མགོ་ལོག་གིས་མི་རིགས་མཐུན་སྒྲིལ་ཡར་ཐོན་སྐུལ་འདེད་བཅའ་ཁྲིམས་ལ་སློབ་སྦྱོང་དང་དྲིལ་སྒྲོག་ཟབ་མོ་བྱས།

​《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་མི་རིགས་མཐུན་སྒྲིལ་ཡར་ཐོན་སྐུལ་འདེད་བཅའ་ཁྲིམས》ལག་བསྟར་བྱས་པ་ནས་བཟུང་། མགོ་ལོག་བོད་རིགས་རང་སྐྱོང་ཁུལ་གྱིས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་ཀྱི་གཙོ་རྐང་ལ་དམ་པོར་དམིགས་ནས། སྲོལ་རྒྱུན་གྱི་བཅའ་ཁྲིམས་ཁྱབ་གདལ་གཏོང་སྟངས་རྐྱང་པར་འགྱུར་ལྡོག་བཏང་སྟེ། ཚོགས་ར་ནས་ཕྱིར་བུད་ཅིང་ཤོག་ངོས་སྒྲོག་བཤད་བྱེད་པར་ཁ་བྲལ་ཏེ། མིག་མཐོང་ལག་ཟིན་གྱི་ལག་ལེན་ཐོག་ནས་མི་རིགས་མཐུན་སྒྲིལ་ཡར་ཐོན་སྐུལ་འདེད་བཅའ་ཁྲིམས་དྲིལ་བསྒྲགས་དེ་འཚོ་བའི་ནང་དངོས་སུ་འདྲེས་ཐུབ་པར་བྱས།

མགོ་ལོག་ཁུལ་གྱིས་མཐོ་ས་ནས་བཀོད་སྒྲིག་དང་སྐུལ་འདེད་བཏང་སྟེ། གཅིག་གྱུར་འཆར་འགོད་དང་མཉམ་འགུལ་གྱི་བྱ་བའི་ལམ་སྲོལ་འཐུས་ཚང་དུ་གཏོང་བ་དང་། འགན་འཁྲི་ཞིབ་ཚགས་སུ་བཏང་ནས། མི་རིགས་མཐུན་སྒྲིལ་གྱི་ཁྲིམས་སྐྱོང་དྲིལ་བསྒྲགས་དེ་མཉེན་གཤིས་བྱ་བའི་བླང་བྱ་ནས། ཚད་འབེབས་ཐུབ་པ་དང་། དཔྱད་ཞིབ་ཐུབ་པའི་འགྱུར་མེད་དམིགས་ཚད་དུ་ཞིབ་ཚགས་སུ་བཏང་། ཁུལ་ཡོངས་ཀྱི་རྫོང་དྲུག་གིས་རང་ངོས་ཀྱི་དོན་དངོས་ལ་གཞི་ཚུགས་པ་དང་། བྱེད་ཐབས་དངོས་བཏོན་ནས་རིམ་པ་བཞིན་འགན་འཁྲི་དོན་འཁྱོལ་བྱས་ཡོད། ཁུལ་དང་རྫོང་། ཞང་བཅས་རིམ་པ་གསུམ་གྱི་རྒྱུན་རྣམ་ཅན་གྱི་ཆེད་དོན་གསོ་སྦྱོང་བྱས་པ་བརྒྱུད། རིམ་པ་ཁག་གི་ལས་བྱེད་པ་དང་གཞི་རིམ་གྱི་རྐང་འཛིན་པར་ཁྱོན་ཡོངས་ནས་ཁྱབ་པར་བྱས་ཏེ། ཏང་ཡོན་ལས་བྱེད་པས་གཞན་གྱིས་སྔོན་ལ་སློབ་སྦྱོང་དང་གཞན་ལས་སློབ་སྦྱོང་གཏིང་ཟབ་བྱས་ནས་དཔེ་སྟོན་སྣེ་ཁྲིད་ཀྱི་ནུས་པ་ལེགས་པོ་འདོན་དུ་བཅུག །

ས་ཁོངས་ཀྱི་ཁྱད་ཆོས་ལ་དམིགས་ནས། མང་ཚོགས་ཀྱི་དགོས་མཁོར་གནད་ལ་འཁེལ་བའི་སྒོ་ནས་སྦྲེལ་མཐུད་བྱས་ཏེ། མང་ཚོགས་ལ་འབྲེལ་འདྲིས་དང་བརྩེ་བ་ལྡན་པའི་སྒོ་ནས་སྐད་གཉིས་སྒྲོག་འགྲེལ་བྱས། སློབ་གྲྭའི་ནང་ཁྱད་ལྡན་བརྗོད་དོན་གཙོ་བོའི་སློབ་ཁྲིད་དང་། སྒྲོག་འགྲེལ་པ་ཆུང་ཆུང་གིས་མཐུན་སྒྲིལ་གྱི་ས་བོན་དེ་གཞོན་ནུ་ལོ་ཆུང་གི་སེམས་ནང་དུ་རྩ་བ་ཚུགས་ཤིང་མྱུ་གུ་འབུས་སུ་བཅུག་པ་དང་། རྩྭ་ཐང་སྟེང་དུ། རྟ་ཐོག་དང་འཕྲུལ་རྟའི་སྒྲོག་འགྲེལ་རུ་ཁག་གིས་རི་ལུང་དང་སྦྲ་གུར་བརྒྱུད་དེ། བཅའ་ཁྲིམས་ཤེས་བྱ་འབྲོག་པའི་སྒོ་འགྲམ་དུ་བསྐྱལ་བ་དང་། རིག་གནས་ཡུལ་སྐོར་གྱི་བྱེད་སྒོ་དང་དྲ་རྒྱའི་སྟེགས་བུ། གྲོང་གསེབ་ཀྱི་རླུང་འཕྲིན་བཅས་ཀྱིས་ཐབས་ལམ་མང་པོ་དང་མཉམ་དུ་ཤུགས་བརྒྱབ་སྟེ། ཕྱོགས་ཡོངས་ནས་ཁྲིམས་ལུགས་ཁྱབ་གདལ་གཏོང་རྒྱ་ཆེ་རུ་བཏང་། མིག་སྔའི་བར་ཁུལ་ཡོངས་ཀྱིས་རིམ་རྩིས་བྱས་ན་རིགས་སྣ་ཚོགས་ཀྱི་སྒོ་ནས་ཁྲིམས་ལུགས་ཁྱབ་གདལ་སྒྲོག་འགྲེལ་ཐེངས230བྱས་པ་དང་། རྒྱ་བོད་སྐད་གཉིས་ཀྱི་དྲིལ་བསྒྲགས་དཔྱད་ཡིག་ཁྲི་གསུམ་དང་སྟོང་གཉིས་ལྷག་བཀྲམ་པས། མི་རིགས་ཁག་གི་ལས་བྱེད་པ་དང་མང་ཚོགས་ཁྲི4ལྷག་ཙམ་ལ་ཕན་པ་ཐོབ་ཡོད། བཅའ་ཁྲིམས་ཀྱི་དོན་ཚན་དེ་འབྲོག་པས་གོ་ཐུབ་པ་དང་། བློ་ལ་ངེས་ཐུབ་པའི་རྒྱུན་ལྡན་གྱི་སྐད་ཆ་དང་མཐུན་སྒྲིལ་གྱི་ནང་དོན་དུ་གྱུར་ཡོད།

བཅའ་ཁྲིམས་སློབ་སྦྱོང་བྱེད་པར་དེ་བས་ཀྱང་བཅའ་ཁྲིམས་སྤྱོད་དགོས། མགོ་ལོག་ཁུལ་གྱིས་ཁྲིམས་སྐྱོང་ལ་བརྟེན་ནས་གཞི་རིམ་བཅོས་སྐྱོང་བྱ་རྒྱུ་མཐའ་འཁྱོངས་བྱས་ཏེ། "སེ་འབྲུའི་ཁྱིམ་གཞིས"དང་ཕན་ཚུན་སྦྱོར་རེས་རྣམ་པའི་སྡེ་ཁུལ་རྒྱུན་མཐུད་རིམ་སྤོར་བྱས་ནས། ཁྱིམ་མཚེས་བར་གྱི་མཐུན་འབྲེལ་བྱེད་སྒོ་རྒྱུན་རྣམ་ཅན་དུ་སྤེལ་བ་དང་། ས་ཁོངས་ལས་བརྒལ་བའི་སྤེལ་རེས་ལས་སྟེགས་བཏོད་དེ། མི་རིགས་ཁག་གི་མང་ཚོགས་མཉམ་སྡོད་མཉམ་སྦྱོང་དང་། མཉམ་ལས་མཉམ་སྤྲོ་ཡོང་རྒྱུར་སྐུལ་འདེད་བཏང་། དེ་དང་ཆབས་ཅིག་དགོན་སྡེའི་རྒྱུན་རྣམ་ཅན་གྱི་ཁྲིམས་སྐྱོང་སློབ་གསོར་སྐུལ་འདེད་ཏན་ཏིག་བཏང་ནས། ཆོས་ལུགས་ལས་རིགས་ཀྱི་མི་སྣར་རྒྱལ་གཅེས་ཁྲིམས་སྲུང་དང་། དད་གཙང་སྤྱོད་གཙང་དུ་སྣེ་ཁྲིད་བྱས།

རྒྱུས་ལོན་བྱུང་བ་ལྟར་ན། མགོ་ལོག་ཁུལ་གྱི་རྫོང་དྲུག་པོ་ཚང་མར་རྒྱལ་ཁབ་རིམ་པའི་མི་རིགས་མཐུན་སྒྲིལ་ཡར་ཐོན་གྱི་དཔེ་སྟོན་རྫོང་གི་མིང་ཐོབ་ཡོད། རྒྱུན་རྣམ་ཅན་གྱི་ལྟ་ཞིབ་དཔྱད་བསྡུར་དང་། དྲང་ཕྱོགས་སྐུལ་སློང་། གཞི་རིམ་གྱི་ཤེས་ལྡན་མི་སྣ་གསོ་སྐྱོང་སོགས་ཀྱི་ཡུན་ཕན་བྱེད་ཐབས་ལ་བརྟེན་ནས། ས་གནས་དེ་གའི་གསར་གཏོད་གྲུབ་འབྲས་རྒྱུན་མཐུད་སྲ་བརྟན་དུ་གཏོང་བ་དང་། མི་རིགས་མཐུན་སྒྲིལ་ཡར་ཐོན་ལས་དོན་དེ"ཚད་ལོན་གསར་གཏོད"ནས"དཔེ་སྟོན་སྣེ་ཁྲིད"ཀྱི་ཕྱོགས་སུ་བསྐྱོད་པར་སྐུལ་འདེད་བཏང་ཡོད།