མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ10པའི་ཚེས1ཉིན། ཟི་ལིང་གི་སྲང་ལམ་གང་སར་བཀྲ་ཤིས་པའི་རྣམ་པས་ཁེངས། ཞིང་ཆེན་ཏང་ཨུའི་ཧྲུའུ་ཅི་ལུའོ་ཏུང་ཁྲོན་སྤྱི་བདེ་དང་མེ་ཟོན། འགྲིམ་འགྲུལ། རིག་གནས་ཡུལ་སྐོར་སོགས་སྡེ་ཁག་དང་ཚོང་རའི་སྒོ་རྩིས་ཚོང་ཁང་དུ་སོང་ནས། རྒྱལ་སྟོན་གུང་གསེང་གི་བདེ་འཇགས་འགན་སྲུང་དང་བརྟན་བརླིང་སྲུང་སྐྱོང་། ཞབས་ཞུ་ལེགས་པོ། དམངས་འཚོར་ཕན་པ་བཅས་ཀྱི་བྱ་བར་ཞིབ་བཤེར་བྱས་ཤིང་། ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་ཚབ་བྱས་ནས་ཞིང་ཆེན་ཡོངས་ཀྱི་རིགས་སོ་སོའི་མང་ཚོགས་ལ་དུས་ཆེན་གྱི་རྟེན་འབྲེལ་ཞུས་པ་དང་། ཞིང་ཆེན་ཡོངས་ཀྱི་འཐབ་ཕྱོགས་སོ་སོ་དང་ལས་གནས་ཁག་བརྟན་སྲུང་བྱེད་མཁན་གྱི་བློ་མཐུན་རྣམས་ལ་ལྷག་བསམ་ཟོལ་མེད་ཀྱི་འཚམས་འདྲི་ཞུས། ཁོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཆུ་ཚད་སྔར་ལས་མཐོ་བའི་དུས་བདེའི་ཀྲུང་གོ་འཛུགས་སྐྲུན་བྱ་རྒྱུའི་སྐོར་གྱི་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱེད་པ་དང་། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཐབས་ཇུས་བཀོད་སྒྲིག་དོན་འཁྱོལ་ནན་མོ་བྱས་ཏེ། སྤྱི་ཚོགས་སྔར་ལས་བརྟན་བརླིང་དང་བཅོས་སྐྱོང་སྔར་ལས་ལས་ཕྱོད་ཆེ་བ། རིག་གནས་ཡུལ་སྐོར་སྔར་ལས་སྤུས་ལེགས་དང་མང་ཚོགས་སྔར་ལས་བློ་ཡིད་ཚིམ་པའི་ཐད་རྒྱུན་མཐུད་སྒོས་ཤུགས་སྣོན་པ་དང་། དུས་ཆེན་དང་གུང་གསེང་གི་བྱ་བ་སྣ་ཚོགས་ཏན་ཏིག་ངང་ཡག་པོར་བསྒྲུབས་ནས། མི་དམངས་མང་ཚོགས་ཀྱིས་བདེ་འཇགས་འཆམ་མཐུན་དང་བཀྲ་ཤིས་དགའ་སྤྲོའི་གུང་གསེང་རོལ་ཐུབ་པར་ཁག་ཐེག་བྱེད་དགོས་ཞེས་ནན་གྱིས་བསྟན།
ལུའོ་ཏུང་ཁྲོན་གྱིས་ཞིང་ཆེན་སྤྱི་བདེ་ཐིང་དུ་བདེ་སྲུང་བརྟན་བརླིང་སྲུང་སྐྱོང་དང་སྤྱི་ཚོགས་ཁྱོན་ཡོངས་ཀྱི་སྐོར་སྲུང་དོ་དམ་ཚོད་འཛིན། འཕྲལ་བསྟུན་གྲ་སྒྲིག་སོགས་ཀྱི་གནས་ཚུལ་སྙན་ཞུ་ལ་ཉན་པ་དང་། བརྙན་ལམ་བཀོད་གཏོང་གི་ལས་ཡུལ་དང་པོའི་གནས་ཚུལ་ལ་བལྟས། ཁོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཧྥུའུ་ཅན་ཞིང་ཆེན་གྱི“ཀྲང་ཀྲོའུ་ཡི110”གི་རུ་མི་ཡོངས་ལ་སྤྲིངས་པའི་འཕྲིན་ལན་གལ་ཆེན་གྱི་དགོངས་དོན་ལག་བསྟར་དོན་འཁྱོལ་ནན་མོ་བྱས་ཏེ། སྤྱི་པའི་བདེ་འཇགས་ལྟ་སྐུལ་དོ་དམ་ལ་ཤུགས་སྣོན་པ་དང་། གཙོ་གནད་ཁུལ་དང་མི་སྣ་འདུ་འཛོམས་ཆེ་སར་སྐོར་སྲུང་བྱེད་ཤུགས་ཆེ་རུ་བཏང་ནས། འགལ་བ་དང་རྩོད་གཞི་གྲལ་བཤེར་བྱས་ཏེ་སེལ་བ་དང་། ཚད་གཞི་མཐོ་ཤོས་ཀྱི་སྒོ་ནས་ཚོད་འཛིན་ནུས་པ་ཆེ་རུ་གཏོང་བ་དང་བདེ་འཇགས་ཀྱི་ཚད་གཞི་མཐོ་རུ་གཏོང་དགོས་ཞེས་ནན་གྱིས་བསྟན།
ཞིང་ཆེན་མེ་ཟོན་རོགས་སྐྱོབ་སྤྱི་ཁྱབ་རུ་ཁག་བཀོད་འདོམས་ལྟེ་གནས་སུ། ལུའོ་ཏུང་ཁྲོན་གྱིས་བརྙན་ལམ་སྦྲེལ་མཐུད་བྱས་ནས་མེ་ཟོན་གྱི་ལས་འཛིན་ས་ཚིགས་སུ་མེ་ཟོན་བདེ་འཇགས་ཀྱི་གནས་བབ་དང་མེ་སྐྱོན་སྔོན་འགོག་ཚོད་འཛིན་སོགས་ཀྱི་གནས་ཚུལ་ལ་རྒྱུས་ལོན་བྱས། ཁོས་དུས་དང་རྣམ་པ་ཀུན་ཏུ་དམག་འཐབ་ལ་སྒུག་པ་དང་དུས་དང་རྣམ་པ་ཀུན་ཏུ་དམག་འཐབ་བྱེད་ཐུབ་པའི་རྣམ་པ་རྒྱུན་འཁྱོངས་བྱས་ཏེ། མཐོ་རིམ་ཨར་སྐྲུན་དང་གནས་ཆུང་བ་དགུའི“ཚེ་སྲོག་བགྲོད་ལམ”སོགས་གཙོ་གནད་ཁུལ་ལ་དམ་པོར་དམིགས་ནས། མེ་སྐྱོན་གྱི་མི་མངོན་པའི་རྐྱེན་ངན་བཅོས་སྒྲིག་ཏན་ཏིག་བྱས་ཏེ་འཕྲལ་བསྟུན་དང་ལེན་དང་། བཀོད་འདོམས་བཀོད་གཏོང་། མཉམ་འབྲེལ་མཁོ་སྒྲུབ་བཅས་མཉམ་འགུལ་བྱེད་ཤུགས་ཆེ་རུ་བཏང་ནས། ཕྱོགས་ཡོངས་ནས་མེ་ཟོན་བདེ་འཇགས་འགོག་སྲུང་དྲ་བ་ཚགས་སུ་ཆུད་པ་བཟོ་དགོས་ཞེས་ནན་གྱིས་བསྟན།
ཞིང་ཆེན་འགྲིམ་འགྲུལ་སྐྱེལ་འདྲེན་ཐིང་ལམ་དྲ་ལྟེ་གནས་སུ་ཡོང་ནས། ལུའོ་ཏུང་ཁྲོན་གྱིས་གཞུང་ལམ་ཤར་གཏོང་འགན་ལེན་དང་ལས་རེས་ཀྱི་གནས་ཚུལ་ལ་ཞིབ་བཤེར་བྱས། ཁོས་བསྟན་དོན། གུང་གསེང་སྐབས་སུ་ཕྱིར་སྐྱོད་པའི་ཁྱད་ཆོས་ལ་དམིགས་ནས་སྡེ་ཁག་གི་མཉམ་གྲོས་ཞིབ་འཇུག་བརྡར་གཅོད་བྱེད་ཤུགས་ཆེ་རུ་གཏོང་བ་དང་། ཆ་འཕྲིན་ཅན་དང་གཞི་གྲངས་ཅན། རིག་ནུས་ཅན་བཅས་ཀྱི་བྱ་ཐབས་ཡག་པོ་སྤྱོད་པ། “འགྲུལ་འཁོར་གཉིས་དང་ཉེན་འཁོར་གཅིག”དེ་མིན་ཞིང་སྡེའི་འགྲུལ་སྐྱེལ་བདེ་འཇགས་ལ་ལྟ་སྐུལ་དོ་དམ་བྱེད་ཤུགས་ཆེ་རུ་གཏོང་བ། ཤར་བགྲོད་འགན་ལེན་དང་ཞབས་ཞུའི་འགན་སྲུང་ཡག་པོ་བྱེད་པ། འགྲིམ་འགྲུལ་དཔལ་ཡོན་གྱི་ཆུ་ཚད་ཁྱོན་ཡོངས་ནས་མཐོ་རུ་གཏོང་བ་བཅས་བྱས་ཏེ། མང་ཚོགས་བློ་བདེ་བག་ཕེབས་དང་བདེ་འཇགས། སྟབས་བདེ་བཅས་ཀྱི་སྒོ་ནས་ཕྱིར་སྐྱོད་ཐུབ་པར་ཁག་ཐེག་བྱེད་དགོས།
མཚོ་སྔོན་རིག་གནས་ཡུལ་སྐོར་གཞི་གྲངས་ཆེན་མོའི་ལས་སྟེགས་ལྟེ་གནས་སུ་ཡོང་ནས། ལུའོ་ཏུང་ཁྲོན་གྱིས་རྒྱང་བསྟེན་བརྙན་ལམ་བརྒྱུད་དེ་མཚོ་སྔོན་པོ་དང་རི་ནག་པོ། མེ་ལྷ་གངས་དཀར་སོགས་གཙོ་གནད་མཛེས་ལྗོངས་ཁུལ་འཁོར་སྐྱོད་དང་འགྲུལ་བ་ཡོང་ཚད། བདེ་འཇགས་འགན་སྲུང་སོགས་ཀྱི་གནས་ཚུལ་ལ་བལྟས། ཁོས་མཛེས་ལྗོངས་ཁུལ་གྱི་བདེ་འཇགས་དོ་དམ་ལ་ཕྱོགས་ཡོངས་ནས་ཤུགས་བསྣན་ཏེ། སྤུས་ལེགས་ཡུལ་སྐོར་ཐོན་རྫས་མཁོ་སྤྲོད་རྒྱུན་ཆད་མེད་པར་ཕུན་སུམ་ཇེ་ཚོགས་སུ་གཏོང་བ་དང་། མཛེས་ལྗོངས་ཁུལ་གྱི་ཞབས་ཞུའི་སྤུས་ཚད་རྒྱུན་མཐུད་ངང་མཐོ་རུ་བཏང་ནས། རིག་གནས་ཡུལ་སྐོར་ཁྲོམ་རའི་སྒྲིག་ལམ་སྔར་ལས་ཚད་ལྡན་དུ་བཏང་སྟེ། རྒྱ་ཆེའི་ཡུལ་སྐོར་བར“རི་ཆུའི་འབྱུང་ཁུངས། རབ་མཛེས་མཚོ་སྔོན”གྱི་ཡིད་དབང་འཕྲོག་ཤུགསསྔར་ལས་ལེགས་པའི་སྒོ་ནས་ཚོར་ཐུབ་པ་བྱེད་དགོས་ཞེས་ནན་གྱིས་བསྟན།
གུང་གསེང་སྐབས་ཀྱི་ཟི་ལིང་གྲོང་ཁྱེར་གྱི་ཚོང་ར་ཆེན་པོ་རུ། ཚོང་ཟོག་སྣ་མང་ཕུན་སུམ་ཚོགས་པ་དང་མགྲོན་པོ་མང་པོ་འཁོར་བཞིན་ཡོད། ལུའོ་ཏུང་ཁྲོན་གྱིས་དངོས་ཟོག་གི་འབྱུང་ཁུངས་མཁོ་སྤྲོད་དང་རིན་གོང་། ཟས་རིགས་བདེ་འཇགས་སོགས་ཀྱི་གནས་ཚུལ་ལ་ཐུགས་ཁུར་ཧ་ཅང་ཆེན་པོ་བྱེད་བཞིན་ཡོད། ཁོས་བཤད་རྒྱུར། གུང་གསེང་སྐབས་སུ་འཛད་སྤྱོད་དགོས་མཁོ་ཆེ་བས་ཁྲོམ་རའི་མཁོ་སྤྲོད་ལ་ལྟ་ཞིབ་ཚད་ལེན་ནན་མོ་བྱེད་པ་དང་། ཐབས་མང་མཉམ་སྤྱོད་ཀྱིས་མཁོ་སྤྲོད་བྱེད་ཚད་ཀྱི་རིན་གོང་བརྟན་པོ་འགན་ལེན་བྱས་ཏེ། ཟས་རིགས་བདེ་འཇགས་ལ་ལྟ་སྐུལ་དོ་དམ་བྱེད་ཤུགས་ཆེ་རུ་གཏོང་བ་དང་དུས་ཆེན་གྱི་བྲིན་སྐུལ་བྱེད་སྒོ་གསར་གཏོད་བྱས་ནས། ཁྱད་ལྡན་འཛད་སྤྱོད་རྣམ་པ་སྔར་ལས་མང་པོ་བཏོད་དེ་དུས་ཆེན་གྱི་དཔལ་འབྱོར་ཇེ་ལེགས་སུ་གཏོང་བ་དང་། ཞིང་ཆེན་ཡོངས་ཀྱི་རིགས་སོ་སོའི་མང་ཚོགས་ཀྱིས་དུས་ཆེན་གྱི་སྤྲོ་སྣང་མཉམ་སྤྱོད་ཐུབ་པ་བྱེད་དགོས།
ཞིང་ཆེན་གྱི་འགོ་ཁྲིད་ཝང་ཝེ་ཏུང་དང་ཀྲང་ཅིན་ཀང་། ཀྲུའུ་ཞང་ཧྥིན་སོགས་ཞིབ་བཤེར་ཁྲོད་ཞུགས།
