མཚོ་སྔོན་གྱིས“སྤྲིན་ཚོགས”ལ་བརྟེན་ནས“གསར་པར”མིག་དཔེ་ལྟ་བ།

མཚོ་སྔོན་ཞིང་ཆེན་གནམ་གཤིས་ཆ་འཕྲིན་ལྟེ་གནས་ཀྱི་ལས་སྒོའི་ལས་སྟེགས་སུ་སྐྱོད་སྐབས་དམིགས་བསལ་གྱི་ཨང་སྒྲིག་རེ་རེ་བརྙན་ཤེལ་ཐོག་མངོན་གྱི་ཡོད།ལས་དོན་མི་སྣས་མཚོ་སྔོན་གྱི་གནམ་གཤིས་གྲངས་གཞིའི་འཁོར་རྒྱུག་བདེ་འཇགས་ལྟ་སྐུལ་དོ་དམ་ལས་སྟེགས་སུ་ཞུགས་ནས་ཨང་སྒྲིག་དེ་ནང་འདྲེན་བྱས་པ་ཙམ་གྱིས་གྲངས་གཞིའི་མིང་དང་།རིམ་པ།ས་ཁོངས།དབྱེ་འབྱེད་ཚད།ཐོན་སྐྱེད་ཚན་པ་སོགས་ཀྱི་ཆ་འཕྲིན་མཐོང་ཐུབ་པ་ཙམ་གྱིས་ཤེས་ཐུབ།

“དེ་ནི་ང་ཚོས་རང་བརྟེན་ཞིབ་བཟོ་བྱས་པའི་མཚོ་བོད་ས་མཐོའི་བྱང་ཤར་རྒྱུད་ཀྱི་1km/5kmདབྱེ་འབྱེད་ཚད་དང་འབྱུང་ཁུངས་མང་པོ་མཉམ་འདྲེས་བྱས་ནས་ཐོན་རྫས་ངོ་མ་བཟོས་པའི་གྲངས་གཞིའི་ཐོབ་ཐང་ལག་ཁྱེར་དང་ཞིང་ཆེན་ཡོངས་ཀྱི་ཀྲུང་གོ་གནམ་གཤིས་ཅུས་ཀྱི་ལས་སྒོའི་ཆོག་འཐུས་ཐོབ་པའི་རིན་ཐང་མཐོ་བའི་གནམ་གཤིས་གྲངས་གཞིའི་ཐོན་རྫས་ཐོག་མ་དེ་རེད”ཅེས་མཚོ་སྔོན་ཞིང་ཆེན་གནམ་གཤིས་ཆ་འཕྲིན་ལྟེ་གནས་ཀྱི་ཀྲུའུ་རེན་གཞོན་པ་ཀྲང་ཧུའེ་ཡན་གྱིས་བརྙན་ཤེལ་ལ་མཛུབ་མོ་བཙུགས་ནས་བཤད།

“གནམ་གཤིས་གྲངས་གཞིའི་ཐོབ་ཐང་ལག་ཁྱེར་ཞེས་པ་གང་ཡིན་ནམ།གནམ་གཤིས་གྲངས་གཞིར་ཨང་སྒྲིག་རྒྱག་དོན་ཅི་ཡིན་ནམ།ཆ་འཕྲིན་དེ་དག་དང་གྲངས་གཞི་ཇི་ལྟར་བསྡམས་དགོས་སམ”ཐ་སྙད་གསར་པ་འདི་ཐོས་རྗེས་གསར་འགོད་པས་ཡ་མཚན་སྐྱེས།

“གནམ་གཤིས་གྲངས་གཞིའི་ཐོན་ཁུངས་མགྱོགས་མྱུར་འཕར་བ་དང་གནམ་གཤིས་ཞབས་ཞུའི་གཏིང་ཟབ་ཚད་དང་རྒྱ་ཆེ་ཚད་ཉིན་རེ་བཞིན་གཏིང་ཟབ་ཏུ་འགྲོ་བ་དང་བསྟུན་ནས་གྲངས་གཞིའི་ཡོང་ཁུངས་རྙོག་འཛིང་ཆེ་བ་དང་།གྲངས་གཞིའི་ཐོན་རྫས་ཀྱི་དབང་གྲགས་མི་འདང་བ།གྲངས་གཞི་བེད་སྤྱོད་ལ་ལྟ་སྐུལ་དོ་དམ་མི་འདང་བ་སོགས་ཀྱི་གནད་དོན་རིམ་བཞིན་མངོན་གསལ་དོད་དུ་འགྲོ་བཞིན་ཡོད་པས་གནམ་གཤིས་གྲངས་གཞི་དང་ཞབས་ཞུར་གཅིག་གྱུར་ཨང་སྒྲིག་བྱས་ནས་སྤྱོད་མཁན་ལ་གྲངས་གཞིའི་དབང་གྲགས་ཡོད་མེད་དང་ཡོང་ཁུངས་ལུགས་མཐུན་ཡིན་མིན་འདྲི་རྩད་བྱེད་དགོས་ཀྱི་ཡོད”ཀྲང་ཧུའེ་ཡན་གྱིས་འགྲེལ་བཤད་བྱས།

“གཞི་གྲངས་གང་ནས་ཡོང་བ་ཡིན།སུས་ཐོན་སྐྱེད་བྱེད་དམ།ཞབས་ཞུ་སུས་བྱེད།སུས་བཀོལ་སྤྱོད་བྱེད”གནད་དོན་རབ་དང་རིམ་པ་དེ་དག་ལ་དམིགས་ནས་གནམ་གཤིས་ལས་རིགས་ཀྱིས་ངེས་པར་དུ་ཐག་གཅོད་ཇུས་གཞི་ཞིག་འདོན་དགོས།

མཚོ་སྔོན་ཞིང་ཆེན་གནམ་གཤིས་ཆ་འཕྲིན་ལྟེ་གནས་ཀྱིས་གནམ་གཤིས་གྲངས་འཛིན་བྱ་ཡུལ་གྱི་མཚོན་རྟགས་མཚོན་རྟགསMOIDལག་རྩལ་ལ་གཞིགས་ནས་མཚོ་སྔོན་གྱི་གནམ་གཤིས་གྲངས་གཞིའི་འཁོར་རྒྱུག་བདེ་འཇགས་ལྟ་སྐུལ་དོ་དམ་ལས་སྟེགས་བརྒྱུད་སྤྱོད་མཁན་ཚང་མའི་གྲངས་གཞིའི་དགོས་མཁོ་ཚང་མར་གོ་ལ་ཧྲིལ་པོའི་གནམ་གཤིས་གྲངས་གཞིའི་ཐོབ་ཐང་ལག་ཁྱེར་འབའ་ཞིག་དེ་དང་མཐུན་ཡོད་པ་རེད།

གནམ་གཤིས་གྲངས་གཞིའི་ཐོབ་ཐང་ལག་ཁྱེར་ཐོག་ནས་གནམ་གཤིས་ཀྱི་གྲངས་གཞི་གཏན་འཁེལ་ཐོ་འགོད་ཐུབ་པ་མཚོན་པ་དང་།གནམ་གཤིས་གྲངས་གཞིའི་བདེ་འཇགས་ཞིབ་བཤེར་དང་།ཤེས་བྱའི་བདག་དབང་སྲུང་སྐྱོང་།གྲངས་གཞིའི་འཁོར་རྒྱུག་ཁུངས་འདེད།ཚན་རྩལ་གྲུབ་འབྲས་གཞན་སྒྱུར་དཔྱད་དཔོག་སོགས་ལ་འགན་ལེན་བྱས་པ་དེ་ནི་གནམ་གཤིས་གྲངས་གཞིའི་སྒོ་བྱང་བཀལ་ནས་ཉོ་ཚོང་དང་ཐོན་རྫས་རྩིས་སྤྲོད་བྱེད་པའི་དགོས་ངེས་ཀྱི་སྔོན་འགྲོའི་ཆ་རྐྱེན་ཞིག་ཡིན་པས་ཁྲོམ་ར་ཅན་གྱི་འཁོར་རྒྱུག་བརྒྱུད་གནམ་གཤིས་གྲངས་གཞིའི་རིན་ཐང་ཟམ་མི་ཆད་པར་འདོན་རྒྱུ་རེད།

ད་ཆ་སྤྱོད་མཁན་གྱིས་ཚད་ལྡན་གྱི་ཐབས་ལམ་བརྒྱུད་གནམ་གཤིས་གྲངས་གཞི་ཐོབ་ཚེ་ཚང་མར་གོ་ལ་ཧྲིལ་པོའི་མཚོན་རྟགས་འབའ་ཞིག་དེ་ཐོབ་ནས་སྤྱོད་མཁན་གྱི་ཆ་འཕྲིན་དང་།ཞབས་ཞུའི་ཞིབ་ཕྲའི་གནས་ཚུལ།ཞབས་ཞུའི་ནང་དོན་སོགས་འདྲི་རྩད་བྱེད་ཐུབ་པ་དང་།གྲངས་གཞིའི་བདེན་རྫུན་གཏན་འཁེལ་དང་གྲངས་གཞིའི་ཁུངས་འདེད་བྱེད་ཐུབ།

“གནམ་གཤིས་ཀྱི་གྲངས་གཞི་བེད་སྤྱོད་བྱེད་མཁན་ལས་རིགས་ཁེ་ལས་ཀྱི་ངོས་ནས་བརྗོད་ན།ཁྲིམས་མཐུན་དང་ཡོང་ཁུངས་དབང་གྲགས་ཀྱི་གྲངས་གཞི་བེད་སྤྱོད་བྱས་ཚེ་དེ་བས་བློས་འགེལ་ཆོག་པ་ཞིག་རེད།གནམ་གཤིས་སྡེ་ཚན་གྱི་ངོས་ནས་བརྗོད་ན།གྲངས་གཞིའི་ཤེས་བྱའི་བདག་དབང་སྲུང་སྐྱོང་དང་གྲངས་གཞིའི་དོ་དམ་ཚད་ལྡན་དུ་གཏོང་རྒྱུར་ཕན་པ་ཡོད་པ་དང་།གནམ་གཤིས་ཀྱི་གྲངས་གཞི་གོ་རིམ་ལྡན་པའི་ངང་འཁོར་རྒྱུག་དང་།ཁྲིམས་མཐུན་སྒྲིག་སྲོལ་ལྟར་བེད་སྤྱོད།ལྟ་སྐུལ་དོ་དམ་གྱི་ཁུངས་འདེད་ནུས་ལྡན་བཅས་ལ་སྐུལ་འདེད་ཏན་ཏིག་བཏང་ཡོད”ཅེས་ཀྲང་ཧུའེ་ཡན་གྱིས་བཤད།

2023ལོའི་ཟླ་12ཚེས་31ཉིན་རྒྱལ་ཁབ་གྲངས་གཞི་ཅུས་སོགས་སྡེ་ཚན་17གྱིས《“གྲངས་གཞིའི་རྒྱུ་རྐྱེན་གཙོ་བོ་×”ལོ་གསུམ་གྱི་བྱ་སྤྱོད་འཆར་གཞི(2024ལོ་ནས་2026ལོ་བར)》མཉམ་འབྲེལ་ཐོག་པར་འགྲེམས་བྱས་ནས་གཙོ་གནད་བྱ་སྤྱོད་ཁག་12ཁ་གསལ་བཟོས་པའི་ནང“གྲངས་གཞིའི་རྒྱུ་རྐྱེན་གཙོ་བོ་×གནམ་གཤིས་ཞབས་ཞུའི”ཚུད་ཡོད་པ་རེད།

ན་ནིང“‘གྲངས་གཞིའི་ལག་ཁྱེར་ཞབས་ཞུ’མངོན་འགྱུར་བྱེད་པ་སྟེ།རིན་ཐང་མཐོ་བའི་གནམ་གཤིས་གྲངས་གཞི་ལུགས་མཐུན་དང་ནུས་ཆེའི་འཁོར་རྒྱུག་བེད་སྤྱོད་ལ་སྐུལ་འདེད་གཏོང་རྒྱུ”ནི་ཞིང་ཆེན་ཡོངས་ཀྱི་ཁག་དང་པོའི་བསྡུ་རུབ་བྱེད་སྒོའི་ཁྲོད་རྒྱལ་ཁབ་གྲངས་གཞི་ཅུས་ཀྱི་བསྐྱར་ཞིབ་དང་རྩོད་ལན་ལྷུ་ཚིགས་ནང་ཚུད་པའི“གྲངས་གཞིའི་རྒྱུ་རྐྱེན་གཙོ་བོ་×”དཔེ་མཚོན་གྱོད་དཔེ་འབའ་ཞིག་དེ་ཡིན་པ་དང་།

“མཚོ་སྔོན་གྱི་གནམ་གཤིས་གྲངས་གཞི་སྣ་མང་ཕུན་སུམ་ཚོགས་པོ་ཡོད་པ་དང་གྲངས་གཞིའི་འཕར་ཚད་ཉིན་རེར་3.5TBཟིན་ཡོད།ང་ཚོས་མཚོ་སྔོན་གྱི་གྲངས་འཛིན་དཔལ་འབྱོར་དང་ལྗང་མདོག་རྩིས་རྒྱག་ནུས་པའི་འཕེལ་རྒྱས་ཀྱི་གོ་སྐབས་དམ་འཛིན་བྱས་ཏེ་གནམ་གཤིས་གྲངས་གཞིའི་རྒྱུ་རྐྱེན་གཙོ་བོ་ལས་ཕྱོད་ཆེ་བའི་བཀོད་སྒྲིག་དང་།ཆུ་ཚད་མཐོ་བའི་བེད་སྤྱོད།གྲངས་འཛིན་ཅན་གྱི་ཞབས་ཞུའི་ནུས་པ་ཆེ་རུ་གཏོང་བ་བཅས་གཙོ་གནད་དུ་བྱས་ནས་གནམ་གཤིས་གྲངས་གཞི་མཐུན་སྦྱོར་ལེགས་སྒྱུར་དང་།བསྐྱར་སྤྱོད་ཕན་ཆེ།མཉམ་འདྲེས་གསར་གཏོད་བཅས་ཀྱི་ནུས་པ་འདོན་སྤེལ་ལ་དམིགས་དགོས”ལས་ཞུགས་བྱས་ནས་ལོ་30ལྷག་ཙམ་སོང་རིང་།མཚོ་སྔོན་ཞིང་ཆེན་གནམ་གཤིས་ཆ་འཕྲིན་ལྟེ་གནས་ཀྱི་ཀྲུའུ་རེན་ལུའོ་ཕུའུ་ཙུའོ་ཡིས་གནམ་གཤིས་གྲངས་གཞི་དེས་མཚོ་བོད་ས་མཐོའི་གནམ་གཤིས་འགྱུར་ལྡོག་ལ་ཞིབ་འཇུག་དང་བརྡར་ཤ་གཅོད་པའི་གལ་ཆེའི་རང་བཞིན་གསལ་པོ་ཤེས་ཀྱི་ཡོད།

ཇི་ལྟར་བྱས་ནས་རྒྱ་མཚོའི་གནམ་གཤིས་ཀྱི་གྲངས་གཞི་བཅོས་སྐྱོང་མི་འདང་བ་དང་།གྲངས་གཞིའི་ཚད་གཞིར་མ་ལག་རང་བཞིན་མི་འདང་བ།གྲངས་གཞིའི་སྤུས་ཚད་མི་སྙོམས་པ།གྲངས་གཞིའི་ཚེ་སྲོག་གི་དུས་འཁོར་གྱི་ལྷུ་ཚིགས་ཁག་ཏུ་ཁེར་ཆགས་གླིང་ཕྲན་སོགས་ཀྱི་གནད་དོན་ལྷག་ཡོད་དམ།

དེར་བརྟེན་མཚོ་སྔོན་ཞིང་ཆེན་གནམ་གཤིས་ཆ་འཕྲིན་ལྟེ་གནས་ཀྱིས་ཚོགས་པ་བཙུགས་ནས་གནམ་གཤིས་གྲངས་གཞི་ཆེན་པོའི་སྤྲིན་ཚོགས་ལས་སྟེགས་དེ་རང་ཅན་གྱི་བཀོད་སྒྲིག་བྱས་པ་དང་།སྤྲིན་རྩིས་དང་གྲངས་གཞི་ཆེན་པོ་སོགས་སྔོན་ཐོན་ཆ་འཕྲིན་ལག་རྩལ་སྤྱད་དེ་གྲངས་གཞི་མགྱོགས་མྱུར་བསྡུ་རུབ་དང་གསོག་ཉར་དང་།ཐོན་རྫས་དྲ་ཐོག་ནས་ཐག་གཅོད།གྲངས་གཞི་ནུས་ཆེའི་འཚམས་འདྲི་བཅས་བྱས་ཏེ“སྤྲིན་དང་མཐའ་སྣེ་ཟུང་འབྲེལ”གྱི་གནམ་གཤིས་ལས་སྒོར་ཕྱོགས་ཡོངས་ནས་འདེགས་སྐྱོར་བྱས་ཏེ“གནམ་གཤིས་ཆ་འཕྲིན་གྱི་ཀ་རྟེན”གྱི་ནུས་པ་འདོན་སྤེལ་བྱས་ཡོད།

ལུའོ་ཕུའུ་ཙུའོ་ཡིས“མཚོ་སྔོན་གྱི་གནམ་གཤིས་གྲངས་གཞི་ཆེ་མོའི་སྤྲིན་ཚོགས་ལས་སྟེགས་སུ་ས་ངོས་དང་།བར་སྣང་།ལེ་ཏ།སྲུང་སྐར།རླུང་ཁམས་ཆེ་མོའི་གྲུབ་ཆ།གྲངས་ཐང་སྔོན་བརྡ།ཞབས་ཞུའི་ཐོན་རྫས་སོགས་ཁྱོན་རིགས་ཆེ་གྲས་14ཡི་གྲངས་གཞི་ཁག་972ཡོད་པ་དང་།དྲ་ཐོག་གྲངས་གཞི་0.92PBཟིན་པ།ལོར་འཚམས་འདྲི་བྱེད་ཐེངས་དུང་ཕྱུར་18.77ལོར་འཚམས་འདྲི་བྱེད་ཚད་4.46PBཟིན་པ།གྲངས་གཞིའི་འཚམས་འདྲི་བྱེད་ཚད་ཆ་སྙོམས་སྐར་ཆ་0.48དང་རྩིས་ཐབས་440ཟིན་ཡོད”ཅེས་ངོ་སྤྲོད་བྱས་པ་རེད།

རྣམ་པའི་བཀོལ་སྤྱོད་ཁྲོད་ཀྱི་གཞི་གྲངས་རྒྱུན་ཆད་མེད་པར་ཆེ་རུ་གཏོང་དགོས་ན།གཤམ་གྱི་འཆར་གཞི་བྱེད་དགོས་ལ་ཕུགས་ཀྱི་ཇུས་འགོད་ཀྱང་བྱེད་དགོས།མཚོ་སྔོན་ཞིང་ཆེན་གནམ་གཤིས་ཆ་འཕྲིན་ལྟེ་གནས་དང་བར་ཐག་སྤྱི་ལེ་10ལྷག་ཙམ་ཡོད་པའི་མཚོ་བོད་ས་མཐོའི་སྣོད་བཅུད་གྲངས་གཞི་ཆེན་པོའི་ལྟེ་གནས་ཀྱིས་གྲངས་འཛིན་དཔལ་འབྱོར་གྱི་རླབས་རྒྱུན་འོག་མཚོ་སྔོན་གྱི་གནམ་གཤིས་ལ་སླར་ཡང་སྤུས་ཚད་མཐོ་བའི་འཕོ་འགྱུར་བྱུང་བའི་དཔང་པོ་བྱེད་ཀྱི་ཡོད།

ཚོམས་ཆེན་དུ་སྐྱོད་སྐབས་བཟོ་དབྱིབས་ཐུན་མོང་མ་ཡིན་པའི་ཀ་བ་བཞིའི་མིག་དབང་འཕྲོག་པ་དང་།གཉིས་འགྲིལ་ལུགས་ཀྱི་ཚབ་རྟགས་0དང་1ལས་གྲུབ་པའི་ཁུང་བུ་ནི་འཕར་ལྡིང་གི་སྒྲ་གདངས་རེ་རེ་དང་འདྲ་བར་གྲངས་འཛིན་འཁོར་རྒྱུག་གི་རོལ་དབྱངས་དཀྲོལ་བ་དང་།རྒྱ་ཆེ་ལ་དཀར་ཆ་དོད་པའི་ལས་སྒོའི་བཀོད་འདོམས་ལྟེ་གནས་སུ་རྐང་ཐང་མར་བརྙན་ཤེལ་མང་པོ་ལངས་གཟུགས་ཅན་དུ་བཞག་པ།མཚོ་ཚད་ཀྱི་གྲངས་གཞིའི་ཆ་འཕྲིན་དེ་གར་འདུས་རྒྱུ་རེད།འཕྲུལ་ཁང་ནང་གི་ཚན་རྩལ་མཐོ་བའི་འཕྲུལ་སྒྲོམ་ཁག་གཅིག་བལྟོས་བཅས་ཀྱིས་བསྒྲིགས་ཡོད་པ་དང་སྒྲིག་ཆས་སྣ་ཚོགས་དེ་གར་སྤོ་རྒྱུ་རེད།

“མཚོ་བོད་ས་མཐོའི་སྣོད་བཅུད་གྲངས་གཞི་ཆེ་མོའི་ལྟེ་གནས་འཛུགས་སྐྲུན་རྣམ་གྲངས་ནི་ཀྲུང་གོ་གནམ་གཤིས་ཅུས་དང་མཚོ་སྔོན་ཞིང་ཆེན་སྲིད་གཞུང་དང་ཞིང་ཆེན་པུའུ་ཡི་མཉམ་ལས་གྲོས་མཐུན་ནང་ཁ་གསལ་བཏོན་པའི་ཐུན་མོང་ཁྱབ་གདལ་གྱི་དོན་ཚན་གལ་ཆེན་ཞིག་དང་མཚོ་སྔོན་ཞིང་ཆེན་གྱི‘བཅུ་བཞི་ལྔ’འཆར་འགོད་ཀྱི་གཙོ་གནད་རྣམ་གྲངས་ཀྱི་གྲས་ཤིག་ཡིན་ལ།མཚོ་སྔོན་ཞིང་ཆེན་གྱི་ལྗང་མདོག་རྩིས་རྒྱག་ནུས་པའི་རྟེན་གཞིའི་གཙོ་གནད་འཆར་འགོད་རྣམ་གྲངས་ཤིག་ཀྱང་རེད།རྣམ་གྲངས་ཀྱི་སྤྱིའི་ས་ཆའི་རྒྱ་ཁྱོན་སྨི་ངོས་གྲུ་16000ཟིན་པ་དང་དུས་ཐེངས་དང་པོར་ཁྱོན་མ་དངུལ་སྒོར་དུང་ཕྱུར་2.397བཏང་ནས་ན་ནིང་ཟླ་བཅུ་གཅིག་པར་བྱེད་པོ་དང་ལེ་ལག་ཚང་བའི་སྒྲིག་བཀོད་ཅེས་ལུའོ་ཕུའུ་ཙུའོ་ཡིས་བཤད།

འཛུགས་སྐྲུན་གྱི་དམིགས་ཚད་སྐོར་གླེང་སྐབས་ལུའོ་ཕུའུ་ཙུའོ་ཡིས“མཚོ་སྔོན་ཞིང་ཆེན་དང་ཐ་ན་མཚོ་བོད་ས་མཐོ་དང་རྒྱལ་ཡོངས་ཀྱི་དགོས་མཁོར་ཕྱོགས་ནས་ང་ཚོས་མཚོ་བོད་ས་མཐོའི་སྣོད་བཅུད་ཀྱི་གྲངས་གཞི་ཆེ་མོའི་ལྟེ་གནས་དེ་གཞི་ཁྱོན་ཅན་དང་།ལེགས་བསྡུས་ཞིབ་གཉེར་ཅན།ཆེད་ལས་ཅན།ལྗང་མདོག་ཅན་བཅས་ཀྱི་གྲངས་གཞི་ཆེན་པོའི་བཀོལ་སྤྱོད་གསར་གཏོད་གཅིག་སྡུད་ཁུལ་དང་གྲངས་འཛིན་ཅན་མཐུན་སྦྱོར་འཕེལ་རྒྱས་ཀྱི་དཔེ་སྟོན་ཁུལ་དུ་བསྐྲུན་ནས་མཚོ་བོད་ས་མཐོའི་སྣོད་བཅུད་ཤེས་དཔལ་འཛུགས་སྐྱོང་དང་།གནམ་གཤིས་འགྱུར་ལྡོག་ཞིབ་འཇུགགྲངས་གཞིའི་དཔལ་འབྱོར་འཕེལ་རྒྱས་བཅས་ལ་ཞབས་འདེགས་ཞུ་རྒྱུ་ཡིན”ཞེས་མུ་མཐུད་བཤད།

“སྤྲིན་”དང་བསྟུན་ནས་མདུན་དུ་བསྐྱོད་དེ།“གསར་པ”ལ་མིག་ལྟོས་བྱེད་དགོས།སྐྱེ་སྟོབས་དང་གསོན་ཤུགས་ཀྱིས་ཁེངས་པའི་ས་གཞི་དེའི་ཐོག་མཚོ་སྔོན་གྱི་གནམ་གཤིས་སྤུས་ཚད་མཐོ་བའི་འཕེལ་རྒྱས་ཀྱི་གཏམ་རྒྱུད་མུ་མཐུད་འབྲི་བཞིན་ཡོད་པ་རེད།