མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
འདི་ག་ལས་ཁུངས་ནས་སྤེལ་བའི་གནས་ཚུལ། རྒྱལ་སྟོན་དུས་ཆེན་འཆར་ཉེར་ཡོད་པས། རྒྱལ་ཡོངས་ས་གནས་ཁག་ཏུ་དགའ་སྟོན་དང་དུས་ཆེན་གྱི་རྣམ་པས་ཁེངས་ཡོད། སྐར་ལྔའི་དར་དམར་ལྷབ་ལྷུབ་ཏུ་གཡོ། ནང་སོག་ཧུའུ་ཧོ་ཧའོ་ཐེ་རུ། ཁྲོམ་གཞུང་ཆེ་ཆུང་ནས་ནགས་ཚལ་སྤྱི་གླིང་བར། གང་སར་ཀྲུང་གོའི་དམར་མདངས་ཀྱིས་བརྒྱན་ཡོད། ཀོང་ཏུང་ཀོང་ཀྲོའུ་རུ། གྲོང་ཁྱེར་གྱི་ཁྲོམ་གཞུང་དུ་འཆམ་འཆམ་བྱེད་སྐབས་གནའ་ཉམས་དོད་པའི་ཐོག་ཁང་དང་དམར་མདངས་བཀྲ་བའི་རྒྱལ་དར་ཕན་ཚུན་གཅིག་རྒྱན་གཅིག་འཕྲོག་ཏུ་གནས་ཡོད།
ཁྲུང་ཆིང་ཡུས་ཀྲུང་ཆུས་སུ། སྐར་ལྔའི་དར་དམར་2000ལྷག་ཙམ་དང་བཀོད་སྒྲིག་ཞིབ་ཚགས་བྱས་པའི་མེ་ཏོག་གི་བཀོད་པ་གཞུང་ལམ་གཙོ་བོ་དང་། ཚོང་ར་གཙོ་བོ། གཙང་སྒྲོལ་ཟམ་ཆེན་བཅས་སུ་མཐོང་རྒྱུ་ཡོད། ཨན་ཧུའེ་ཧྲེ་རྫོང་དུ། ཧུའེ་ཀྲོའུ་གནའ་གྲོང་ནང་སྐར་ལྔའི་དར་དམར་ལྷབ་ལྷུབ་ཏུ་གཡོ་བ་དང་མེ་ཏོག་སྣ་ཚོགས་ཀྱིས་མཛེས་རྒྱན་ལེགས་པར་སྤྲས་ཡོད། ཡུན་ནན་ཝུན་ཧྲན་གྱི་ཏུང་ཧྲན་སྤྱི་གླིང་དུ། གྲོང་མི་དང་ཡུལ་སྐོར་བས་རིང་ཚད་ལ་སྨི་24དང་ཞེང་ཚད་ལ་སྨི་16ཡོད་པའི་སྐར་ལྔའི་དར་དམར་ཞིག་བཀྲམ་པ་དང་། ཚང་མས་སྐད་གསང་མཐོན་པོའི་གླུ་སྒྲར་བརྟེན་ནས་སྨོན་འདུན་བཟང་པོ་མཚོན་པར་བྱས་ཡོད།
སི་ཁྲོན་ཁྲེང་ཏུའུ་དང་། ཧྲན་ཞི་ཐའེ་ཡོན། ཧུའུ་པེའི་དབྱི་ཁྲང་སོགས་སུ་སྐར་ལྔའི་དར་དམར་ལྷབ་ལྷུབ་ཏུ་གཡོ་ཞིང་། རྒྱལ་སྟོན་དུས་ཆེན་ལ་བསུ་བ་ཞུས་ཡོད།སྲང་ལམ་གང་སར་མེ་ཏོག་གི་མཛེས་རྒྱན་རབ་ཏུ་སྤྲས། ཧྥུའུ་ཅན་ཧྥུའུ་ཀྲོའུ་ཡི་སྤྱི་གླིང་ཆེ་གྲས་ཁག་གིས་རྒྱལ་སྟོན་དུས་ཆེན་གྱི་བརྗོད་དོན་གཙོ་བོའི་མེ་ཏོག་འགྲེམས་སྟོན་བྱས་པ་དང་། ཧེ་ལུང་ཅང་ཏ་ཆིང་གི་མེ་ཏོག་སྣ་ཁ་མང་པོ་གྲོང་ཁྱེར་གྱི་ཐང་ཆེན་དང་སྤྱི་གླིང་ཆེ་གྲས་ཁག་ཏུ་སྒྲིག་གཤོམ་བྱས་ཡོད།དུས་ཆེན་གྱི་ཁྲོམ་རའི་ཉོ་ཚོང་གཉིས་ཀ་བྲིན་ཁ་རྒྱུག་པོ་ཡོད། ཧོ་ནན་ཀྲུང་མོའུ་ཡི་ཞིང་ལས་ཐོན་རྫས་བསྡུ་འགྲེམས་ཁུལ་དུ། ཞོགས་པ་སྔ་པོ་ནས་འཛུལ་སྒོ་ནས་ཤིང་འབྲས་དང་སྔོ་ཚལ་སོས་པ་སྐྱེལ་འདྲེན་བྱེད་པའི་ཟོག་འདྲེན་རླངས་འཁོར་གྲལ་སྟར་རིང་པོ་བསྒྲིགས་ཡོད་པ་དང་། སེ་འབྲུ་དང་། ཚ་ལུ་མ། མི་ཧོའུ་ཐའོ་སོགས་ཀྱི་ཤིང་འབྲས་གྲ་སྒྲིག་མང་པོ་བྱས་ཡོད།
ཤིན་ཅང་ཝུའུ་ལུའུ་མུའུ་ཆི་རུ། མེ་ཏོག་ཁྲོམ་རར་ཚོང་བྲིན་ཁ་རྒྱུག་པོ་ཡོད་པ་དང་། མེ་ཏོག་སྣ་ཁ་སྟོང་ལྷག་གིས་འཛད་སྤྱོད་པའི་སྣ་མང་འདེམས་ཉོའི་དགོས་མཁོ་སྐོང་བཞིན་ཡོད། རྒྱལ་སྟོན་དུས་ཆེན་གྱི་སྔ་ནུབ་ཏུ། ཤང་ཀང་གི་ཁྲོམ་གཞུང་ཆེ་ཆུང་གང་སར་སྐར་ལྔའི་དར་དམར་དང་དམིགས་བསལ་ཁུལ་གྱི་ཁུལ་དར་བཀལ་ཡོད་པ་དང་། ཁྲོམ་གཞུང་གཙོ་བོའི་གཞུང་ལམ་གཡས་གཡོན་དུ་རྒྱལ་སྟོན་དུས་ཆེན་གྱི་དྲིལ་བསྒྲགས་རི་མོ་ཆེན་པོ་སྒྲིག་གཤོམ་བྱས་ཡོད། སྤྱི་ཚོགས་ཚོགས་པ་མང་པོས་སྲོལ་རྒྱུན་བཟོ་རྩལ་ཉམས་ལེན་སོགས་ཀྱི་རིག་གནས་བྱེད་སྒོ་སྤེལ་ནས། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ་ངོ་77འཁོར་བར་རྟེན་འབྲེལ་ཞུས་ཡོད། ཨའོ་མོན་གྱི་རྒྱལ་མཚམས་ནས་འགྲོ་འོང་བྱེད་པའི་འགག་སྒོ་དང་། ཁྲོམ་གཞུང་གཙོ་བོ། སྤྱི་གླིང་། ཐང་ཆེན་སོགས་སུ་དམར་མདངས་བཀྲ་བའི་སྐར་ལྔའི་དར་དམར་ལྷབ་ལྷུབ་ཏུ་གཡོ་བ་དེ་རྒྱལ་སྟོན་ལ་རྟེན་འབྲེལ་ཞུ་བའི་སྨོན་ཚིག་བཟང་པོ་དང་ཕན་ཚུན་གཅིག་རྒྱན་གཅིག་འཕྲོག་བྱེད་ཅིང་། བཀྲ་ཤིས་དགའ་སྟོན་ལ་རོལ་བའི་རྒྱལ་སྟོན་གྱི་རྣམ་པ་བཟང་པོ་བསྐྲུན་ཡོད།
