ཐེན་ཅིན་གྱིས་མཚོ་སྔོན་ལ་རོགས་སྐྱོར་བྱེད་པའི“མཐུན་ལྔ་མཉམ་འཇུག”གིས་རྨ་ལྷོའི་སྤུས་ཚད་མཐོ་བའི་འཕེལ་རྒྱས་ལ་ནུས་ཤུགས་བསྩལ་བ།

ལོ15ཡི་རིང་ལ་རིམ་བསགས་ཀྱིས་སྒོར་དུང་ཕྱུར18.51བཏང་ཞིང་། མཚོ་སྔོན་ལ་རོགས་སྐྱོར་བྱེད་པའི་ལས་གཞི567དོན་འཁྱོལ་བྱས།

2010ལོ་ནས་བཟུང་། ཐེན་ཅིན་གྲོང་ཁྱེར་གྱིས་རྨ་ལྷོ་བོད་རིགས་རང་སྐྱོང་ཁུལ་ལ་ཁ་གཏད་རོགས་སྐྱོར་བྱེད་མགོ་བརྩམས། མིག་སྔའི་བར་དུ། ཐེན་ཅིན་གྱིས་རྨ་ལྷོའི་འཕེལ་རྒྱས་ཀྱི་གནས་སྟངས་ལ་དམ་པོར་དམིགས་ཏེ། ལོ15ཡི་རིང་ལ་རིམ་བསགས་ཀྱིས་མ་དངུལ་སྒོར་དུང་ཕྱུར18.51བཏང་ཞིང་། མཚོ་སྔོན་ལ་རོགས་སྐྱོར་བྱེད་པའི་ལས་གཞི567དོན་འཁྱོལ་བྱས་པས། རྨ་ལྷོ་ཁུལ་གྱི་དཔལ་འབྱོར་དང་སྤྱི་ཚོགས་འཕེལ་རྒྱས་ཐད་འཛད་མེད་ཀྱི་སྒུལ་ནུས་དྲག་པོ་བསྩལ་ཡོད།

རྒྱུས་ལོན་པ་ལྟར་ན། ཐེན་ཅིན་གྲོང་ཁྱེར་གྱིས་དུས་རབས་གསར་པའི་ཁ་གཏད་རོགས་སྐྱོར་བྱ་བའི་བླང་བྱ་ལྟར། ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་བསྐྲུན་པའི་གཙོ་ཐིག་དང་དམ་དུ་སྦྲེལ་བ་དང་། ཐོན་ལས་མཉམ་ལས་དང་དམངས་འཚོའི་འགན་སྲུང་གི་སྲོག་ཤིང་ཆེན་པོ་གཉིས་ལ་དམིགས་ཏེ། འཇོན་མི་ནང་འདྲེན་དང་སྐྱེད་སྲིང་། སྨན་བཅོས་དང་སློབ་གསོའི་རོགས་སྐྱོར། མི་རིགས་མཉམ་འདྲེས་སོགས་ཕྱོགས་གསུམ་གྱི་ཐད་ནས་གནད་འཁེལ་ཇུས་བསྟར་བྱས་ཤིང་། “མཐུན་ལྔ་མཉམ་འཇུག”གི་མཚོ་སྔོན་ལ་རོགས་སྐྱོར་བྱེད་པའི་དཔེ་དབྱིབས་གསར་པ་གསར་འཛུགས་བྱས་པ་དང་། ཁ་གཏད་རོགས་སྐྱོར་བྱ་བའི་ཆུ་ཚད་སྔར་ལས་མཐོ་རུ་འཕེལ་བར་སྐུལ་འདེད་བཏང་།

“ཐོན་ལས་མཐུན་དཀྲོལ”གྱི་ཁྱབ་ཁོངས་སུ། ཐེན་ཅིན་གྱི་མཚོ་སྔོན་རོགས་སྐྱོར་ཚོགས་པས་རྨ་ལྷོ་ཁུལ་གྱི་ཁྱད་ལྡན་ཐོན་ཁུངས་ལ་གཞི་བཅོལ་ཏེ། ལྗང་མདོག་རྩིས་ནུས་ཐོན་ལས་དོན་འཁྱོལ་བྱེད་པར་སྐུལ་སྤེལ་ཤུགས་ཆེན་བཏང་ཞིང་། རིག་གནས་ཡུལ་སྐོར་གྱི་མཉམ་འདྲེས་འཕེལ་རྒྱས་ཟབ་སྤེལ་བཏང་བ་དང་། ཞིང་ཕྱུགས་ཐོན་རྫས་ཀྱི་རིམ་པ་སྤར་བར་རོགས་ཤུགས་བཏོན། ཐེན་ཅིན་གྱི་ལག་རྩལ་དང་མ་དངུལ། ཁྲོམ་རའི་ལེགས་ཆ་བཅས་ནང་འདྲེན་བྱས་པར་བརྟེན་ནས། རྨ་ལྷོ་ཁུལ་གྱི་དེང་རབས་ཐོན་ལས་མ་ལག་ནུས་ཤུགས་ཡོད་རྒུས་སྒྲིག་འཛུགས་བྱས་པ་དང་། ཐོན་ལས་ཀྱི་སྲོག་ཤིང་འགྲན་རྩོད་ནུས་པ་རྒྱུན་ཆད་མེད་པར་མཐོར་འདེགས་བཏང་།

“དམངས་འཚོ་ཞི་མཐུན”བཟོ་འགོད་ཀྱིས་རྨ་ལྷོ་ཁུལ་གྱི་རྨང་གཞིའི་སྒྲིག་བཀོད་དང་སྤྱི་པའི་ཞབས་ཞུའི་ཆུ་ཚད་རྒྱུན་ཆད་མེད་པར་ལེགས་བསྒྱུར་བྱས། སྡོད་ཁང་འགན་སྲུང་ནས་སློབ་གསོ་དང་སྨན་བཅོས་བར་དམངས་འཚོའི་ལས་གཞི་རབ་དང་རིམ་པ་ལག་བསྟར་བྱས་པ་བརྒྱུད་དེ། ས་གནས་མང་ཚོགས་ཀྱི་ཐོབ་སྣང་དང་སྐྱིད་སྣང་མངོན་གསལ་གྱིས་ཇེ་མཐོར་བཏང་ཡོད་ལ། བདེ་སྐྱིད་འཚོ་བའི་མཛེས་རིས་ཤིག་ལེགས་པར་བྲིས་ཡོད།

འབྲེལ་འདྲིས་དང་བརྗེ་རེས། མཉམ་འདྲེས་བཅས་ཀྱི་ཐད་ནས། “འབྲེལ་གསུམ་མཉམ་འདྲེས”འགུལ་སྐྱོད་ཀྱིས་བརྗེ་རེས་བྱ་འགུལ་སྣ་ཚོགས་སྤེལ་བ་བརྒྱུད། ཐེན་ཅིན་དང་མཚོ་སྔོན་ས་གནས་གཉིས་ཀྱི་མི་སྣ་འབྲེལ་འདྲིས་དམ་ཟབ་བྱེད་པར་སྐུལ་འདེད་བཏང་བ་དང་། མི་རིགས་ཕན་ཚུན་བར་གྱི་རྒྱུས་ལོན་དང་ཡིད་ཆེས་འཕེལ་བར་བྱས་ནས། མི་རིགས་ཀྱི་སེམས་སྦྲེལ་ཟམ་པ་བརྟན་པོར་བསྐྲུན།

“འཇོན་མིའི་བློ་མཐུན”འཆར་གཞིས་འཇོན་མི་ནང་འདྲེན་དང་སྐྱེད་སྲིང་ལ་དོ་སྣང་བྱས། ཐེན་ཅིན་གྱིས་ཆེད་ལས་འཇོན་མི་བདམས་མངགས་བྱས་ཏེ་རྨ་ལྷོ་ཁུལ་དུ་རོགས་སྐྱོར་བྱེད་དུ་བཅུག་པར་མ་ཟད། རིམ་པ་མང་པོའི་འཇོན་མིའི་གསོ་སྦྱོང་རྩ་འཛུགས་སྒོས་སྤེལ་ཏེ། ས་གནས་ཀྱི་གསར་གཏོད་འཕེལ་རྒྱས་ལ་གསོན་ཤུགས་གསར་པ་སྦྱིན།

“སྨན་བཅོས་དང་སློབ་གསོའི་འདུན་མ་གཅིག་མཐུན”འགུལ་སྐྱོད་ཁྲོད། ཐེན་ཅིན་སྨན་བཅོས་ཚོགས་པས་སྔོན་ཐོན་གྱི་ལག་རྩལ་དང་འདུ་ཤེས་རྨ་ལྷོར་ཁྱེར་ཡོང་སྟེ། ས་གནས་ཀྱི་སྨན་བཅོས་ཆ་རྐྱེན་ལེགས་བཅོས་ནུས་ལྡན་བཏང་ཡོད། སློབ་གསོ་རོགས་སྐྱོར་ནི་དགེ་རྒན་གྱི་གསོ་སྦྱོང་སྤེལ་བ་དང་སློབ་ཁྲིད་ཐོན་ཁུངས་མཉམ་སྤྱོད་བྱེད་པ་སོགས་ཀྱི་བྱེད་ཐབས་བརྒྱུད་དེ། རྨ་ལྷོ་ཁུལ་གྱི་སློབ་ཁྲིད་ཀྱི་སྤུས་ཚད་རྒྱུན་ཆད་མེད་པར་མཐོར་འདེགས་ཡོང་བར་སྐུལ་འདེད་བཏང་།

ཐེན་ཅིན་གྱིས་མཚོ་སྔོན་ལ་རོགས་སྐྱོར་བྱེད་པའི“མཐུན་ལྔ་མཉམ་འཇུག”དཔེ་དབྱིབས་ཀྱི་གསར་གཏོད་ལག་ལེན་གྱིས། རྨ་ལྷོ་ཁུལ་གྱི་དཔལ་འབྱོར་དང་སྤྱི་ཚོགས་སྤུས་ཚད་མཐོན་པོས་འཕེལ་རྒྱས་འགྲོ་བར་སྒུལ་ཤུགས་དྲག་པོ་བསྩལ་ཡོད་ལ། རྒྱལ་ཡོངས་ཀྱི་ཁ་གཏད་རོགས་སྐྱོར་བྱ་བར་ཉམས་མྱོང་རྩ་ཆེན་ཡང་འདོན་སྤྲོད་བྱས་ཡོད། མ་འོངས་པར་ཐེན་ཅིན་དང་མཚོ་སྔོན་ས་གནས་གཉིས་ཀྱིས་མུ་མཐུད་དུ་ལག་གདང་སྦྲེལ་ནས་མཉམ་དུ་བསྐྱོད་དེ། མཐུན་སྒྲིལ་འབད་འཐབ་ཀྱི་དུས་རབས་ཀྱི་ལེའུ་གསར་པ་འབྲི་རྒྱུ་རེད། །