རྒྱལ་སྟོན་གུང་གསེང་སྐྱིད་པོར་རོལ། གསོན་ཤུགས་འབར་བའི་ཀྲུང་གོར་ལྟ།

རྒྱལ་སྟོན་དུས་ཆེན་གྱི་གུང་གསེང་འདིར། ཀྲུང་གོའི་ས་གནས་སོ་སོར་གསོན་ཤུགས་ཀྱིས་ཁེངས། མི་རྣམས་ཀྱིས་རི་ཆུའི་ལྟད་མོར་བལྟས་ཤིང་། སྲོལ་རྒྱུན་རིག་གནས་ལ་རོལ་མྱོང་བྱས་ཏེ། སྣ་མང་ཕུན་སུམ་ཚོགས་པའི་བྱེད་སྒོའི་ཁྲོད་གུང་གསེང་སྐྱིད་པོ་རོལ།

མཛེས་སྡུག་རི་ཆུའི་ལྟད་མོར་ཅི་དགར་ལྟ། རླབས་ཆེན་མེས་རྒྱལ་གྱི་འཁྲུངས་སྐར་ལ་སྨོན་འདུན་ཞུ། གུང་གསེང་གི་ཉིན་དང་པོར། པེ་ཅིང་གནམ་བདེ་སྒོ་མོ་ཆེའི་ས་ཁུལ་དུ་འགྲུལ་རྒྱུན་ཆེན་པོ་སླེབས་ཏེ། ས་གནས་སོ་སོའི་ཡུལ་སྐོར་བ་སུམ་འབུམ་ལྷག་གནས་འདིར་འཛོམས། ཚང་མས་ལག་ལ་རྒྱལ་དར་བཟུང་ཞིང་། ལྟ་སྐོར་པར་ལེན་བྱེད་ཞོར་མེས་རྒྱལ་དར་རྒྱས་གོང་འཕེལ་ཡོང་བའི་སྨོན་འདུན་ཞུས། འཛམ་གླིང་རིག་གནས་ཤུལ་བཞག་གནས་ཞ་མོན་ཀུའུ་ལང་ཡུའུ་རུ། ཡུལ་སྐོར་བ་ཚོས་ཁྲོམ་གཞུང་དུ་འཁྲབ་སྟོན་སྣ་ཚོགས་མཐོང་བ་དང་། ལྗོངས་ཁུལ་ཆེ་གྲས་སོ་སོར་སོང་ནས། སྙན་འཇེབས་ལྡན་པའི་སྒྲ་སྙན་ཁྲོད། ཀྲུང་གོ་གསར་པའི་འཁྲུངས་སྐར་ལ་སྨོན་འདུན་ཞུས།  ཀན་སུའུ་མུན་ཆིན་རྫོང་དུ། མི་རྣམས་ཀྱིས་བྱེ་སྒང་དུ་འཆམ་འཆམ་དང་། བྱེ་ཐང་གི་བྱེས་བགྲོད་ཉམས་ལེན་སོགས་བྱས་ཏེ། བྱེ་ཐང་གི་མཛེས་ལྗོངས་ཉམས་སུ་མྱངས།  ཀུའེ་ཀྲོའུ་ལི་པོ་རྫོང་དུ། མི་རྣམས་རི་ཀླུང་ཀུན་ཏུ་ཉུལ་ཏེ། འཛམ་གླིང་རང་བྱུང་ཤུལ་བཞག་གི་མཛེས་སྡུག་ཉམས་སུ་མྱངས། རྒྱལ་སྟོན་དུས་ཆེན་གྱི་གུང་གསེང་འདིར། ཧའེ་ནན་གྱིས་མཚོ་གཏིང་ནས་སྐམ་ས་དང་། དམའ་དབྱིངས་ནས་ནགས་རིར་ལྟ་སྐོར་བྱེད་པའི་སྣ་མང་ཡུལ་སྐོར་རྣམ་པ་གསར་གཏོད་བྱས།  སན་ཡ་རུ། ཝུའུ་ཀྲི་ཀྲོའུ་གླིང་ཕྲན་དུ་མི་ཚོགས་འཚང་ཁ་ཤིག་ཤིག་བྱས་ཏེ། གུང་གསེང་གི་ཉིན་དང་པོར་མི6000ལྷག་གླིང་ཕྲན་འདིར་སླེབས་ཡོད། 

ཡུལ་སྐོར་ཁྲོད་རིག་གནས་ཀྱི་ཡིད་དབང་འཕྲོག་ཤུགས་ཉམས་སུ་མྱོང་།  ཧྲན་ཏུང་ལིན་ཆིན་དུ། མི་རྣམས་ཀྱིས་མིས་བཟོས་གཙང་པོ་ཆེན་པོའི་འགྲམ་དུ་ས་གནས་དེའི་ཁྱད་ལྡན་ཞིམ་ཟས་ཀྱི་བྲོ་བ་མྱོང་བ་དང་།  ཅང་སུའུ་ཅན་ཧུའུ་རུ། མི་རྣམས་ཀྱིས་ཧོའེ་ཅུས་ཟློས་གར་གྲོང་རྡལ་ལ་བསྐྱོད་དེ། སྲོལ་རྒྱུན་ཟློས་གར་དང་དམངས་སྲོལ་འཁྲབ་སྟོན་ལ་རོལ་མྱོང་བྱས།  སི་ཁྲོན་ཞིན་ཅིན་དུ།  ནན་ཧི་གཙང་པོའི་ངོགས་གཉིས་སུ། སི་ཁྲོན་དང་ཁྲུང་ཆིན་ས་གནས་གཉིས་ནས་ཡོང་བའི་གཟུགས་འདས་རིག་གནས་ཤུལ་བཞག་ཉམས་ལེན་དང་། རིག་གནས་ཚོང་འདུས་ནི་རྒྱལ་སྟོན་དུས་ཆེན་འདིའི་མི་རྣམས་ཀྱི་ལྟ་སྐོར་བྱ་ཡུལ་གསར་པར་གྱུར།  ཀྲེ་ཅང་ཏི་ཆིན་གྱི་ཞིན་ཧྲི་གནའ་གྲོང་དུ། ཡག་ཐོག་ཡག་བརྩེགས་བྱས་པའི་སྲོལ་རྒྱུན་རིག་གནས་ཀྱི་གསར་གཏོད་ཐོན་རྫས་དང་། གཟུགས་འདས་རིག་གནས་ཤུལ་བཞག་ལག་ཤེས་ཐོན་རྫས། རླངས་པ་ལྷོག་ལྷོག་འཕྱུར་བའི་སྲོལ་རྒྱུན་ཐུད་ཟས།  ཁྱད་ལྡན་སིལ་ཟས་སོགས། ཆུ་གྲོང་གི་ཉམས་འགྱུར་དང་མི་ཡུལ་གྱི་འཚོ་བའི་རྣམ་པ་ཕན་ཚུན་འདྲེས་ནས། ཡུལ་སྐོར་བ་མང་པོའི་ཡིད་དབང་བཀུག

གུང་གསེང་གི་མཚན་མོའི་ལྟད་མོའང་ཧ་ཅང་ངོ་མཚར་ཆེ།  ཧྲང་ཧའེ་རུ།  ཧོང་ཕུའུ་གཙང་པོའི་འགྲམ་ངོགས་སུ་ཚོན་གློག་འདྲ་མིན་སྣ་ཚོགས་འོད་ཆེམ་ཆེམ་དུ་མངོན། ད་ལོར། ཧྲང་ཧའེ་ཡིས་ཚན་རྩལ་བརྗོད་དོན་གྱི་ལྟ་སྐོར་གྲུ་གཟིངས་གསར་བཏོད་བྱས་ཤིང་། རིག་ནུས་འཕྲུལ་མིའི་འཁྲབ་སྟོན་དང་ཧོང་ཕུའུ་གཙང་པོའི་འགྲམ་ངོགས་གཉིས་ཀྱི་མཚན་ལྗོངས་མཉམ་འདྲེས་བྱུང་ནས།  ཚན་རྩལ་དང་ཚོར་སྣང་གཉིས་ཀ་ལྡན་པའི་མཚན་མོའི་ཡུལ་སྐོར་གྱི་ཉམས་ལེན་གསར་པ་བསྐྲུན། རྒྱལ་སྟོན་དུས་ཆེན་འདིར།  ཐེན་ཅིན་ཧའེ་ཧི་ཡི་ཚོན་གློག་འཁྲབ་སྟོན་རྣམ་པ་གསར་པར་བརྗེས། གྲོང་ཁྱེར་གྱི་མཚོན་རྟགས་དང་། ཐེན་ཅིན་ས་ཆའི་མི་ཚུལ་རིག་གནས་རྣམ་པ་དེ་འོད་གྲིབ་ཆེན་པོའི་སྟེང་དུ་ཕབ། གྲོང་མི་དང་ཡུལ་སྐོར་བ་མི་ཉུང་བ་ཞིག་གཙང་འགྲམ་དུ་ཡོང་ནས་ལྟད་མོར་ལྟ་བ་དང་དྲན་རྟེན་པར་ལེན་བྱས། ཚེས1ཉིན་གྱི་དགོང་མོར།  ཧུའུ་པེ་ཝུའུ་ཧན་གྱིས་ཚོན་སྦག་གཏོང་བའི་བྱེད་སྒོ་སྤེལ། ཚོན་སྦག་སྣ་ཚོགས་འབྲི་ཆུའི་ཝུའུ་ཧན་འབབ་མཚམས་ཀྱི་ཆུ་ཁར་བཀད་ཅིང་། འགྲམ་ངོགས་གཉིས་ན་ཡོད་པའི་ཐོག་ཁང་གི་གློག་འོད་དང་སྣོལ་མར་འཕྲོས།  ཅང་ཞིའི་ནན་ཁྲང་གི་རྒྱལ་སྟོན་ཚོན་སྦག་གཏོང་བའི་དགོང་ཚོགས་དེ་ཀན་ཅང་གཙང་པོའི་ལའོ་ཀོན་ཀྲོའུ་ཡི་ཆུ་ཁོངས་སུ་གཟབ་རྒྱས་ངང་སྤེལ། ཚོན་སྦག་འདྲ་མིན་སྣ་ཚོགས་མཚན་མོའི་མཁའ་དབྱིངས་སུ་རབ་ཏུ་བཀད་དེ། གྲོང་ཁྱེར་གྱི་མཚན་ལྗོངས་རྣམ་པ་གསར་པས་བརྒྱན་པ་མ་ཟད། ཚང་མའི་སེམས་ནང་གི་རྒྱལ་གཅེས་བརྩེ་བ་རབ་ཏུ་བསླངས།

ཞང་ཀང་གིས་ཚེས1ཉིན་གྱི་དགོང་མོར།  རྒྱལ་སྟོན་དུས་ཆེན་གྱི་ཚོན་སྦག་འཁྲབ་སྟོན་སྤེལ། ཚོན་སྦག་ཁྲི3ལྷག་གིས་ཝེ་ཏོ་ལི་ཡ་གྲུ་ཁའི་མཚན་མོ་ཉིན་དཀར་དུ་བཏང་བ་དང་། ཞང་ཀང་ལ་དུས་ཆེན་གྱི་སྤྲོ་བ་ཟབ་མོ་བསྣན།  ཨའོ་མོན་གྱིས་ཚོན་སྦག་འཁྲབ་སྟོན་དང་རིག་རྩལ་དགོང་ཚོགས་སོགས་ཀྱི་རྣམ་པ་བརྒྱུད་དེ། ཀྲུང་གོ་གསར་པ་དབུ་བརྙེས་ནས་ལོ77འཁོར་བར་རྟེན་འབྲེལ་ཞུས། ལས་རིགས་སོ་སོའི་མང་ཚོགས་ཀྱིས་མཉམ་དུ་རྒྱལ་བདེ་དམངས་སྐྱིད་ཡོང་བ་དང་། དར་རྒྱས་གོང་འཕེལ་འགྲོ་བའི་སྨོན་འདུན་ཞུས།