མི་དམངས་དཔའ་བོར་མེ་ཏོག་འབུལ་བའི་མཛད་སྒོ་པེ་ཅིང་དུ་གཉེར་བ།

སྔོན་གཤེགས་དཔའ་བོའི་དྲན་གསོའི་ཉིན་མོར་མི་དམངས་དཔའ་བོར་མེ་ཏོག་འབུལ་བའི་མཛད་སྒོ་པེ་ཅིང་དུ་གཟབ་རྒྱས་ངང་གཉེར་ཡོད།

ཞི་ཅིན་ཕིང་དང་། ལི་ཆང་། ཀྲའོ་ལེ་ཅི། ཝང་ཧུའུ་ཉིང་། ཚའེ་ཆི། ཏིང་ཞུའེ་ཞང་། ལི་ཞི། ཧན་ཀྲེང་བཅས་མཛད་སྒོར་ཞུགས་གནང་ཡོད།

སྔོན་གཤེགས་དཔའ་བོའི་མཛད་རྗེས་ལ་གུས་འདུད་ཞུ། བསྐྱར་དར་རླབས་པོ་ཆེའི་སྟོབས་ཤུགས་གཅིག་ཏུ་སྒྲིལ། སྔོན་གཤེགས་དཔའ་བོའི་དྲན་གསོའི་ཉིན་མོར་མི་དམངས་དཔའ་བོར་མེ་ཏོག་འབུལ་བའི་མཛད་སྒོ་ཚེས་30ཉིན་གྱི་སྔ་དྲོ་པེ་ཅིང་གནམ་བདེ་སྒོ་མོ་ཆེའི་ཐང་ཆེན་ཐོག་གཟབ་རྒྱས་ངང་གཉེར་ཡོད་ཅིང་། ཏང་དང་རྒྱལ་ཁབ་ཀྱི་འགོ་ཁྲིད་མི་སྣ་ཞི་ཅིན་ཕིང་དང་། ལི་ཆང་། ཀྲའོ་ལེ་ཅི། ཝང་ཧུའུ་ཉིང་། ཚའེ་ཆི། ཏིང་ཞུའེ་ཞང་། ལི་ཞི། ཧན་ཀྲེང་སོགས་ལས་རིགས་ཁག་གི་འཐུས་མི་དང་ལྷན་དུ་མཛད་སྒོར་ཞུགས་གནང་ཡོད།

རྔམ་བརྗིད་ལྡན་པའི་གནམ་བདེ་སྒོ་མོ་ཆེའི་ཐང་ཆེན་ཐོག་དམར་མདངས་བཀྲ་བའི་སྐར་ལྔའི་དར་དམར་ལྷབ་ལྷུབ་ཏུ་གཡོ་ཞིང་། མི་དམངས་དཔའ་བོའི་དྲན་གསོའི་རྡོ་རིང་འགྱིང་ངེར་གནས། ཐང་ཆེན་གྱི་དཀྱིལ་དབུས་སུ་མེས་རྒྱལ་ལ་བཀྲ་ཤིས་སྨོན་འདུན་ཞུ་ཞེས་པའི་མེ་ཏོག་སི་ར་ཆེན་པོ་ཞིག་ཡོད་པ་དེ་ལས་མེས་རྒྱལ་སྟོབས་འབྱོར་མངའ་ཐང་རྒྱས་པའི་སྨོན་འདུན་བཟང་པོ་མཚོན་པར་བྱས་ཡོད། དྲན་གསོའི་རྡོ་རིང་གི་བྱང་ངོས་སུ་མེ་ཏོག་སྟེགས་བུ་གཉིས་ཀྱི་སྟེང་དུ་ལུག་མིག་མེ་ཏོག་དཀར་པོ་སོགས་ལས་གྲུབ་པའི་མེ་ཏོག་ཕྲེང་བ་18ལས་ཀྲུང་ཧྭའི་བུ་ཕྲུག་ཡོངས་ཀྱིས་སྔོན་གཤེགས་དཔའ་བོར་བཅངས་པའི་བརྩེ་བ་ཟབ་མོ་མཚོན་པར་བྱས་ཡོད།

ཆུ་ཚོད་10ཙམ་ལ། ཞི་ཅིན་ཕིང་དང་། ལི་ཆང་། ཀྲའོ་ལེ་ཅི། ཝང་ཧུའུ་ཉིང་། ཚའེ་ཆི། ཏིང་ཞུའེ་ཞང་། ལི་ཞི། ཧན་ཀྲེང་སོགས་ཏང་དང་རྒྱལ་ཁབ་ཀྱི་འགོ་ཁྲིད་མི་སྣ་གནམ་བདེ་སྒོ་མོ་ཆེའི་ཐང་ཆེན་དུ་ཕེབས་ཏེ་མི་དམངས་དཔའ་བོར་མེ་ཏོག་འབུལ་བའི་མཛད་སྒོར་ཞུགས་གནང་ཡོད།

ཀྲུང་གོ་མི་དམངས་བཅིངས་འགྲོལ་དམག་གི་དམག་དཔུང་རོལ་ཆ་རུ་ཁག་གི་དུང་ཆུང་གཏོང་མཁན་གྱིས《སྔོན་གཤེགས་དཔའ་བོའི་དྲན་གསོའི་ཉིན་མོའི་དུང་བརྡ》བཏང་ཡོད་ཅིང་། དུང་ཆུང་གི་དབྱངས་རྟས་མི་སེམས་འགུལ་བར་བྱས། གུས་ལུགས་དམག་རང་གནས་སུ་འཁོད་ཅེས་བཀའ་བཏང་བ་དང་བསྟུན་ནས་དམག་གསུམ་གཟབ་སྦྲེང་རུ་མི་ཚོས་ཤུགས་དང་ལྡན་པའི་གོམ་སྟབས་དང་བཅས་དྲན་གསོའི་རྡོ་རིང་མདུན་དུ་བསྐྱོད་དེ་མེ་མདའ་འཁྱེར་ནས་ཀྲོང་ངེར་ལངས་ཡོད།

ཆུ་ཚོད་10ཏག་ཏག་ལ་མི་དམངས་དཔའ་བོར་མེ་ཏོག་འབུལ་བའི་མཛད་སྒོ་དངོས་སུ་འགོ་ཚུགས་ཡོད། དམག་དཔུང་རོལ་ཆ་རུ་ཁག་གིས《བློས་བླངས་དམག་གི་མདུན་སྐྱོད་གླུ་དབྱངས》དཀྲོལ་གཏོང་བྱས་པ་དང་ཚོགས་ར་ཡོངས་ནས་མགྲིན་གཅིག་ཏུ་སྐད་གསང་མཐོན་པོས་ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་གླུ་བླངས་ཡོད།

རྒྱལ་གླུ་བླངས་ཚར་རྗེས། ཚོགས་ར་ཡོངས་ཀྱི་མི་རྣམས་གུས་སྟབས་ཀྱིས་ལངས་ནས། ཀྲུང་གོ་མི་དམངས་ཀྱི་བཅིངས་འགྲོལ་བྱ་གཞག་དང་སྤྱི་མཐུན་རྒྱལ་ཁབ་འཛུགས་སྐྲུན་བྱ་གཞག་གི་ཆེད་དུ་དཔའ་ངར་ཆེན་པོས་རང་སྲོག་བློས་གཏོང་གནང་མཁན་སྔོན་གཤེགས་དཔའ་བོ་རྣམས་ལ་ངག་བསྡམས་ནས་མྱ་ངན་ཞུས་ཡོད།

ངག་བསྡམས་མྱ་ངན་ཞུས་ཚར་རྗེས། ལག་ཏུ་མེ་ཏོག་འཁྱེར་བའི་ལོ་ཆུང་བྱིས་པ་ཚོས་མི་དམངས་དཔའ་བོའི་དྲན་གསོའི་རྡོ་རིང་ལ་ཁ་ཕྱོགས་ནས《ང་ཚོ་ནི་གུང་ཁྲན་རིང་ལུགས་ཀྱི་རྒྱུན་འཛིན་པ་ཡིན》ཞེས་པ་སྐད་གསང་མཐོན་པོས་བླངས་པ་དང་འབྲེལ་ལོ་ཆུང་གདོང་ལེན་རུ་ཁག་གི་གུས་འདུད་ཞུས་ཡོད།

རུ་སྟར་གྱི་མདུན་དུ། ཀྲུང་གུང་ཀྲུང་དབྱང་དང་། རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་། རྒྱལ་སྲིད་སྤྱི་ཁྱབ་ཁང་། རྒྱལ་ཡོངས་སྲིད་གྲོས། ཀྲུང་དབྱང་དམག་ཨུད། དམངས་གཙོའི་ཏང་ཤོག་ཁག རྒྱལ་ཡོངས་བཟོ་ཚོང་མཉམ་འབྲེལ་ལྷན་ཚོགས། ཏང་ཤོག་གང་ལའང་མི་གཏོགས་པའི་རྒྱལ་གཅེས་མི་སྣ། མི་དམངས་ཚོགས་པ་ཁག ལས་རིགས་ཁག་གི་མང་ཚོགས། འཐབ་འཛིང་པ་རྒན་གྲས་དང་། བློ་མཐུན་རྒན་གྲས། སྔོན་གཤེགས་དཔའ་བོའི་གཉེན་ཉེ། ཀྲུང་གོའི་ལོ་ཆུང་གདོང་ལེན་རུ་ཁག་བཅས་ཀྱི་མིང་ཐོག་ནས་ཕུལ་བའི་མེ་ཏོག་སི་ར་ཆེ་གྲས་9གྲལ་སྟར་བསྒྲིགས་ཡོད་ཅིང་། མེ་ཏོག་སི་རའི་དར་འཛར་དམར་པོའི་ཐོག་བྲིས་པའི་མི་དམངས་དཔའ་བོ་ཡུན་དུ་གནས་གྱུར་ཅིག་ཅེས་པའི་ཡིག་འབྲུ་མངོན་གསལ་ལྷག་ཏུ་ཆེ།

དམག་དཔུང་རོལ་ཆ་རུ་ཁག་གིས་བརྩེ་བ་ཟབ་པའི《མེ་ཏོག་འབུལ་བའི་རོལ་དབྱངས》དཀྲོལ་གཏོང་བྱས་པ་དང་བསྟུན་ནས། གུས་ལུགས་དམག་མི་18ཀྱིས་མེ་ཏོག་སི་ར་བཏེགས་ནས་ག་ལེར་མི་དམངས་དཔའ་བོའི་དྲན་གསོའི་རྡོ་རིང་ཕྱོགས་སུ་བསྐྱོད་དེ་དྲན་གསོའི་རྡོ་རིང་གི་ཞབས་སྟེགས་ཐོག་མེ་ཏོག་སི་ར་གྲལ་སྒྲིག་པོར་བཞག་ཡོད།

ཞི་ཅིན་ཕིང་སོགས་ཏང་དང་རྒྱལ་ཁབ་ཀྱི་འགོ་ཁྲིད་མི་སྣ་དྲན་གསོའི་རྡོ་རིང་གི་ཞབས་སྟེགས་ཐོག་འཛེགས་གནང་བ་དང་། མེ་ཏོག་གི་སི་རའི་མདུན་དུ་ཞབས་སྤོ་མཚམས་བཞག་ནས་སྤྱན་གཟིགས་གནང་ཡོད། བཀྲག་མདངས་རབ་ཏུ་རྒྱས་པའི་མེ་ཏོག་ངང་སྡེར་དམར་པོ་དང་། དྲི་ཞིམ་ལྷག་ཏུ་འཐུལ་བའི་ལུག་མཉེ་མེ་ཏོག རྣམ་པར་རབ་ཏུ་བཞད་པའི་ཕྱེ་ལེབ་མེ་ཏོག་བཅས་ཀྱིས་མི་དམངས་དཔའ་བོར་རྗེས་དྲན་ཟབ་མོ་ཞུ་ལུགས་དང་བླ་ན་མེད་པའི་གུས་འདུད་ཞུ་ལུགས་མཚོན་པར་བྱས་ཡོད།

ཞི་ཅིན་ཕིང་མདུན་ཕྱོགས་སུ་ཕེབས་ནས་མེ་ཏོག་སི་རའི་དར་འཛར་ཞིབ་པར་སྒྲིག་གནང་བ་དང་། དེ་རྗེས་ཞི་ཅིན་ཕིང་སོགས་ཏང་དང་རྒྱལ་ཁབ་ཀྱི་འགོ་ཁྲིད་མི་སྣས་ག་ལེར་སྐོར་བ་བསྐྱོན་ནས་མི་དམངས་དཔའ་བོའི་དྲན་གསོའི་རྡོ་རིང་ལ་གུས་མཇལ་ཞུས་ཡོད།

ད་ལོ་ནི་ཀྲུང་གོ་གུང་ཁྲན་ཏང་དབུ་བརྙེས་ནས་ལོ་ངོ་105འཁོར་བའི་ལོ་དང་། ཀྲུང་གོའི་བཟོ་ཞིང་དམར་དམག་གི་རྒྱང་སྐྱོད་ལ་རྒྱལ་ཁ་ཐོབ་ནས་ལོ་90འཁོར་བའི་ལོ་རེད། དུས་རབས་གསར་པའི་རྒྱང་སྐྱོད་ལམ་བུའི་ཐོག བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་སྲ་ཞིང་བརྟན་པའི་འགོ་ཁྲིད་འོག ཏང་ཡོངས་དང་དམག་ཡོངས། རྒྱལ་ཡོངས་མི་རིགས་ཁག་གི་མི་དམངས་བཅས་ཀྱིས་རླབས་ཆེན་ཏང་འཛུགས་ཀྱི་སྙིང་སྟོབས་དང་རླབས་ཆེན་རྒྱང་སྐྱོད་ཀྱི་སྙིང་སྟོབས་རྒྱུན་འཛིན་དར་སྤེལ་གཏོང་བ་དང་། བློ་སྟོབས་རྒྱས་ཤིང་མཐུན་སྒྲིལ་རྡོག་རྩ་གཅིག་སྒྲིལ་གྱིས་ཀྲུང་གོའི་རྣམ་པའི་དེང་རབས་ཅན་ལ་བརྟེན་ནས་རྒྱལ་ཁབ་སྟོབས་ཆེན་འཛུགས་སྐྲུན་དང་མི་རིགས་བསྐྱར་དར་གྱི་བྱ་གཞག་རླབས་པོ་ཆེར་ཁྱོན་ཡོངས་ནས་སྐུལ་འདེད་གཏོང་ཆེད་འབད་འཐབ་ལྷོད་མེད་བྱེད་དགོས།

ལོ་ཆུང་བྱིས་པ་དང་ལས་རིགས་ཁག་གི་འཐུས་མིས་ཀྱང་གཅིག་རྗེས་གཉིས་མཐུད་ངང་དྲན་གསོའི་རྡོ་རིང་གི་མདུན་དུ་བསྐྱོད་དེ་མེ་ཏོག་ཕུལ་བ་དང་དྲན་གསོའི་རྡོ་རིང་ལ་གུས་མཇལ་ཞུས་ཡོད།

མེ་ཏོག་འབུལ་བའི་མཛད་སྒོ་དེ་ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན། པེ་ཅིང་གྲོང་ཨུད་ཀྱི་ཧྲུའུ་ཅི་དབྱིན་ལི་ཡིས་གཙོ་སྐྱོང་གནང་ཡོད།

པེ་ཅིང་དུ་བཞུགས་པའི་ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་དང་། ཀྲུང་དབྱང་ཧྲུའུ་ཅི་ཁྲུའི་ཧྲུའུ་ཅི། ཀྲུང་དབྱང་དམག་ཨུད་ཀྱི་ཀྲུའུ་ཞི་གཞོན་པ། རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་གཞོན་པ་ཁག་ཅིག རྒྱལ་དོན་ཨུ་ཡོན། ཆེས་མཐོའི་མི་དམངས་ཁྲིམས་ཁང་གི་འགོ་འཛིན། ཆེས་མཐོའི་མི་དམངས་ཞིབ་དཔྱོད་ཁང་གི་ཞིབ་དཔྱོད་དཔོན། རྒྱལ་ཡོངས་སྲིད་གྲོས་ཀྱི་ཀྲུའུ་ཞི་གཞོན་པ་ཁག་ཅིག་བཅས་མཛད་སྒོར་ཞུགས་གནང་ཡོད།

ཀྲུང་དབྱང་ཏང་སྲིད་དམག་དམངས་ཀྱི་འབྲེལ་ཡོད་ཚན་པ་དང་པེ་ཅིང་གྲོང་ཁྱེར་གྱི་འགན་འཁུར་བློ་མཐུན་གཙོ་བོ། དམངས་གཙོ་ཏང་ཤོག་ཁག་གི་ཀྲུང་དབྱང་། རྒྱལ་ཡོངས་བཟོ་ཚོང་མཉམ་འབྲེལ་ལྷན་ཚོགས་ཀྱི་འགན་འཁུར་བ། ཏང་ཤོག་གང་ལའང་མི་གཏོགས་པའི་མི་སྣའི་འཐུས་མི། པེ་ཅིང་དུ་བཞུགས་པའི་འཐབ་འཛིང་པ་རྒན་གྲས་དང་བློ་མཐུན་རྒན་གྲས། སྔོན་གཤེགས་དཔའ་བོའི་གཉེན་ཉེའི་འཐུས་མི། པེ་ཅིང་དུ་བཞུགས་པའི་བྱས་རྗེས་གཟི་བརྗིད་མཚན་སྙན་གྱི་གཟེངས་རྟགས་ཐོབ་མྱོང་བའི་འཐུས་མི། རྒྱལ་ཡོངས་གྲངས་ཉུང་མི་རིགས་ཀྱི་གཟིགས་སྐོར་ཚོགས་པའི་ཁོངས་མི། རྒྱལ་སའི་ལས་རིགས་ཁག་གི་མང་ཚོགས་ཀྱི་འཐུས་མི་སོགས་མཛད་སྒོར་ཞུགས་གནང་ཡོད།