མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
འདི་ག་ལས་ཁུངས་ནས་སྤེལ་བའི་གནས་ཚུལ། གསར་འགོད་པར་འགྲིམ་འགྲུལ་སྐྱེལ་འདྲེན་པུའུ་ནས་ཤེས་རྟོགས་བྱུང་བར་གཞིགས་ན། ད་ལོའི་རྒྱལ་སྟོན་དུས་ཆེན་གྱི་གུང་གསེང་རིང་། སྔོན་དཔག་བྱས་ན་འགྲིམ་འགྲུལ་ཕྱིར་སྐྱོད་བྱེད་ཚད་མཐོ་པོ་ཡོད་པ་དང་། ཟླ་10ཚེས་1ཉིན་ཕྱིར་སྐྱོད་མཁན་མི་ཐེངས་དུང་ཕྱུར་3.4ཟིན་རྒྱུ་ཡིན་ཞིང་། དེ་རྒྱུན་གཏན་གྱི་མི་གྲངས་ཀྱི་ལྡབ་གཉིས་ཙམ་ཟིན་པ་དང་། རླངས་འཁོར་གླས་ནས་ཕྱིར་སྐྱོད་བྱེད་ཚད་20%ཡན་འཕར་རྒྱུ་ཡིན་པ་རེད། འགྲིམ་འགྲུལ་སྐྱེལ་འདྲེན་པུས་རིག་ནུས་ཞིབ་འཇུག་བརྡར་གཅོད་མ་ལག་སྤྱོད་འགོ་ཚུགས་ཤིང་། སྤྱི་བདེ་དང་འགྲིམ་འགྲུལ་ཉེན་རྟོག་པ་སོགས་སྡེ་ཚན་མང་པོ་དང་མཉམ་འབྲེལ་བྱས་ཏེ་རླངས་འཁོར་འགག་སྲིད་པའི་ལམ་དུམ་དུ་སྟོབས་ཤུགས་བཀོད་སྒྲིག་གིས་རླངས་འཁོར་གྱི་དོན་འཛོལ་ཆུང་རིགས་དུས་ཐོག་ཏུ་ཐག་གཅོད་བྱས་ནས། གཞུང་ལམ་ཐོག་རླངས་འཁོར་འགག་ཚད་ཉུང་དུ་གཏོང་རྒྱུ་ཡིན་པ་རེད།
ལྕགས་ལམ་སྡེ་ཚན་གྱིས་དུས་ཡུན་ཉིན་16གི་ཟླ་མཆོད་དུས་ཆེན་དང་རྒྱལ་སྟོན་དུས་ཆེན་གྱི་གུང་གསེང་རིང་གི་མཉམ་འབྲེལ་སྐྱེལ་འདྲེན་ཇུས་གཞི་སྔ་སྣུར་དུ་ལག་བསྟར་བྱས་པ་དང་། 12306གྲངས་གཞི་ཆེན་པོ་གཞིར་བཟུང་། འགྲུལ་པ་མང་བའི་ཕྱོགས་སུ་དུས་ཐོག་ཏུ་མེ་འཁོར་གྱི་ལན་གྲངས་མང་དུ་གཏོང་བཞིན་ཡོད། གུང་གསེང་སླེབས་གྲབས་ཡོད་པས། མྱུར་བགྲོད་ལྕགས་ལམ་གྱི་ལམ་ཐིག་གསར་པ་མང་པོ་ཞིག་ཤར་གཏོང་ཐུབ་ནས་ལས་གཉེར་བྱེད་འགོ་ཚུགས་ཤིང་། ཅིང་ཀང་མྱུར་བགྲོད་ལྕགས་ལམ་གྱི་ཞུང་ཧྲང་དུམ་བུ་དང་། ཞི་ཡུས་མྱུར་བགྲོད་ལྕགས་ལམ་གྱི་ཞི་ཁང་དུམ་བུས་ཟླ་9ཚེས་29ཉིན་གུང་གསེང་རིང་མེ་འཁོར་གྱི་ལན་གྲངས་མང་དུ་གཏོང་རྒྱུའི་ཆ་འཕྲིན་ཁྱབ་བསྒྲགས་བྱས་ཡོད།
གུང་གསེང་མ་སླེབས་གོང་། རྒྱལ་ནང་གི་ཁྱད་ལྡན་ཡུལ་སྐོར་གྲོང་ཁྱེར་གྱི་མཁའ་འགྲུལ་འགྲུལ་རྒྱུན་མགྱོགས་མྱུར་འཕར་བ་དང་། རྒྱལ་སྤྱིའི་གནམ་གྲུའི་སྤ་སེ་མངགས་ཉོ་བྱེད་ཚད་དུས་མཚུངས་ལས་22.5%འཕར་བ། མཁའ་འགྲུལ་ཀུང་སི་ཆེ་གྲས་ཁག་གི་སྐྱེལ་འདྲེན་ནུས་པ་འདང་ངེས་ཡིན་པ། དམངས་སྤྱོད་མཁའ་འགྲུལ་གྱི་འགྲུལ་རྒྱུན་གྱིས་སླར་ཡང་ལོ་རྒྱུས་ཀྱི་དུས་མཚུངས་ཀྱི་ཟིན་ཐོ་གསར་པ་གཏོད་རེ་ཡོད་པ་རེད།
