མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཉེ་ལམ། ཞིང་ཆེན་ལས་བྱེད་པ་རྒན་པའི་བྱེད་སྒོ་ལྟེ་གནས་དང་། རྨ་ལྷོ་བོད་རིགས་རང་སྐྱོང་ཁུལ་ཏང་ཨུའི་ལས་བྱེད་རྒན་པ་ཅུས་ཀྱིས་མཉམ་འབྲེལ་སྒོས་གཉེར་བའི། “སེ་འབྲུ་དམར་པོ་ཀུན་ནས་དམར། གཟུགས་འདས་རིག་གནས་ཤུལ་བཞག་འགྲེམ་སྟོན་གྱི་ཉམས་འགྱུར་མངོན”ཞེས་པའི་མི་རིགས་རིག་གནས་འགྲེམ་སྟོན་སྐབས་གསུམ་པ་དང་། “ངས་ཕ་ཡུལ་གྱི་ཚབ་བྱེད·གཟུགས་འདས་རིག་གནས་ཤུལ་བཞག་གཅིག་ཏུ་འདུ”ཞེས་པའི་བྱེད་སྒོ་དངོས་སུ་སྤེལ། བློ་མཐུན་རྒན་པ་དང་ཏང་ཡོན་རྒན་པ། དེ་བཞིན་ཁོངས་གཏོགས་ཁུལ་གྱི་མང་ཚོགས1200ལྷག་ཐེངས་འདིའི་འགྲེམ་སྟོན་ལ་ལྟ་རུ་ཡོང་ཡོད།
བྱེད་སྒོའི་ཁྲོད་གཟུགས་འདས་རིག་གནས་ཤུལ་བཞག་གི་ལག་ཤེས་དང་ཁྱད་ལྡན་ཞིམ་ཟས། རིག་རྩལ་འགྲེམ་སྟོན་བཅས་ཁག་ཆེན་པོ་གསུམ་བཀོད་སྒྲིག་བྱས་ནས། མི་རིགས་རིག་གནས་ཉམས་ལེན་གྱི་རྣམ་པ་བསྐྲུན་ཡོད། ཡུལ་དངོས་སུ་ཐང་ག་དང་འཚེམ་དྲུབ། ཤིང་བརྐོས། མི་རིགས་ཀྱི་འཚེམ་དྲུབ་སོགས་མཐོ་སྒང་གི་གཟུགས་འདས་རིག་གནས་ཤུལ་བཞག་གི་བརྩམས་ཆོས་ཆིག་སྟོང་ལྷག་གཅིག་སྡུད་སྒོས་འགྲེམ་སྟོན་བྱས་པ་དང་། གཟུགས་འདས་རིག་གནས་ཤུལ་བཞག་གི་མཚོན་བྱེད་རང་བཞིན་ལྡན་པའི་རྒྱུན་འཛིན་པ16གིས་ཡུལ་དངོས་ནས་ལག་རྩལ་གྱི་འབྱུང་ཁུངས་དང་རིག་གནས་ཀྱི་ནང་དོན་ལ་འགྲེལ་བཤད་བརྒྱབ། མར་དང་ཞོ། རྩམ་པ་སོགས་ཁྱད་ལྡན་ཞིམ་ཟས་གཅིག་སྡུད་སྒོས་འགྲེམ་སྟོན་བྱས་ནས། མང་ཚོགས་ལ་མཐོ་སྒང་གི་བཟའ་བཏུང་རིག་གནས་ཉམས་སུ་མྱོང་ཐུབ་པར་བྱས། རྒྱན་གོས་འཁྲབ་སྟོན་དང་མི་རིགས་ཞབས་བྲོ། མཉམ་ལེན། པི་ཝང་རྟ་མགོ་མ་དཀྲོལ་ལེན་སོགས་ངོ་མཚར་ཆེ་བའི་ལེ་ཚན་རེས་མོས་ཀྱིས་འཁྲབ་སྟོན་བྱས་ནས། ལོ་ལོན་རྒན་པའི་ཚོགས་སྤྱི་ཡི་དཔའ་ཉམས་ཆེ་བའི་ཉམས་འགྱུར་གང་ལེགས་སྒོས་མངོན་པ་དང་། མི་རིགས་མཐུན་སྒྲིལ་ཁྱིམ་ཚང་གཅིག་ལྟར་བརྩེ་བའི་རྣམ་པ་བཟང་བོ་བསྐྲུན།
ད་ཐེངས་ཀྱི་བྱེད་སྒོ་འདིས་མཐོ་སྒང་གི་ཕུན་སུམ་ཚོགས་པའི་མི་རིགས་རིག་གནས་ཀྱི་ཁྱད་སྟོབས་ལ་བརྟེན་ནས། ཁྲོམ་རའི་འགྲེམ་སྟོན་དང་འཁྲབ་སྟོན་མཉམ་འདྲེས་ཀྱི་གསར་གཏོད་རྣམ་པའི་ལམ་ནས་སྲོལ་རྒྱུན་མི་རིགས་རིག་གནས་རྒྱུན་འཛིན་སྲུང་སྐྱོང་དང་མི་རིགས་མཐུན་སྒྲིལ་ཡར་ཐོན་གྱི་སློབ་གསོར་སྐུལ་འདེད་བཏང་སྟེ། འཇོན་མིའི་ལེགས་ཆ་ནུས་ལྡན་ངང་མངོན་པ་དང་། སྲོལ་རྒྱུན་ལག་རྩལ་དང་ཁྱད་ལྡན་ཐོན་རྫས་ཁྱབ་གདལ་གཏོང་བའི་ཐབས་ལམ་རྒྱ་སྐྱེད་བཏང་སྟེ། མི་རིགས་སོ་སོའི་མང་ཚོགས་བར་ཕན་ཚུན་འགྲོ་འོང་སྤེལ་རེས་དང་མཉམ་འདྲེས་ཇེ་ཟབ་ཏུ་བཏང་སྟེ། ཀྲུང་ཧྭ་མི་རིགས་ཀྱི་གཅིག་མཐུན་ཚོགས་པའི་འདུ་ཤེས་མུ་མཐུད་དུ་ཇེ་བརྟན་དུ་བཏང་།
