མཚོ་སྔོན་ཞིང་ཆེན་མི་དམངས་སྲིད་གཞུང་དྲ་བ།
ཟླ9པའི་ཚེས28ཉིན། ཞིང་ཆེན་ཏང་ཨུའི་ཧྲུའུ་ཅི་ལུའོ་ཏུང་ཁྲོན་གྱིས་ཞིང་ཆེན་དམངས་ཆེན་དང་ཞིང་ཆེན་སྲིད་གྲོས་ཀྱི་ལས་ཁུངས། དམངས་གཙོ་ཏང་ཁག་སོ་སོའི་ཞིང་ཆེན་ཨུ་ཡོན་ལྷན་ཁང་དང་ཞིང་ཆེན་བཟོ་ཚོང་མཉམ་འབྲེལ་ལྷན་ཚོགས་བཅས་སུ་འཚམས་འདྲི་རྟོག་ཞིབ་བྱས་ཏེ། ལས་བྱེད་དང་ལས་བཟོ་བར་འཚམས་འདྲི་བྱས་པར་མ་ཟད། གནས་ཚུལ་མཚམས་སྦྱོར་ལ་ཉན་ཞིང་བསམ་ཚུལ་དང་གྲོས་གཞི་བསྡུ་ལེན་བྱས། ཁོས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་དགོངས་པ་མཛུབ་སྟོན་དུ་འཛིན་པ་རྒྱུན་འཁྱོངས་དང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཚོ་སྔོན་བྱ་བའི་ཐད་ཀྱི་བླང་བྱ་གལ་ཆེན་ལག་བསྟར་དང་དངོས་འབེབས་གཏིང་ཟབ་བྱས་ཏེ། དཀྱིལ་སྙིང་ལ་དམིགས་པ་དང་འགན་འཁྲི་མཐའ་འཁྱོལ་སྒྲུབ་པ། ཁག་ཁུར་བྱེད་ཕྱོགས་མངོན་པ་བཅས་ཀྱིས་མཐུན་སྒྲིལ་འབད་འཐབ་ཀྱི་སྟོབས་ཤུགས་ཆེན་པོ་གཅིག་ཏུ་བསྡུས་ནས། ཀྲུང་གོའི་ལུགས་ཀྱི་དེང་རབས་ཅན་གྱི་མཚོ་སྔོན་གྱི་ལེའུ་རྩོམ་ཆེད་བྱས་རྗེས་གསར་བ་འཇོག་དགོས།
ཞིང་ཆེན་དམངས་ཆེན་ལས་ཁུངས་སུ། ལུའོ་ཏུང་ཁྲོན་སྔ་གཞུག་ཏུ་ཞིང་ཆེན་དམངས་ཆེན་སྔོན་རྩིས་དྲ་འབྲེལ་ལྟ་སྐུལ་ལྟེ་གནས་དང་། ཞིང་ཆེན་དམངས་ཆེན་ཁྲིམས་ལུགས་ཨུ་ཡོན་ལྷན་ཁང་དུ་སོང་ནས་དཔལ་འབྱོར་ལྟ་སྐུལ་དང་། དམངས་ཆེན་ཁྲིམས་འཛུགས་སོགས་ཀྱི་བྱ་བ་སྤེལ་བའི་གནས་ཚུལ་ལ་རྒྱུས་ལོན་ཞིབ་མོ་བྱས་ཤིང་། ལས་བྱེད་དང་ལས་བཟོ་བར་བརྩེ་བའི་ཁ་བརྡ་བྱས་ལ། ཁོ་ཚོས་རྒྱལ་ཡོངས་ཀྱི་མཐོ་ཚད་དང་མཚོ་སྔོན་ལ་རྐང་བཙུགས་ཏེ། ཁྲིམས་ལྟར་འགན་འཁྲི་མཐའ་འཁྱོལ་སྒྲུབ་པ་དང་ནོར་སྲིད་ལྟ་སྐུལ་མུ་མཐུད་ཤུགས་དྲག་ཏུ་བཏང་ནས་ཁྲིམས་འཛུགས་ཀྱི་སྤུས་ཚད་རྒྱུན་ཆད་མེད་པར་ཇེ་མཐོར་གཏོང་དགོས་པ་ནན་གྱིས་བསྟན། ལུའོ་ཏུང་ཁྲོན་གྱིས་ཉེ་བའི་ལོ་འདི་འགའི་ཞིང་ཆེན་དམངས་ཆེན་དང་དེའི་རྒྱུན་ལས་ཨུ་ཡོན་ལྷན་ཁང་གི་གྲུབ་འབྲས་ལ་ཁས་ལེན་གང་ལེགས་བྱས་ཤིང་། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མི་དམངས་འཐུས་མིའི་ཚོགས་ཆེན་ལམ་ལུགས་རྒྱུན་འཁྱོངས་དང་ལེགས་བཅོས་གཏོང་བའི་སྐོར་གྱི་དགོངས་པ་གལ་ཆེན་སློབ་སྦྱོང་དང་ལག་བསྟར་གཏིང་ཟབ་བྱེད་པ། ཏང་གི་འགོ་ཁྲིད་དང་མི་དམངས་ཀྱིས་རང་ཁྱིམ་རང་བདག་བྱེད་པ། ཁྲིམས་ལྟར་རྒྱལ་ཁབ་སྐྱོང་བ་བཅས་གཅིག་གྱུར་ནུས་ལྡན་ཡོང་བ་ཐོག་མཐའ་བར་གསུམ་དུ་རྒྱུན་འཁྱོངས་བྱས་ཏེ། ཁྲིམས་སྐྱོང་བསམ་བློ་དང་ཁྲིམས་སྐྱོང་བྱེད་ཐབས་སྔར་ལས་བཀོལ་མཁས་དང་། ཁྲིམས་ལྟར་ཁྲིམས་འཛུགས་དང་ལྟ་སྐུལ། ཐག་གཅོད། བསྐོ་འཐེན་སོགས་བྱེད་པའི་འགན་དབང་ཡག་པོར་སྤྱོད་པ། བརྒྱུད་རིམ་ཧྲིལ་བོའི་མི་དམངས་དམངས་གཙོ་ལག་བསྟར་ཟབ་མོ་བྱེད་པ། ཁྲིམས་ལྟར་ཞིང་ཆེན་སྐྱོང་བའི་ལས་དོན་དང་ཁྲིམས་སྐྱོང་མཚོ་སྔོན་འཛུགས་སྐྲུན་ལ་ཤུགས་ཆེན་པོས་སྐུལ་འདེད་བཏང་ནས། ཞིང་ཆེན་ཡོངས་ཀྱི་དཔལ་འབྱོར་སྤྱི་ཚོགས་འཕེལ་རྒྱས་ཁྲོད་སྔར་ལས་མང་བའི་སྟོབས་ཤུགས་འབུལ་བ་དང་སྔར་ལས་ཆེ་བའི་བྱེད་ཕྱོགས་མངོན་དགོས་པ་བསྟན།
ཞིང་ཆེན་སྲིད་གྲོས་ལས་ཁུངས་སུ། ལུའོ་ཏུང་ཁྲོན་གྱིས་འགོ་ཁྲིད་ཚན་ཁག་དང་བརྗེ་རེས་ཟབ་མོ་བྱས་ལ། གྱོད་གཞི་སྒྲུབ་པ་དང་གྲོས་མོལ་སྲིད་གླེང་། དམངས་གཙོ་ལྟ་སྐུལ་སོགས་ཀྱི་བྱ་བའི་གནས་ཚུལ་རྒྱུས་ལོན་བྱས་ཤིང་། ཉེ་བའི་ལོ་འགའི་རིང་ཞིང་ཆེན་སྲིད་གྲོས་ཀྱིས་སྐྱེ་ཁམས་སྲུང་སྐྱོབ་དང་། ཁྱད་ལྡན་ཐོན་ལས་འཕེལ་རྒྱས། མི་རིགས་མཐུན་སྒྲིལ་དང་དམངས་ཚིས་ལེགས་བཅོས་སོགས་ཁྱབ་ཁོངས་སུ་རྟོག་ཞིབ་གྲོས་མོལ་དང་དམངས་གཙོ་ལྟ་སྐུལ་ཀྱི་བྱ་བ་སྤེལ་བར་ཁས་ལེན་གང་ལེགས་བྱས། ཁོས་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མི་དམངས་སྲིད་གྲོས་བྱ་བར་ཤུགས་སྣོན་དང་ལེགས་བཅོས་གཏོང་བའི་སྐོར་གྱི་དགོངས་པ་གལ་ཆེན་སློབ་སྦྱོང་དང་ལག་བསྟར་གཏིང་ཟབ་བྱེད་པ། ཏང་གི་འགོ་ཁྲིད་དང་འཐབ་ཕྱོགས་གཅིག་གྱུར། གྲོས་མོལ་དམངས་གཙོ་བཅས་ཟུང་འབྲེལ་ནུས་ལྡན་ཡོང་བ་རྒྱུན་འཁྱོངས་བྱས་ཏེ། སྲིད་གྲོས་ཀྱི་ཆེད་དོན་གྲོས་མོལ་ལས་ཁུངས་ཀྱི་བྱེད་ནུས་འདོན་སྤེལ་གང་ལེགས་བྱེད་པ། སྐྱེ་ཁམས་དཔལ་ཡོན་གྱི་མཐོ་ས་དང་། ཐོན་ལས་ཀྱི་གནས་བཞི་འཛུགས་སྐྲུན་སོགས་ཀྱི་ལས་འགན་གལ་ཆེན་ལ་དམིགས་ཏེ། བརྟག་དཔྱད་ཞིབ་འཇུག་དང་། ཐུན་མོང་འདུ་ཤེས་རྒྱ་ཆེར་གཅིག་སྡུད། བཀག་མེད་རྒྱུ་ལམ་བེད་སྤྱོད་ཡག་པོ། བློ་གྲོས་མང་དུ་འབུལ་བ་དང་དངོས་གཉེར་གྱི་འཐབ་ཇུས་མང་དུ་འདོན་པ་བཅས་བྱེད་དགོས་ཤིང་། སྤུས་ཚད་མཐོ་བའི་དམངས་གཙོའི་ལྟ་སྐུལ་ལ་བརྟེན་ནས་སྐྱེ་ཁམས་སྲུང་སྐྱོབ་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་དགོས།
ལུའོ་ཏུང་ཁྲོན་ཞིང་ཆེན་སྲིད་གྲོས་རིག་གནས་ལོ་རྒྱུས་ཁང་གི་དཀའ་སྡུག་མཉམ་མྱོང་དང་དཀའ་སྡུག་མཉམ་འཁུར་འགྲེམ་ཁང་དུ་སོང་སྟེ། དམངས་གཙོ་ཏང་ཁག་སོ་སོའི་ཞིང་ཆེན་ཨུ་ཡོན་ལྷན་ཁང་དང་ཞིང་ཆེན་བཟོ་ཚོང་མཉམ་འབྲེལ་ལྷན་ཚོགས་ཀྱི་འཕེལ་རྒྱས་བརྒྱུད་རིམ་ལ་རྒྱུས་ལོན་དང་། ཁོ་ཚོས་མཚོ་སྔོན་གྱི་དཔལ་འབྱོར་སྤྱི་ཚོགས་འཕེལ་རྒྱས་ཐད་རོགས་ཤུགས་བཏོན་པའི་གནས་ཚུལ་མཚམས་སྦྱོར་བྱས་པར་ཉན། ཁོས་ནན་གྱིས་བསྟན་དོན། ཏང་གི་ཕྱོགས་ཡོངས་ཀྱི་འགོ་ཁྲིད་རྒྱུན་འཁྱོངས་དང་དེར་ཤུགས་སྣོན་པ། ཏང་མང་མཉམ་ལས་ཀྱི་སྲོལ་རྒྱུན་བཟང་བོ་རྒྱུན་འཛིན་བྱེད་པ། འཇོན་མི་མང་དུ་འཕེལ་ཞིང་རིག་སྟོབས་གཅིག་ཏུ་འདུ་བ། འབྲེལ་གཏུག་ཁྱབ་ཆེ་བ་སོགས་ཀྱི་དགེ་མཚན་དངོས་སུ་འདོན་སྤེལ་བྱས་ཏེ། ཕྱོགས་སོ་སོའི་སྟོབས་ཤུགས་སྐུལ་སློང་ཧུར་ཐག་བྱས་ནས་དེང་རབས་ཅན་གྱི་མཚོ་སྔོན་གསར་བ་འཛུགས་སྐྲུན་བྱེད་པར་འབད་དགོས།
ལུའོ་ཏུང་ཁྲོན་གྱིས་ནན་གྱིས་བསྟན་དོན། ཞིང་ཆེན་དམངས་ཆེན་དང་། ཞིང་ཆེན་སྲིད་གྲོས། དམངས་གཙོ་ཏང་ཁག་སོ་སོའི་ཞིང་ཆེན་ཨུ་ཡོན་ལྷན་ཁང་དང་ཞིང་ཆེན་བཟོ་ཚོང་མཉམ་འབྲེལ་ལྷན་ཚོགས་བཅས་ཀྱིས་ཞིང་ཆེན་ཡོངས་ཀྱི་བསམ་བཀོད་གཅིག་གི་དགོངས་པ་མཐའ་འཁྱོལ་དུ་འཛུགས་པ་དང་། སྲིད་འབྲས་ལྟ་བ་ཡང་དག་འཛུགས་པ་དང་ལག་ཏུ་བསྟར་བ། ཡིད་ཆེས་ཇེ་བརྟན་དང་དཀའ་སྡུག་མཉམ་འཁུར། ཁག་ཁུར་ཕོད་པ། དངོས་འབེབས་ནན་འཛིན་བཅས་བྱས་ཏེ། གོམ་གང་མདུན་སྤོས་སྒོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་ལ་འཆར་འགོད་གནང་བའི་རླབས་ཆེན་དཔེ་རིས་མཛེས་སྡུག་གི་དོན་དངོས་སུ་བསྒྱུར་དགོས། ཞིང་ཆེན་ཏང་ཨུས་སྔར་བཞིན་ཞིང་ཆེན་དམངས་ཆེན་དང་ཞིང་ཆེན་སྲིད་གྲོས། དམངས་གཙོ་ཏང་ཁག་སོ་སོའི་ཞིང་ཆེན་ཨུ་ཡོན་ལྷན་ཁང་དང་ཞིང་ཆེན་བཟོ་ཚོང་མཉམ་འབྲེལ་ལྷན་ཚོགས་བཅས་ཀྱིས་སྒྲིག་ཁྲིམས་སྒྲིག་ཡིག་ལྟར་འགན་ནུས་ལག་བསྟར་བྱེད་པར་རྒྱབ་སྐྱོར་བྱེད་ཅིང་། སྔར་ལས་ལྷག་པའི་ལས་དོན་སྤེལ་བ་དང་བྱེད་ནུས་འདོན་སྤེལ་བྱེད་པར་ཆ་རྐྱེན་གང་ལེགས་བསྐྲུན་རྒྱུ་ཡིན།
ཞིང་ཆེན་གྱི་འགོ་ཁྲིད་མགོན་པོ་བཀྲ་ཤིས་དང་། དབྱང་ཧྥེན་ཁྲུན། པད་གོ། ཀྲུའུ་ཞང་ཧྥེན་བཅས་རྟོག་ཞིབ་ཁྲོད་ཞུགས།
