“མཚོ་སྔོན་གྱི་ཚོང་རྟགས་གྲགས་ཅན”བརྒྱ་ལྷག་དར་གོས་ལམ་བུར་འཛོམས།

ཉེ་སྔོན། དར་གོས་ལམ་བུའི་རྒྱལ་སྤྱིའི་དངོས་མང་སྟོན་ཚོགས་སྐབས་བརྒྱད་པ་དང་ཀྲུང་གོའི་ཤར་ནུབ་རྒྱུད་ཀྱི་མཉམ་ལས་དང་མ་འཇོག་ཚོང་དོན་ངོ་འཕྲད་གྲོས་མོལ་ཚོགས་འདུ(གཤམ་དུ“དར་གོས་ལམ་བུའི་དངོས་མང་སྟོན་ཚོགས”ཞེས་བསྡུ་རྒྱུ)ཤིས་ཨན་དུ་འཚོགས་པ་རེད།སྐབས་འདིའི་དར་གོས་ལམ་བུའི་དངོས་མང་སྟོན་ཚོགས་འཚོགས་ཡུན་ཉིན་ལྔ་ཡིན་པ་དང“ཕན་ཚུན་སྦྲེལ་མཐུད་ཟབ་ཏུ་གཏོང་བ་དང་དཔལ་འབྱོར་ཚོང་དོན་མཉམ་ལས་རྒྱ་ཆེར་གཏོང་བ”བརྗོད་དོན་གཙོ་བོར་བྱས་ནས་རྒྱལ་སྤྱིའི་སྤེལ་རེས་འགྲེམས་སྟོན་དང་།ཞིང་ཆེན་དབར་གྱི་མཉམ་ལས་འགྲེམས་སྟོན།འགྲིམ་འགྲུལ་ཟོག་འགྲེམས་འགྲེམས་སྟོན།སྔོན་ཐོན་བཟོ་སྐྲུན་ལས་རིགས་འགྲེམས་སྟོན།དེང་རབས་ནུས་རྒྱུ་འགྲེམས་སྟོན་བཅས་འགྲེམས་ཁུལ་ལྔ་བཀོད་སྒྲིག་བྱས་ཡོད།

ཞིང་ཆེན་དབར་གྱི་མཉམ་ལས་འགྲེམས་ཁུལ་དུ་མཚོ་སྔོན་འགྲེམས་ཁང་གིས་བཀྲག་མདངས་འཚེར་བཞིན་ཡོད་པ་རེད།ལྗང་མདོག་སྐྱེ་ལྡན་ཞིང་འབྲོག་ཐོན་རྫས་ནས་མངོན་མིན་རིག་གནས་ཤུལ་བཞག་གི་གསར་གཏོད་ཐོན་རྫས་བར་དང་།ཐོག་མར་ཞུགས་པ་ནས་སླར་ཡང་ཐུག་འཕྲད་བྱེད་པའི་བར།“མཚོ་སྔོན་རྟགས་ཅན”གྱི་ཐོན་རྫས་བརྒྱ་ལྷག་ཙམ་གནའ་གྲོང་ཤིས་ཨན་དུ་འཛོམས་ནས་དར་གོས་ལམ་བུའི་ཆིངས་ཡིག་ཅིག་ཏུ་བསྐྱོད་དེ་མཉམ་ལས་ཀྱི་གོ་སྐབས་ཤིག་མཉམ་སྤྱོད་བྱས་ཡོད།

སི་པའོ་ཐོག་མར་འཕྲད་པ།

མཚོ་སྔོན་གྱི་དངོས་པོ་བཟང་པོ་གར་སྟེགས་ཆེན་པོའི་ཐོག་འཁྱེར་རྒྱུ་ཡིན་པ།

ཉེ་སྔོན། ཞིང་ཆེན་དབར་གྱི་མཉམ་ལས་འགྲེམས་ཁུལ་དུ་གནས་པའི་མཚོ་སྔོན་འགྲེམས་ཁང་དུ་སྐྱོད་སྐབས“ལྗང་མདོག”གཞི་རྟེན་དུ་བྱེད་པའི་ས་ཁོངས་ཤིག་མིག་ལམ་དུ་མངོན་ཡོད།ཐོག་གི་གློག་སྒྲོན་མདོག་བཞི་ལས་མཚོ་སྔོན་པོ་དང་།ཁྲའར་ཧན་ཚྭ་མཚེའུ།གནམ་སྔོན་པོ།རྩྭ་ཐང་བཅས་ཀྱི་ཚོན་མདངས་མཚོན་ཡོད།གློག་སྒྲོན་འོག་འཛམ་གླིང་རིམ་པའི་ཚྭ་མཚེའུ་ཐོན་ལས་རྟེན་གཞི་དང་།རྒྱལ་ཁབ་ཀྱི་ནུས་རྒྱུ་གཙང་མའི་ཐོན་ལས་མཐོ་ས།རྒྱལ་སྤྱིའི་སྣོད་བཅུད་ཡུལ་སྐོར་དམིགས་ས།ལྗང་མདོག་སྐྱེ་ལྡན་ཞིང་འབྲོག་ཐོན་རྫས་ཕྱིར་གཏོང་བྱ་ཡུལ་བཅས་གཏོད་རྒྱུ་བརྗོད་དོན་གཙོ་བོར་བྱས་པའི་ཀ་བ་འཛུགས་རྒྱུ་དེ་མི་རྣམས་ཀྱིས་དོ་སྣང་བྱེད་ཀྱི་ཡོད།

མཚོ་སྔོན་རུའེ་ཧུའུ་སྐྱེ་དངོས་ཐོན་ཁུངས་གསར་སྤེལ་ཚད་ཡོད་ཀུང་སིའི་འགྲེམས་གནས་མདུན་དུ་ལས་དོན་པ་ཝུའེ་ཡུས་ཀྲུའུ་ཡིས་ཐོན་རྫས་ལེགས་སྒྲིག་ཞིབ་ཚགས་བྱེད་བཞིན་ཡོད་པ་རེད།དེ་ནི་ཁེ་ལས་དར་གོས་ལམ་བུའི་དངོས་མང་སྟོན་ཚོགས་ནང་ཞུགས་ཐེངས་དང་པོ་ཡིན་པ་དང་ཁེ་ལས་ཀྱི་ཚབ་ཞུས་ནས་འགྲེམས་སྟོན་ནང་ཞུགས་མཁན་ཝུའེ་ཡུས་ཀྲུའུ་ཡིས་རེ་སྒུག་ཆེན་པོ་བྱེད་ཀྱི་ཡོད།2013ལོར་བཙུགས་པའི་མཚོ་སྔོན་རུའེ་ཧུའུ་སྐྱེ་དངོས་ཐོན་ཁུངས་གསར་སྤེལ་ཚད་ཡོད་ཀུང་སི་ནི་འདྲེ་ཚེར་མ་དང་།ལུག་མིག་མེ་ཏོགནོར་ཀོ་སོགས་ཞིང་ཞོར་ཐོན་རྫས་ལ་དམིགས་ནས་ལས་སྣོན་ཞིབ་ཚགས་བྱེད་པའི་ཁེ་ལས་ཤིག་ཡིན་པ་དང་།རྒྱུ་མའི་བདེ་ཐང་ལ་སྐུལ་འདེད་གཏོང་བ་དང་ཤ་ཚིལ་ཉུང་དུ་གཏོང་བའི་རིམ་སྤེལ་ཐོན་རྫས་གཙོ་གནད་ཐོག་ཞིབ་འཇུག་གསར་སྤེལ་དང་ཐོན་སྐྱེད་བྱེད་ཀྱི་ཡོད།

“དེ་རིང་ནི་དར་གོས་འགྲེམས་ཚོགས་སྤེལ་བའི་ཉིན་དང་པོ་ཡིན་པས་ཡུལ་སྐོར་བ་མི་ཉུང་བ་ཞིག་མཚོ་སྔོན་གྱི་འགྲེམས་ཁང་དུ་ལྟ་སྐོར་བྱེད་པར་ཡོང་སྐབས་ང་ཚོའི་ཐོན་རྫས་ཧང་སངས་དགོས་པ་དང་།ས་མཐོའི་ཁྱད་ལྡན་ཐོན་རྫས་ཀྱིས་ད་དུང་ནུས་པ་མི་འདྲ་བའི་ཐོན་རྫས་ཞིབ་འཇུག་གསར་སྤེལ་བྱེད་ཐུབ་པ་བསམ་ཡུལ་ལས་འདས་པ་ཞིག་རེད།མཚོ་སྔོན་དུ་ང་ཚོས་ས་གནས་དེ་གའི་ཐོན་ཁུངས་ལ་གཞི་ཚུགས་ནས་འཛད་སྤྱོད་པར་རང་བྱུང་བཟའ་བཅའ་དང་མཚོ་བོད་ས་མཐོར་དམིགས་བསལ་དུ་ཡོད་པའི་ཐོན་རྫས་མཁོ་འདོན་བྱས་པ་མ་ཟད།དྲ་ཐོག་ཚོང་དོན་ལས་སྟེགས་བརྒྱུད་ཁེ་ལས་འཕེལ་རྒྱས་དང་ཞིང་དུད་ཀྱི་འབབ་འཕར་དམིགས་ཚད་མངོན་འགྱུར་ཐུབ་རྒྱུའི་རེ་བ་ཡོད”ཅེས་ཝུའེ་ཡུས་ཀྲུའུ་ཡིས་བཤད།

ཝུའེ་ཡུས་ཀྲུའུ་དང་འདྲ་བར་མཚོ་སྔོན་རྨ་ལྷོ་རེབ་གོང་རྒྱལ་མཚམས་རིག་གནས་ཡུལ་སྐོར་གསར་སྤེལ་ཚད་ཡོད་ཀུང་སིའི་འགན་འཁུར་བ་ཤ་བོ་རྒྱ་མཚོས་ཀྱང་རེབ་གོང་ཐང་ག་དང་རིག་གནས་གསར་གཏོད་ཐོན་རྫས་འཁྱེར་ནས་དར་གོས་འགྲེམས་ཚོགས་ཐོག་ཡོང་ཐེངས་དང་པོ་རེད།ཐང་ག་འགྲེམས་སྟོན་བྱས་མ་ཐག་ཡུལ་སྐོར་བ་མི་ཉུང་བ་ཞིག་གི་ཡིད་དབང་འཕྲོག་པ་དང་བཟོ་དབྱིབས་ཁྱད་པར་ཅན་གྱི་རིག་གནས་གསར་གཏོད་ཐོན་རྫས་ཀྱིས་ཕྱེ་མ་མང་པོ་འཐེན་གྱི་ཡོད།

ཤ་བོ་རྒྱལ་མཚན་གྱིས་མཚོ་སྔོན་གྱི་རེབ་གོང་གསེར་དངུལ་བརྐོས་ལག་རྩལ་གྱིས་རེབ་གོང་ས་ཁུལ་གྱི་ལོ་ངོ་སྟོང་གི་རིག་གནས་ཀྱི་ལོ་རྒྱུས་མཚོན་པས་རེབ་གོང་སྒྱུ་རྩལ་གྱི་གྲུབ་ཆ་གཙོ་བོ་ཞིག་རེད་ཅེས་བཤད།གསེར་དངུལ་བརྐོས་རྒྱག་ལག་རྩལ་ནི་གནའ་བོའི་ལག་ཤེས་སྒྱུ་རྩལ་ཞིག་ཡིན་པ་མ་ཟད།རེབ་གོང་ས་ཁུལ་གྱི་རིག་གནས་ཐོན་ལས་འཕེལ་རྒྱས་ཀྱི“སྣེ་ཁྲིད་དམག”དེ་བས་ཀྱང་ཡིན་པ་དང་རྨ་ལྷོ་བོད་རིགས་རང་སྐྱོང་ཁུལ་གྱི་ཁུལ་རིམ་པའི་མངོན་མིན་རིག་གནས་ཤུལ་བཞག་རྣམ་གྲངས་ནང་བཅུག་ཡོད།བརྐོས་པའི་བཟོ་རྩལ་ཐོན་རྫས་དེ་ཀོ་བའི་ཁུག་མའི་ཐོག་ཏུ་བརྐོས་པ་དེའང་ཁེ་ལས་ཀྱིས་རིག་གནས་གསར་གཏོད་ཐོན་རྫས་ལ་གསར་གཏོད་བྱས་པ་ཞིག་རེད།མི་དེ་བས་མང་བས་མཚོ་སྔོན་གྱི་མངོན་མིན་རིག་གནས་ཤུལ་བཞག་རྣམ་གྲངས་ཤེས་རྟོགས་བྱས་ནས་རིག་གནས་ཐོན་ལས་འཕེལ་རྒྱས་ལ་རམ་འདེགས་བྱ་རྒྱུའི་རེ་བ་ཡོད་ཅེས་བཤད་པ་རེད།

མཉམ་ལས་ཀྱི་འདོད་བློ་སྔར་ལས་མང་བ་ཞིག་ཡོང་བའི་རེ་བ་ཡོད།

གྲོགས་པོ་གསར་པ་དང་དར་གོས་ལམ་བུའི་དངོས་མང་སྟོན་ཚོགས་དབར་ཐོག་མར་ངོ་ཤེས་པ་དང་གྲོགས་པོ་རྙིང་པ་དང་དར་གོས་ལམ་བུའི་དངོས་མང་སྟོན་ཚོགས་སླར་ཡང་འཕྲད་ཡོད།མཚོ་སྔོན་ཏུའུ་ལན་ཧྥུང་ཧའེ་འདྲེ་ཚེར་མ་ཚད་ཡོད་འགན་འཁྲི་ཀུང་སིའི་ཕྱིར་ཚོང་ཅིང་ལི་ཀྲའོ་དབྱིང་ཡུས་ནི་དེའི་ཁྲོད་ཀྱི་གྲོགས་པོ་རྙིང་པ་ཞིག་རེད།

“འཛམ་གླིང་གི་འདྲེ་ཚེར་མ་ཀྲུང་གོར་ཡོད་པ་དང་།ཀྲུང་གོའི་འདྲེ་ཚེར་མ་མཚོ་སྔོན་དུ་ཡོད་པ།ང་ཚོ་ནི་རྒྱལ་ནང་གི་ཁག་དང་པོའི་ཀྲུང་གོའི་འདྲེ་ཚེར་མའི་སྐྱེ་ལྡན་བདེན་དཔང་ར་སྤྲོད་ཐོབ་པའི་ཁེ་ལས་ཀྱི་གྲས་ཤིག་ཡིན་པས་རྒྱལ་ཁབ་མང་པོའི་སྐྱེ་ལྡན་ཐོན་རྫས་ཀྱི་བདེན་དཔང་ར་སྤྲོད་ཐོབ་པས་སྤུས་ཚད་འགན་ལེན་ཐུབ་ངེས་རེད”ཁེ་ལས་ཀྱི་འགྲེམས་སྟོན་མདུན་དུ་ཀྲའོ་དབྱིང་ཡུས་ཀྱིས་བློ་འདྲི་བྱེད་པར་ཡོང་མཁན་ཡུལ་སྐོར་བར་ཐོན་རྫས་ངོ་སྤྲོད་བྱེད་བཞིན་ཡོད།ངོ་སྤྲོད་ཉན་རྗེས་ཡུལ་སྐོར་བས་བཟོད་ཐབས་བྲལ་ནས་ཁུག་མ་གཉིས་ཉོས།

འདི་ནི་ཀྲའོ་དབྱིན་ཡུས་ཀྱིས་ཏུའུ་ལན་གྱི་འདྲེ་ཚེར་མ་འཁྱེར་ནས་དར་གོས་འགྲེམས་ཚོགས་ལ་ཞུགས་ཐེངས་གསུམ་པ་རེད།ཁོང་གིས“རང་བྱུང་དང་།སྐྱེ་ལྡན།སྦྱོར་རྟ་མེད་པ”བཅས་ཀྱི་ཐོན་རྫས་ཐོན་སྐྱེད་བྱ་རྒྱུ་དེ་གཉེར་སྐྱོང་གི་འདུ་ཤེས་སུ་བྱས་ནས་ཁེ་ལས་ཀྱིས་མིག་སྔར་ཚད་ལྡན་ཅན་གྱི་སྐྱེ་ལྡན་འདྲེ་ཚེར་མ་འདེབས་འཛུགས་རྟེན་གཞི་མུའུ་4875བསྐྲུན་པ་དང་འདེབས་འཛུགས་རྟེན་གཞི་དང་ཐོན་རྫས་ཚང་མ་ཡོ་རོབ་མནའ་འབྲེལ་དང་།ཨ་རི།རི་པིན།ཁ་ན་ཏ་བཅས་ཀྱི་སྐྱེ་ལྡན་ཐོན་རྫས་ཀྱི་ཁས་ལེན་དཔང་འདོན་ཐུབ་ཡོད་ཅེས་བཤད།དར་གོས་ལམ་བུའི་དངོས་མང་སྟོན་ཚོགས་སུ་ཡོང་རིམ་བཞིན་གྲུབ་འབྲས་མི་འདྲ་བ་ཐོབ་ཡོད་པས་ད་ཐེངས་མཉམ་ལས་ཀྱི་བར་མཐོངས་དེ་བས་མང་བ་འཚོལ་ཞིབ་ཐུབ་རྒྱུའི་རེ་བ་བྱེད་ཀྱི་ཡོད།

འགྲེམས་ཁང་གི་གཞོགས་གཞན་ཞིག་ཏུ་མཚོ་སྔོན་རྩེ་ཁོག་མུའུ་ཡོན་ཞིང་ཞོར་ཐོན་རྫས་ཚད་ཡོད་ཀུང་སིའི་ལས་དོན་མི་སྣ་ཧོ་ཝུའེ་ན་ཡིས་ཁེ་ལས་ཀྱི་འགྲེམས་སྟེགས་མདུན་དུ་ཁྱད་ལྡན་ཐོན་རྫས་འཚོང་བ་དང་།སྐབས་འགར་འགྲེམས་ཁང་གི་གཞོགས་གཅིག་ཏུ་ཡོད་པའི་འཁྱག་སྒྲོམ་མདུན་དུ་བསྐྱོད་དེ་རྨ་ལྷོ་བོད་རིགས་རང་སྐྱོང་ཁུལ་རྩེ་ཁོག་རྫོང་ནས་ཐོན་པའི་ཁྱད་ལྡན་ཚགས་ཤ་ངོ་སྤྲོད་བྱས་པས་བྲེལ་བ་ཧ་ཅང་ཆེན་པོ་ཡོད།

རྩེ་ཁོག་མུའུ་ཡོན་ཞིང་ཞོར་ཐོན་རྫས་ཚད་ཡོད་ཀུང་སི་ནི་རྩེ་ཁོག་རྫོང་ས་ཁོངས་ཀྱི་སྤྱི་སྤྱོད་སྤུས་རྟགས་ཏེ་རྩེ་ཡུག་འབྲོག་ཐོན་རྫས་ཀྱི་དམིགས་འཛུགས་བེད་སྤྱོད་དབང་ཆ་སྤྲོད་མཁན་ཞིག་ཡིན་པ་དང་།གཙོ་བོ་རྩེ་ཁོག་ནོར་ལུག་ཐོན་ལས་ཀྱི་སྣོད་བཅུད་གསོ་ཚགས་དང་།བཤས་གཏོང་།ལས་སྣོན་ཞིབ་ཚགས།གྲང་སྦྲེལ་མཛོད་སྒྲིག་སྦྱོར་དང་དེ་བཞིན་གློག་རྡུལ་ཚོང་དོན་གཉེར་སྐྱོང་བྱས་ནས“རྩེ་ལེགས་འབྲོག་རྫས”ས་ཁོངས་ཀྱི་སྤྱི་སྤྱོད་སྤུས་རྟགས་འོས་སྦྱོར་བྱས་ཡོད།ཉེ་བའི་ལོ་ཤས་རིང་།རྩེ་ཁོག་རྫོང་གི་ས་ཁོངས་ཡོངས་ཀྱི་རྩྭ་རར་རྒྱལ་ཁབ་ཀྱི་སྐྱེ་ལྡན་ལྗང་མདོག་བདེན་དཔང་ར་སྤྲོད་བྱུང་བ་དང་།ནོར་ལུག་ཚང་མ་ས་མཐོའི་སྲོལ་རྒྱུན་གྱི་སྐྱས་སྤོས་གསོ་ཚགས་བྱས་ནས་ཐུན་མོང་མ་ཡིན་པའི་ནོར་ལུག་གི་ཐོན་ཁུངས་ཤིག་བཏོད་ཡོད།རྩེ་ཁོག་ལུག་དང་རྩེ་ཁོག་ནོར་གནག་ཀྱང་རྒྱལ་ཡོངས་ཀྱི་ཕུལ་བྱུང་རྒྱུད་རྒྱུའི་ཐོན་ཁུངས་ཆེ་གྲས་བཅུར་བདམས་ཡོད།

ད་ཐེངས་ནི་རྩེ་ཁོག་མུའུ་ཡོན་ཞིང་ཞོར་ཐོན་རྫས་ཚད་ཡོད་ཀུང་སིས་དར་གོས་དངོས་མང་སྟོན་ཚོགས་ལ་ཞུགས་ཐེངས་གཉིས་པ་ཡིན་པ་རེད།ད་ཐེངས་ཧོ་ཝུའེ་ན་ཡིས“དར་གོས་ལམ་བུའི་དངོས་མང་སྟོན་ཚོགས་ནང་ཞུགས་སྐབས་རྒྱལ་ཁབ་ཕྱི་ནང་གི་ཚོང་པ་དང་སྦྲེལ་མཐུད་ཐུབ་རྒྱུ་རེད།ཁེ་ལས་ཀྱི་ངོས་ནས་བརྗོད་ན་དྲིལ་བསྒྲགས་ལས་སྟེགས་ཡག་པོ་ཞིག་རེད།ད་ཐེངས་ང་ཚོས‘རྩེ་ལེགས་འབྲོག་ཐོན་རྫས’ས་ཁོངས་ཀྱི་སྤྱི་སྤྱོད་སྤུས་རྟགས་འོག་གི་སྤུས་ལེགས་དངོས་པོ་འཁྱེར་ཡོང་རྒྱུ་ཡིན་པས་དར་གོས་ལམ་བུའི་དངོས་མང་སྟོན་ཚོགས་ལ་བརྟེན་ནས་མཚོ་སྔོན་གྱི་སྤུས་ལེགས་ཞིང་འབྲོག་ཐོན་ཟོག་དེ་བས་རྒྱ་ཆེ་བའི་ཁྲོམ་རར་ཁྱབ་གདལ་གཏོང་རྒྱུའི་རེ་བ་ཡོད”ཅེས་དམིགས་ཚད་ཁ་གསལ་བཏོན་ཡོད།

དར་གོས་ཚོང་ལམ་གྱི་ཆིངས་ཡིག

ཐོན་རྫས་རིགས་བརྒྱ་ཙམ་གཅིག་སྡུད་ཐོག་འགྲེམས་སྟོན་བྱས་པ།

དར་གོས་ལམ་བུའི་རྒྱལ་སྤྱིའི་དངོས་མང་སྟོན་ཚོགས་དང་ཀྲུང་གོའི་ཤར་ནུབ་རྒྱུད་ཀྱི་མཉམ་ལས་དང་མ་འཇོག་ཚོང་དོན་ངོ་འཕྲད་གྲོས་མོལ་ཚོགས་འདུ་དེ་སྔོན་ཆད་1997ལོར་བཙུགས་པའི་ཀྲུང་གོའི་ཤར་ནུབ་རྒྱུད་ཀྱི་མཉམ་ལས་དང་མ་འཇོག་ཚོང་དོན་ངོ་འཕྲད་གྲོས་མོལ་ཚོགས་འདུ(བསྡུས་མིང་ལ་ནུབ་རྒྱུད་ཀྱི་ངོ་འཕྲད་གྲོས་མོལ་ཚོགས་འདུ་ཞེས་བརྗོད་རྒྱུ)དེ་རེད།2016ལོའི་ཟླ་3པར་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཆོག་མཆན་ཐོབ་པ་བརྒྱུད་དར་གོས་དངོས་མང་སྟོན་ཚོགས་ཞེས་པར་དངོས་སུ་མིང་བསྒྱུར་ནས་ཧྲའན་ཤིས་ཞིང་ཆེན་ཤིས་ཨན་གྲོང་ཁྱེར་དུ་གཉེར་བ་རེད།མིག་སྔར་དར་གོས་ལམ་བུའི་དངོས་མང་སྟོན་ཚོགས་སྐབས་བདུན་བདེ་བླག་ངང་གཉེར་ནས་ཕན་ཚུན་སྦྲེལ་མཐུད་ཟབ་ཏུ་གཏོང་རྒྱུ་གཙོ་གནད་དུ་བྱེད་པ་དང་དཔལ་འབྱོར་ཚོང་དོན་མཉམ་ལས་རྒྱ་ཆེར་གཏོང་རྒྱུ་དམིགས་ཚད་དུ་བྱས་ཏེ་ཨེ་ཤེ་ཡ་དབུས་མའི་ཨེ་ཤེ་ཡ་དང་ཨེ་ཤེ་ཡ་ལྷོ་མའི་རྒྱལ་ཁབ་དང་ཞིང་ཆེན་དང་།གྲོང་ཁྱེར།རང་སྐྱོང་ལྗོངས་བཅས་ཀྱི་ཚོང་དོན་མ་འཇོག་མཉམ་ལས་སྤེལ་རེས་ཟབ་ཏུ་གཏོང་བའི་སྒོ་དབྱེའི་ལས་སྟེགས་ཤིག་ཏུ་གྱུར་ཡོད།

མཚོ་སྔོན་གྱི་སྤྱི་ཡོངས་གཟུགས་བརྙན་དང་།མ་འཇོག་ཁོར་ཡུགཁྱད་ལྡན་ཐོན་ལས།གཙོ་གནད་རྣམ་གྲངས་བཅས་གཅིག་སྡུད་ཐོག་འགྲེམས་སྟོན་དང་དྲིལ་བསྒྲགས་བྱས་ནས་ཞིང་ཆེན་དབར་གྱི་ས་ཁོངས་མཉམ་ལས་མཉམ་སྐྲུན་གྱི་གྲུབ་འབྲས་རྒྱ་ཆེར་གཏོང་བ་དང་།“རྒྱུད་གཅིག་ལམ་གཅིག”མཉམ་སྐྲུན་གྱི་རྣམ་པ་ཆེན་པོར་གཏིང་ཟབ་ཞུགས་པ།ཕྱོགས་བསྡུས་ཤུགས་རྐྱེན་ཐེབས་ཤུགས་སྔར་བས་ཆེ་རུ་གཏོང་བ་དང་ཆ་འཕྲིན་སྤེལ་རེས་ལ་སྐུལ་འདེད་གཏོང་བ་བཅས་བྱ་ཆེད།མཚོ་སྔོན་ཞིང་ཆེན་གྱིས་གདན་ཞུས་ལྟར་ཚོགས་པ་སྒྲིག་འཛུགས་བྱས་ནས་འགྲེམས་སྟོན་ལ་ཞུགས་པ་དང་ཐོན་ལས་དྲིལ་བསྒྲགས་དང་དཔལ་འབྱོར་ཚོང་དོན་སྐུལ་སྤེལ་སོགས་ཀྱི་བྱེད་སྒོ་སྤེལ་རྒྱུ་རེད།རྒྱ་ཁྱོན་སྨི་ངོས་གྲུ་225ཟིན་པའི་འགྲེམས་ཁང་ནང་བརྙན་ལམ་བསྟན་པ་དང་།སྒྲོན་སྒམ་གྱི་ཡིག་རིས་འགྲེམས་སྟོན།དངོས་རྫས་ཐོན་རྫས་འགྲེམས་སྟོན་སོགས་རྣམ་པ་སྣ་ཚོགས་ལ་བརྟེན་ནས་མཚོ་སྔོན་གྱི་འཕེལ་རྒྱས་གྲུབ་འབྲས་དང་།ཐོན་ལས་ཀྱི་ལེགས་ཆ།མ་འཇོག་ཁོར་ཡུགམཉམ་ལས་ཀྱི་མདུན་ལམ་བཅས་དྲིལ་བསྒྲགས་བྱས་པ་དང་དར་གོས་འགྲེམས་ཚོགས་ཀྱི་ལས་སྟེགས་ལ་བརྟེན་ནས་ཁེ་ལས་འབྲིང་ཆུང་དང་ཆེས་ཆུང་གྲས་འཕེལ་རྒྱས་འགྲོ་རྒྱུར་སྐུལ་འདེད་བཏང་བ་རེད།

ཞིང་ཆེན་བཟོ་ལས་དང་ཆ་འཕྲིན་ཅན་ཐིང་གི་འབྲེལ་ཡོད་ལས་དོན་མི་སྣས་ངོ་སྤྲོད་བྱས་པར་གཞིགས་ན།སྐབས་འདིའི་དར་གོས་དངོས་མང་སྟོན་ཚོགས་ནང་མཚོ་སྔོན་གྱིས་ཁྱད་ལྡན་ཁེ་ལས་28འགྲེམས་སྟོན་ནང་ཞུགས་རྒྱུ་སྒྲིག་འཛུགས་བྱས་ཡོད།འགྲེམས་སྟོན་ནང་ཞུགས་པའི་འགྲེམས་རྫས་དེ་ཚྭ་མཚེའུ་ཐོན་ཁུངས་ཕྱོགས་བསྡུས་བེད་སྤྱོད་དང་།རིག་གནས་ཡུལ་སྐོར།ལྗང་མདོག་སྐྱེ་ལྡན་ཞིང་འབྲོག་ཐོན་རྫས་སོགས་ཁྱབ་ཁོངས་ཀྱི་ཐོན་རྫས་བརྒྱ་ལྷག་ཙམ་དང་འབྲེལ་བ་ཡོད་པ་རེད།ཚགས་ཤ་དང་ལུག་ཤའི་ཐོན་རྫས་དང་།དཀར་ཆུའི་ཐོན་རྫས།སྦྲང་རྩིའི་ཐོན་རྫས།པད་ཁའི་སྣུམ།རང་བྱུང་གཏེར་ཆུ།ནས་ཀྱི་ཐོན་རྫས་རབ་དང་རིམ་པ།སྐྱེ་ལྡན་ལི་གྲོ་དང་དེའི་ལས་སྣོན་ཐོན་རྫས།ཐང་གའི་བརྩམས་ཆོས་བཅས་དང་དེ་བཞིན་ཚྭ་མཚེའུ་རྫས་འགྱུར་བཟོ་ལས་ཀྱི་མ་བཅོས་རྒྱུ་ཆ་དང་སྨད་རྒྱུད་ཐོན་རྫས་སོགས་ཚུད་ཡོད།