མཚོ་སྔོན་ཡུལ་ཤུལ་གྲོང་ཁྱེར་གྱིས“རོལ་དབྱངས་གསུམ་མཉམ་དཀྲོལ་”བྱས་ནས་ལྗང་མདོག་སྐྱེ་ལྡན་གྱི་ཞིང་འབྲོག་ཐོན་ཟོག་གི“འབྲོག་གླུ་གསར་པ”དཀྲོལ་བ།

སྟོན་རིའི་མཚོ་སྔོན་ཞིང་ཆེན་ཡུལ་ཤུལ་བོད་རིགས་རང་སྐྱོང་ཁུལ་ཡུལ་ཤུལ་གྲོང་ཁྱེར་དུ་གནམ་གཤིས་གྲང་ཙམ་ཡོད་པ་དང་།གྲོང་ཁུལ་དང་བར་ཐག་སྤྱི་ལེ་20ལྷག་ཙམ་ཡོད་པའི་ཡུལ་ཤུལ་གྲོང་ཁྱེར་རྒྱལ་གཉེར་འབྲོག་རའི(ཡུལ་ཤུལ་གྲོང་ཁྱེར་གྱི་ནོར་ནག”མཐོ་གསར་གསོ་ཚགས་ཕྱོགས་བསྡུས་དཔེ་སྟོན་རྟེན་གཞི)དུ་ཁྱུ་དང་ཁྱུ་བྱས་ནས་འབྲོག་པའི་སྣེ་ཁྲིད་འོག་རི་ཁུལ་གྱི་རྩྭ་ཐང་དུ་དལ་བུར་བསྐྱོད།ཡུལ་ཤུལ་གྲོང་ཁྱེར་གྱི་ཕྱོགས་བསྡུས་ཐོན་ལས་ལས་གཏོད་ཟོག་འགྲེམས་གླིང་གི་འགྲེམས་ཚོང་ཁུལ་དུ་ཉོ་མཁན་མང་པོ་ཡོད་པ་དང་།ཞིང་འབྲོག་ཐོན་རྫས་ལས་སྣོན་ཞིབ་ཚགས་ཁེ་ལས་ཚང་མ་གསོག་གྲབས་ཡོད་པ་དང་།འགྲམ་གྱི་མཛོད་ཉར་ཟོག་འགྲེམས་ཁག་བགོས་ཁུལ་དུ་དངོས་ཟོག་སྐྱེལ་འདྲེན་རླངས་འཁོར་ཞིག་སྒྲིག་སྦྱོར་བྱས་ནས་བསྡད་ཡོད།

“གཙང་གསུམ་ཆུ་འགོའི་ས་ཁུལ་གྱི་ལྟེ་བའི་གྲོང་ཁྱེར”དང་མཚོ་བོད་དང་སི་ཁྲོན་གྱི་འགྲོ་འོང་བགྲོད་ལམ་ཆེན་པོའི་འགྲིམ་འགྲུལ་ཁུལ་གྱི་ལེགས་ཆར་བརྟེན་ནས་ཉེ་བའི་ལོ་ཤས་རིང་ཡུལ་ཤུལ་གྲོང་ཁྱེར་གྱིས“སྤུས་ཚད་མཐོ་རུ་གཏོང་བ་དང་།གྲངས་འབོར་བརྟན་པོ།སྦྲེལ་ཐག་གསབ་པ།འདྲེན་རྒྱ་ཆེ་རུ་གཏོང་བ”བཅས་ཀྱི་ཐབས་ལམ་དུ་བྱས་ཏེ་ཞིང་འབྲོག་ལས་འཕེལ་རྒྱས་གཏོང་སྟངས་མགྱོགས་མྱུར་འགྱུར་ལྡོག་བཏང་ནས་སྣ་ཁ་ལེགས་སུ་གཏོང་བ་དང་།སྤུས་ཚད་མཐོར་གཏོང་།སྤུས་རྟགས་གཏོད་པ།ཚད་ལྡན་ཅན་གྱི་ཐོན་སྐྱེད་བཅས་ལ་སྐུལ་འདེད་ཤུགས་ཆེན་བཏང་ནས་སྣོད་བཅུད་ཞིང་འབྲོག་ཐོན་ལས་འཕེལ་རྒྱས་ཀྱི་གོམ་སྟབས་བརྟན་པོ་ཡོང་བ་བྱས་ཏེ་ཡུལ་ཤུལ་“ལྗང་མདོག་སྐྱེ་ལྡན་ཞིང་འབྲོག་ཐོན་རྫས་ཕྱིར་གཏོང་ས་བདག་གི་མཁོ་འདོན་ཁུལ”བཏོད་ནས་སྟོབས་ཤུགས་ལེགས་སྐྱེས་སུ་ཕུལ་ཞིང་།    

མཁའ་འགྲུལ་པར་ལེན་ཐོན་ལས་གླིང་།

ཡུལ་ཤུལ་གྲོང་ཁྱེར་རྒྱལ་གཉེར་འབྲོག་ར་དང་ཕྱོགས་བསྡུས་ཐོན་ལས་ལས་གཏོད་ཟོག་འགྲེམས་གླིང་དུ་བསྐྱོད་དེ་ས་གནས་དེ་གའི་སྣོད་བཅུད་ཞིང་འབྲོག་ལས་དབྱར་མཚོ་རྒྱས་པ་ལྟར་འཕེལ་རྒྱས་འགྲོ་བའི་མྱོང་ཚོར་བྱས་པ་དང་ཡུལ་ཤུལ་གྲོང་ཁྱེར་གྱི“ལྗང་མདོག་སྐྱེ་ལྡན་ཞིང་འབྲོག་ཐོན་རྫས་ཕྱིར་གཏོང་བྱ་ཡུལ་གཙོ་བོའི་མཁོ་འདོན་ཁུལ་གཏོད་པའི”གསོན་ཉམས་ལྡན་པའི་ལག་ལེན་འཚོལ་ཞིབ་བྱས་པ་རེད།

མདུན་སྣེ།ནུས་ཆེའི་གསོ་ཚགས་ཀྱིས་མ་བཅོས་རྒྱུ་ཆ་མཁོ་སྤྲོད་འགན་ལེན་བྱེད་པ།

ཉེ་སྔོན། ཡུལ་ཤུལ་གྲོང་ཁྱེར་རྒྱལ་གཉེར་འབྲོག་རའི་འབྲོག་པ་རིན་ཆེན་རྒྱ་མཚོས་སྟབས་བདེའི་ངང་ཞོགས་ཟས་བཟས་རྗེས་ཕྱི་གོས་མཐུག་པོ་ཞིག་གྱོན་ནས་ཕྱིར་ཐོན་པ་དང་།ནོར་གནག་མཐོ་གསར་གསོ་ཚགས་དཔེ་སྟོན་རྟེན་གཞིའི་ཆེད་མངགས་ཕྱུགས་འཚོ་མཁན་ཞིག་ཡིན་པའི་ངོས་ནས་ད་ཆ་ཁོང་གིས་ལས་ཀར་མ་དངུལ་གཏོང་ཚད་དེ་སྔོན་རང་ཁྱིམ་དུ་ཕྱུགས་འཚོ་སྐབས་ལས་མཐོ་བ་ཡོད།

རིག་འཛིན་རྒྱ་མཚོས“ངའི་ཁྱིམ་ནི་འབྲོག་རར་ཡོད།དེ་སྔོན་འབྲོག་ར་ཁེར་རྐྱང་དུ་གཉེར་སྐྱོང་བྱེད་ཀྱི་ཡོད་པ་ལས་མཉམ་ལས་ཁང་དང་མཉམ་འབྲེལ་བྱས་ནས་འབྲོག་དུད་ཀྱི་འབྲོག་པར་འཕེལ་རྒྱས་གཏོང་རྒྱུར་སྐུལ་ཁྲིད་བྱས་མེད།མཉམ་ལས་ཁང་ཁག་གིས་སྤྱིར་ན་ཁེར་རྐྱང་དུ་འཐབ་རྩོད་བྱེད་ཀྱི་ཡོད།ད་ཆ་གཅིག་པ་མ་རེད།ཡུལ་ཤུལ་གྲོང་ཁྱེར་གྱིས་དེ་གར་ཆེད་མངགས་གསོ་ཚགས་རྟེན་གཞི་གསར་སྐྲུན་བྱས་པ་མ་ཟད།ད་དུང་ས་གནས་ཁག་གི་མཉམ་ལས་ཁང་དུ་ཁ་ཐོར་དུ་བཏང་བའི་ནོར་ནག་བསྡུ་སྒྲིལ་བྱས་ཏེ་འབྲོག་པར་རྟེན་གཞིའི་ཆེད་གཉེར་བ་གདན་འདྲེན་ཞུ་གི་ཡོད་པས་ང་ཚོས་ཡོང་འབབ་དེ་བས་སེམས་ཁྲལ་བྱེད་ཀྱི་ཡོད

“ལྗང་མདོག་སྐྱེ་ལྡན་ཞིང་འབྲོག་ཐོན་རྫས་ཕྱིར་གཏོང་བྱ་ཡུལ་གཙོ་བོའི་མཁོ་འདོན་ཁུལ”འཛུགས་སྐྲུན་ལ་ཞབས་འདེགས་དེ་བས་ལེགས་པ་ཞུ་ཆེད།ཡུལ་ཤུལ་གྲོང་ཁྱེར་གྱིས་ས་གནས་དེ་གའི་ཐོན་ཁུངས་གང་ལེགས་སྤྱད་དེ་ཕྱོགས་ཁག་ལ་ཕན་པའི་སྣོད་བཅུད་འབྲོག་ལས་ཐོན་ལས་སྦྲེལ་ཐག་སྟོབས་ཆེར་བཏང་བ་རེད།2022ལོར་ཡུལ་ཤུལ་གྲོང་ཁྱེར་གྱི་རྒྱལ་གཉེར་འབྲོག་རའི(ཕྱུགས་འདེབས་ར་བ)སྒྲིག་སྲོལ་སྒྱུར་བཅོས་བྱས་ནས་སྲོལ་རྒྱུན་ཐོན་ལས་ཁྲོམ་རར་ཞུགས་ཚད་མཐོ་པོ་མེད་པ་དང་དེ་བཞིན་མདུན་སྣེའི་གསོ་ཚགས་འབྲེལ་ཐག་གི“ཐུང་བ་དང་།དཀོན་པ།ཞན་བ”བཅས་ཀྱི་དོན་དངོས་དང་ཟུང་འབྲེལ་བྱས་ཏེ་མ་དངུལ་སྒོར་དུང་ཕྱུར་1ལྷག་ཙམ་བཏང་ནས་འབྲོག་རའི་སྔར་ཡོད་རྨང་གཞིའི་ཐོག་ཡུལ་ཤུལ་གྲོང་ཁྱེར་གྱི་ནོར་ནག་མཐོ་གསར་གསོ་ཚགས་དཔེ་སྟོན་རྟེན་གཞིའི་རྣམ་གྲངས་བསྐྲུན་རྒྱུ་རེད།

རྣམ་གྲངས་དེ་རྒྱལ་ལམ་215དང་ཉེ་འགྲམ་དུ་བསྐྱོད་པ་དང་།སྐྱེ་རྒུ་གྲོང་རྡལ་དང་བར་ཐག་སྤྱི་ལེ་15ཡོད་པ།ས་བབ་ལེགས་པ།འགྲིམ་འགྲུལ་སྟབས་བདེ་བ།ཁོངས་གཏོགས་ཁུལ་དུ་འབྲོག་དུད་194ཡི་མི་804ཡོད་པ།བེད་སྤྱོད་ཆོག་པའི་རྒྱ་ཁྱོན་མུའུ་ཁྲི་33ཡོད་པ།ནོར་ནག་5000ལྷག་ཙམ་ཡོད་པ་རེད།ད་ཆ་སྒྲིག་ཆས་གཅིག་ཉོ་སྒྲུབ་གནད་ལ་འཁེལ་བ་དང་།བཟོ་ཁང་རེ་རེ་དང་ཕྱུགས་ཚང་རེ་རེ་བཞིན་བསྐྲུན་པ།རྒྱལ་གཉེར་འབྲོག་ར་དེ་ཕྱོགས་གཅིག་ནས་སྒྱུར་བཅོས་དང་།ཕྱོགས་གཅིག་ནས་སྐྲུན་པ།ཕྱོགས་གཅིག་ནས་གཉེར་བ་བཅས་ཀྱི་ཁྲོད་རིམ་བཞིན་མཐོ་གསར་གསོ་ཚགས་རྟེན་གཞིར་ཕྱོགས་སྒྱུར་བྱས་ཏེ་སྤུས་ལེགས་ནོར་ནག་མཁོ་སྤྲོད་ཀྱི་འབྱུང་རྩ་འཇུག་གཞིར་བྱས་ནས་ཐོན་ཁུངས་ཀྱི་ལེགས་ཆ་དེ་ཐོན་རྫས་ཀྱི་ལེགས་ཆ་དང་དཔལ་འབྱོར་གྱི་ལེགས་ཆར་རྒྱུན་ཆད་མེད་པར་བསྒྱུར་ཡོད།

“ད་ཆ་ནོར་ནག་དབྱར་དུས་ཀྱི་འབྲོག་རར་རེས་མོས་ཀྱིས་འཚོ་བཞིན་ཡོད་པས་ཟླ་བཅུ་པའི་གོང་དུ་སླར་ཡང་ཁག་གཅིག་བཤས་གཏོང་དགོས་ཀྱི་ཡོད།དེར་བརྟེན་ང་སྔ་ཙམ་སྒོ་ལ་འགྲོ་དགོས་པ་དང་དེ་དག་རྩྭ་ཐང་དུ་བཏང་ནས་རྩྭ་སོས་པ་ཟ་དགོས་པ་དང་།འགུལ་སྐྱོད་འདང་ངེས་བྱས་ཚེ་ནོར་ནག་གི་གཟུགས་པོ་ཐང་པོ་ཡོད་པས་ཤ་རྒྱུ་དེ་བས་ལེགས་པ་ཡོང་གི་རེད”ཅེས་རིག་འཛིན་རྒྱ་མཚོས་བཤད།

དེས་མ་ཚད་ཡུལ་ཤུལ་གྲོང་ཁྱེར་གྱིས་ད་དུང་མ་དངུལ་སྒོར་ཁྲི་500བཏང་ནས་ཕྱུགས་རིགས“ཟླ་རེར་བཤས་གཏོང”དང“བྱ་དགས་ཁ་གསབ་ཀྱི་ཚབ་བྱེད་པའི”གསར་གཏོད་ཚོད་ལྟ་བྱས་པ་དང་།ཐོན་སྐྱེད་ཁེ་ལས་ཀྱིས་འབྲོག་པ་མང་ཚོགས་ལ་ནོར་ནག་གཅིག་ཉོས་ཚེ་སྲིད་གཞུང་གིས་འབྲོག་པར་ཁ་གསབ་སྒོར་700སྤྲོད་ཀྱི་ཡོད།ཞིང་འབྲོག་མང་ཚོགས་འཕེལ་རྒྱས་ནང་ཞུགས་རྒྱུར་ཁྲིད་སྟོན་ཧུར་ཐག་བྱེད་པ་དང་ཆབས་ཅིག་ཞིང་འབྲོག་ཁེ་ལས་ཀྱིས་ཁྲོམ་རའི་རིན་གོང་ལས་མཐོ་བའི་རྣམ་པའི་ཐོག་ནས་མཉམ་ལས་ཁང་དང་འབྲོག་དུད་དང་གནད་སྨིན་སྦྲེལ་མཐུད་བྱས་ཏེ་རིམ་བཞིན་ཐོན་འཕར་ཡོང་རྒྱུར་སྐུལ་ཁྲིད་བྱས་པ་རེད།

“རྣམ་གྲངས་ལག་བསྟར་བྱས་ཚུན།འབྲོག་རར་འབྲོག་ལས་ཆ་འཕྲིན་ཅན་གྱི་བེད་སྤྱོད་ཆུ་ཚད་མགྱོགས་མྱུར་མཐོ་རུ་བཏང་ནས་ཕྱུགས་རིགས་གསོ་ཚགས་ལེགས་བཅོས་ཁུལ་དུ་རིག་ལྡན་འབྲོག་རའི་མ་ལག་གསར་སྤེལ་དང་འཛུགས་སྐྲུན་བྱས་པ་དང་དྲ་ཐོག་གསོ་ཚགས་བྱེད་སྟངས་ཁྱབ་གདལ་བཏང་ཡོད།མིག་སྔའི་བར་སྤུས་ཚད་མཐོ་བའི་ནོར་ནག་གསོ་ཚགས་གཉེར་སྐྱོང་བྱེད་པོ་19སྐྱེད་སྲིང་བྱས་པས་ནོར་གནག་ཚན་རིག་དང་མཐུན་ལ་ནུས་ཆེའི་ངང་གསོ་ཚགས་བྱ་རྒྱུ་དེ་མྱུར་བགྲོད་ལམ་བུའི་ཐོག་བསྐྱོད་ཡོད”ཅེས་ཡུལ་ཤུལ་གྲོང་ཁྱེར་རྒྱལ་གཉེར་འབྲོག་རའི་ཁྲང་ཀྲང་གིས་བཤད།

བར་སྣེ།ཞིབ་ཚགས་ལས་སྣོན་དང་སྤུས་ལེགས་ཐོན་རྫས་ཀྱི་སྤུས་ཚད་ཡིན་པ།

འབྲོག་ར་ནས་ཐོན་ཏེ་ཡུལ་ཤུལ་གྲོང་ཁྱེར་གྱི་ཕྱོགས་བསྡུས་ཐོན་ལས་ལས་གཏོད་ཟོག་འགྲེམས་གླིང་དུ་སྐྱོད་སྐབས་བཟོ་ཁང་ཡག་པོ་རེ་རེ་བཞིན་བསྒྲིགས་ནས་དཀྱིལ་གྱི་ཟོག་འདྲེན་རླངས་འཁོར་ཆུང་ཆུང་ཕར་འགྲོ་ཚུར་འོང་བྱེད་བཞིན་ཡོད།

ཡུལ་ཤུལ་གྲོང་ཁྱེར་ཞིང་འབྲོག་དང་ཚན་རྩལ་ཅུས་ཀྱི་ཅུས་ཀྲང་ནོར་བུ་ཚེ་རིང་གིས“ཟོག་འགྲེམས་གླིང་དེར་ཁྱོན་མ་དངུལ་སྒོར་དུང་ཕྱུར་2.38བཏང་བ་དང་ས་ཆ་མུའུ་175ཙམ་བཟུང་བ་དང་ཁྱད་ལྡན་ཐོན་ལས་ལས་སྣོན་ཁུལ་དང་།མཛོད་ཉར་ཟོག་འགྲེམས་ཡན་ལག་སྤྲོད་ཁུལ།ཕྱོགས་བསྡུས་ཐོན་ལས་ཞབས་ཞུ་ཁུལ་བཅས་གཞི་གཅིག་ཏུ་འདུས་ཡོད་པ་དེ་ནི་ཡུལ་ཤུལ་གྲོང་ཁྱེར་གྱི་ཁྱད་ལྡན་ཐོན་ལས་འཕེལ་རྒྱས་བཀོད་སྒྲིག་ཁྲོད་ཀྱི་ལྷུ་ཚིགས་གལ་ཆེན་ཞིག་ཡིན་ལ་ཡུལ་ཤུལ་གྲོང་ཁྱེར་གྱིས་ལྗང་མདོག་སྐྱེ་ལྡན་ཞིང་འབྲོག་ཐོན་རྫས་ཕྱིར་གཏོང་བྱ་ཡུལ་གཙོ་བོའི་དཔེ་སྟོན་སྐར་ཁུང་ཞིག་ཀྱང་རེད”ཅེས་བཤད།

ང་ཚོ་ཐོན་སྐྱེད་འཁོར་ཁང་ཨང་བརྒྱད་པར་ཡོང་བ་དང་དེ་གར་བཅའ་སྡོད་བྱ་ཡུལ་ནི་ཡུལ་ཤུལ་ཁུལ་ཐེང་ཞང་བཟོ་ལས་ཚོང་དོན་ཚད་ཡོད་ཀུང་སི་ཡིན་པ་དང་ཀུང་སི་དེ་ནི“ཀུང་སི་དང་།རྟེན་གཞི།ཞིང་དུད”བཅས་གཉེར་སྐྱོང་བྱེད་སྟངས་སུ་བྱེད་པའི་ཞིང་འབྲོག་ཚན་རྩལ་ཁེ་ལས་ཤིག་རེད།

འཁོར་ཁང་དུ་སྐྱོད་སྐབས་འཕྲུལ་འཁོར་གྱི་སྐད་སྒྲ་ཐོས་རྒྱུ་མེད་པ་དང་ཤེལ་སྒོའི་ནང་ནས་ཡུལ་ཤུལ་གྱི་ཚགས་ཤ་ཧ་ཅང་ཆེན་པོ་ཞིག་འཕྲུལ་འཁོར་ནང་བླུགས་ནས་འཁྱགས་བཞུ་དང་།གཙང་འཁྲུད།བགོ་བ།བསྙལ་བ།བྲོ་བ་བཟོ་བ།རླུང་སྐམ་སྐམ་པ།གཏུབ་གཏུབ་སོགས་ལས་རིམ་བཅུ་གྲངས་ལས་སྣོན་བྱས་རྗེས་མཐར་བྲོ་བ་ཞིམ་པའི་ཚགས་ཤ་སྐམ་པོ་ཞིག་ཏུ་གྱུར་ཡོད།

ཀུང་སིའི་འགན་འཁུར་བ་པའོ་ཡུས་ལེའང་གིས་ཐོན་སྐྱེད་འཁོར་ཁང་ཧྲིལ་པོའི་རྒྱ་ཁྱོན་སྨི་ངོས་གྲུ་1800ཟིན་པ་དང་མིག་སྔར་མ་དངུལ་སྒོར་ཁྲི་700བཏང་ནས་ཐོན་སྐྱེད་སྒྲུབ་རིམ་ཉོས་པ་དང་ཐོན་སྐྱེད་འཁོར་ཁང་ཧྲིལ་པོར་མ་བཅོས་རྒྱུ་ཆའི་མཛོད་དང་།སྲེག་པ།ཤ་མོ་གསོད་པ་སོགས་འཁོར་ཁང་12བཙུགས་ཡོད་པ་དང་།གཙོ་བོ་ནི་ནོར་ནག་ཐོན་རྫས་ལས་སྣོན་ཞིབ་ཚགས་བྱེད་ཀྱི་ཡོད།

པའོ་ཡུས་ལེའང་ནི་ནང་སོག་གི་མི་ཡིན་པ་དང་མཐོ་རིམ་སློབ་འབྲིང་ཐོན་རྗེས་ཚགས་ཤ་དང་འབྲེལ་བ་བྱེད་འགོ་བཙུགས་ནས་ཚགས་ཤ་དང་ཤ་རིགས་ཐོན་རྫས་ཀྱི་བཟོ་རྩལ་དང་སྡེབ་སྦྱོར་བྱེད་སྟངས་ཁོང་དུ་ཆུད་པ་བྱས་ཡོད།

“ང་ཚོའི་ཁེ་ལས་ཡུལ་ཤུལ་དུ་འཕེལ་རྒྱས་གཏོང་བར་ཡོང་བ་ནི་ཕྱོགས་གཅིག་ནས་ཡུལ་ཤུལ་གྲོང་ཨུད་དང་གྲོང་ཁྱེར་སྲིད་གཞུང་གི་ཤུགས་ཆེའི་རྒྱབ་སྐྱོར་ཐོབ་པ་དང་།ཕྱོགས་གཞན་ཞིག་ནས་ཡུལ་ཤུལ་གྱི་སྤུས་ལེགས་ནོར་ནག་ཐོན་ཁུངས་ཀྱིས་ང་ཚོའི་ཡིད་དབང་བཀུག་ཡོད།ང་ཚོས་མིག་སྔར་ཐོན་སྐྱེད་བྱས་པའི་ཚགས་ཤ་སྐམ་པོ་ལ་སྦྱོར་རྟ་གང་ཡང་མི་བསྣན་པར་སྟབས་བདེའི་བྲོ་སྡེབ་སྦྱོར་བྱས་པ་བརྒྱུད་ཚགས་ཤ་ཡི་བྲོ་བ་ངོ་མ་འགན་ལེན་གང་ཐུབ་བྱས་ཡོད”པའོ་ཡུས་ལེང་གིས་ཡིད་ཆེས་ཆེན་པོས་ཁེངས་བཞིན་དུ་མིག་སྔར་གཞི་ཁྱོན་ཆེན་པོས་ཐོན་སྐྱེད་བྱེད་འགོ་ཚུགས་མེད་ཀྱང་།ཚད་ལེན་ཚོད་ལྟ་བྱེད་རིང་ཚགས་ཤ་སྐམ་པོའི་བྲོ་བ་དང་བྲོ་བ་ལ་གདེང་འཇོག་ཡག་པོ་ཐོབ་ཡོད།ཁེ་ལས་ལ་དེང་རབས་ཀྱི་བྱེད་ཐབས་ལ་བརྟེན་ནས་ཕ་ཡུལ་གྱི་བྲོ་བ་སྲུང་སྐྱོང་ཡག་པོ་བྱས་ཏེ་ཡུལ་ཤུལ་གྱི་ཚགས་ཤ་སྐམ་པོ་དེ་ཀྲུང་གོའི་ཚགས་ཤ་ཐོན་ལས་ཀྱི་སྤུས་རྟགས་དང་པོར་བཟོས་ནས་ཡུལ་ཤུལ་གྲོང་ཁྱེར་གྱི་ལྗང་མདོག་སྐྱེ་ལྡན་ཞིང་འབྲོག་ཐོན་རྫས་ས་ཁུལ་གཙོ་བོའི་འཛུགས་སྐྲུན་ལ་རོགས་རམ་བྱེད་ཀྱི་ཡོད་ཅེས་བཤད།

པའོ་ཡུས་ལེང་དང་མཉམ་དུ་འཁོར་ཁང་དུ་ལས་མི་10ལྷག་ཙམ་ལས་མེད་པ་དང་བཟོ་པ་དེ་དག་ཚང་མ་ཡུལ་ཤུལ་ནས་ཡོང་བའི་འབྲོག་པ་ཡིན་པ་དང་ཁོང་ཚོས་གསོ་སྦྱོང་བྱས་པ་བརྒྱུད་སྒོ་འགྲམ་དུ་ལས་ཞུགས་ཐུབ་ཡོད།

དངོས་ཟོག་སྐྱེལ་འདྲེན་གླིང་ནང་བྲེལ་འཚུབ་ཆེ་བའི་མྱུར་སྐྱེལ་པ།

པའོ་ཡུས་ལེའང་གིས“ང་ཚོའི་ཁེ་ལས་གཞི་ཁྱོན་ཆེན་པོས་ཐོན་སྐྱེད་བྱེད་འགོ་ཚུགས་རྗེས་མི་50ཙམ་ལས་མི་བསྡུ་དགོས་ཀྱི་ཡོད།ས་གནས་དེ་གའི་མང་ཚོགས་ཀྱི་ལས་ཞུགས་ལ་རོགས་རམ་ཡག་པོ་བྱེད་ཐུབ་ཀྱི་ཡོད།ཞིང་འབྲེལ་ལ་སྣེ་ཁྲིད་བྱེད་པའི་ལམ་སྲོལ་བརྒྱུད་ཡུལ་ཤུལ་གྲོང་ཁྱེར་གྱི་གྲོང་གསེབ་དར་རྒྱས་ལས་དོན་ལ་གསོན་ཤུགས་བསྣན་རྒྱུ་རེད”ཅེས་བཤད།

ཟོག་འགྲེམས་གླིང་ཧྲིལ་པོར་ཡུལ་ཤུལ་ཁུལ་ཐེང་ཞང་བཟོ་ལས་ཚོང་དོན་ཚད་ཡོད་ཀུང་སི་ལྟ་བུའི་ཁེ་ལས་ད་དུང་མང་པོ་ཡོད།ནོར་བུ་ཚེ་རིང་གིས“ང་ཚོས་ཐོན་ལས་གླིང་གི་ལེགས་བསྡུས་ཞིབ་གཉེར་དང་མཉམ་སྤྱོད་ཀྱི་ཁྱད་ཆོས་འདོན་སྤེལ་ཧུར་ཐག་བྱས་ནས‘བོགས་མར་གཏོང་མི་དགོས་པར་ལོ་ཕྱེད་གཏོང་བའི’གཟིགས་སྐྱོང་སྲིད་ཇུས་བཏོན་ནས་ཞིང་ཕྱུགས་ཐོན་རྫས་ལས་སྣོན་སྡེབ་ཚོང་སོགས་གཉེར་སྐྱོང་བྱེད་པོ་སྣ་ཚོགས་25བསྡུ་ལེན་བྱས་ཡོད།ཁེ་ལས་དེ་དག་བརྒྱུད་ཡུལ་ཤུལ་གྱི་ཚགས་ཤ་ལས་སྣོན་ཞིབ་ཚགས་ཡག་པོ་བྱས་ནས་ཡུལ་ཤུལ་གྱི་ནོར་ནག་ཐོན་ལས་གང་འགབ་ཅི་སྤྱོད་བྱས་ཏེ་ཡུལ་ཤུལ་གྱི་ཚགས་ཤ་ཐོན་རྫས་ཀྱི་ཟུར་སྣོན་རིན་ཐང་སྔར་བས་མཐོ་རུ་བཏང་ཡོད”ཅེས་བཤད།

མཇུག་སྣེ།ཟོག་འགྲེམས་ཤར་གཏོང་ཐུབ་པ་དང་ཕྱིར་ཚོང་ཐབས་ལམ་རྒྱ་ཆེར་གཏོང་བ།

ཡུལ་ཤུལ་གྲོང་ཁྱེར་ཅང་ཧའེ་ཡན་ཚོང་དོན་ཚད་ཡོད་འགན་འཁྲི་ཀུང་སི་ནི་ཡུལ་ཤུལ་གྲོང་ཁྱེར་གྱི་ཕྱོགས་བསྡུས་ཐོན་ལས་ལས་གཏོད་ཟོག་འགྲེམས་གླིང་དུ་བཅའ་སྡོད་བྱེད་སྔ་ཤོས་ཀྱི་ཚོང་དུད་ཅིག་རེད།འགན་འཁུར་བ་ཅང་ཧའེ་ཡན་གྱིས“ང་ནི་ཀྲེ་ཅང་དབུན་ཁུལ་ནས་ཡིན།ཡུལ་ཤུལ་དུ་ནོར་ལུག་གི་ཤ་སྡེབ་ཚོང་བྱས་ནས་ལོ་20ལྷག་ཙམ་སོང་ཡོད།ཕྱིར་ཚོང་ཐབས་ལམ་དང་ཐོན་ཁུངས་ཕུན་སུམ་ཚོགས་པོ་ཡོད།ན་ནིང་ཡུལ་ཤུལ་གྲོང་ཨུད་དང་གྲོང་ཁྱེར་སྲིད་གཞུང་དང་འབྲེལ་མཐུད་ཐེངས་མང་བྱས་པ་བརྒྱུད་ཡུལ་ཤུལ་གྲོང་ཁྱེར་གྱི་ཕྱོགས་བསྡུས་ལས་གཏོད་ཟོག་འགྲེམས་གླིང་དུ་བསྐྲུན་རྒྱུའི་ཐག་བཅད་པ་རེད”ཅེས་བཤད།

ཀུང་སི་དེ་ཕྱོགས་བསྡུས་ཐོན་ལས་ལས་གཏོད་ཟོག་འགྲེམས་གླིང་གི་མདུན་གྲལ་དུ་སླེབས་ཡོད།གླིང་ཁུལ་གྱི་འགན་འཁུར་བ་བསམ་བསྟན་ལན་ཁུལ་གྱིས“ང་ཚོས་མདུན་གྲལ་ཚང་མ་ཕྱིར་ཚོང་ཚོང་ཁང་དུ་བཟོ་རྩིས་ཡོད།སྡེབ་ཚོང་བྱེད་ཆོག་ལ་སིལ་ཚོང་ཡང་བྱེད་ཆོག་གི་ཡོད།དམིགས་ཡུལ་ནི་མདུན་གྲལ་དེ་ཡུལ་ཤུལ་གྲོང་ཁྱེར་གྱི་ལྗང་མདོག་སྐྱེ་ལྡན་ཞིང་འབྲོག་ཐོན་རྫས་འགྲེམས་སྟོན་བྱེད་པའི་སྐར་ཁུང་གལ་ཆེན་ཞིག་ཏུ་གཏོད་རྒྱུ་དང་།དེ་རྗེས་ཀྱི་ཐོན་སྐྱེད་འཁོར་ཁང་ནས་ཐོན་པའི་དངོས་ཟོག་རྣམས་དུས་ཚོད་དང་པོར་མདུན་གྲལ་དུ་འགྲེམས་ཚོང་བྱེད་ཆོག་གི་ཡོད”ཅེས་བཤད།

ཉིན་ལྟར་ཞོགས་པ་ནམ་ལངས་མ་ཐག་ཅང་ཧའེ་ཡན་དང་ཚོང་ཁང་ནང་གི་ཚོང་པ་རྣམས་བྲེལ་འཚུབ་ཆེན་པོ་བྱེད་ཀྱི་ཡོད་པ་དང་ཁོང་ཚོས་ཚགས་ཤ་དང་ལུག་ཤ་ཧྲིལ་པོར་སྐུ་མགྲོན་གྱི་རེ་བ་ལྟར་འབྲེག་གཅོད་དང་ཐུམ་སྒྲིལ་སོགས་བྱེད་ཀྱི་ཡོད་པ་དང་ལས་ཀ་དེ་དག་བསྒྲུབས་རྗེས་ཅང་ཧའེ་ཡན་གྱིས་འཕྲལ་མར་ཟོག་འགྲེམས་ཀུང་སི་དང་འབྲེལ་བ་བྱེད་ཀྱི་ཡོད།

“བསྟན་གྲུབ།དེ་རིང་གི་ཚོང་ཟོག་ཡག་པོ་ཡོད་པས་ཁྱེད་རང་གིས་མི་མངགས་ནས་ཚུར་འཐེན་རོགས་གནང་”ཅང་ཧའེ་ཡན་གྱིས་གོམས་གཤིས་རང་བཞིན་གྱིས་མྱུར་སྐྱེལ་ཀུང་སིར་ཁ་པར་བརྒྱབ།

ཁ་པར་གྱི་སྒོ་བརྒྱབ་ནས་སྐར་མ་ཁ་ཤས་ལས་མ་སོང་བར།ལྗང་མདོག་གི་སྦྲག་སྲིད་མྱུར་སྐྱེལ་རླངས་འཁོར་ཞིག་སྒོ་ཁར་བསྡད།“ཨ་ཅག་ལགས།དེ་རིང་གི་ཚོང་ཟོག་ཁ་སང་ལས་མང་བ་འདུག”ཅེས་མྱུར་སྐྱེལ་བ་བསྟན་གྲུབ་ཀྱིས་བཤད།“ཡུལ་ཤུལ་གྱི་ནོར་ལུག་གི་ཤ་ལས་དགའ་པོ་བྱེད་ཀྱི་འདུག”ཅེས་ཅང་ཧའེ་ཡན་གྱིས་དགའ་སྤྲོའི་ངང་བཤད།

ཁོང་གཉིས་ཀྱིས་གླེང་མོལ་བྱེད་རིང་ཤོག་བྱང་སྦྱར་བའི་ཚགས་ཤ་སྤྱི་རྒྱ་250ལྷག་ཙམ་ཟོག་འདྲེན་རླངས་འཁོར་ཆུང་ཆུང་བླུགས་ནས་རྒྱལ་ཡོངས་ཀྱི་ས་གནས་ཁག་ཏུ་སྐྱེལ་རྩིས་ཡོད་པ་རེད།“འདི་ལོ་ཡུལ་ཤུལ་གྲོང་ཁྱེར་སྦྲག་སྲིད་ཡན་ལག་ཀུང་སིས་ཕྱོགས་བསྡུས་ཐོན་ལས་ལས་གཏོད་ཟོག་འགྲེམས་གླིང་དུ་སྤོས་པ་དང་།བཟོ་ཁང་ལ་སྨི་ངོས་གྲུ་1400ཡོད་པ།ཐུམ་སྒྲིལ་དབྱེ་འབྱེད་ཁུལ་དང་།གཞུང་ལས་ཁུལ།ངལ་གསོ་ཁུལ་སོགས་ཡོད།ནོར་ལུག་གི་ཤ་སྡེབ་སྐྱེལ་བྱེད་ཚད་སྔར་བས་ཆེ་རུ་ཕྱིན་ཡོད”ཅེས་དོན་གྲུབ་ཀྱིས་བཤད།

མཇུག་སྣེའི་ཕྱིར་ཚོང་ལ་དམིགས་ནས་ཡུལ་ཤུལ་གྲོང་ཁྱེར་ཕྱོགས་བསྡུས་ཐོན་ལས་ལས་གཏོད་ཟོག་འགྲེམས་གླིང་གིས་ཟོག་འགྲེམས་གླིང་སྔ་སྣུར་དུ་ཇུས་འགོད་བྱས་ཏེ་ཀྲུང་གོའི་སྦྲག་སྲིད་དང་།ཧྲུན་ཧྥུང་མྱུར་སྐྱེལ།གྲོང་གསེབ་མྱུར་སྐྱེལ་སོགས་མྱུར་སྐྱེལ་ཀུང་སི་མང་པོ་ནང་འདྲེན་བྱས་ནས་སྐྱེལ་འདྲེན་འབྲེལ་ཐག་གི་ཆུ་ཚད་སྔར་བས་ཆེ་རུ་བཏང་སྟེ་ཡུལ་ཤུལ་གྱི་ལྗང་མདོག་སྐྱེ་ལྡན་ཞིང་འབྲོག་ཐོན་རྫས་རྒྱལ་ཡོངས་ཀྱི་ས་གནས་ཁག་ཏུ་བསྐྱལ་བ་རེད།

ཡུལ་ཤུལ་གྲོང་ཁྱེར་སྦྲག་སྲིད་ཡན་ལག་ཀུང་སིའི་སྤྱི་ཁྱབ་ཅིང་ལི་གཞོན་པ་ཚེ་རིང་བསམ་གྲུབ་ཀྱིས“ལས་རིགས་ཀྱི‘རྒྱལ་ཁབ་རུ་ཁག’ཡིན་པའི་ཀྲུང་གོའི་སྦྲག་སྲིད་ལ་འཐུས་སྒོ་ཚང་བའི་ཟོག་འགྲེམས་མ་ལག་ཡོད་པས་ཐོག་མའི་ཐོན་ཡུལ་ནས་འཛད་སྤྱོད་པའི་ལག་ཏུ་མགྱོགས་མྱུར་དང་ནུས་ཆེའི་འཁོར་རྒྱུག་ཐུབ་རྒྱུ་རེད།ད་ཆ་ང་ཚོ་ཡུལ་ཤུལ་གྲོང་ཁྱེར་གྱི་ཕྱོགས་བསྡུས་ཐོན་ལས་ལས་གཏོད་ཟོག་འགྲེམས་གླིང་དུ་སྤོས་རྗེས་སྡེབ་སྐྱེལ་ལས་ཕྱོད་ཆེ་རུ་ཕྱིན་པ་དང་ཆབས་ཅིག་ཁེ་ལས་དང་ཞིང་འབྲོག་པའི་ཐོན་རྫས་ཟོག་འགྲེམས་མ་གནས་དམའ་རུ་ཕྱིན་ནས་ཞིང་འབྲོག་པ་དང་ས་གནས་དེ་གའི་ཁེ་ལས་ཀྱི་ཡོང་འབབ་མང་དུ་ཕྱིན།