རྨ་འབྲི་རྫ་གསུམ་འབྱུང་ཡུལ་རྒྱལ་ཁབ་སྤྱི་གླིང་གི་རྨ་ཆུའི་འགོ་ཁུངས་ཁུལ་གྱི་ཆུ་ཁོངས་གསོ་སྙིལ་ནུས་པ་མུ་མཐུད་ནས་ཇེ་ཆེར་ཕྱིན་ཡོད།

  མཚོ་འཚེའུ་གྲངས་འབོར་དེ4077ནས5849ལ་བསླེབས་ཤིང་།  བརླན་སའི་རྒྱ་ཁྱོན་དེ་སྤྱི་ལེ་ངོས་སྙོམས་གྲུ་བཞི་མ104བསྐྱེད་ཡོད།

 མཚོ་སྔོན་གསར་འགྱུར་དྲ་བའི་འཕྲིན།   ཟླ11ཚེས9ཉིན།  གསར་འགོད་པས་རྨ་འབྲི་རྫ་གསུམ་འབྱུང་ཡུལ་རྒྱལ་ཁབ་སྤྱི་གླིང་ལས་རྨ་ཆུའི་འགོ་ཁུངས་ཁུལ་དུ་བཅར་འདྲི་བྱེད་སྐབས།   ཁུལ་ཁོངས་སུ་ཆུ་བོ་སྣ་ཚོགས་འདུ་ཞིང་།  མཚོ་འཚེའུ་གྲངས་མེད་པ།  ཆུ་འབབ་ཁོངས་ཀྱི་སྐྱེ་ཁམས་ཁོར་ཡུག་ཧ་ཅང་ལེགས་པ།   བརླན་སའི་རྒྱ་ཁྱོན་ཡངས་པ།   རྐྱང་དང་གནའ་བ།  ཁྲུང་ཁྲུང་སོགས་རི་སྐྱེས་སྲོག་ཆགས་ཕུན་སུམ་ཚོགས་པ།   སྐྱེ་དངོས་ཀྱི་རིགས་དང་ཉ་རིགས། འདབ་ཆགས་ཀྱི་རིགས་སོགས་སྐྱེ་དངོས་སྣ་མང་ལ་སྲུང་སྐྱོབ་ནུས་ལྡན་བྱས་པ་མཐོང་། 
    རྨ་ཆུའི་འགོ་ཁུངས་ཁུལ་ནི་རྨ་འབྲི་རྫ་གསུམ་འགོ་ཁུངས་ཀྱི་རང་བྱུང་གི་མཛེས་པ་དང་ལོ་རྒྱུས་ཡུན་རིང་ལྡན་པའི་མི་རིགས་རིག་གནས་མངོན་བྱེད་ཀྱི་སྒེའུ་ཁུང་ཉག་ཅིག་ཡིན།   དེ་སའི་གོ་ལའི“གླིང་སྣེ་གསུམ་པ”རུ་གྲགས་པའི་མདོ་དབུས་མཐོ་སྒང་གི་ལྟེ་བར་ཆགས་ཤིང་།  རྨ་ཆུའི་འགོ་ཁུངས་ཡིན་ལ།  འཛམ་གླིང་ན་གཉིས་སུ་མེད་པའི་མཐོ་སྒང་གི་བརླན་སའི་མ་ལག་ཅིག་ཀྱང་ཡིན།  ཏང་གི་ཚོགས་ཆེན་ཉི་ཤུ་བ་འཚོགས་ཚུན་དང་། ནང་སྒོས་སུ་རྨ་འབྲི་རྫ་གསུམ་འབྱུང་ཡུལ་རྒྱལ་ཁབ་སྤྱི་གླིང་འཛུགས་སྐྲུན་བྱས་པའི་ཚུན་ལ།  རྨ་ཆུ་འགོ་ཁུངས་ཁུལ་གྱིས་རི་ཆུ་ནགས་རྩྭ་མཚོ་འཚེའུ་བཅས་ལ་གཅིག་གྱུར་དོ་དམ་བྱེད་དགོས་པའི་བླང་བྱ་ལྟར།   “ཁྱིམ་ཚང་གཅིག་ལས་ལས་རྐང་གཅིག”རེ་བཀོད་སྒྲིག་བྱེད་པའི་སྐྱེ་ཁམས་ལྟ་སྐྱོང་བའི་སྲིད་ཇུས་དོན་འཁྱོལ་བྱས་ཤིང་།  སྐྱེ་ཁམས་སྲུང་སྐྱོང་གི་རྨང་གཞི་སྒྲིག་ཆས་དང་།  ཆུ་གསུམ་ལས་གཞིའི་དུས་སྐབས་གཉིས་པའི་ལས་གཞི། རྨ་ཆུ་འབབ་རྒྱུད་ཀྱི་སྐྱེ་ཁམས་སྲུང་སྐྱོབ།  སྤུས་ཚད་མཐོ་བའི་འཕེལ་རྒྱས་ལ་སོགས་པའི་སྐྱེ་ཁམས་སྲུང་སྐྱོབ་དང་སླར་གསོ་ལས་གཞི་རབ་དང་རིམ་པ་གཅིག་གྱུར་ཐོག་ལག་བསྟར་བྱས་པ་དང་།  “སྐྱེ་ཁམས་ཐོན་ཁུངས་གཏོར་བརླག་བཟོ་མཁན་ཁྲིམས་འགལ་ཉེས་ཅན་ལ་རྡུང་རྡེག་བཏང་སྟེ་མཉམ་དུ་མདོ་དབུས་མཐོ་སྒང་གི་སྐྱེ་ཁམས་ལ་སྲུང་སྐྱོབ་དང་སློབ་གསོ་བྱེད་པའི་དཔེ་སྟོན་ཁུལ་བསྐྲུན”ཞེས་པ་བརྗོད་བྱང་དུ་བཀོད་པའི་ཆེད་དོན་འགུལ་སྐྱོད་དང་“ཕབ་ལྗང”ལྟ་སྐུལ་ཁྲིམས་བསྟར་ཞིབ་བཤེར་གྱི་བྱེད་སྒོ་བཅས་སྤེལ་ནས་ཆུ་འགོ་ཁུལ་ཕྱི་ནང་གི་རྩྭ་ཐང་དང་། བརླན་ས། རི་སྐྱེས་སྲོག་ཆགས་ཀྱི་ཐོན་ཁུངས་སོགས་རང་བྱུང་ཐོན་ཁུངས་དང་སྐྱེ་ཁམས་ཐོན་ཁུངས་ཀྱི་བདེ་འཇགས་ལ་འགན་ལེན་ཏན་ཏིག་བྱས། 

　ལོ་དུ་མའི་བཅོས་སྐྱོང་དང་སླར་གསོ་བརྒྱུད།   རྨ་ཆུའི་འགོ་ཁུངས་ཁུལ་གྱི་ཆུ་འགོའི་གསོ་སྙིལ་ནུས་པ་ཇེ་ཆེར་དང་།  རྩི་ཤིང་གི་ཁེབས་ཚད་ཇེ་མཐུག   བརླན་སའི་རྒྱ་ཁྱོན་ཆེ་རུ་བསྐྱེད་ཡོད་པ་མ་ཟད།   སྐྱེ་ཁམས་ཐོན་རྫས་ཀྱི་འདོན་སྤྲོད་ནུས་པ་ཡང་ཇེ་ཆེར་ཕྱིན་ཡོད།   ལྟ་ཞིབ་ཚད་ལེན་བྱས་པ་ལྟར་ན།   རྒྱལ་སྤྱིའི་བརླན་ས་གལ་ཆེན་མཚོ་སྐྱ་རེངས་དང་སྔོ་རེངས་གཉིས་ཀྱི་རྒྱ་ཁྱོན་དེ2015ལོ་དང་བསྡུར་ན་སོ་སོ་ནས་སྤྱི་ལེ་ངོས་སྙོམས་གྲུ་བཞི་མ74.6དང་སྤྱི་ལེ་ངོས་སྙོམས་གྲུ་བཞི་མ117.4ལ་བསླེབས།   རྨ་ཆུའི་འགོ་ཁུངས་ཁུལ་གྱི་མཚོ་འཚེའུ་ཡི་གྲངས་འབོར་ཡང4077ནས5849ལ་བསླེབས།   བརླན་སའི་རྒྱ་ཁྱོན་སྤྱི་ལེ་ངོས་སྙོམས་གྲུ་བཞི་མ104ལ་བསླེབས།   རྩྭ་སའི་ཕྱོགས་བསྡུས་རྩི་ཤིང་གི་ཁེབས་ཚད56.3%ཟིན།  རི་སྐྱེས་སྲོག་ཆགས་ལས་རྩྭ་གཟན་དང་ཤ་གཟན21དང་། རིགས་ཚན46།   རིགས་མི་འདྲ་བ119བཅས་ཡོད་པས།རི་སྐྱེས་སྲོག་ཆགས་འཚོ་གནས་ཀྱི་དགའ་ཚལ་ཞིག་ཏུ་གྱུར་བ་དང་། རྨ་ཆུའི་འགོ་ཁུངས་ཀྱི་མཚོ་མོ་སྟོང་གི་ངོ་མཚར་ཡུལ་ལྗོངས་ཡང་བསྐྱར་སྤྱན་ལམ་དུ་མངོན་བྱུང་།