ཞིང་ཆེན་ཡོངས་ཀྱི་བདེ་འཇགས་ཐོན་སྐྱེད་བྱ་བའི་བརྙན་ལམ་ཚོགས་འདུ་འཚོགས་པ་དང་། ལུའོ་ཏུང་ཁྲོན་ཚོགས་འདུར་ཞུགས་པར་མ་ཟད་གཏམ་བཤད།

 

ཟླ9ཚེས28ཉིན། རྒྱལ་ཡོངས་བདེ་འཇགས་ཐོན་སྐྱེད་ཀྱི་བརྙན་ལམ་ཚོགས་འདུ་མཇུག་སྒྲིལ་རྗེས། མཚོ་སྔོན་ཞིང་ཆེན་གྱིས་འཕྲལ་མར་ཞིང་ཆེན་ཡོངས་ཀྱི་བདེ་འཇགས་ཐོན་སྐྱེད་ཀྱི་བརྙན་ལམ་ཚོགས་འདུ་འཚོགས་པ་དང་། ཞིང་ཆེན་ཏང་ཨུའི་ཧྲུའུ་ཅི། ཧྲིན་ཀྲང་། ཞིང་ཆེན་བདེ་འཇགས་ཨུ་ཡོན་ལྷན་ཁང་གི་ཀྲུའུ་རེན་ལུའོ་ཏུང་ཁྲོན་ཚོགས་འདུར་ཞུགས་པར་མ་ཟད་གཏམ་བཤད་གནང་སྟེ། སྤྱི་ཁྱབ་ཧྲུའུ་ཅི་ཞི་ཅིན་ཕིན་གྱི་བདེ་འཇགས་ཐོན་སྐྱེད་སྐོར་གྱི་མཛུབ་སྟོན་དང་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་ལ་སློབ་སྦྱོང་དང་ལག་བསྟར་གཏིང་ཟབ་བྱེད་པ་དང་། ཙུང་ལི་ལི་ཆང་གི་གསུང་བཤད་ཀྱི་བླང་བྱ་དང་རྒྱལ་ཡོངས་བདེ་འཇགས་ཐོན་སྐྱེད་བརྙན་ལམ་ཚོགས་འདུའི་བཀོད་སྒྲིག་ནན་ཏན་སྒོས་དོན་འཁྱོལ་བྱེད་པ། མི་དམངས་བླ་ན་མེད་པ་དང་ཚེ་སྲོག་བླ་ན་མེད་པ་རྒྱུན་འཁྱོངས་བྱས་ཏེ། གཟབ་ནན་གྱི་ཚད་གཞི་དང་། ཞིབ་ཕྲའི་བྱེད་ཐབས། ཡང་དག་པའི་སྤྱོད་ལམ་བཅས་སྤྱད་དེ་བདེ་འཇགས་ཐོན་སྐྱེད་ཀྱི་དམར་ཐིག་བརྟན་སྲུང་དང་། བདེ་འཇགས་ཀྱི་ཉེན་ཁ་སྣ་ཚོགས་སྔོན་འགོག་དང་སེལ་ཐབས་བྱེད་པ། བློ་བརྟན་འགྱུར་མེད་ངང་ལས་འཛོལ་ཚབས་ཆེན་འབྱུང་བ་གཏན་འགོག་མཐའ་གཅིག་ཏུ་བྱས་ཏེ་བདེ་འཇགས་བརྟན་ལྷིང་གི་འཕེལ་རྒྱས་ཁོར་ཡུག་ཏན་ཏིག་གིས་བསྐྲུན་དགོས།

ཚོགས་འདུའི་སྟེང་ད་ལོའི་ཚུན་ལ་ཞིང་ཆེན་ཡོངས་ཀྱི་བདེ་འཇགས་ཐོན་སྐྱེད་བྱ་བའི་གནས་ཚུལ་གྱི་བརྡ་ཁྱབ་བསྒྲགས་ཤིང་། ཞིང་ཆེན་འགྲིམ་འགྲུལ་སྐྱེལ་འདྲེན་ཐིང་དང་ཞིང་ཆེན་རིག་གནས་དང་ཡུལ་སྐོར་ཐིང་། ཟི་ལིང་གྲོང་ཁྱེར། མཚོ་ཤར་གྲོང་ཁྱེར་བཅས་ཀྱིས་གཏམ་བཤད་སྤེལ།

ལུའོ་ཏུང་ཁྲོན་གྱིས་ད་ལོའི་ཚུན་ལ་ཞིང་ཆེན་ཡོངས་ཀྱི་བདེ་འཇགས་ཐོན་སྐྱེད་ཀྱི་གནས་བབ་སྤྱིའི་ཆ་ནས་བརྟན་བརྟན་བརླིང་ཡིན་ལ། རྒྱལ་སྟོན་གུང་གསེང་ཐོན་ལ་ཉེ་བས་ངེས་པར་དུ་བདེ་འཇགས་ཐོན་སྐྱེད་ཀྱི་ཛ་དྲག་དང་རྙོག་འཛིང་གི་གནས་བབ་ལ་ངོས་འཛིན་གཏིང་ཟབ་བྱས་ཏེ། “དུས་དང་རྣམ་པ་ཀུན་ཏུ་ལྷོད་གཡེང་མི་བྱེད་པའི”འགན་འཁྲིའི་འདུ་ཤེས་དེ“བྱ་བ་ཡོད་ཚད་ལ་སེམས་སུ་གདེང་ཚོད་ཡོད་པའི”བྱ་སྤྱོད་ཀྱི་ནུས་ཤུགས་སུ་བསྒྱུར་དགོས། བདེ་འཇགས་ཐོན་སྐྱེད་ཀྱི་འགན་འཁྲི་ནན་དཀྲི་བྱས་ཏེ། རང་ས་གནས་ཀྱི་ལས་རིགས་བདེ་འཇགས་ཀྱི་ཉེན་ཁར་ཡང་བསྐྱར་དབྱེ་ཞིབ་དང་། ཡང་བསྐྱར་ཞིབ་འཇུག་བརྡར་གཅོད་བྱས་ཏེ། བསམ་བློའི་ངོས་འཛིན་གནད་ལ་འཁེལ་བ་དང་། ཉེན་ཁར་ཞིབ་འཇུག་བརྡར་གཅོད་གནད་ལ་འཁེལ་བ། འགན་འཁྲི་དང་བྱེད་ཐབས་དོན་ཐོག་ཏུ་འཁྱོལ་བ་བཅས་བྱས་ཏེ། ཆུ་ཚད་མཐོ་བའི་བདེ་འཇགས་ཀྱིས་སྤུས་ཚད་མཐོ་བའི་འཕེལ་རྒྱས་ལ་འགན་སྲུང་བྱེད་དགོས་པ་ནན་གྱིས་བསྟན།

ལུའོ་ཏུང་ཁྲོན་གྱིས་བློ་བརྟན་འགྱུར་མེད་སྒོས་བདེ་འཇགས་ཐོན་སྐྱེད་ཀྱི་ཆབ་སྲིད་འགན་འཁྲི་འཁུར་དགོས་ལ། བསམ་བློ་དང་བྱ་སྤྱོད་དེ་བདེ་འཇགས་ཐོན་སྐྱེད་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིན་གྱི་མཛུབ་སྟོན་དང་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་སྟེང་གཅིག་གྱུར་བྱས་ཏེ། ཀྲུང་དབྱང་བདེ་འཇགས་ཐོན་སྐྱེད་དཔྱད་ཞིབ་སྐོར་ཞིབ་ཚོ་ཆུང་གིས་ལྡོག་འདྲེན་གྱི་གནད་དོན་དག་ཐེར་ཡོ་བསྲང་བྱེད་པའི་གོ་སྐབས་དང་བསྟུན་ནས། བདེ་འཇགས་ཐོན་སྐྱེད་ཀྱི་རྩ་བཅོས་འགག་སྒྲོལ་ལོ་གསུམ་འགུལ་སྐྱོད་དང“བྱ་སྤྱོད་ཆེན་མོ་དགུ”ཡི་མཇུག་བསྡུ་བར་སྐུལ་འདེད་གཏིང་ཟབ་གཏོང་བ། ཟུར་བསྟན་ལེབ་མཐོང་། རྩ་ལག་མཉམ་བཅོས། ཁྱོན་ཡོངས་ནས་བདེ་འཇགས་འགོག་སྲུང་དྲ་བ་བཟོ་བ། བདེ་འཇགས་འཕེལ་རྒྱས་ཀྱི་རྨང་གཞི་སྲ་བརྟན་དུ་གཏོང་བ། ཨར་ལས་འཛུགས་སྐྲུན། གཏེར་རི། ཉེན་ཁ་ཅན་དུ་འགྱུར་བ། བཟོ་ཚོང་སོགས་གཙོ་གནད་ལས་རིགས་ལ་དམིགས་ཏེ།“ཁྲིམས་འགལ་རྡུང་རྡེག་དང་སྒྲིག་འགལ་གཙང་བཅོས”ཀྱི་ཆེད་དོན་བྱ་སྤྱོད་རྒྱུན་མཐུད་ངང་གཏིང་ཟབ་ཏུ་སྤེལ་བ་དང་། ཁྲིམས་འགལ་སྒྲིག་འགལ་གྱིས་འགན་གཙང་གཞན་སྤྲོད་དང་ཁག་བགོས་ནས་གཙང་སྤྲོད་བྱེད་པའི་བྱ་སྤྱོད་ལ་རྡུང་རྡེག་ཚ་ནན་གཏོང་བ། གཟབ་ནན་གྱིས་དོ་དམ་དང་ཆད་པ་ནན་མོ་བཅད་པའི་ཟིལ་གནོན་དྲག་པོ་ཆགས་པར་བྱས་ཏེ་ཉེན་ཁ་དང་མི་མངོན་པའི་རྐྱེན་ངན་མ་བྱུང་གོང་ནས་མེད་པར་བཟོ་དགོས། དམངས་འཚོའི་ཁྱབ་ཁོངས་ཀྱི་གཙོ་གནད་ལྷུ་ཚིགས་ལ་དམ་པོར་དམིགས་པ་དང་། “ཚད་བརྒལ་གསུམ་དང་ངལ་དུབ་གཅིག”སོགས་འགྲིམ་འགྲུལ་ཁྲིམས་འགལ་བྱ་སྤྱོད་ལ་ཞིབ་བཤེར་ནན་མོ་བྱས་ནས་མཛེས་ལྗོངས་ཁུལ་དང་སྤྲོ་གསེང་རོལ་རྩེད་སྒྲིག་བཀོད་ཀྱི་བདེ་འཇགས་དོ་དམ་ཚོད་འཛིན་ལ་ཤུགས་སྣོན་བྱེད་དགོས། “གནས་ཡུལ་ཆུང་བ་དགུ”སོགས་མི་མང་འདུས་སའི་མེ་སྐྱོན་གྱི་མངོན་མེད་རྐྱེན་ངན་གྲལ་བཤེར་དང་བཅོས་སྒྲིག་གཏིང་ཟབ་བྱས་ཏེ། གྲོང་ཁྱེར་གྱི་བདེ་འཇགས་འཁོར་སྐྱོད་འགན་ལེན་ལ་ཤུགས་བསྣན་ནས་ས་གཤིས་གནོད་འཚེ་ལ་དོགས་ཟོན་བྱེད་པ་དང་། སྟོན་བསྡུའི་བདེ་འཇགས་ལ་སྤྱི་འདོམས་དམ་འཛིན་བྱེད་དགོས། འགན་འཁྲིའི་སྦྲེལ་ཐག་ནན་དཀྲི་དང་དམ་འཛིན་བྱས་ཏེ། ཏང་སྲིད་ཀྱི་འགན་འཁུར་བ་གཙོ་བོ་ངེས་པར་དུ་དངོས་སུ་ཟབ་ཞུགས་བྱེད་དགོས་པ་དང་། ཏང་སྲིད་འགན་མཉམ་དང་གནས་གཅིག་འགན་གཉིས་མཐའ་འཁྱོངས་བྱེད་པ། “དོ་དམ་གསུམ་དང་ངེས་པར་གསུམ”གྱི་བླང་བྱ་ནན་ཏན་སྒོས་དོན་འཁྱོལ་བྱས་ཏེ། རྒྱུན་མཐུད་ངང་འཕྲལ་སྡོམ་ནུས་པ་མཐོར་འདེགས་དང་། ལས་རེས་ལས་སྲུང་ལ་ཤུགས་སྣོན། དྲིལ་བསྒྲགས་སློབ་གསོ་ལ་ཤུགས་སྣོན་བཅས་བྱེད་དགོས། ད་ལྟ་ད་དུང་དཔལ་འབྱོར་འཁོར་སྐྱོད་དང་དམངས་འཚོ་འགན་ལེན་སོགས་སྤྱི་ཚོགས་བརྟན་ལྷིང་ལས་དོན་ལ་སྤྱི་འདོམས་དམ་འཛིན་བྱས་ཏེ། ཏང་གི་སྐབས་ཉི་ཤུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་ལྔ་པ་རྒྱལ་ཁའི་ངང་འཚོགས་པ་དང་ཞིང་ཆེན་ཡོངས་ཀྱི་རིགས་སོ་སོའི་མང་ཚོགས་ཀྱིས་རྒྱལ་སྟོན་དུས་ཆེན་དགའ་སྤྲོའི་ངང་རོལ་བར་བརྟན་ལྷིང་དང་འཆམ་མཐུན་གྱི་ཁོར་ཡུག་ཅིག་བསྐྲུན་དགོས་ཞེས་ནན་གྱིས་བསྟན།

ཞིང་ཆེན་ནས་ཚོགས་ར་གཙོ་བོ་བཙུགས་པ་དང་། གྲོང་ཁྱེར་དང་ཁུལ། རྫོང་། ཆུས་བཅས་ནས་སོ་སོར་ཡན་ལག་ཚོགས་ར་བཀོད་སྒྲིག་བྱས། ཞིང་ཆེན་གྱི་འགོ་ཁྲིད་ཀྲང་ཅིན་ཀང་གིས་གྲོས་ཚོགས་ལ་འགོ་འཛིན་བྱས་པ་དང་། ལིའུ་ཐའོ་དང་། དབྱང་ཀྲི་ཝུན། ལི་ཧུང་ཡ། ཝང་ཧའེ་ཧུང་། ཁྲེང་ཅི་ཝུའེ་བཅས་ཚོགས་འདུར་ཞུགས།