མི་གྲངས་ཁྲི་གཅིག་དང་བདུན་བརྒྱ་དང་ལྔ་ཡིས་ལས་ཞུགས་བྱེད་པ་མངོན་འགྱུར་བྱས། སྡེ་བའི་ཐུན་མོང་དཔལ་འབྱོར་གྱིས་སྡེ་བ་སྟོབས་ལྡན་དུ་གཏོང་བའི་བཟོ་སྐྲུན་ལག་བསྟར་བྱས་པ་བརྒྱུད་དེ་ཐབས་བརྒྱ་ཇུས་སྟོང་གིས་ཏང་རྩ་འཛུགས་ཀྱི་ཆབ་སྲིད་དགེ་མཚན་དང་རྩ་འཛུགས་དགེ་མཚན་དེ་སྡེ་བའི་ཐུན་མོང་དཔལ་འབྱོར་གྱི་འཕེལ་རྒྱས་དགེ་མཚན་དུ་འགྱུར་བར་བྱས། མིག་སྔའི་བར་དུ། གྲོང་ཁྱེར་ཡོངས་སུ་ཡོང་འབབ་སྒོར་ཁྲི་ལྔ་ནས་སྒོར་འབུམ་གཅིག་གི་སྡེ་བ་ཉེར་གཉིས་ཡོད་པ་དང་སྒོར་འབུམ་གཅིག་ནས་འབུམ་བཞིའི་སྡེ་བ་ཉེར་དགུ་ཡོད།
རྩོམ་སྒྲིག་པ། ལྷ་ཆེན་རྒྱལ།
