རྒྱལ་སྟོན་དུས་ཆེན་བསུ་བའི་མང་ཚོགས་ཀྱི་ཕུལ་བྱུང་ཡིག་གཟུགས་བརྩམས་ཆོས་འགྲེམ་སྟོན་ཟི་ལིང་དུ་སྤེལ།

ཟླ10པའི་ཚེས1ཉིན་ཏེ། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ77འཁོར་བར་སྤྲོ་སེམས་འཁོལ་བའི་ངང་རྟེན་འབྲེལ་ཞུ་བའི་སྐབས་སུ། མཚོ་སྔོན་ཞིང་ཆེན་རིག་གནས་ཁང་གིས་གཙོ་སྒྲུབ་བྱས་པ་དང་། གྲོང་ཁྱེར་དང་ཁུལ། རྫོང་། ཆུས་བཅས་ཀྱི་རིག་གནས་ཁང་གིས་གཞོགས་འདེགས་བྱས་ཏེ་གཉེར་བའི། “ཚོས་སྨྱུག་གིས་མཐོ་སྒང་བརླན། བསམ་པ་གཅིག་མཐུན་བཅངས་ནས་ཡིག་གཟུགས་འབྲི”ཞེས་པའི། རྒྱལ་སྟོན་བསུ་བའི་མང་ཚོགས་ཀྱི་ཕུལ་བྱུང་ཡིག་གཟུགས་བརྩམས་ཆོས་འགྲེམ་སྟོན་མཚོ་སྔོན་ཞིང་ཆེན་རིག་གནས་ཁང་གི་སྐར་ཚོམ་འགྲེམ་ཁང་དུ་སྤེལ།

ད་ཐེངས་ཀྱི་འགྲེམ་སྟོན་ནི་མཚོ་སྔོན་ཞིང་ཆེན་མང་ཚོགས་ཀྱི་ཡིག་གཟུགས་སྤེལ་རེས་བྱེད་སྒོ་རབ་དང་རིམ་པའི་གྲུབ་ཆ་གལ་ཆེན་ཞིག་ཡིན་པ་དང་། འགྲེམ་སྟོན་བྱས་པའི་བརྩམས་ཆོས་རྩེ་གྲ100ཚང་མ་སྨྱུག་ཚོགས་རབ་དང་རིམ་པའི་ཁྲོད་ཀྱི་ཡིག་མཁན་གྲགས་ཅན་དང་ཡིག་གཟུགས་ལ་དགའ་མོས་བྱེད་མཁན་གྱི་གསར་རྩོམ་གྲུབ་འབྲས་ལས་བདམས་པ་ཡིན། བྱེད་སྒོ་རབ་དང་རིམ་པ་ཧྲིལ་པོར་མཐོ་སྒང་གི་བརྗོད་དོན་ཡིག་གཟུགས་གསར་རྩོམ་གྱི་སྨྱུག་ཚོགས་དང་། ཡིག་གཟུགས་རིག་གནས་རིག་གཞུང་བགྲོ་གླེང་སྤེལ་རེས་ཚོགས་འདུ། ཡིག་གཟུགས་སྤྱི་ཕན་གཞི་རིམ་དུ་སྤེལ་བ། མང་ཚོགས་ཀྱི་ཡིག་གཟུགས་ཕུལ་བྱུང་བརྩམས་ཆོས་འགྲེམ་སྟོན་བཅས་ཁྱད་ཆོས་ལྡན་པའི་ནང་དོན་ཁག་བཞི་བཀོད་སྒྲིག་བྱས་ཡོད་ཅིང་། བཀོད་སྒྲིག་དེ་དག2026ལོའི་ཟླ9པའི་ཚེས28ཉིན་ནས་ཟླ10པའི་ཚེས20ཉིན་བར་གཅིག་རྗེས་གཉིས་མཐུད་ངང་སྤེལ་རྒྱུ་རེད། དེའི་ནང་ཚོས་སྨྱུག་གིས་དམངས་ལ་ཕན་བདེ་བསྐྲུན་ཞེས་པའི་སྤྱི་ཕན་སྨྱུག་ཚོགས་སྔ་རྗེས་སུ་རྨ་ཆུ་ལམ་སློབ་ཆུང་དང་ཞི་ཀོན་ཁྲོམ་གཞུང་སློབ་ཆུང་དུ་བསྐྱོད་དེ། ཡིག་མཁན་གྲགས་ཅན་གྱིས་ཡུལ་དངོས་སུ་དཔེ་སྟོན་སློབ་ཁྲིད་བྱས་པ་དང་སློབ་མས་བཤུ་འབྲི་ནན་ཏན་བྱས་ནས། ཉམས་ལེན་དངོས་ཀྱི་ཁྲོད་ཀྲུང་ཧྭའི་སྣུམ་སྨྱུག་རིག་གནས་ཀྱི་ཡིད་དབང་འཕྲོག་ཤུགས་ཚོར་བར་བྱས་པའི་དུས་མཚུངས་སུ། ཞི་ཀོན་ཁྲོམ་གཞུང་གི་ཁྲོམ་གཞུང་དོན་གཅོད་ཁྲུའུ་དང་ཞིན་ཧའེ་ལམ་ཁྲོམ་གཞུང་དོན་གཅོད་ཁྲུའུ་རུ་བསྐྱོད་དེ། སྡེ་ཁུལ་གྱི་མང་ཚོགས་དེའི་ཁྲོད་འབད་པས་ཞུགས་ནས། རང་གི་ཐག་ཉེ་ས་ནས་ཡིག་གཟུགས་ཀྱི་བརྩམས་ཆོས་ཕུལ་བྱུང་ལ་རོལ་མྱོང་དང་རིག་གནས་དམངས་ཕན་གྱི་གྲུབ་འབྲས་མཉམ་སྤྱོད་བྱས།

ད་ཐེངས་ཀྱི་འགྲེམ་སྟོན་ནང་ཡིག་གཟུགས་དང་སྣུམ་སྨྱུག་གཞི་རྟེན་དུ་བྱས་ནས། ཀྲུང་གོ་གསར་པ་བཙུགས་ནས་ལོ77འཁོར་བར་བསྟོད་བསྔགས་བྱས་ཏེ། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་དང་མཐོ་སྒང་གི་ས་གནས་དེ་གའི་རིག་གནས་མཉམ་འདྲེས་ཡོང་བར་བྱས་ནས། ཞིང་ཆེན་ཡོངས་ཀྱི་མི་རིགས་སོ་སོའི་མང་ཚོགས་ལ་མང་ཚོགས་ཀྱི་རིག་རྩལ་གྲུབ་འབྲས་མཉམ་སྤྱོད་བྱེད་པའི་སྟེགས་བུ་བསྐྲུན་པ་དང་། རྒྱལ་སྟོན་དུས་ཆེན་སྐབས་ཀྱི་སྤྱི་པའི་རིག་གནས་མཁོ་སྤྲོད་ཕུན་སུམ་ཇེ་ཚོགས་སུ་གཏོང་བའི་དུས་མཚུངས་སུ། རིག་གནས་ཀྱི་ཁྱབ་ཚད་ཇེ་མང་དུ་བཏང་ནས། ཀྲུང་ཧྭ་མི་རིགས་ཀྱི་གཅིག་མཐུན་ཚོགས་པའི་འདུ་ཤེས་ཇེ་བརྟན་དུ་བཏང་སྟེ། མང་ཚོགས་ཀྱི་རིག་རྩལ་གསར་རྩོམ་གྱི་ནང་གནས་སྒུལ་ཤུགས་སྐུལ་སློང་བྱས་ནས། མཚོ་སྔོན་མང་ཚོགས་ཀྱི་རིག་གནས་བྱ་གཞག་གི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་ཆེད་རིག་གནས་ཀྱི་སྟོབས་ཤུགས་གཅིག་སྡུད་བྱས།