མཚོ་རླུང་ཏུའུ་སུའུ་རུའེ་ཞེས་པ་དེའི་ཤུགས་རྐྱེན་ཐེབས་པའི་དབང་གིས། ཧའེ་ཧི་གཙང་པོའི་འབབ་རྒྱུད་དུ་ཆུ་ལོག་གི་གནོད་པ་ཚབས་ཆེན་བྱུང་བ་དང་། དེ་མིན་སུང་ཧྭ་ཅང་གཙང་པོའི་འབབ་རྒྱུད་དང་ཅིན་ཅང་གཙང་པོ། ཏུང་ཅང་གཙང་པོ་བཅས་ཀྱི་ཆུ་ལག་ཁག་གཅིག་ལ་ཉེན་མཚམས་ལས་བརྒལ་བའི་ཆུ་ལོག་གི་གནོད་པ་བྱུང་ནས། ས་ཁུལ་ཁག་གཅིག་གི་ཆུ་བེད་བཟོ་སྐྲུན་སྒྲིག་ཆས་ལ་གཏོར་སྐྱོན་ཚབས་ཆེན་བཟོས། ཟླ་བརྒྱད་པའི་ཚེས་བཅུ་ཉིན། ནོར་སྲིད་པུའུ་དང་ཆུ་བེད་པུའུ་ཡིས་ཆུ་བེད་གནོད་སེལ་ཐད་མ་དངུལ་སྒོར་ཐེར་འབུམ་གཅིག་དང་དུང་ཕྱུར་ལྔ་ས་ཡ་ལྔ་བཏང་ནས། པེ་ཅིང་དང་ཐེན་ཅིན། ཧི་པེ། ཧྲན་ཞི། ནང་སོག ལེའོ་ཉིང་། ཅི་ལིན། ཧེ་ལུང་ཅང་། ཀྲེ་ཅང་། ཨན་ཧོས། ཧྥུའུ་ཅན། ཧི་ནན། ཀོང་ཏུང་སོགས་ཞིང་ཆེན་དང་རང་སྐྱོང་ལྗོངས། གྲོང་ཁྱེར་བཅས་བཅུ་གསུམ་གྱི་གནོད་ཐེབས་ས་ཁུལ་དང་། གཙང་པོ་དང་མཚེའུ། ཆུ་རགས། ཆུ་མཛོད། ཆུ་འཐེན་འཕྲུལ་འཁོར། ཆུ་ལམ་བཟོ་སྐྲུན་སོགས་ཆུ་བེད་བཟོ་སྐྲུན་སྒྲིག་ཆས་ལ་གཏོར་སྐྱོན་ཚབས་ཆེན་བཟོས་པ་ཞིག་གསོ་བྱེད་པའི་ཐད་རྒྱབ་སྐྱོར་བྱས་ནས། གནོད་ཐེབས་ས་ཁུལ་གྱི་ཐོན་སྐྱེད་དང་འཚོ་བའི་སྒྲིག་ལམ་གང་མགྱོགས་ཀྱིས་སླར་གསོ་བྱེད་ཐུབ་པར་རོགས་རམ་བྱས།

འདིའི་སྔོན་ལ། སྡེ་ཁག་གཉིས་ཀྱིས་མགྱོགས་མྱུར་ངང་འགུལ་སྐྱོད་སྤེལ་ནས། ཟླ་བརྒྱད་པའི་ཚེས་བཞི་ཉིན། པེ་ཅིང་དང་ཐེན་ཅིན། ཧི་པེ་བཅས་ཀྱི་ཆུ་བེད་གནོད་སེལ་ཐད་མ་དངུལ་སྒོར་དུང་ཕྱུར་བཞི་དང་བྱེ་བ་ལྔ་བཏང་བ་དང་། ཟླ་བརྒྱད་པའི་ཚེས་དགུ་ཉིན། སྒོར་ཐེར་འབུམ་གཅིག་བཏང་ནས། ཆུ་ལོག་གི་གནོད་པ་ཐེབས་སའི་མང་ཚོགས་ཀྱི་རྒྱུན་ལྡན་གྱི་ཐོན་སྐྱེད་དང་འཚོ་བའི་སྒྲིག་ལམ་གང་མགྱོགས་ཀྱིས་སླར་གསོ་བྱེད་ཐུབ་པར་རྒྱབ་སྐྱོར་གང་ལེགས་བྱས།