མཚོ་སྔོན་ཞིང་ཆེན་གྱིས་ངེས་གཏོང་འགྲོ་སོང་ཐད་ཀྱི་དཀའ་ཁག་ཁྱིམ་ཚང་ངོས་འཛིན་བྱེད་ཐབས་བཏོན་པ།

རིམ་པ་དང་རིགས་དགར་བའི་སྤྱི་ཚོགས་རོགས་སྐྱོབ་མ་ལག་སྔར་ལས་འཐུས་ཚང་དུ་གཏོང་བ་དང་། བྱ་ཡུལ་རིམ་འབྱེད་དང་གནད་ཁེལ་ངོས་འཛིན་བྱ་བ་ལེགས་པོར་བསྒྲུབ་ཆེད། ཉེ་ཆར། མཚོ་སྔོན་ཞིང་ཆེན་དམངས་སྲིད་ཐིང་གིས་ནོར་སྲིད་ཐིང་དང་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ཐིང་། སྨན་བཅོས་འགན་བཅོལ་ཅུས་སོགས་འབྲེལ་ཡོད་སྡེ་ཁག་དང་མཉམ་འབྲེལ་གྱིས《མཚོ་སྔོན་ཞིང་ཆེན་གྱི་ངེས་གཏོང་འགྲོ་སོང་ཐད་ཀྱི་དཀའ་ཁག་ཁྱིམ་ཚང་ངོས་འཛིན་བྱེད་ཐབས》(གཤམ་དུ《བྱེད་ཐབས》ཞེས་བསྡུས་ཡོད)དཔར་འགྲེམ་བྱས་ལ། དེས་ངེས་གཏོང་འགྲོ་སོང་ཐད་ཀྱི་དཀའ་ཁག་ཁྱིམ་ཚང་ངོས་འཛིན་བྱེད་པའི་ཆ་རྐྱེན་དང་ངོས་འཛིན་བྱེད་རིམ།རོགས་སྐྱོབ་བྱེད་ཐབས་སོགས་ཚད་ལྡན་དུ་བཏང་ཡོད།

《བྱེད་ཐབས》ནང་ངེས་གཏོང་འགྲོ་སོང་ཐད་ཀྱི་དཀའ་ཁག་ཁྱིམ་ཚང་ངོས་འཛིན་བྱེད་པའི་ཆ་རྐྱེན་ཁ་གསལ་བཟོས་ཡོད་ལ། དུས་མཚུངས་སུ་གཤམ་གསལ་ཆ་རྐྱེན4དང་མཐུན་པའི་མཚོ་སྔོན་ཞིང་ཆེན་གྱི་ཁྱིམ་ཐོ་ཡིན་པའི་སྡོད་དམངས་ཀྱིས་ངེས་གཏོང་འགྲོ་སོང་ཐད་དཀའ་ཁག་ཡོད་པའི་ཁྱིམ་ཚང་ངོས་འཛིན་བྱ་རྒྱུའི་རེ་ཞུ་བྱེད་ཆོག་སྟེ། མ་མཐའི་འཚོ་བའི་འགན་སྲུང་དང་ཁྱད་དབུལ་མི་སྣའི་རོགས་སྐྱོར་ཁྱབ་ཁོངས་སུ་བཞག་མེད་པར་མ་ཟད། འཚོ་བའི་འགན་སྲུང་མཐའ་མཚམས་ཀྱི་ཁྱིམ་ཚང་དུའང་ངོས་འཛིན་བྱས་མེད་པ། མཉམ་དུ་འཚོ་བ་རོལ་བའི་ཁྱིམ་ཚང་གི་ཁོངས་མིའི་མི་རེའི་ཆ་སྙོམས་ཡོང་འབབ་ལོ་འཁོར་གོང་མའི་གྲོང་ཁྱེར(ཁུལ)གྱི་གྲོང་ཁྱེར་དང་གྲོང་གསེབ་སྡོད་དམངས་ཀྱི་མི་རེའི་ཆ་སྙོམས་བཀོལ་ཆོག་ཡོང་འབབ་ལས་དམའ་བ། རེ་འདུན་མ་ཞུས་གོང་གི་ཟླ་བ་བཅུ་གཉིས་ནང་། མཉམ་དུ་འཚོ་བ་རོལ་བའི་ཁྱིམ་ཚང་གི་ཁོངས་མིའི་འཚོ་བ་དང་སྨན་བཅོས། སློབ་གསོ། དབང་པོ་སྐྱོན་ཅན་ལུས་གསོའི་འགྲོ་སྒོ་དང་འགྲོ་སོང་གཞན་དག་སོགས་ངེས་གཏོང་འགྲོ་སོང་གིས་ཁྱིམ་ཚང་གི་སྤྱིའི་ཡོང་འབབ་ཀྱི60%ལས་མི་དམའ་བ་ཟིན་ཡོད་པ།ཁྱིམ་གྱི་རྒྱུ་ནོར་གནས་ཚུལ་ནི་མཚོ་སྔོན་ཞིང་ཆེན་གྱི་མ་མཐའི་འཚོ་བའི་འགན་སྲུང་མཐའ་མཚམས་ཁྱིམ་ཚང་གི་སྲིད་ཇུས་ཀྱི་འབྲེལ་ཡོད་གཏན་འབེབས་དང་མཐུན་པ་བཅས་རེད།

《བྱེད་ཐབས》ཀྱིས་ངེས་གཏོང་འགྲོ་སོང་ཐད་དཀའ་ཁག་ཡོད་པའི་ཁྱིམ་ཚང་ངོས་འཛིན་བྱེད་རིམ་ཁ་གསལ་བཟོས་ཡོད། མ་མཐའི་འཚོ་བའི་འགན་སྲུང་གི་ཁྱིམ་ཚང་རོགས་སྐྱོབ་ཞིབ་བཤེར་གོ་རིམ་མུ་མཐུད་དུ་སྤྱད་དེ། ངེས་གཏོང་འགྲོ་སོང་ཐད་དཀའ་ཁག་ཡོད་པའི་ཁྱིམ་ཚང་གི་ཡོང་འབབ་དམའ་བའི་མི་འབོར་གྱི་འགུལ་རྣམ་ལྟ་ཞིབ་ཚད་ལེན་གྱི་ཆ་འཕྲིན་སྟེགས་བུའི་ནང་ཁེར་རྐྱང་དུ་མཚོན་པ་དང་། རྒྱུན་རྣམ་ཅན་གྱི་ལྟ་ཞིབ་ཚད་ལེན་སྔོན་བརྡ་གཏོང་བའི་ཁྱབ་ཁོངས་ནང་བཞག་ནས། འབྲེལ་ཡོད་སྡེ་ཁག་དང་ལས་ཁུངས་ཀྱིས་ངེས་གཏོང་འགྲོ་སོང་ཐད་དཀའ་ཁག་ཡོད་པའི་ཁྱིམ་ཚང་ལ་རོགས་སྐྱོབ་རོགས་རམ་བྱེད་པར་ཆ་འཕྲིན་འདྲི་རྩད་དང་དགོས་མཁོ་སྐྱེལ་བ་སོགས་ཀྱི་ཞབས་ཞུའི་རྒྱབ་སྐྱོར་མཁོ་འདོན་བྱེད་པ་དང་། རོགས་སྐྱོབ་ཐོན་ཁུངས་གཅིག་གྱུར་འཆར་འགོད་དང་ཆ་འཕྲིན་མཉམ་སྤྱོད་མངོན་འགྱུར་བྱེད་དགོས།《བྱེད་ཐབས》ཀྱིས་ངེས་གཏོང་འགྲོ་སོང་ཐད་དཀའ་ཁག་ཡོད་པའི་ཁྱིམ་ཚང་གི་འགན་སྲུང་གོ་ཆོད་དུས་ཡུན་ཟླ་བ12ཡིན་པ་གཏན་འབེབས་བྱས་ཡོད་པ་དང་། གོ་ཆོད་དུས་ཡུན་ནང་། འགན་སྲུང་བྱ་ཡུལ་གྱིས་ལྟོས་ཟླའི་རོགས་སྐྱོབ་རོགས་རམ་ལོངས་སུ་སྤྱད་ཆོག དུས་ཡུན་ལོངས་རྗེས་ཡང་བསྐྱར་ངོས་འཛིན་བྱ་རྒྱུའི་རེ་འདུན་ཞུ་དགོས།

《བྱེད་ཐབས》ཀྱིས་ངེས་གཏོང་འགྲོ་སོང་ཐད་དཀའ་ཁག་ཡོད་པའི་ཁྱིམ་ཚང་ལ་རོགས་སྐྱོབ་བྱེད་ཐབས་ཁ་གསལ་བཟོས་ཡོད། ངེས་གཏོང་འགྲོ་སོང་ཐད་དཀའ་ཁག་ཡོད་པའི་ཁྱིམ་ཚང་གི་རོགས་སྐྱོབ་བྱེད་ཐབས་ནང་སྨན་བཅོས་དང་སློབ་གསོ། སྡོད་ཁང་། ལས་ཞུགས། འཕྲལ་བསྟུན་སོགས་ཆེད་དོན་སྤྱི་ཚོགས་རོགས་སྐྱོབ་དང་གནས་སྐབས་རོགས་སྐྱོབ་ཚུད་ཡོད།《བྱེད་ཐབས》དང་མ་མཐའི་འཚོ་བའི་འགན་སྲུང་སྲིད་ཇུས་འབྲེལ་མཐུད་བྱས་ནས་ངེས་གཏོང་འགྲོ་སོང་ཐད་དཀའ་ཁག་ཡོད་པའི་ཁྱིམ་ཚང་གིས་ལྟོས་ཟླའི་ཆེད་དོན་སྤྱི་ཚོགས་རོགས་སྐྱོབ་ལོངས་སུ་སྤྱད་རྗེས་གཞི་རྩའི་འཚོ་བར་སྔར་བཞིན་དཀའ་ཁག་ཡོད་ཚེ། སྲིད་ཇུས་ལྟར་མ་མཐའི་འཚོ་བའི་འགན་སྲུང་ཁྱབ་ཁོངས་ནང་བཞག་ཆོག་པ་དང་། འགྲོ་སོང་ཐད་དཀའ་ཁག་ཡོད་པའི་ཁྱིམ་ཚང་ཁྲོད་ཀྱི་དབང་བོ་སྐྱོན་ཅན་ཚབས་ཆེན་དང་ནད་ལྕི་མོ་ཕོག་པའི་མི་སྣ། སློབ་ཆེན་སློབ་མ་སོགས་དམིགས་བསལ་གྱི་དཀའ་ངལ་ཡོད་པའི་མི་ཚོགས་ཀྱིས། “མི་གཅིག་འགན་སྲུང་བྱེད་པའི”སྲིད་ཇུས་གཞིར་བཟུང་ནས་མ་མཐའི་འཚོ་བའི་འགན་སྲུང་ཁྱབ་ཁོངས་སུ་འཇུག་པ་དང་། གཞི་རྩའི་འཚོ་བའི་འགན་སྲུང་ཆུ་ཚད་ཏན་ཏིག་གིས་མཐོར་འདེགས་གཏོང་དགོས་པ་ནན་གྱིས་བསྟན་ཡོད། །