མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
སྟོན་འབྲུ་ཡིས་ལོ་ཧྲིལ་བོའི་འབྲུ་རིགས་ཐོན་སྐྱེད་ཀྱི་ཟིན་ཚད་མཐོ་ཞིང་། དེས་སྤྱིའི་ཐོན་ཚད་ཀྱི་བཞི་ཆའི་གསུམ་ཟིན་ཡོད། སྟོན་དུས་སུ་སླེབས་པས། རང་རྒྱལ་གྱི་སྟོན་འབྲུ་ནི་གཅིག་རྗེས་གཉིས་མཐུད་དུ་སྨིན་ཐག་ཆོད་ཡོད་ལ། རྒྱལ་སྟོན་གུང་གསེང་གི་སྐབས་སུ་སྟོན་བསྡུའི་ལས་ཀར་བྲེལ་བའི་སྒང་རེད།
རང་རྒྱལ་གྱི་སྟོན་འབྲུ་ནི་ལྷོ་ནས་བྱང་ལ་ཁྱབ་པར་མ་ཟད། རིགས་སྣའང་མང་སྟེ། གཙོ་བོ་བར་སྨིན་འབྲས་དང་། ཕྱི་སྨིན་འབྲས། མ་རྨོས་ལོ་ཏོག སྲན་ཆེན། ཞོག་ཁོག་སོགས་འདུས་ཡོད། ཞིང་ལས་ཞིང་སྡེ་པུའུ་ཡི་ཞིང་ལས་གནས་ཚུལ་བཀོད་གཏོང་ལས་མངོན་པ་ལྟར་ན། རྒྱལ་ཡོངས་ཀྱི་སྟོན་བསྡུ་བཅུ་ཆའི་གསུམ་ཟིན་ནས་འཕེལ་ཚད་ན་ནིང་གི་དུས་མཉམ་ལས་མགྱོགས། ཞིན་ཅང་གི་དབྱི་ལི་ཁྲ་པུའུ་ཁྲ་ཨར་རྫོང་དུ། ས་གནས་ཀྱིས་མ་རྨོས་ལོ་ཏོག་མཐུག་འདེབས་དང་ཐོན་ཚད་ཆེ་བའི་གནད་སྨིན་སྙོམ་སྒྲིག་ལག་རྩལ་གཙོ་གནད་ཁྱབ་གདལ་བཏང་བ་དང་། མུའུ་ཁྲི་ཡི་དཔེ་སྟོན་ཞིང་གི་མུའུ་རེའི་ཐོན་ཚད་དེ་ན་ནིང་གི་སྤྱི་རྒྱ་ཆིག་སྟོང་ལྔ་བརྒྱ་ཞེ་གཉིས་ལྷག་ནས་སྤྱི་རྒྱ་ཆིག་སྟོང་དྲུག་བརྒྱ་དགུ་ལྷག་བར་མང་དུ་འཕེལ་ནས་ས་གནས་ཀྱི་མུའུ་ཁྲི་ཡི་ཐོན་ཚད་ཆེ་བའི་ཟིན་ཐོ་གསར་པ་བཏོད།
ཉིན་འདི་འགར། བྱང་ཤར་ས་ཁུལ་གྱི་སྲན་ཆེན་ལ་ཐོན་འབབ་བྱུང་ནས་སྐྱེ་ཚུལ་ཧ་ཅང་ཡག ཧེ་ལུང་ཅང་གི་པེ་ཏ་ཧོང་ནིན་པེ་ཞིང་རའི་མུའུ930ཡི་སྲན་ཆེན་གྱི་ཐོན་ཚད་ཆེ་བ་ནི་ཕྱོགས་བསྡུས་ཐོན་འཕར་ལག་རྩལ་དོན་ཐོག་ཏུ་འཁྱོལ་བ་ལས་བྱུང་བ་དང་། སྲན་ཆེན་གྱིས་ཆར་ཆུ་མང་ཞིང་ཞོད་སྐྱོན་གྱི་ཤུགས་རྐྱེན་འགོག་ཐུབ་པ་བྱུང་ཡོད། མུའུ་རེའི་ཐོན་ཚད་རྒྱ་མ540ལས་བརྒལ་བ་དེ་ན་ནིང་གི་དུས་མཉམ་ལས་བརྒྱ་ཆའི་བཅུ་བདུན་འཕར་ཡོད།
མིག་སྔར། འབྲི་ཆུའི་འབབ་རྒྱུད་ཀྱི་བར་སྨིན་འབྲས་རིམ་བཞིན་སྨིན་པ་དང་། དུས་འགོའི་མཚོ་རླུང་གི་ཤུགས་རྐྱེན་དང་ཉེ་དུས་ཀྱི་དྲོད་ཚད་ཅུང་མཐོ་བའི་གནམ་གཤིས་ཀྱི་དབང་གིས་ཆུ་འབྲས་ཀྱི་ཐོན་འབབ་ལ་ཤུགས་རྐྱེན་ཅུང་ཆེ་བའི་འཕུར་ཤིག་གི་ཉེན་ཁའང་ཆེ་རུ་ཕྱིན་ཡོད། ཅང་སུའུ་རུ་ས་གནས་ཀྱིས་ཞིང་ཁའི་སྐོར་ཞིབ་ཇེ་མང་དུ་བཏང་སྟེ། གཅིག་གྱུར་སྔོན་འགོག་དང་གཅིག་གྱུར་བཅོས་སྐྱོང་ལ་ཤུགས་བསྣན་ནས་ད་ལྟ་སྔོན་འགོག་ཚོད་འཛིན་གྱི་རྒྱ་ཁྱོན་མུའུ་བྱེ་བ་བརྒྱད་ལས་བརྒལ་ཡོད།
ད་ལོར། ཀྲུང་དབྱང་ནོར་སྲིད་ཀྱིས་མ་དངུལ་སྒོར་ཐེར་འབུམ་གཅིག་དུང་ཕྱུར་གསུམ་བྱེ་བ་གསུམ་ས་ཡ་གཅིག་བཀོད་སྒྲིག་བྱས་ནས། སྟོན་འབྲུའི་གནོད་འགོག་སོགས་ཀྱི་ལས་ཀ་གཙོ་གནད་དུ་བཟུང་ནས་རྒྱབ་སྐྱོར་བྱས། རྒྱལ་ཡོངས་ཀྱི་སྟོན་འབྲུ་གཅིག་སྡུད་ཐོག་བསྡུ་བའི་དུས་ཚོད་སྔོན་དཔག་བྱས་ན་ཟླ10པའི་ཟླ་མཇུག་བར་རྒྱུན་མཐུད་རྒྱུ་རེད། ཞིང་ལས་ཞིང་སྡེ་པུའུ་ཡིས་དྲན་སྐུལ་བྱས་དོན། ས་ཁུལ་དགར་བ་དང་རིགས་དགར་ནས་དུས་མཇུག་གི་ཞིང་ཁའི་དོ་དམ་ལ་ཤུགས་བསྣན་ཏེ། ཞིང་འཕྲུལ་མཁོ་སྤྲོད་འབྲེལ་མཐུད་སྔ་མོར་བྱས་ཏེ་གནམ་གཤིས་བཟང་པོ་དམ་འཛིན་སྒོས་སྟོན་འབྲུའི་ཐོན་འབབ་བསྡུ་བར་སྐུལ་འདེད་བཏང་།
