རྒྱལ་སྟོན་དུས་ཆེན་གྱི་གུང་གསེང་རིང་རྒྱལ་ཡོངས་ཀྱི་གསར་བརྗེའི་ཡུལ་སྐོར་གྱི་མཛེས་ལྗོངས་ཁུལ་གྲགས་ཅན་དུ་ཡུལ་སྐོར་བ་མང་པོ་སླེབས།

རྒྱལ་སྟོན་དུས་ཆེན་གྱི་གུང་གསེང་རིང་། རྒྱལ་ཡོངས་ཀྱི་ས་ཆ་མང་པོའི་གསར་བརྗེའི་ཡུལ་སྐོར་མཛེས་ལྗོངས་ཁུལ་དུ་ཡུལ་སྐོར་བ་མང་པོ་སླེབས་ཤིང་།   མི་རྣམས་ཀྱིས་གསར་བརྗེ་གནས་གཞི་རུ་གསར་བརྗེའི་སྙིང་སྟོབས་ལ་ཉམས་ལེན་དང་རྒྱུན་འཛིན་བྱས།

ཀུའེ་ཀྲོའུ་གསར་བརྗེའི་མཛེས་ལྗོངས་ཁུལ་དུ་རྒྱལ་སྟོན་སྐབས་སུ་ལྟ་སྐོར་བའི་ཚ་རླབས་འཕྱུར་ཞིང་། ཞི་ཧྲུའེ་ཐུའུ་ཁྲིན་གྲོང་རྡལ་གྱི་ཁྲུ་ཧྲུའེ་ཆུ་བོ་ཐེངས་བཞི་བརྒལ་བའི་རྗེས་དྲན་ཁང་དུ་ཡུལ་སྐོར་བའི་གྲངས་འབོར་ན་ནིང་གི་དུས་མཉམ་ལས་བཅུ་ཆའི་གསུམ་ཉེ་བ་འཕར།   ལོའུ་ཧྲན་ཀོན་མཛེས་ལྗོངས་ཁུལ་དུ་བག་ཕེབས་རྣམ་པའི་རིག་གནས་ཡུལ་སྐོར་ལྗོངས་རྣམ་གསར་པ་བསྐྲུན།   ཀུའེ་དབྱང་རྒྱང་སྐྱོད་རིག་གནས་གྲངས་འཛིན་སྒྱུ་རྩལ་ཁང་གིསAIསོགས་གྲངས་འཛིན་ལག་རྩལ་ལ་བརྟེན་ནས་རྒྱང་སྐྱོད་ཀྱི་རྣམ་པ་བསྐྱར་མངོན་བྱས་ཤིང་།   ཉིན་རེར་ཡུལ་སྐོར་བ་མི་ཐེངས་ཉིས་སྟོང་ལྷག་སྣེ་ལེན་བྱས།

ཨན་ཧུའེ་ཅིན་ཀྲའེ་གསར་བརྗེའི་མཛེས་ལྗོངས་ཁུལ་དུ། ཡུལ་སྐོར་བས་དམར་དམག་གི་གཡུལ་སའི་ཞབས་རྗེས་དེད་དེ། དམར་དམག་ཐང་ཆེན་དང་གསར་བརྗེའི་རྟེན་མཛོད་ཁང་དུ་ཕྱིན་ཏེ། དམག་འཁྲུག་གི་ལོ་ཟླ་ཕྱིར་དྲན་བྱས།  ཀྲེ་ཅང་ཁྲང་ཞིན་དུ། དམག་སྡེ་བཞི་པའི་སུའུ་ཀྲེ་དམག་ཁུལ་རྗེས་དྲན་ཁང་ནི་འབྲི་ཆུའི་ལྷོ་རྒྱུད་ས་ཁུལ་དུ་ཉར་ཚགས་ཆ་ཚང་ཤོས་དང་གཞི་ཁྱོན་ཆེ་ཤོས་ཀྱི་གསར་བརྗེའི་གནས་རྙིང་གི་གྲས་ཤིག་ཡིན་པ་དང་། གུང་གསེང་རིང་ཉིན་རེར་ཡུལ་སྐོར་བ་མི་ཐེངས་ཆིག་སྟོང་ལྷག་སྣེ་ལེན་བྱས། གསར་བརྗེའི་གནས་མཆོག་ཧྲའན་ཞི་ཡན་ཨན་པའོ་ཐ་རི་བོའི་མཛེས་ལྗོངས་ཁུལ་གྱིས“པའོ་ཐ་རི་བོའི་གཏམ་རྒྱུད”སོགས་ཁྱད་ལྡན་བྱེད་སྒོ་སྤེལ་ཞིང་། ནང་དོན་ཕུན་སུམ་ཚོགས་པས་ཞིབ་སྦྱོང་ཚོགས་པ་མང་པོས་གསར་བརྗེའི་ཞབས་རྗེས་འཚོལ་བར་བཀུག

ཅང་སུའུ་ནན་ཅིན་ཡུས་ཧྭ་ཐའེ་སྔོན་གཤེགས་དཔའ་བོའི་བང་སོ་རུ། “དད་མོས་ལ་བརྟེན་པའི་སྙན་ངག་གི་བཞུད་ལམ”ཅེས་པའི་གསར་བརྗེའི་བརྗོད་དོན་ཞིབ་སྦྱོང་བྱེད་སྒོ་གསར་དུ་སྤེལ་ཞིང་།    ཡུལ་སྐོར་བས་གསར་བརྗེའི་སྙན་ཚིག་ཀློག་པ་དང་།   དད་མོས་ཀྱི་སྟོབས་ཤུགས་ཉམས་ལེན་བྱས།   གུང་གསེང་རིང་སྔོན་དཔག་བྱས་ན་ཡུལ་སྐོར་བ་མི་ཐེངས་ཉིས་འབུམ་ཉེ་བ་སྣེ་ལེན་ཞུ་རྒྱུ་རེད།  མཛེས་ལྗོངས་ཁུལ་དུ་འགྲེལ་བཤད་མཁན་ཇེ་མང་དང་ལམ་ཐིག་ཇེ་ལེགས་སུ་བཏང་ནས་བསམ་བློ་བརྗེ་རེས་དང་ཉམས་ལེན་ཕུན་སུམ་ཚོགས་པར་བཏང་།

“མདེལ་གཉིས་སྐར་གཅིག”གི་སྙིང་སྟོབས་རྒྱུན་འཛིན་དང་དར་སྤེལ་གཏོང་བའི་མཚོ་སྔོན་རྡུལ་ཕྲན་མཁར་གྱི་དྲན་གསོ་ཁང་དུ། དངོས་རྫས་དང་ལོ་རྒྱུས་ཀྱི་དཔྱད་གཞིའི་ཡིག་རིགས་ཐོག་ནས་ཚན་ཞིབ་ལས་བྱེད་པ་རྒན་རབས་དག་གིས་མཐོ་སྒང་དུ་རྩ་བ་ཚུགས་པ་དང་། རང་མིང་སྦས་གསང་བྱེད་པ། རྒྱལ་ཁབ་ཀྱི་ཆེད་དུ་མཆོག་ནོར་བསྐྲུན་པ་བཅས་ཀྱི་འོད་སྟོང་འབར་བའི་ལོ་ཟླ་བསྐྱར་དུ་མངོན་སྟེ། ལྟ་སྐོར་བ་རྒྱུན་ཆད་ཀྱིན་མེད།

རང་རྒྱལ་དུ་ད་ལྟ་རྒྱལ་ཡོངས་གསར་བརྗེའི་ཡུལ་སྐོར་མཛེས་ལྗོངས་ཁུལ་གྲགས་ཅན300ཡོད་ཅིང་། རྒྱལ་ཡོངས་སུ་ཐོ་འགོད་བྱས་པའི་གནས་སྤོ་མི་ཐུབ་པའི་གསར་བརྗེའི་རིག་དངོས་བཞི་ཁྲི་ཉིས་སྟོང་ལྷག་ཡོད་ཅིང་། གནས་སྤོ་ཆོག་པའི་གསར་བརྗེའི་རིག་དངོས་ས་ཡ་གཅིག་འབུམ་ལྔ་ལྷག་ཡོད། གསར་བརྗེའི་ཡུལ་སྐོར་མཛེས་ལྗོངས་ཁུལ་དེ་རྒྱལ་གཅེས་རིང་ལུགས་ཀྱི་སློབ་གསོ་སྤེལ་ས་དང་། གཞོན་ནུ་ལོ་ཆུང་གིས་ཞིབ་སྦྱོང་བྱེད་པའི་སློབ་ཚན་གལ་ཆེན་ཞིག་ཏུ་གྱུར་བ་མ་ཟད།  རིག་གནས་ཡུལ་སྐོར་ཁྲོམ་རར་བསམ་པའི་སྟོབས་ཤུགས་ཀྱང་བསྩལ་ཡོད།