གསར་བརྗེ་བརྗོད་གཞི་ཡིན་པའི་རི་མོའི་འགྲེམ་སྟོན་བྱེད་སྒོ་དེ་མཚོ་སྔོན་མཛེས་རྩལ་ཁང་དུ་སྤེལ།

 

ཟླ9པའི་ཚེས29ཉིན།   ཀྲུང་གོ་གུང་ཁྲན་ཏང་དབུ་བརྙེས་ནས་ལོ105འཁོར་བ་དང་དམར་དམག་རྒྱང་སྐྱོད་ལ་རྒྱལ་ཁ་ཐོབ་ནས་ལོ90འཁོར་བར་རྟེན་འབྲེལ་ཞུ་བའི་མཚོ་སྔོན་ཞིང་ཆེན་གྱི་རི་མོའི་བརྩམས་ཆོས་འགྲེམ་སྟོན་བྱེད་སྒོ་མཚོ་སྔོན་ཞིང་ཆེན་མཛེས་རྩལ་ཁང་དུ་སྤེལ་འགོ་བརྩམས།

ཏང་དབུ་བརྙེས་ནས་ལོ105འཁོར་བའི་གཟི་བརྗིད་དང་དམར་དམག་རྒྱང་སྐྱོད་ལ་རྒྱལ་ཁ་ཐོབ་ནས་ལོ90འཁོར་བར་དྲན་གསོ་ཞུ་རྒྱུ་དེ་ལོ་ལྔའི་འཆར་འགོད་བཅོ་ལྔ་པ་འགོ་རྩོམ་པའི་དུས་རབས་གྱི་གོམས་འགྲོས་དང་འགྲོགས་ནས་མཐོ་སྒང་གི་ས་གཞི་ཆེན་པོར་དུས་མཉམ་དུ་སྤེལ་བཞིན་ཡོད། ཐེངས་འདིའི་འགྲེམ་སྟོན་སྟེང་ཞིང་ཆེན་ཡོངས་ཀྱི་མཛེས་རྩལ་བྱ་བ་སྒྲུབ་མཁན་གྱི་སྤུས་ལེགས་བརྩམས་ཆོས་མང་པོ་གཅིག་བསྡུས་བྱས་ཡོད་དེ།   ཀྲུང་གོའི་རི་མོ་དང་སྣུམ་ཚོན་རི་མོ།  འཇིམ་བརྐོས་སོགས་རིགས་མང་པོ་འདུས་ཡོད། འགྲེམ་སྟོན་ནང་ཞུགས་པའི་བརྩམས་ཆོས་རྣམས་ལ་གསར་བརྗེའི་གཞི་རྒྱུ་དང་མཐོ་སྒང་གི་ཁྱད་ཆོས་ལྡན་ཞིང་།  ཏང་གི་ལོ་བརྒྱ་ལྷག་གི་འབད་འཐབ་བརྒྱུད་རིམ་དང་རྒྱང་སྐྱོད་ལམ་བུའི་སྟེང་གི་གཟི་བརྗིད་ལྡན་པའི་ལོ་ཟླ་མཚོན་པར་བྱས་ཡོད་པར་མ་ཟད།  མཚོ་སྔོན་གྱི་རིགས་སོ་སོའི་མང་ཚོགས་ཀྱིས་མཐུན་སྒྲིལ་འབད་འཐབ་བྱེད་པའི་དུས་རབས་ཀྱི་སྣང་བརྙན་མངོན་པར་བྱས་ཡོད།  གསར་བརྗེའི་རིག་གནས་དང་མཐོ་སྒང་གི་ཁྱད་ཆོས་སིམ་འདྲེས་ཡོང་བར་བྱས་ནས་སྐྱེ་ཁམས་ཀྱི་མཛེས་པ་དང་འཕེལ་རྒྱས་ཀྱི་མཛེས་པ། མཐུན་སྒྲིལ་གྱི་མཛེས་པ། འབད་འཐབ་ཀྱི་མཛེས་པ་བཅས་ཚང་མ་རི་མོའི་བརྩམས་ཆོས་ཁྲོད་མངོན་པར་བྱས་ཡོད།

ཐེངས་འདིའི་འགྲེམ་སྟོན་ནི་མང་ཚོགས་ཀྱིས་གསར་བརྗེའི་ལོ་རྒྱུས་ལ་ཕྱིར་དྲན་དང་མཐོ་སྒང་གི་མཛེས་སྡུག་ལ་རོལ་མྱོང་བྱེད་སའི་སྟེགས་བུ་གལ་ཆེན་ཞིག་ཡིན་པ་དང་།   མཛེས་རྩལ་བྱ་བ་སྒྲུབ་མཁན་རྣམས་ཀྱིས་ཕན་ཚུན་བར་གསར་རྩོམ་ཐད་ནས་བསམ་བློ་བརྗེ་རེས་དང་ལག་རྩལ་ཐད་གྲོས་མོལ་བྱེད་པའི་གོ་སྐབས་གལ་ཆེན་ཞིག་རེད།  ཞིང་ཆེན་ཡོངས་ཀྱི་མཛེས་རྩལ་བྱ་བ་སྒྲུབ་མཁན་རྣམས་ཀྱིས་རི་མོའི་འབྲི་རྩལ་ལ་བརྟེན་ཏེ་གསོན་ཉམས་ལྡན་པའི་སྒོ་ནས་ཏང་གི་གཏམ་རྒྱུད་དང་རྒྱང་སྐྱོད་གཏམ་རྒྱུད།  མཚོ་སྔོན་གྱི་གཏམ་རྒྱུད་བཅས་ལེགས་པོར་མཚོན་པར་བྱས་ཡོད་པ་དང་།   སྐྱེ་ཁམས་སྲུང་སྐྱོབ་དང་མི་རིགས་མཐུན་སྒྲིལ། ལྗང་མདོག་འཕེལ་རྒྱས།   གྲོང་གསེབ་དར་སྤེལ་སོགས་བྱ་བ་གཙོ་བོར་དམིགས་ཏེ་སྒྱུ་རྩལ་གྱི་སྟོབས་ཤུགས་ལ་བརྟེན་ནས་འཕེལ་རྒྱས་ཀྱི་དྲང་ཕྱོགས་བྱེད་ནུས་གཅིག་བསྡུས་བྱས།   ཚང་མས་རྒྱུན་ཆད་མེད་པར་མཐོ་སྒང་ལ་རྐང་འཛུགས་པ་དང་སྤུས་ལེགས་བརྩམས་ཆོས་སྔར་ལས་མང་པོ་གསར་རྩོམ་བྱས་ནས་ཀྲུང་གོའི་ལུགས་ཀྱི་དེང་རབས་ཅན་གྱི་མཚོ་སྔོན་འཛུགས་སྐྲུན་ཐད་རིག་གནས་ཀྱི་སྟོབས་ཤུགས་འབུལ་རྒྱུ་རེད།

འགྲེམ་སྟོན་དེ་ཟླ10པའི་ཟླ་དཀྱིལ་བར་སྤེལ་རྒྱུ་རེད།