མཚོ་སྔོན་དུ་རྒྱལ་སྟོན་དུས་ཆེན་བསུ་བའི་བྱེད་སྒོ་གཟབ་རྒྱས་ཤིག་སྤེལ་འདུག

   ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་དབུ་བརྙེས་ནས་ལོ་ངོ་77འཁོར་བར་སྤྲོ་སེམས་འཁོལ་པོས་རྟེན་འབྲེལ་ཞུ་བ་དང་། འབྱུང་ཁམས་དཔལ་ཡོན་འཛུགས་སྐྱོང་དང་རྒྱལ་གཅེས་རིང་ལུགས་ཀྱི་སློབ་གསོ་མཉམ་འདྲེས་གཏིང་ཟབ་ཡོང་བར་སྐུལ་འདེད་གཏོང་ཆེད་དུ། ཟླ་9པའི་ཚེས་30ཉིན་གཙང་གསུམ་འབྱུང་ཡུལ་འབྱུང་ཁམས་སྲུང་སྐྱོང་ཐེབས་རྩ་ལྷན་ཚོགས་ཀྱིས་མཚོ་སྔོན་ཞིང་ཆེན་གྱི་ཐད་གཏོགས་འབྲེལ་ཡོད་ལས་ཁུངས་དང་དངུལ་རྩའི་ཁོངས་གཏོགས། སྤྱི་ཚོགས་སྤྱི་ཕན་སྒྲིག་འཛུགས་དང་འབྱུང་ཁམས་གཅེས་སེམས་མི་སྣ་བཅས་དང་མཉམ་འབྲེལ་གྱིས། མཚོ་ལྷོ་བོད་རིགས་རང་སྐྱོང་ཁུལ་ཁྲི་ཀ་རྫོང་གི་ཙོང་ཁ་ལབ་ཙེ་མཛེས་ལྗོངས་ཁུལ་དུ་རྒྱལ་སྟོན་ལ་བསུ་བ་ཞུ་བའི་འབྱུང་ཁམས་ཤེས་དཔལ་གྱི་རྒྱལ་གཅེས་རིང་ལུགས་ཀྱི་སློབ་གསོའི་བརྗོད་དོན་གཙོ་བོའི་བྱེད་སྒོ་སྤེལ་བ་དང་བྱེད་སྒོའི་ནང་ཁྱོན་ལས་རིགས་ཁག་གི་འཐུས་མི་300ལྷག་ཙམ་ཞུགས་ཡོད་པ་རེད།

 སྔ་དྲོའི་ཆུ་ཚོད་10པར་བྱེད་སྒོ་དངོས་སུ་འགོ་ཚུགས་ཤིང་། རྔམ་བརྗིད་ལྡན་པའི་<<བློས་བླངས་དམག་གི་མདུན་སྐྱོད་གླུ་དབྱངས>>དང་བསྟུན་ནས་སྐར་ལྔའི་དར་དམར་རྒྱ་མཚོའི་ངོས་ལས་མཐོ་ཚད་སྨི་སུམ་སྟོང་ལྷག་ཙམ་ཡོད་པའི་ས་མཐོར་དལ་བུར་སྒྲེང་བ་དང་རླུང་བུའི་ལྡང་ཕྱོགས་དང་བསྟུན་ནས་ལྷབ་ལྷུབ་ཏུ་གཡོ་བཞིན་ཡོད། བྱེད་སྒོའི་ནང་ཞུགས་མཁན་མི་སྣ་ཡོངས་ཀྱིས་གྲལ་སྟར་འགྲིག་པོ་བསྒྲིགས་ནས་སྐད་གསང་མཐོན་པོས་རྒྱལ་གླུ་བླངས་པ་དང་། ས་མཐོའི་བུ་ཕྲུག་ཚོས་མེས་རྒྱལ་ལ་དགའ་ཞེན་དང་རྨ་འབྲི་རྫ་གསུམ་སྲུང་སྐྱོང་བྱེད་པའི་ལྷག་བསམ་ཟོལ་མེད་ཀྱི་ཐོག་མའི་བསམ་འདུན་མཚོན་པར་བྱས་ཡོད།

 སླད་ཕྱིན། གཙང་གསུམ་འབྱུང་ཡུལ་འབྱུང་ཁམས་སྲུང་སྐྱོང་ཐེབས་རྩ་ལྷན་ཚོགས་ཀྱིས་སྤྱི་ཕན་གྱི་འགན་འཁྲི་གཙོ་བོར་རྒྱུན་མཐུད་ངང་གཞི་ཚུགས་ཏེ། རྣམ་པ་གསར་རྐྱང་དང་ནང་དོན་ཕུན་སུམ་ཚོགས་པའི་འབྱུང་ཁམས་དྲིལ་བསྒྲགས་སློབ་གསོ་དང་རྒྱལ་གཅེས་སློབ་གསོ། སྤྱི་ཕན་ལག་ལེན་བྱེད་སྒོ་བཅས་རྒྱུན་རྣམ་ཅན་དུ་སྤེལ་རྒྱུ་དང་། དུས་རབས་གསར་པའི་གཙང་གསུམ་འབྱུང་ཡུལ་གྱི་འབྱུང་ཁམས་སྲུང་སྐྱོང་གི་གཏམ་རྒྱུད་རྒྱུན་མཐུད་ངང་ཡག་པོ་བརྗོད་པ། སྤྱི་ཚོགས་ཀྱི་སྤྱི་ཕན་སྟོབས་ཤུགས་རྒྱ་ཁྱབ་ཏུ་གཅིག་བསྡུས་བཅས་ཀྱི་ཐོག་ནས། ཀྲུང་ཧྭའི་ཆུ་མཛོད་ཀྱི་འབྱུང་ཁམས་བདེ་འཇགས་སྲུང་ར་སྲུང་སྐྱོང་ཡག་པོ་བྱས་ཏེ། འབྱུང་ཁམས་སྲུང་སྐྱོང་གི་ཕན་འབྲས་ཏན་ཏིག་ལ་བརྟེན་ནས་མེས་རྒྱལ་ལ་ཕྱག་རྟགས་འབུལ་བ་དང་སྤྱི་ཚོགས་ལ་དྲིན་ལན་འཇལ་རྒྱུ་ཡིན་པ་རེད།